Ne Tumau a Iopu i te Loto Fakamaoni Mai Lalo i Tofotofoga

Ne nofo a Iopu i Usa i te taimi ne fai ei a te kau Isalaelu mo pologa i Aikupito. E tiga eiloa e sē se tino Isalaelu, ne fai eiloa a Iopu mo fai se tino tapuaki alofa tumau ki a Ieova. E tokouke a tino i tena kāiga, e maumea ‵ki, kae lauiloa foki i tena fa‵kai. Ne fakatāua malosi ne tino a ia me ne ‵kilo atu ki ei e pelā me se tino fakatonutonu sili kae se famasino telā e se fakailoga tino. Ne kaimalie a ia ki tino ma‵tiva mo tino kolā e ma‵nako ki se fesoasoani. A Iopu se tagata loto fakamaoni.

Ne fakaasi faka‵lei mai ne Iopu me i a Ieova ko te ‵toe Tino tāua i tena olaga

1:8-11, 22; 2:2-5

• Ne seki fia iloa ne Satani te loto fakamaoni o Iopu. Ne seki ‵teke atu a ia ki te fakalogo o Iopu ki a Ieova; i lō te fai penā, ne fakamasei ne ia a lagonaga o Iopu

• Ne ‵losi atu a Satani me ne tavini atu fua a Iopu ki a Ieova ona ko ana manakoga kaima‵nako

• Ke tuku atu se tali ki pati ‵toa a Satani, ne talia ne Ieova ke oso atu a Satani ki te tagata fakamaoni tenā. Ne fakapuapuagatia ne Satani a Iopu i feitu katoa o tena olaga

• I te taimi ne fakatumau ei ne Iopu tena loto fakamaoni, ne taku fakamasei ne Satani te loto fakamaoni o tino katoa

• Ne seki agasala io me ne ‵losi atu a Iopu ki te Atua me ne fai ne ia se mea ‵se