Fesoasoani Atu ki Tau Tamaliki ke Tupu Aka i te Fiafia

1, 2. Ne a mea faiga‵ta mo mea fakafia‵fia e mafai o maua i te olaga fakatalavou?

E ‵KESE ‵ki eiloa māfai e isi se talavou i te kāiga i lō se tamaliki telā ko lima io me ko sefulu ana tausaga. E maua atu eiloa a mea faiga‵ta mo fakalavelave i te olaga fakatalavou, kae e mafai foki o aumai i ei te fiafia mo fakamanuiaga. E pelā mo Iosefa, Tavita, Iosia, mo Timoteo, e fakaasi mai i ei me e mafai foki ne talavou o gasue‵sue i se auala ‵lei kae maua foki ne latou se fesokotakiga ‵lei mo Ieova. (Kenese 37:2-11; 1 Samuelu 16:11-13; 2 Tupu 22:3-7; Galuega 16:1, 2) Ko oti foki ne fakamaoni mai ne talavou e tokouke i aso nei te ‵tonu o te manatu tenā. Kāti e iloa eiloa ne koe a nisi o latou.

² Kae e uke eiloa a fakalavelave i olaga o nisi talavou. E maua ne latou a lagonaga ‵lei mo lagonaga ma‵sei. Kāti e ma‵nako a nisi talavou ke lasi atu te lotou saolotoga, kae e mafai foki o se fia‵fia latou ki fakataputapuga kolā e tuku atu ne olotou mātua. Kae ko vaegā talavou penā e seki lasi te lotou iloa kae manakogina malosi i ei se fesoasoani alofa mo te kufaki mai i olotou mātua. E tonu, e mafai o fakafiafia te olaga fakatalavou, kae e mafai foki o faka‵numi​—ki mātua fakatasi mo talavou. E mafai pefea o fesoasoani atu ki talavou i tausaga o te olaga fakatalavou?

3. I se auala fea e tuku atu ei ne mātua se avanoaga ‵lei i te olaga ki olotou tama‵liki talavou?

³ E tuku atu ne mātua kolā e tau‵tali ki pati fakatonutonu i te Tusi Tapu a te ‵toe avanoaga ‵lei ke mafai ne olotou talavou o ga‵solo ki mua mo te manuia i loto i tofotofoga konā ke oko eiloa ki te taimi ko ma‵tua ‵lei ei latou. I fenua katoa e pelā foki mo vaitaimi katoa, ne manuia eiloa a mātua mo talavou kolā ne taumafai o fakaaogā ne latou a fakatakitakiga fakavae i te Tusi Tapu.​—Salamo 119:1.

TE FAKAMAONI I TE FAIGA O FESOKOTAKIGA

4. Kaia e tāua ‵ki ei ke sau‵tala fakatasi a mātua mo olotou tama‵liki i a latou eiloa i te taimi koi talavou ei?

⁴ E fai mai te Tusi Tapu: “E se mafai o manuia au fuafuaga māfai e se faipati ‵tonu.” (Faataoto 15:22, NW) Kafai ne manakogina ke faipati ‵tonu atu ki tama‵liki i te taimi koi fo‵liki ei, e se sili atu la te tāua i te taimi ko talavou ei​—me ko mu‵tana fua olotou taimi i te fale kae uke atu mo taugasoa i te akoga io me ko nisi taugasoa aka foki. Kafai e seai ne manatu e fai ‵funa​—e seai ne fesokotakiga e fai mo te fakamaoni i te vā o tama‵liki mo mātua—e mafai o fai ei a talavou e pelā me ne tino fakaa‵tea i te fale. Tela la, e mafai pefea o fakatumau te faiga o fesokotakiga?

