Ke Talia A Te Polopolokiga A Ieova Ke ‵Fuli Ne Ia Koe

1, 2. (a) Ne a mea e manakogina ke fai ko te mea ke maua se fesokotakiga ‵lei mo Ieova? (e) Ka maua pefea ne tatou a mea aoga mai te sukesuke ki tala i Tusitusiga Tapu ki auala ne talia ei ne tino a polopolokiga a te Atua?

“KAE ki a au eiloa, se mea tafasili i te gali te pili ki te Atua; e maua toku puipuiga i te Aliki Maluga [ko Ieova].” (Sala. 73:28) Ne fakaasi mai ne te faisalamo i konei a tena loto talitonu ki te Atua. Ne a tulaga ne oko ki ei tou tagata ko ala ei o fai ne ia te fakaikuga tenei? I te laveaga ne te faisalamo a te filemu o tino amio ma‵sei, ne sē fiafia tena loto i te taimi muamua. Ana muna: “E a, e seai se aoga a te tausi o toku olaga ke ‵ma, mai te agasala”? (Sala. 73:2, 3, 13, 21) Kae i te taimi ne fano ei a ia ki loto i te ‘faletapu o te Atua,’ ne mafai ei o fakatonutonu a tena mafaufau kae fakatumau a tena fesokotakiga ‵pili mo te Atua. (Sala. 73:16-18) Ne tauloto ne te faisalamo se akoakoga tāua: Me i te nofo atu i va o tino o te Atua, talia a manatu fakatonutonu, kae fakagalue aka a mea konā e manakogina ko te mea ke maua se fesokotakiga ‵pili mo Ieova.—Sala. 73:24.

² E ma‵nako foki tatou ki se fesokotakiga ‵pili mo te Atua ola kae tonu. Ke maua a te fakamoemoega tenā, e tāua ke talia ne tatou ana manatu fakatonutonu io me ko polopolokiga ke ‵fuli ki ei tatou ko te mea ke fai tatou e pelā me ne tino taki tokotasi kolā e fakafiafia atu ki a ia! I taimi ko ‵teka, ne alofa fakamagalo a te Atua o tuku atu a avanoaga ki tino taki tokotasi mo fenua ke talia ne latou ana polopolokiga. Ne tusi a tala konei ki loto i te Tusi Tapu “ke akoako ei tatou” kae “se fakailoaga ke fakaeteete tatou kolā ko ‵nofo i te taimi o te gataga o te lalolagi tenei.” (Lo. 15:4; 1 Koli. 10:11) A te sukesuke ki tala konei ka fesoasoani mai ke malama‵lama tatou i uiga totino o Ieova kae fakaasi mai i ei te auala e maua ei ne tatou a mea aoga māfai e fakatonutonu ne ia tatou.

TE AUALA E FAKAAOGA EI NE TE TINO FAITE IPU KELE A TENA PULEGA

3. Ne fakamatala mai pefea i te Isaia 64:8 mo te Ielemia 18:1-6 a te pulega a Ieova ki luga i tino? (Onoono ki te ata i te kamataga.)

³ I te fakamatalaga e uiga ki te pulega a Ieova ki tino taki tokotasi mo atufenua, e fai mai te Isaia 64:8, Tusi Tapu Tauloto, penei: ‘Te Aliki [Ieova], a koe ko te motou tamana. A matou e pelā me ne kele, kae ko koe ko te Tino faite ipu kele. Ne fakafua ne koe a matou.’ E pule katoatoa a te tino faite ipu kele i te fulifuliga o te kele ki te mea telā e manako a ia o faite. E se pule a te kele. E penā foki te tagata mo te Atua. E seai se saolotoga o te tagata o fai ki te Atua a te auala e ‵tau ei o fakatonutonu tatou e pelā mo te kele e se mafai o fai atu ki te tino faite ipu kele ki te vaegā ipu, io me se ulo e ‵tau o faite.—Faitau te Ielemia 18:1-6.

