Ke Momea Aka Faeloa ‵Tou Atamai i te Galuega Talai​—Ke Talai Atu i Koga Fai Pisinisi

Te Pogai e Tāua ei: A te tokoukega o tino e masani sale o ga‵lue fakaovataimi, tela la a te auala ‵lei ke fakaoko atu ne tatou te fekau o te Malo ko te talai atu ki a latou i olotou koga ga‵lue. Se mea fakafiafia kae magoi a te talai atu i koga fai pisinisi me i tino ga‵lue i te ukega o taimi e ‵galo i olotou fale kae e masani foki o fakaasi atu ne latou te āva ki tino kolā e olo atu o ‵togi olotou mea i sitoa. Ko te mea ke magoi te faiga o te galuega, e ‵tau mo tino talai o atamai kae ‵poto kae ke fai foki pelā me ne fakaakoakoga ‵lei i te auala e fai ei olotou gatu mo teuga. (2 Koli. 6:3) Tela la, e ‵tau mo te ovasia o te galuega talai o onoono faka‵lei me pefea te uke o taimi e ga‵lue ‵soko i koga fai pisinisi kae ko oi foki e masani o ga‵lue faeloa i ei.