Ke Momea Aka Faeloa ‵Tou Atamai i te Galuega Talai—Fakatoka ki se Tino Telā e Ave Faeloa ki ei a Mekesini

Te Pogai e Tāua ei: A te tokoukega o tino kolā e fia‵fia o fai‵tau sale ki ‵tou mekesini e se ma‵nako ke fai ne olotou akoga faka-te-Tusi Tapu mo tatou. E se taumate kāti e lotoma‵lie loa latou ki olotou talitonuga, io me sē lava olotou taimi ke fai olotou akoga. Kae ui ei, kafai e fai‵tau faeloa latou ki ‵tou mekesini, e mafai o ati aka ei se manakoga fiafia ki te Muna a te Atua. (1 Pe. 2:2) E mafai o isi se mataupu i loto i te mekesini e otia ei olotou loto, io me ko fakanofonofoga o latou e mafai o mafuli‵fuli. A te āsi atu faeloa e fai ei ke masani ‵lei mai latou ki a tatou kae fesoasoani mai foki ke iloa ne tatou a mea kolā e fia‵fia latou ki ei penā foki loa mo mea kolā e manava‵se ki ei. I te faiga tenā, ka mafai ei o kamata se akoga faka-te-Tusi Tapu.

Te Auala ke Fai ei:

I masina takitasi, ke fakatoka se taimi ke āsi atu faeloa ki tino taki tokotasi ke avatu ki ei a lōmiga ‵fou o Te Faleleoleo Maluga mo te Awake! Io me mafai ne koe o āsi atu i se taimi i loto i te masina ke fakaosofia aka ei tena fia faitau ki se mataupu i loto i te mekesini telā ne tuku atu ne koe, io me ofo atu fua se mekesini telā e tufa i te masina tenā. Ke tausi faka‵lei a fakamatalaga e uiga ki asiga.—Ke onoono ki te ‵Tou Galuega Talai i a Ianuali 2014, i te itu. e 3.
Ke fakatoka mō āsiga takitasi. I lō te tuku atu fua o mekesini, taumafai ke sau‵tala sale mo te tino ko te mea ke masani ‵lei koulua ko mafai foki ei o ati aka tena loto fiafia.
Ke matapula‵pula ki so se avanoaga ke kamata se akoga faka-te-Tusi Tapu. Kafai se tino fiafia e ‵sili atu ne ia se fesili e uiga ki manatu o te Tusi Tapu ki se mataupu, ke tuku atu ne koe se tusi telā e fai ei a akoga kae maua i ei te tali ki tena fesili ko te mea ke mafai o sau‵tala koulua ki ei. Kae koi tuai koe o fano, ke tuku atu se fesili telā e fetaui ‵lei mo te mataupu ne sau‵tala koulua ki ei ko te mea ke mafai o sau‵tala ki ei ma toe foki atu koe. A te fakatoka faka‵lei kae fai faeloa se fakamatalaga toetoe mai i te Tusi Tapu io me se tusi akoga a tatou, ko lau eiloa te mea tenā e pelā me se akoga faka-te-Tusi Tapu. Kai ofo aka loa ne koe a te polosiua ko te Tala ‵Lei kae fai se akoga faka-te-Tusi Tapu telā e toetoe fua? E mata, e fakaasi atu ne koe a vitio, Kaia e ‵Tau ei o Suke‵suke ki te Tusi Tapu? mo te Ne a Mea e Fai i se Akoga Faka-te-Tusi Tapu? Faitalia foki loa me ne seki fiafia aka loa te tino ke fai sena akoga faka-te-Tusi Tapu, e mafai eiloa o mafuli‵fuli a fakanofonofoga o latou. E mata, ka mafai o aoga ma toe taumafai koe ki ei?

Ke Tofotofo Aka ki te Mea Tenei i te Masina Kātoa:

Ke fai se fakasologa o igoa o tino kolā e ave faeloa ki ei a mekesini. Ofo atu ki ei a mekesini ‵fou, kae fai atu me ka toe foki atu koe o tuku atu ana mekesini māfai ko oko mai te suā lōmiga fou.