5. E fakamalosi atu pefea ki talavou ke fakatāua ne latou te faiga o fesokotakiga mo olotou mātua?

⁵ E ‵tau eiloa o fai a tusaga o talavou mo mātua i te feitu tenei. E tonu, e mafai o faigata ki talavou ke fai‵pati atu ki olotou mātua i lō te taimi koi fo‵liki ei latou. E tiga eiloa te feitu tenā, masaua me e “pakū te malo manafai e seai se takitaki” kae ko “te tokouke o tino fai manatu fakatonutonu ko te ‵lei tenā o te malo.” (Faataoto 11:14) E fakasino atu eiloa a pati konei ki tino katoa, talavou mo tino ma‵tua. A talavou kolā e matea ne latou te manatu tenei ka malamalama me koi ‵tau eiloa o maua ne latou se takitakiga ‵lei, ona ko te mea ko fe‵paki latou mo mataupu faiga‵ta i lō aso mua. E ‵tau o matea ne latou te manatu me i olotou mātua tali‵tonu e āpo ke fai pelā me ne tino fakatonutonu me e uke atu olotou mea e iloa i te olaga kae ko oti foki ne fakamaoni mai te lotou a‵lofa atafai i tausaga e uke. Tela la, i te tulaga tenei o olotou olaga ka se fulitua atu a talavou ‵poto ki olotou mātua.

6. Se a te kilokiloga ka maua ne mātua ‵poto kae a‵lofa māfai ko sau‵tala mo olotou tama‵liki talavou?

⁶ E fakauiga eiloa a fesokotakiga ‵lei ki te mātua telā e taumafai faeloa ke avanoa a ia māfai ko fia sau‵tala atu te talavou. Kafai koe se mātua, taumafai ke avanoa faeloa koe. E mafai o se faigofie te mea tenei. E fai mai te Tusi Tapu me e isi se “taimi o te nofo ‵mu mo te taimi o te faipati.” (Failauga 3:7) Kafai ko fia faipati tau tama, kāti ko te taimi eiloa tenā ke fakalogologo faka‵lei ei koe. Kāti ko oti ne fakaiku aka ne koe te taimi tenā mō fai au sukesukega totino, ke malōlō, io me ke fai a galuega i te fale. Kae kafai ko manako tau tama o faipati atu ki a koe, taumafai o taofi aka au mea e fai kae fakalogologo ki ei. Kafai e se fai penā, e iku loa o se toe taumafai a ia i te suā taimi. Masaua te fakaakoakoga a Iesu. I te taimi e tasi, ne fakatoka ne ia se taimi ke malōlō malie aka. Kae i te taimi ne mumu atu ei se vaitino ki ana tafa, ne taofi aka tena malōlōga kae kamata o akoako atu ki a latou. (Maleko 6:30-34) E iloa ne talavou e tokouke me e fakalave‵lave malosi olotou mātua, kae e ma‵nako latou ki se fakamaoniga me e avanoa faeloa olotou mātua māfai e ma‵nako latou ki se mea. Tela la, taumafai ke avanoa faeloa koe kae ke maua foki te loto malamalama.

7. Se a te mea e ‵tau o ‵kalo keatea a mātua mai i ei?

⁷ Taumafai ke masaua ne koe tou olaga fakatalavou, kae ke mo a ma puli ou uiga faifa‵kata! E ‵tau o fia‵fia a mātua ke ‵nofo fakatasi mo olotou tama‵liki. Kafai e isi ne taimi e avanoa, e fakaaogā pefea ne mātua a taimi konā? Kafai e fakaaogā faeloa ne latou a taimi avanoa ki te faiga o mea kolā e se aofia i ei te kāiga kātoa, ka lavea fakavave ne talavou te mea tenā. Kafai ko fakaiku aka ne talavou me e ‵saga malosi atu olotou taugasoa i te akoga ki a latou i lō olotou mātua, ka fe‵paki eiloa latou mo fakalavelave.

