“Kiloke! Au E Fakatasi Faeloa Mo Koutou I Aso Katoa”

1. (a) Fakamatala fakatoetoe mai a te tala fakatusa e uiga ki saito mo mouku ma‵sei. (e) Ne fakamatala mai pefea ne Iesu a te uiga o te tala fakatusa tenā?

E TASI te tala fakatusa a Iesu e uiga ki te Malo e fakamatala mai i ei e uiga ki se tino fai fatoaga telā ne ‵toki ne ia a fuaga saito ‵lei, mo tena fili telā ne ‵toki ne ia a mouku ma‵sei i va o fuaga ‵lei. Ne uke atu a mouku ma‵sei ne ola aka i lō saito, kae ne fakatonu atu a te tino fai fatoaga ki ana tavini ke “tuku ke ola fakatasi aka latou ke oko ki te taimi e ‵kati ei a saito.” I te taimi o te ‵katiga o saito, ne fakaseai atu ei a mouku ma‵sei kae ne ‵luku fakatasi mai a saito. Ne fakamatala mai eiloa ne Iesu a te tala fakatusa tenā. (Faitau te Mataio 13:24-30, 37-43, Tusi Tapu Tuvalu.) Se a te mea e fakaasi mai i te tala fakatusa tenei? (Ke onoono ki te pokisi “Saito mo Mouku Ma‵sei.”)

2. (a) Ne a mea e fakatusa ki ei a mea kolā ne ‵tupu i te fatoaga a te tino fai fatoaga? (e) Se a te vaega o te tala faka‵tusa ka sau‵tala tatou ki ei?

² A mea kolā ne ‵tupu i te fatoaga a te tino fai fatoaga tenā, e fakaasi mai i ei a te auala mo te taimi ka fakamaopoopo ei ne Iesu mai i tino a te potukau e pelā me ne saito​—ko Kelisiano fakaekegina kolā ka pule fakatasi mo ia i tena Malo. Ne kamata a te ‵tokiga o fuaga i te Penitekoso 33 T.A. Kae ka fakaoti atu a te fakamaopoopomaiga o latou māfai ko maua ne te kau fakaekegina kolā e ola i te taimi o te gataga o te olaga tenei a te lotou toe fakamailogaga oti aka loa ko avaka ei latou ki te lagi. (Mata. 24:31; Faka. 7:1-4) E pelā eiloa mo te tino telā e tu i luga i se mauga maluga telā e lavea faka‵lei ne ia a mea i ana tafa, e fakaasi mai foki i te tala fakatusa tenei se ata manino o mea kolā ka ‵tupu i se vaitaimi o tausaga e 2,000. Mai ‵tou kilokiloga totino, ne a fakasologa o mea ne ‵tupu e uiga ki te Malo e malamalama tatou i ei? E fakamatala mai i te tala fakatusa tenei a te taimi o te ‵tokiga o fuaga, te olaakaga, mo te ‵katiga. Ka fakapitoa eiloa a te mataupu tenei ki te taimi o te ‵katiga o saito.a

MAI LALO I TE TAUSIGA ALOFA A IESU

3. (a) Ne a mea ne ‵tupu mai tua o te senitenali muamua? (e) E ‵tusa mo te Mataio 13:28, se a te fesili ne fakasae aka, kae ko oi ne fakasae aka ne ia te fesili tenā? (Ke onoono foki ki te fakamatalaga i te fakaotiga.)

³ I te kamataga o te lua o senitenali T.A., ne “ola aka foki a mouku” ma‵sei ko te taimi telā ne ‵sae aka ei a Kelisiano ‵loi i te lalolagi. (Mata. 13:26) I te fa o senitenali, ne tokouke atu a Kelisiano kolā e fai pelā me ne mouku ma‵sei i lō Kelisiano fakaekegina. Ke masaua me fai mai te tala fakatusa, me ne fakamolemole atu a pologa ki te lotou matai ke unu keatea a mouku ma‵sei.b (Mata. 13:28) Se a te tali a te matai?

4. (a) Se a te mea e fakaasi mai i te tali a te Matai ko Iesu? (e) Ko te taimi fea ne kamata ei o maina a tino me ko oi e aofia i Kelisiano kolā e fai pelā me ko te potukau o saito?

⁴ I ana pati e uiga ki saito mo mouku ma‵sei, ne fai atu a Iesu penei: “Tuku ke ola fakatasi aka latou ke oko ki te taimi e ‵kati ei a saito.” E fakaasi mai i te fakatonuga tenei me talu mai te senitenali muamua ke oko mai ki aso nei, e isi faeloa ne Kelisiano fakaekegina kolā e fai pelā me ne saito i te lalolagi nei. E mautinoa i a tatou a te mea tenei i pati a Iesu kolā ne fai fakamuli atu ki ana soko penei: “Au e fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:20) Tela la, ka puipui faeloa a Kelisiano fakaekegina ne Iesu i aso katoa o olotou olaga ke oko eiloa ki te taimi o te gataga. Kae ona ko te mea ne tokouke atu a Kelisiano kolā e fai pelā me ne mouku ma‵sei i a latou, e se mautinoa tonu i a tatou me ko oi a tino e aofia i te potukau o saito i te vaitaimi leva ‵ki tenā. Kae i se fia sefulu tausaga mai mua o kamata te ‵katiga o saito, ne kamata o maina latou me ko oi e aofia i te potukau o saito. Ne iloa pefea ne latou te mea tenā?

