Se Fesili Ke Mafaufau Ki Ei

◼ Ne a mea e ‵tau o tauloto ne tama‵liki ko te mea ke gasolo aka o ma‵tua i te feitu faka-te-agaga?

E fai eiloa ne mātua a mea e uke ke puti aka olotou tama‵liki “i polopolokiga mo fakatakitakiga a Ieova.” (Efe. 6:4) E pelā mo te iloa aka ne mātua a te aoga ke mafau‵fau ki te tusi siki mō te aso fakatasi mo olotou tama‵liki i taeao katoa. I te tapuakiga a kāiga mo nisi taimi aka, e mafai o onoono fakatasi a kāiga ki se vitio kae sau‵tala e uiga ki mataupu fakapito mai te tusi ko te Young People Ask, ke fai se koniseti e uiga ki se tala i te Tusi Tapu, io me ke fakaakoako ki nisi mea. Kae ko te mea ke “ga‵solo o ma‵tua ‵lei” a tama‵liki, e ‵tau foki o akoako atu a muna‵tonu faka-te-Tusi Tapu ‵loto.​—Epe. 6:1.

Mafaufau ki mea e akoako atu ne tatou ki tino kolā e fetaui mo tatou i te ‵tou galuega talai. I te āsiga muamua io me se isi āsiga, e taumafai sāle tatou ke kamata se akoga faka-te-Tusi Tapu mai te fakaaogaga o te tusi ko te Ne a Mea e Akoako ‵Tonu Mai i te Tusi Tapu? Kafai ko oti te tusi tenā, e fakaaoga ne tatou a te tusi ko te Ke Tumau “i te Alofa o te Atua.” Kaia? A te tusi ko te Akoakoga a te Tusi Tapu e tuku atu ki tino a‵koga se malamalama faigofie i te Tusi Tapu. A te tusi ko te “Alofa o te Atua” e akoako atu ei a te auala ke fakagalue aka a akoakoga faka-te-Tusi Tapu i te olaga i aso katoa. A te sukesuke ki tusi e lua konei e fesoasoani atu ki tino ‵fou ke “‵mau kae ati aka” kae ‘‵mautakitaki foki i te fakatuanaki’ i a Keliso. (Kol. 2:​6, 7) E mata, e se aoga foki a te mataupu tenei ki ‵tou tama‵liki? E ‵tau foki o akoako latou e uiga ki te togiola, te Malo, mo te tulaga o tino ‵mate. E ‵tau o iloa ne tama‵liki a te pogai ne talia ei ne te Atua a logo‵maega mo te auala e iloa ei a aso fakaoti o te olaga masei tenei. E ‵tau o tali‵tonu latou me e maua ne Molimau a Ieova te munatonu. E ‵tau foki o malamalama a tama‵liki i akoakoga fakavae i te Tusi Tapu mo te auala ke fakamasani o fakaaoga “te malosi o olotou mafaufau.” (Epe. 5:14) E tonu, e ‵tau o mafau‵fau a mātua ki te ma‵tua mo te lasi o te malamalama o olotou tama‵liki. Kae e maua eiloa ne tama‵liki e tokouke a te atamai ke tauloto ki muna‵tonu faka-te-Tusi Tapu ‵loto faitalia me koi fo‵liki eiloa latou.​—Luka 2:​42, 46, 47.