4. E mata, e ‵fuli mālō ne Ieova a tino io me ko atufenua? Fakamatala mai.

⁴ Ne fakatonutonu ne Ieova a te kau Isalaelu e pelā mo te mea e fai ne te tino faite ipu kele ki te kele. Kae manino ‵lei me isi se ‵kesega. E mafai ne te tino faite ipu kele o faite so se mea e mafai ne ia mai te kele. E mata, e ‵fuli mālō ne Ieova a tino io me ko atufenua, ke ‵lei a nisi tino kae ko nisi tino ke ma‵sei? A te tali a te Tusi Tapu ko te ikai. Ko oti ne tuku mai ne Ieova se meaalofa tāua ‵ki—ko te saolotoga ke fai a filifiliga. E se fakaaoga ne ia a tena pulega i se auala telā e fakaseaoga ei a tena meaalofa. E ‵tau eiloa mo tino o filifili me talia ne latou ke fulifuli latou ne te Mafuaga, ko Ieova io me ikai.—Faitau te Ielemia 18:7-10.

5. Kafai e ita a tino ma ‵fuli latou ne Ieova, e pule atu pefea a ia ki a latou?

⁵ Kae e a māfai a tino e loto ma‵keke kae ita ma fulifuli latou ne te Tino faite ipu kele Sili? E fakaaoga pefea ne Ieova a tena pulega? Mafaufau ki te mea ka fai ki te kele māfai ko sē ‵lei ki te mea telā e manakogina ke fai. E mafai ne te tino faite ipu kele o faite se mea fakaa‵tea io me ‵pei kea‵tea. E pelā mo te masani, kafai e masei a te kele, i o te tino faite ipu kele a te ‵se. E se mafai lele o fai penā a ‵tou Tino faite ipu kele. (Teu. 32:4) Kafai e se talia ne se tino ke ‵fuli a ia ne Ieova, i o te tino eiloa tenā a te ‵se. E pule atu a Ieova ki luga i tino e auala i te fakamafulifuliga o ana faifaiga e fai ki a latou kae fakalagolago ki te talia ne latou a te fesoasoani. A latou kolā e faka‵logo faka‵lei ka maua ne latou a mea aoga. Pelā me se fakaakoakoga, a Kelisiano fakaekegina ko “ipu o te alofa fakamagalo” kolā ko oti ne ‵fuli mo fai ne ‘ipu mō se mea ‵lei.’ I te suā feitu, a latou kolā e loto ma‵keke o ‵teke atu ki te Atua e iku atu ki te fai mo “ipu o te kaitaua kolā e ‵tau o fakaseai.”—Lo. 9:19-23.

6, 7. Ne ‵kese pefea a te faka‵logo o te tupu ko Tavita mo te tupu ko Saulo ki pati fakatonutonu a Ieova?

⁶ A te auala e tasi e ‵fuli ei ne Ieova a tino ko te tuku atu o pati fakatonutonu mo polopolokiga. E lavea ne tatou a te auala e pule atu ei a ia ki tino kolā e ‵fuli ne ia mai te mafau‵fau ki tupu muamua e tokolua o Isalaelu—Saulo mo Tavita. I te taimi ne mulilua ei a te tupu ko Tavita mo Patisepa, ne pokotia a ia mo nisi tino i ana faifaiga. E ui eiloa a Tavita ko te tupu, ne tuku atu ne Ieova a polopolokiga ‵mafa ki tou tagata. Ne uga atu ne te Atua a tena pelofeta ko Natano ke fano ki a Tavita o tuku atu a pati fakatonutonu kae ‵mafa. (2 Samu. 12:1-12) Ne pefea a lagonaga o Tavita? Ne salamō ‵ki eiloa tou tagata, kae ne fakaasi atu ne te Atua a te alofa fakamagalo ki a Tavita.—Faitau te 2 Samuelu 12:13.

⁷ Kae ‵kese a te tupu ko Saulo telā ne sui ne Tavita, ne seki fakalogo faka‵lei ki pati fakatonutonu. Ne fakatonu atu a Ieova ki a Saulo e auala i te pelofeta ko Samuelu: Tamate a tino Amaleka katoa mo olotou manu. Ne seki fakalogo a Saulo ki te fakatonuga tenei mai te Atua. Ne fakasao ne tou tagata a te tupu ko Akako mo ana manu tafasili i te ‵lei. Kaia? E se taumate, e manako tou tagata ke maua ne ia a tavaega. (1 Samu. 15:1-3, 7-9, 12) I te taimi ne tuku atu ei a pati fakatonutonu, ne ‵tau o fakamalū ne Saulo a tena loto mai te talia ke fakatonutonu a ia ne te Tino faite ipu kele Sili. I lō te fai penā, ne ita a Saulo ma ‵fuli. Ne fia tonu tou tagata. Ne fakasako‵sako mai tou tagata i ana mea kolā ne fai e saoloto me i manu tafasili i te ‵lei e mafai o fakaaoga mo fai a taulaga, kae ne manatu māmā a ia ki pati fakatonutonu a Samuelu. Ne ‵teke atu a Ieova ki te tupu ko Saulo, kae ne seki toe maua ne Saulo a tena fesokotakiga ‵lei mo te Atua tonu.—Faitau te 1 Samuelu 15:13-15, 20-23.