MEA E ‵TAU O SAU‵TALA KI EI

8. E mafai pefea o faka‵mafa atu ki tama‵liki te tāua o te fakamaoni, te galue malosi, mo amioga ‵lei?

⁸ Kafai e seki fakamalosi aka ne mātua i olotou tama‵liki te tāua o te fakamaoni mo te galue malosi, e ‵tau eiloa o taumafai latou ke fai penā i te taimi ko talavou ei a tama‵liki. (1 Tesalonia 4:11; 2 Tesalonia 3:10) E tāua foki ke fakamautinoa aka ne latou me e tali‵tonu katoatoa olotou tama‵liki ki te tāua o te ola i se olaga ‵mā i mea tau amioga. (Faataoto 20:11) E fesokotaki atu a mātua i feitu konei e auala i te faiga o fakaakoakoga ‵lei. E pelā eiloa mo avaga sē tali‵tonu kolā e mafai o ‘tosina mai ona ko amioga ‵lei a olotou avaga,’ e penā foki te tauloto ne talavou a akoakoga fakavae ‵tonu e auala i amioga a olotou mātua. (1 Petelu 3:1) Kae e se lava fua i te tukuatuga o fakaakoakoga ‵lei, me e tuku faka‵sau atu foki a tama‵liki ki fakaakoakoga ma‵sei e uke mo takolekolega se ‵lei i tua o te kāiga. Tela la, e ‵tau eiloa o iloa ne mātua a‵lofa te kilokiloga a olotou tama‵liki e uiga ki mea e lavea kae lagona ne latou, kae e manakogina i ei a sau‵talaga aogā.​—Faataoto 20:5.

9, 10. Kaia e ‵tau ei o fakamautinoa aka ne mātua ke akoako atu olotou tama‵liki e uiga ki faifaiga fakatauavaga, kae e mafai pefea o fai ne latou te mea tenei?

⁹ E aogā fakapito eiloa te mea tenei e uiga ki faifaiga fakatauavaga. Mātua, e a, e ‵mā koulua ma sau‵tala mo aulua tama‵liki e uiga ki faifaiga fakatauavaga? Kafai foki loa e mā koe, taumafai eiloa ke fai te mea tenā, i te mea ma iloa ne aulua tama‵liki a mea e uiga ki te mataupu tenā mai i se isi tino. Kafai ne seki tauloto ne latou mai i a koe, ne a la fakamatalaga ‵se kolā ka maua ne latou? I te Tusi Tapu, e se ‵kalo keatea a Ieova mai mataupu e uiga ki faifaiga fakatauavaga, kae e se ‵tau foki o fai penā a mātua.​—Faataoto 4:1-4; 5:1-21.

¹⁰ E fakafetai tatou me e maua i te Tusi Tapu a fakatakitakiga māea e uiga ki faifaiga fakatauavaga, kae ko oti ne ‵lomi mai ne te Sosaiete o te Faleleoleo Maluga a fakamatalaga fesoasoani e uke kolā e fakaasi mai i ei me koi aogā eiloa a fakatakitakiga konei i te lalolagi i aso nei. Kaia e se na fakaaogā ei ne koe te fesoasoani tenei? E pelā mo te sau‵tala fakatasi mo au tama‵liki e uiga ki te vaega ko te “Sex and Morals” i te tusi ko te Questions Young People Ask​—Answers That Work. E mafai o fiafia koe i ikuga ‵gali e maua mai i ei.

11. Se a te ‵toe auala magoi mō mātua ke fakaaogā i te akoakoatuga o olotou tama‵liki ke tavini atu ei ki a Ieova?

¹¹ Se a te ‵toe mataupu tāua telā e ‵tau o sau‵tala ki ei a mātua mo tama‵liki? Ne fakasino atu eiloa ki ei te apositolo ko Paulo i te taimi ne tusi mai ei a ia: “Ke puti ake [otou tama‵liki] i te olaga ‵lei mo akoakoga faka-Kelisiano.” (Efeso 6:4) E ‵tau eiloa o tumau a tama‵liki i te tauloto e uiga ki a Ieova. Kae maise eiloa te tāua ke iloa ne latou o a‵lofa kae ke fia tavini atu foki ki a ia. E mafai foki o uke atu a mea e akoako atu e auala i te faiga o fakaakoakoga ‵lei i te feitu tenei. Kafai e lavea atu ne tama‵liki me e a‵lofa olotou mātua ki te Atua ‘mo olotou loto kātoa mo olotou ola kātoa mo olotou mafaufau kātoa’ kae e ‵fua mai i olotou mātua a fuataga ‵lei, ka fakamalosi atu ei ki a latou ke fai foki penā. (Mataio 22:37) E penā foki loa, kafai e lavea atu ne talavou me e maua ne olotou mātua se kilokiloga paleni ki mea faka-te-foitino, mai te fakamuamua ne latou te Malo o te Atua, ka fesoasoani atu ei ke fakamalosi aka se kilokiloga penā i a latou.​—Failauga 7:12; Mataio 6:31-33.

