Fakamasani Au Tama‵liki ke Fai Pelā me ne Tino Talai

1. Se a te mea e fakamalosi mai i te Salamo 148:​12, 13 ke fai ne mātua Kelisiano?

¹ E ‵kami ne Ieova a talavou ke ‵viki atu ki a ia. (Sala. 148:​12, 13) Tela la, e uke atu a mea e fai ne mātua Kelisiano i lō te akoako atu o tama‵liki ki muna‵tonu i te Tusi Tapu mo tulafono a te Atua i mea tau amioga. E fakamasani foki ne latou a tama‵liki ke fai pelā me ne tino talai o te tala ‵lei. E mafai pefea o fai a te mea tenei?

2. E pokotia pefea a tama‵liki i se fakaakoakoga ‵lei a te mātua?

² Fakaakoakoga ‵Lei: Ne fai atu a te famasino ko Kitiona ki ana tagata e toko 300, penei: “Fakaakoako ki te mea e fai ne au.” (Fama. 7:​17) Se mea masani ke ‵kilo kae fakaakoako atu a tama‵liki ki olotou mātua. E isi se tamana e tokotasi e galue i te po, kae i lo te fanatu o moe, e puke ne ia ana tama‵liki ki te galuega talai faitalia tena fi‵ta māfai ko foki mai a ia ki te fale i te taeao o te Aso Ono. E aunoa mo se pati, e akoako ne ia latou me e ‵tau o fakamuamua te galuega talai. (Mata. 6:​33) E mata, e lavea ne au tama‵liki a ‵tou fiafia ke aofia i vaega kese‵kese o te tapuakiga, e pelā mo te ‵talo, faitau ki te Tusi Tapu, fai au tali, kae talai? E tonu, ka se fai koe mo fai se fakaakoakoga ‵lei katoatoa. Kae ka ma‵nako malosi au tama‵liki o ‵saga atu ki au taumafaiga ke akoako latou ke tapuaki ki a Ieova māfai e lavea ne latou a tou fiafia i te tavini atu ki a ia.​​—Teu. 6:​6, 7; Loma 2:​21, 22.

3. Ne a fakamoemoega kolā e ‵tau o fesoasoani atu a mātua ke fakatoka kae kausaki ki ei olotou tama‵liki?

³ Fakamoemoega Kolā e Fai ei ke Gasolo Atu ki Mua: E se ‵fiu eiloa a mātua i te fakamasani atu olotou tama‵liki ke sa‵sale, ke fai‵pati, ke fai faka‵lei olotou gatu, mo nisi mea aka foki. Kafai ko ga‵solo aka o ma‵tua a tama‵liki, ka kausaki atu foki latou ki fakamoemoega ‵fou. Kafai a mātua ne Kelisiano, e fesoasoani atu foki latou ki olotou tama‵liki ke fakatoka kae kausaki atu ki fakamoemoega faka-te-agaga e ‵tusa mo olotou tausaga mo mea e mafai ne latou o fai. (1 Koli. 9:​26) E mata, e akoako ne koe au tama‵liki ke fai olotou tali i olotou pati totino kae ke fakatoka olotou lauga i Te Akoga mō Tino Talai? (Sala. 35:18) E mata, e fakamasani ne koe latou ke aofia i vaega kese‵kese o te galuega talai? E mata, e fakatoka ne koe i mua o latou a te fakamoemoega ko te papatisoga mo te taviniga tumau? E mata, e fesoasoani atu koe ki a latou ke fai taugasoa mo tino talai fia‵fia kae loto finafinau kolā ka fakamalosi atu ki a latou?​​—Faata. 13:20.

4. E maua pefea ne tama‵liki a mea aoga mai mātua kolā e kamata o fakamasani latou i te galuega talai i te fo‵likiga?

⁴ Ne fai mai te faisalamo: “Te Atua, ko oti ne akoako ne koe au ka koi tama‵liki, ke oko mai ki aso nei koi fakaasi atu eiloa ne au galuega fakaofoofogia.” (Sala. 71:17) Ke na kamata o fakamasani au tama‵liki ka koi fo‵liki ke fai pelā me ne tino talai. A te fakavae faka-te-agaga telā e fesoasoani atu koe ke ati aka ne latou e mautinoa eiloa me ka aoga ki a latou i te taimi e ma‵tua ei latou!​​—Faata. 22:6.