A TE ATUA E SE FAKAILOGA TINO

8. Se a te akoakoga e mafai o tauloto ne tatou mai te auala ne ‵saga atu ei a te fenua o Isalaelu ki fakatonutonuga a Ieova?

⁸ Ne tuku atu foki ne Ieova a te avanoaga ki atufenua ke faka‵logo ki a ia kae sē ko tino taki tokotasi fua. I te 1513 T.L.M., ne maua ne te kau Isalaelu kolā ne fakasaoloto mai te ‵nofo pologa i Aikupito, se fesokotakiga fakapito mo te Atua. Ne fai a Isalaelu mo fai a tena fenua filifilia kae ne taulia latou ke ‵fuli ne ia, e pelā me ‵nofo i luga i te mea faigaluega a te Tino faite ipu kele Sili. E ui i ei, ne tumau a tino i te faiga o mea ma‵sei i mua o Ieova, ke oko ki te tapuaki ki atua o atufenua i olotou tafa. Ne uga atu faeloa ne Ieova a pelofeta o fesoasoani ki a latou ke ala olotou mafaufau, kae ne seki faka‵logo a te fenua o Isalaelu. (Iele. 35:12-15) Ona ko te loto ma‵keke, ne polopoloki ‵mafa ei a te fenua o Isalaelu. E pelā me se ipu e ‵tau o fakaseai, ne fakatakavale ne te kau Asulia a te malo o matakāiga e sefulu ki mātū kae penā foki te mea ne fai ne Papelonia ki te malo o te avā matakāiga ki saute. E maua ne tatou se akoakoga tāua ‵ki mai te mea tenei! Ka fesoasoani mai a fakatonutonuga a Ieova māfai fua e faka‵logo faka‵lei tatou ki ei.

9, 10. Ne tali atu pefea a tino Nineva ki te faka‵pulaga mai te Atua?

⁹ Ne tuku atu foki ne Ieova ki tino i te laumua o Asulia ko Nineva se avanoaga ke faka‵logo ki tena faka‵pulaga. Ne fai atu ana pati ki a Iona, penei: “Fano ki Nineva, te fa‵kai lasi tenā, kae ‵valo atu te lotou malaia; ko iloa ne au me ko oko eiloa te amio ma‵sei o tino i te fa‵kai tenā.” Ko ‵tau eiloa o fakaseai a Nineva.—Iona 1:1, 2; 3:1-4.

¹⁰ E ui i ei, i te taimi ne folafola atu ei ne Iona a te fekau o te fakamaseiga, “ne tali‵tonu a tino Nineva ki te fekau tenei mai i te Atua. Tenā, ne mafau‵fau ei latou me ‵tau mo tino katoa o fakaliki‵liki kae ‵pei ki gatu lautaga, mai tino ma‵lalo ke oko ki tino ma‵luga, e fakaasi ei te lotou sala‵mo.” Ne tu aka te lotou tupu “mai tena nofoga-aliki, tapale tena gatu ‵loa, pei ana gatu masae‵sae kae sagasaga ki koga e ‵fonu i ‵lefu.” Ne faka‵logo a tino Nineva ki fakatonutonuga a Ieova kae sala‵mo. Kae ko te ikuga, ne seki fai ne Ieova ke tupu a te fakalavelave.—Iona 3:5-10.

11. Se a te uiga o Ieova e tulaga muamua i ana faifaiga ki Isalaelu mo Nineva?

¹¹ A te fai mo fenua filifilia e se taofi aka i ei a te tukuatuga o polopolokiga ki Isalaelu. I te suā feitu, a tino Nineva ne seki aofia i se fesokotakiga fakapito mo te Atua. Kae koi fakailoa atu eiloa ne Ieova a tena fekau o fakamasinoga ki a latou kae fakaasi atu te alofa fakamagalo māfai e fakatalitonu mai i a latou ko pelā mo kele malu‵lu i ana lima. E fakaasi manino mai i fakaakoakoga e lua konei i a Ieova ‵tou Atua “e galo i a ia te loto fakapito”!—Teu. 10:17.