12, 13. Ne a manatu e ‵tau o masaua māfai e ma‵nako tatou ke iku manuia te faiga o te akoga faka-te-kāiga?

¹² A te faiga o se akoga faka-te-Tusi Tapu a te kāiga i vaiaso katoa se fesoasoani lasi ‵ki ke maua ne talavou se kilokiloga tāua ki mea faka-te-agaga. (Salamo 119:33, 34; Faataoto 4:20-23) E tāua ‵ki eiloa a te tumau i te faiga o se vaegā akoga penā. (Salamo 1:1-3) E ‵tau o iloa ne mātua mo lā tama‵liki me e ‵tau eiloa o fakamuamua te faiga o te akoga a te kāiga i lō nisi mea. E se gata i ei, e ‵tau eiloa o maua se kilokiloga tonu ko te mea ke magoi te faiga o te akoga. Ne fai mai se tamana: “A te auala tāua ko te fakamalosi aka ne te tino e takitaki ne ia te akoga se tulaga fakafiafia kae fakaaloalo i te taimi e fai ei te akoga a te kāiga​—ke se tō faka‵malu kae ke mo a foki e sōnafai. E se faigofie faeloa ke maua se faifaiga paleni tonu, kae kāti ka ma‵nako faeloa a tama‵liki ke fakatonutonu aka olotou kilokiloga. Kafai e se fanofano ‵lei a mea katoa i te taimi muamua mo te lua o taimi, sa ‵fiu kae taumafai i te suā taimi.” E fai mai foki te tamana tenei me kafai ko ‵talo atu a ia mai mua o akoga takitasi, e fakamolemole fakapito atu eiloa a ia mō se fesoasoani mai i a Ieova ke maua se kilokiloga tonu ne tino katoa kolā e aofia i te akoga.​—Salamo 119:66.

¹³ A te faiga o te akoga a te kāiga ko te tiute eiloa o mātua tali‵tonu. E tonu, kāti e se apo a nisi mātua e pelā me ne faiakoga, kae e mafai foki o faigata ki a latou ke maua ne auala kolā e mafai ei o fakafiafia te faiga o te akoga a te kāiga. E tiga eiloa te feitu tenā, kafai e alofa koe ki au tama‵liki i au ‘faiga mo pati ‵tonu,’ ka manako eiloa koe o fesoasoani atu ki a latou i te auala o te loto maulalo mo te fakamaoni ke ga‵solo latou ki mua i te feitu faka-te-agaga. (1 Ioane 3:18) Kāti ka fāmeo latou i nisi taimi, kae kāti mai te fai penā ka lavea eiloa ne latou te lasi o tou amanaia ki mea e ‵lei ei latou.

14. E mafai pefea o fakagalue te Teutelonome 11:18, 19 māfai ko fakamatala atu a mea faka-te-agaga ki talavou?

¹⁴ A te akoga a te kāiga e se ko te taimi fua ke fai‵pati i ei ki mataupu kolā e tāua i te feitu faka-te-agaga. E mata, e masaua ne koe te fakatonuga a Ieova ki mātua? Ana muna: “Ke manatua ne koutou a fakatonuga konei, kae tausi faka‵lei. Tusi ki se pepa kae ‵sai ki otou lima pelā foki ki otou lae ko te mea ke masaua faeloa ne koutou. Akoako atu foki a fakatonuga konā ki otou tama‵liki. Ke fai‵pati faeloa koutou e uiga ki fakatonuga konā i loto i otou kāiga, pelā foki manafai e ‵nofo ‵mao koutou, pelā foki manafai e malolo io me ga‵lue koutou.” (Teutelonome 11:18, 19; ke onoono foki ki te Teutelonome 6:6, 7.) E se fakauiga i ei me e ‵tau faeloa o talai atu a mātua ki olotou tama‵liki. Kae e ‵tau faeloa o matapulapula a te ulu o te kāiga alofa ki avanoaga ke fakamalosi aka ei te kilokiloga faka-te-agaga o tena kāiga.

