Ne a Mea e Tauloto ne Nisi Tino Mai i te Onoono Atu ki a Koe?

1. Ne a mea ne tauloto ne soko o Iesu mai i te onoono atu ki a ia?

¹ Ne fai mai a Iesu: “Ke amo ne koutou taku amoga, kae fakaakoako mai ki a au.” (Mata. 11:29) E manino ‵lei, me ne akoako ne ia a nisi tino mai te tukuatuga ki a latou o se fakaakoakoga ‵lei, kae e se ko ana pati fua. Mafaufau la ki mea ne tauloto ne soko mai i te onoono atu ki a Iesu. A ia e filemu, e atafai kae alofa. (Mata. 8:1-3; Male. 6:30-34) Ne loto maulalo tonu a ia. (Ioane 13:2-5) I te taimi ne olo fakatasi ei latou mo Iesu i te galuega talai, ne lavea ne ana soko me i a ia se tino galue malosi telā ne magoi i te akoako atu o te munatonu ki tino. (Luka 8:1; 21:37, 38) E mafai pefea o pokotia a nisi tino i te onoono mai ki a tatou i te galuega talai?

2. E tuku atu pefea ne tatou se ata ‵lei ki tino i fale e auala i ‵tou teuga mo amioga ‵lei i te galuega talai?

² Tino i te Fale: A ‵tou gatu, amioga ‵lei, mo te mata fiafia ki tino e mafai o lasi ‵ki tena pokotiaga ki tino i te fale. (2 Koli. 6:3; Fili. 1:27) Ka iloa ne latou me e fakaaoga faeloa ne tatou a te Tusi Tapu. E fiafia eiloa a nisi tino me e fakalogologo faka‵lei tatou māfai ko fai‵pati mai latou. Ke sa manatu mā‵ma tatou me i te tukuatuga o fakaakoakoga ‵lei i koga kolā e talai tatou i ei, e mafai o ‵futi mai i ei a loto o tino ki te fekau e uiga ki te Malo.

3. Ne a mea ‵lei e mafai o tauloto ne ‵tou taina mai i a tatou?

³ ‵Tou Taina: Mafaufau foki la ki feitu ‵lei kolā e mafai o pokotia i ei ‵tou taina ona ko tatou. A te ‵tou loto finafinau i te faiga o te galuega talai e mafai o ‵pisi atu ki nisi tino. E pelā me se fiti telā e fakamata ne ia te suā fiti, a te fakatoka faka‵lei o ‵tou fakamatalaga e mafai o fakamalosi atu ki nisi tino ke momea aka a te lotou atamai i te faiga o te galuega talai. (Faata. 27:17) A te ‵tou fakamaoni i te tusiga o fakamatalaga ‵tonu e uiga ki tino fia‵fia mo te ‵toe ‵foki fakavave atu, e fakamalosi atu foki ki nisi tino ke fai penā. Ka mafai o ‵lei ‵ki te fakaakoakoga e tuku atu ne tatou ki ‵tou taina mo tuagane māfai e fakataunu faka‵lei ne tatou a te faiga o te galuega talai.​—2 Timo. 4:5.

4. Kaia e ‵tau ei o iloilo aka faeloa ne tatou a ‵tou fakaakoakoga?

⁴ Kaia e se iloilo aka faeloa i ei ne koe au pati mo au mea e fai e penā foki mo te auala e pokotia ei a nisi tino i tau fakaakoakoga? Ka fiafia eiloa a Ieova ki ‵tou fakaakoakoga ‵lei kae fai foki i ei ke fai tatou e pelā mo te apositolo ko Paulo, i ana pati konei: “Fakaakoako mai ki a au, e pelā mo au e fakaakoako ki a Keliso.”​—1 Koli. 11:1.