A IEOVA E LOTO MALAMALAMA KAE UIGA FAIGOFIE

12, 13. (a) Kaia e ‵fuli ei ne te Atua a tena ikuga māfai a tino taki tokotasi e faka‵logo ki ana pati fakatonutonu? (e) Se a te uiga o te ‘‵fuliga o te mafaufau’ o Ieova e uiga ki a Saulo? mo Nineva?

¹² E fakaasi mai i te auala telā ne ‵fuli ei tatou ne Ieova i a ia e loto malamalama kae uiga faigofie. E fakatalitonu mai a te mea tenā i tulaga kolā ne fakaiku aka ne Ieova ke gasuesue a ia ona ko tena fakamasinoga tonu ki tino, kae oti aka, ‵fuli ei tena mafaufau ona ko te faka‵logo o tino. E fai mai i Tusitusiga Tapu i a Ieova ne ‘salamō me ne fai ne ia a Saulo mo fai te tupu.’ (1 Samu. 15:11) I te taimi ne sala‵mo ei a tino Nineva kae ‵fuli kea‵tea mai i olotou auala ma‵sei, e fai mai te Tusi Tapu: “Ne ‵fuli a tona mafaufau kae ne seki fakasala ne ia a latou e pelā mo ana muna ne fai me ka fakasala ne ia.”—Iona 3:10. Tusi Tapu Tauloto.

¹³ A te tugāpati Epelu telā e ‵fuli ki te “salamō” e fakasino tonu atu ki te ‵fuliga o se kilokiloga io me se fuafuaga. Ne ‵fuli te kilokiloga a Ieova ki a Saulo i te filifiliga mo fai se tupu ke ‵teke atu ki a ia. A te ‵fuliga tenei ne seki tupu ona ko Ieova ne ‵se i te filifiliga o Saulo, kae ona ko Saulo ne seki fakatuanaki i ana mea ne fai kae ne seki fakalogo. E uiga ki Nineva, ne ‵fuli te mafaufau o te Atua tonu; tenā, ne ‵fuli ei tena fuafuaga e uiga ki a latou. Ko oko eiloa i te fakamalosi loto ke iloa atu ia Ieova te ‵tou Tino faite ipu kele e loto malamalama kae uiga faigofie, e mataalofa kae alofa fakamagalo, e loto fiafia o ‵fuli a tena ikuga ona ko ‵fuliga tonu e fai ne tino fai mea ‵se!

KE MO A E ‵TEKE TATOU KI POLOPOLOKIGA A IEOVA

14. (a) E fakatonutonu pefea tatou ne Ieova i aso nei? (e) E faka‵logo pefea tatou ki pati fakatonutonu a te Atua?

¹⁴ I aso nei, e fakatonutonu tatou ne Ieova e auala i tena Muna ko te Tusi Tapu, mo tena fakapotopotoga. (2 Timo. 3:16, 17) E mata, e se ‵tau mo tatou o talia so se fakatonutonuga io me se polopolokiga e maua ne tatou i auala konei? Faitalia me pefea te leva ne papatiso ei tatou io me ko te uke o tauliaga ne maua ne tatou i te taviniga, e ‵tau mo tatou o tumau i te faka‵logo ki pati fakatonutonu a Ieova, kae talia ke fulifuli ki ei tatou ke fai mo ipu mō se mea ‵lei.

15, 16. (a) Ne a lagonaga sē ‵lei e mafai o ‵sae aka māfai e ‵galo ‵tou tauliaga? Tuku mai se fakaakoakoga. (e) Se a te mea e mafai o fesoasoani mai ke manumalo tatou i lagonaga sē ‵lei ona ko te polopolokiga?