POLOPOLOKIGA MO TE ĀVA

15, 16. (a) Se a te polopoloki? (e) Ko oi e ‵tau o tuku atu ne latou a polopolokiga, kae ko oi e ‵tau o faka‵logo ki ei?

¹⁵ A te polopoloki se akoakoga telā e fakatonutonu atu, kae e aofia i ei a fesokotakiga. E aofia i te polopoloki a te manatu ke fakatonutonu atu i lō te fakasalaga​—kae e mafai o aofia i ei te fakasalaga. Ne ‵tau o maua ne au tama‵liki a pati polopoloki i te taimi koi fo‵liki ei, kae i te taimi ko talavou ei, koi ‵tau eiloa latou o polopoloki latou i nisi feitu, kae kāti ka momea aka foki te manakoga ke fai penā. E iloa ne talavou ‵poto me e tonu eiloa te mea tenei.

¹⁶ E fai mai te Tusi Tapu: “E se ‵tau mo koe o fakasēaogā a muna akoako a tou tamana ki a koe; e ‵tau eiloa o talia ne koe manafai e fakatonu ne ia au mea ‵se ne fai.” (Faataoto 15:5) E uke a mea e tauloto ne tatou mai te fuaiupu tenei. E fakauiga i ei me ka tuku atu eiloa a polopolokiga. E se mafai o saga atu se talavou ki ‘pati polopoloki’ kolā e seki tuku atu. E tuku atu eiloa ne Ieova ki mātua kae maise ki tamana a te tiute ke fai a polopolokiga. Kae ko te tiute ke fakalogo ki te polopolokiga tenā ne tuku atu ki te tamaliki. Ka uke atu ana mea e tauloto kae mu‵tana ana mea ‵se e fai māfai e fakalogo a ia ki pati polopoloki a tena tamana mo tena mātua. (Faataoto 1:8) E fai mai te Tusi Tapu: “A te tino telā e se fia tauloto ka mativa kae masiasi. A te tino telā e talia ne ia ana mea ‵se ne fai e fakaaloalogina ne tino.”​—Faataoto 13:18.

17. Se a te tulaga paleni telā e ‵tau o taumafai ki ei a mātua māfai ko tuku atu a polopolokiga?

¹⁷ Kafai e polopoloki a talavou, e ‵tau o paleni ‵lei a mātua. E se ‵tau o tō faiga‵ta latou i te mea ma fakaitaita atu ei ki olotou tama‵liki, kāti ka fakamasei atu foki ki te loto talitonu o te tamaliki ki a ia eiloa. (Kolose 3:21) Kae e se ‵tau foki o sōna talia ne mātua ke fai ne olotou tama‵liki so se mea ke mo a ma se maua ne tama‵liki se akoakoga tāua. E mafai eiloa o fakamataku a te mea tenā. E fai mai te Faataoto 29:17: “Akoako malosi tau tama, kae ka fakamatamata faeloa koe ona ko ia. Ka se mafai eiloa o fakamasiasi ne ia a koe.” Kae e fai mai te fuaiupu e 21: “Kafai e ave faeloa ne koe ki tau tavini a mea e manako mai ki ei, mai te folikiga ke oko ki te taimi e matua ei, ko tena uiga, i se aso, e iku o ‵fao ne ia au mea katoa.” E tiga eiloa e fakasino atu te fuaiupu tenei ki se tavini, e ‵pau eiloa tena aogā ki so se tamaliki i te kāiga.

18. Se a te mea e fakamaoni mai i polopolokiga, kae se a te mea e ‵kalo keatea mai i ei māfai ko tuku atu faeloa ne mātua a polopolokiga kolā e fetaui ‵lei?

