E Fai ne te Galuega Talai ke Tumau Tatou i te Malosi Faka-te-Agaga
1. Ne a mea aoga e maua ne tatou mai i te galuega talai?
1 A te kau malosi ki te galuega talai e mafai o fakamalosi aka ei tatou i te feitu faka-te-agaga kae momea aka foki i ei te ‵tou fia‵fia. E tonu, a te pogai tāua e ‵kau atu ei tatou ki te galuega talai ke fakafiafia atu ki a Ieova. Kae mai te faka‵logo ki te fakatonuga ke “folafola atu te muna,” e fakamanuia tatou ne Ieova kae e maua atu foki ne tatou a mea aoga i nisi auala. (2 Timo. 4:2; Isa. 48:17, 18) Se a la te auala e fakamalosi kae fakafiafia ei tatou ne te galuega talai?
2. Ne a auala e fakamalosi ei tatou ne te galuega talai?
2 E Fakamalosi Kae Fakamanuia Foki ei Tatou: E fakamalosi aka tatou ne te galuega talai ke ‵saga tonu atu ki fakamanuiaga o te Malo i lō fakalavelave i aso nei. (2 Koli. 4:18) A te fakamatala atu o akoakoga i te Tusi Tapu e fakamalosi aka ei te ‵tou fakatuanaki ki folafolaga a Ieova kae ati aka ei te ‵tou loto fakafetai ki te munatonu. (Isa. 65:13, 14) I te taimi e fesoasoani atu ei tatou ki nisi tino ke gasolo atu ki mua i te feitu faka-te-agaga e pelā mo te sē fai o latou mo fai “ne vaega o te lalolagi,” e fakamalosi aka foki i ei ne tatou te ‵tou tulaga ke ‵vae keatea mai te lalolagi.—Ioa. 17:14, 16; Loma 12:2.
3. E fesoasoani mai pefea te ‵tou galuega talai ke ati aka ne tatou a uiga faka-Kelisiano?
3 A te kau atu ki te galuega talai e fesoasoani mai ke ati aka ne tatou a uiga faka-Kelisiano. E pelā mo te taumafai ke fai “a mea katoa kolā e fai ne vaegā tino kese‵kese katoa” e fesoasoani mai ke ati aka ne tatou se loto maulalo sili. (1 Koli. 9:19-23) E pelā mo te fai‵pati o tatou ki tino kolā “ko pa‵ka kae tuku tiaki latou e pelā me ne mamoe kolā e seai se lotou tino tausi,” e fai ei ke iloa ne tatou o fakaasi atu a lagonaga alofa mo lagonaga atafai. (Mata. 9:36) E fakamasani tatou ki te fakaasi atu o te kufaki i te taimi e ‵mautakitaki ei tatou faitalia a te sē fia‵fia io me ko te ‵teke mai o tino. E momea aka te ‵tou fia‵fia mai i te fesoasoani atu o tatou ki nisi tino.—Galu. 20:35.
4. E pefea ou lagonaga e uiga ki tau galuega talai?
4 Ko oko eiloa i te manuia o tatou ke maua se galuega telā e tuku atu ei a tavaega ki te Tino e tokotasi telā e ‵tau o tapuaki atu tatou ki ei! E fakamalosi aka tatou ne te galuega talai. E maua foki mai i ei a fakamanuiaga e uke ki tino kolā e ‵kau katoatoa atu ki te “tuku atu se molimau katoatoa e uiga ki te tala ‵lei.”—Galu. 20:24.