¹⁵ A nisi polopolokiga e tuku mai pelā me se fakatonuga io me se faka‵tonuga o mea i te mafaufau. I nisi taimi, kāti e manakogina ne tatou a polopolokiga me ne seki fai ne tatou a te mea tonu. E mafai o aofia i polopolokiga penā a te ‵galo o ‵tou tauliaga. Mafaufau ki te fakaakoakoga a Dennisa telā ne tavini pelā me se toeaina. Ne fai ne tou tagata se mea ‵se ona ko te masei o tena fakaikuga ne fai i mea tau pisinisi, kae ne polopoloki ‵mafa ei a ia. Ne pefea a lagonaga o Dennis i te po telā ne faka‵pula ei ki te fakapotopotoga i a ia ko sē fai pelā me se toeaina? “Ne lagona ‵ki ne au a toku fakatamala,” ko ana pati. “I tausaga e silia atu i te 30 ko ‵teka, ne uke ‵ki oku tauliaga. Ko oti au ne paenia tumau, galue i te Peteli, tavini fesoasoani kae oti aka, fai ei pelā me se toeaina. Ne fatoa oti foki ne fai taku lāuga muamua eiloa i fono o te atufenua. Kae poi eiloa me ko ‵galo atu a mea katoa. I tafa o te mā kae sē fiafia, ne manatu aka au me ko seai se avanoaga mō oku i loto i te fakapotopotoga.”

¹⁶ E ‵tau mo Dennis o ‵fuli ana amioga, mai te ‵fuli kea‵tea mai te mea ‵se telā ne manakogina ke fakatonutonu aka a ia i ei. Kae se a te mea ne fesoasoani atu ki tou tagata ke manumalo i lagonaga sē ‵lei? “Ne fakaiku aka ne au ke fakatumau se fakasologa ‵lei o mea faka-te-agaga. Kae ‵pau eiloa te tāua o te ‵lago mai o taina mo tuagane mo te fakamalosiga e maua ne au mai ‵tou tusi. Ne fai a te mataupu ‘Did You Once Serve? Can You Serve Again?’ i te lōmiga o The Watctchtower o Aokuso 15, 2009 e pelā me se tusi totino e tali mai ki aku ‵talo. A pati fakatonutonu kolā ne fakatāua malosi ne au ko te ‘saga tonu ki te fakamalosiga o tou feitu faka-te-agaga, a koi tuai o isi ne ou tofiga i te fakapotopotoga.’” Ne aoga pefea ki a Dennis a te polopolokiga tenā? I tausaga fakamuli ifo, e fai mai tou tagata, “Ko toe fakamanuia au ne Ieova i a au ko toe taulia ke tavini pelā me se tavini fesoasoani.”

17. E fesoasoani atu pefea a te fakatea ki se tino agasala ke salamō? Tuku mai se fakaakoakoga.

¹⁷ A te fakatea ko te suā auala o te polopolokiga mai i a Ieova. E puipui i ei a te fakapotopotoga mai i se fakamalosiga masei kae fesoasoani atu ki te tino agasala ke salamō. (1 Koli. 5:6, 7, 11) Ko tai kātoa te 16 tausaga ne fakatea ei a Robert, kae i te taimi tenei, ne tumau eiloa ana mātua mo ana taina o fakagalue a te fakatakitakiga i te Muna a te Atua ke fakagata te ‵kau fakatasi mo tino agasala, ke sē fakatalofa atu foki ki tino penā. Ko oti nei ne toe foki mai a Robert ki loto i te fakapotopotoga mō nāi tausaga kae ko gasolo ki mua i te feitu faka-te-agaga. I te taimi ne fesili atu ei ki tou tagata me se a te mea ne fakamalosi atu ki a ia ke toe foki mai ki a Ieova mo Ana tino mai tua o se taimi leva ‵ki, ne tali mai a ia me ko te tulaga telā ne ‵tu i ei a tena kāiga ne pokotia a ia i ei. “Moi fai ne fesokotaki malie mai toku kāiga ki a au, pelā me e fesili mai fua me e a au, ne mafai loa o malie au i te fesokotakiga toetoe fua tenā kae ne mafai o sē fai a toku manako o fesokotaki mo toku kāiga mo fai se mea e toe foki mai ei au ki te Atua.”

18. E ‵tau o fai tatou mo fai te vaegā kele fea i lima o te Tino faite ipu kele Sili?

¹⁸ Kāti e se ma‵nako tatou ki te polopolokiga tenā, kae ko tatou ko te vaegā kele fea i lima o te Tino faite ipu kele Sili? Ka pefea ‵tou faiga māfai e polopoloki tatou? E mata, ka fai tatou pelā mo Tavita, io me pelā mo Saulo? A te Tino faite ipu kele Sili ko te ‵tou Tamana. Ke mo a e puli i “te Aliki [Ieova] e fakatonu ne ia a mea ‵se a latou kolā e alofa a ia ki ei, e pelā me se tamana e fakatonu ne ia tena tama tagata telā e fakamatamata a ia ki ei.”—Faata. 3:11, 12.