¹⁸ A te ‵tonuga loa, a te faiga o polopolokiga ‵tau se fakamaoniga o te alofa o te mātua ki tena tamaliki. (Epelu 12:6, 11) Kafai koe se mātua, e iloa ne koe me e faigata loa ke fakatumau te faiga o polopolokiga kolā e fetaui ‵lei kae aogā. Ko te mea ke maua se filemu, e mafai o foliga mai me e faigofie atu ke talia se talavou fui fai ke fai te mea e manako a ia ki ei. Kae fakamuli loa, a te mātua telā e tautali atu ki te auala tenei ka maua eiloa ne ia se kāiga telā ka se mafai o pule faka‵lei atu ki ei.​—Faataoto 29:15; Kalatia 6:9.

GA‵LUE KAE TA‵FAO

19, 20. E mafai pefea o fakatoka ne mātua i se auala poto a fakafiafiaga mō olotou tama‵liki talavou?

¹⁹ I aso mua, e masani loa o fesoasoani atu a tama‵liki ki galuega i te fale io me ko fatoaga mo te tausiga o manu. I aso nei, e tokouke loa a talavou kolā e se fakaaogā faka‵lei olotou taimi avanoa e uke. E tuku mai eiloa ne te lalolagi o pisinisi a mataupu e se lausia ke fakaaogā ki ei a taimi konā. E fakaopoopo atu ki ei te foliki o te fakatāua ne te lalolagi a tulaga faka-te-Tusi Tapu i mea tau amioga, ko mafai ei o ‵tupu a fakalavelave fakama‵taku.

²⁰ Tela la, a te mātua poto, e fakatumau eiloa tena aiā ke fai ne ia a fakaikuga katoa e uiga ki fakafiafiaga. Kae ke mo a ma puli me i te talavou e gasolo aka o matua. I tausaga takitasi, kāti ka fakamoemoe a ia ke fai atu a faiga ki a ia e pelā me se tino matua. Tela la, se mea poto ke tuku atu te saolotoga ke fai ana filifiliga e uiga ki fakafiafiaga i te taimi e gasolo aka ei a ia o matua ​—māfai e fakaasi mai i filifiliga konā a te gasolo atu ki mua i te feitu faka-te-agaga. I nisi taimi, e mafai o fai ne se talavou se filifiliga ‵se i pese fakatagi‵tagi, taugasoa, mo nisi mea aka foki. Kafai e tupu te mea tenei, e ‵tau eiloa o sau‵tala mo te talavou ko te mea ke tai ‵lei atu ana filifiliga i aso mai mua.

21. Ka pefea te uke o taimi e fakamāumāu ki fakafiafiaga ke mafai ei o puipui se talavou?

²¹ E pefea te uke o taimi e ‵tau o fakaavanoa mō fakafiafiaga? I nisi fenua, e tali‵tonu a talavou me e ‵tau eiloa o tumau te lotou ‵kau atu ki fakafiafiaga. Tela la, kāti ka fai ne se talavou se fakatokaga ko te mea ke fanatu faeloa a ia mai te “fakafiafiaga” e tasi ki te suā fakafiafiaga. Ko mātua eiloa e fakaasi atu ne latou te akoakoga me e ‵tau foki o fakaaogā a taimi ki nisi mea, e pelā mo te kāiga, sukesukega totino, te ‵kau fakatasi mo tino ma‵tua i te feitu faka-te-agaga, fakatasiga faka-Kelisiano, mo galuega i te fale. Ka taofi aka ne mea konei ke mo a e ‵teke atu ne “mea fakafiafia o te olaga nei” a te Muna a te Atua.​—Luka 8:11-15.

22. Ne a mea e ‵tau o fakapaleni faka‵lei ki ei a fakafiafiaga i te olaga o se talavou?

²² Ne fai mai te Tupu ko Solomona: “Ko iloa aka nei ne au me i te mea sili e ‵tau o fai ne tatou ko te fakafia‵fia i te olaga tenei koi ola tatou i ei. E ‵tau mo tatou katoa o ‵kai kae inu kae fakafiafia ki mea ne maua ne tatou mai o‵tou galuega. Ko te meaalofa a te Atua tenā.” (Failauga 3:12, 13) E tonu, a te fiafia se vaega o te olaga paleni. Kae penā foki loa a galuega ‵mafa. E se iloa ne talavou e tokouke i aso nei a te fiafia telā e maua mai i te faiga o galuega ‵mafa io me ko te talitonu telā e maua mai i te fakafesagai atu ki se fakalavelave mo tena faka‵leiga. Ne seki tuku atu ki nisi talavou te avanoaga ke tauloto ki se galuega telā e mafai o ‵lago fakamuli atu ki a latou. Tenei eiloa te ‵toe mea faigata mō mātua. E mata, ka fakamautinoa aka eiloa ne koe ke tuku atu a avanoaga penā ki tau tamaliki? Kafai e mafai o manuia koe i te akoakoga o tau tamaliki ke fakatāua kae ke fiafia foki ki te faiga o galuega ‵mafa, ka fakamalosi aka eiloa ne ia se kilokiloga ‵lei telā ka aogā ki a ia i tena olaga kātoa.

MAI TE TALAVOU KI TE TINO MATUA

23. E mafai pefea o fakamalosi aka ne mātua olotou tama‵liki talavou?

²³ Kafai foki loa e isi se fakalavelave i te vā o koe mo tau tamaliki, e aogā faeloa te fuaiupu tenei: “E se mafai o gata a te alofa.” (1 Kolinito 13:8) Ke mo a eiloa ma fakagata te fakaasi atu o tou alofa. Fesili ifo ki a koe, ‘E mata, e fakamālō atu au ki tama‵liki taki tokotasi māfai ko manumalo i se fakalavelave io me se mea faigata? E mata, e taumafai au ke fakaasi atu toku alofa mo toku loto fakafetai ki aku tama‵liki, a koituai o galo atu te avanoaga tenā?’ E tiga eiloa e se maua se loto malamalama i nisi taimi, kafai e lagona ‵tonu ne talavou tou alofa mō latou, e mafai eiloa o toe fakaasi atu ne latou te alofa tenā ki a koe.

24. Se a te munatonu fakavae i te Tusi Tapu telā e fetaui ‵lei i feitu katoa i te putiakaga o tama‵liki, kae se a te mea e ‵tau o masaua faeloa?

²⁴ E tonu, i te taimi e ga‵solo aka ei a tama‵liki o ma‵tua, ka fai eiloa ne latou a fakaikuga ‵mafa mō latou. I nisi taimi, e se fia‵fia a mātua ki fakaikuga konā. Kae e a māfai ko fakaiku aka ne se tamaliki ke se toe tavini atu a ia ki a Ieova te Atua? E mafai o tupu te mea tenei. Ke oko foki eiloa ki nisi tama faka-te-agaga a Ieova ne seki faka‵logo ki ana polopolokiga kae ne ‵teke atu ei ki a ia. (Kenese 6:2; Iuta 6) E se fai a tama‵liki e pelā me ne komupiuta, kolā ko oti ne fakapolokalame ke fai ne latou a mea kolā e ma‵nako tatou ki ei. A latou ne tino ola kolā e isi ne olotou saolotoga ke fai olotou filifiliga, kae ka fakamasino latou ne Ieova e ‵tusa mo filifiliga kolā e fai ne latou. Kae e tonu faeloa a muna a te Faataoto 22:6 i feitu katoa: “Akoako atu ki te tamaliki te mea e ‵tau o fai ne ia e ola ei a ia, kae ka masaua faeloa ne ia i tena olaga kātoa.”

25. Se a te ‵toe auala ‵lei mō mātua ke fakaasi atu te lotou loto fakafetai ki a Ieova mō te tauliaga ke fai latou mo fai ne mātua?

²⁵ Tela la, fakaasi atu faeloa te alofa lasi ki au tama‵liki. Fai te ‵toe mea e mafai o fai ke tautali atu koe ki akoakoga a te Tusi Tapu i te putiakaga o latou. Fakaasi atu se fakaakoakoga ‵lei i te faiga o amioga fakaatua. Ka tuku atu ei ne koe ki au tama‵liki te ‵toe avanoaga ‵lei ke ‵tupu aka latou e pelā me ne tino amio ‵lei kae ma‵taku ki te Atua. Tenei eiloa te ‵toe auala ‵lei mō mātua ke fakaasi atu te lotou loto fakafetai ki a Ieova mō te tauliaga ke fai latou mo fai ne mātua.