TE AVE FEKAU TELĀ NE ‘FAKATOKA NE IA TE AUALA’

5. Ne fakataunu pefea a te valoaga a Malaki i te senitenali muamua?

⁵ I te fia senitenali mai mua o fai atu ne Iesu te tala fakatusa e uiga ki saito mo mouku ma‵sei, ne fakaosofia ne Ieova a tena pelofeta ko Malaki ke ‵valo mai ne ia a mea kolā ka ‵tupu i aso mai mua kae ka lavea atu i te tala fakatusa a Iesu. (Faitau te Malaki 3:1-4.) A Ioane te Papatiso ko te ‘ave fekau telā ne fakatoka ne ia te auala.’ (Mata. 11:10, 11) I te taimi ne vau ei a ia i te 29 T.A., kae ko pili foki eiloa ki te taimi o te fakamasinoga o te fenua o Isalaelu. A Iesu ko te tokolua o avefekau. Ne faka‵ma fakalua ne ia a te faletapu i Ielusalema​—muamua la, i te kamataga o tena galuega talai, a ko te lua i te fakaotiotiga o tena galuega. (Mata. 21:12, 13; Ioa. 2:14-17) Tela la, a te galuega ki te faka‵maga telā ne fai ne Iesu ne fai i loto i se vaitaimi tai mata leva.

6. (a) Se a te fakataunuga lasi o te valoaga a Malaki? (e) Ko te vaitaimi fea ne āsi ei ne Iesu a te faletapu faka-te-agaga? (Onoono foki ki te fakamatalaga i te fakaotiga.)

⁶ Se a te fakataunuga lasi o te valoaga a Malaki? I te fia sefulu tausaga mai mua malie o te 1914, ne fai ne C.T.Russell mo ana taugasoa ‵pili se galuega e tai ‵pau mo te galuega ne fai ne Ioane te Papatiso. E aofia i te galuega tāua tenā ko te toe faka‵fokimaiga o muna‵tonu mai te Tusi Tapu. Ne akoako ne Tino A‵koga ki te Tusi Tapu konei a te uiga tonu o te taulaga togiola a Keliso, ne fakaasi faka‵sau atu ne latou a te akoakoga ‵se e uiga ki te afi i seoli, kae folafola atu ne latou a te gataga o Taimi o Fenua Fakaa‵tea. Kae e uke aka foki a nisi potukau o lotu kolā e fai mai i a latou ne soko o Keliso. Tela la, e isi se fesili tāua telā e ‵tau o tali faka‵lei aka: Ko oi te potukau i potukau konei e fai pelā me ne saito? Ke tali aka te fesili tenā, ne kamata o fai ne Iesu a tena asiga ki te faletapu faka-te-agaga i te 1914. A te asiga tenā mo te galuega ki te faka‵maga ne fai i loto i se vaitaimi tai mata leva​—mai te 1914 ke oko ki te kamatamataga o te 1919.c

TAUSAGA NE FAI EI TE ASIGA MO TE FAKA‵MAGA

7. I te taimi ne kamata ei te asiga a Iesu i te 1914, ne a ana mea ne maua i ei?

⁷ I te taimi ne fai ei ne Iesu tena asiga, ne a mea ne maua ne ia? Ne maua ne ia se tamā potukau o Tino A‵koga ki te Tusi Tapu kolā ne fakamāumāu ne latou olotou malosi mo olotou tupe i tausaga e silia atu mo te 30 ke fai ne latou se talaiga lasi ‵ki.d Ko tafaga la te fiafia o Iesu mo te kau agelu ke maua atu ne latou me i te potukau foliki tenei, kolā e fai pelā me ne kau saito ma‵losi ‵ki, ne seki fakasai‵tia olotou ola ne mouku ma‵sei a Satani! Kae ne manakogina eiloa ke “faka‵ma a faitaulaga,” kolā ko te kau fakaekegina. (Mala. 3:2, 3; 1 Pe. 4:17) Kaia?

8. Ne a mea ne ‵tupu mai tua o te 1914?

⁸ I te fakaotiotiga o te 1914, ne loto vai‵vai a nisi Tino A‵koga ki te Tusi Tapu me ne seki avaka latou ki te lagi. I te 1915 mo te 1916, ne fai ne ‵tekemaiga mai tua o te fakapotopotoga ke fakatuai a te faiga o te galuega talai. E se gata i ei, mai tua eiloa o te mate o te Taina ko Russell i a Oketopa 1916, ne ‵sae aka a ‵tekemaiga mai loto eiloa i te fakapotopotoga. Ne ‵teke atu a te tokofa mai te tokofitu o tino pule‵pule o te Watch Tower Bible and Tract Society ki te fakaikuga ke fai ne te Taina ko Rutherford a te takitakiga. Ne taumafai latou o fai ke isi ne mavaevaega i va o taina, kae i a Aokuso 1917, ne tiaki ei ne latou a te Peteli​—se faka‵maga tonu eiloa! Ne kamata foki o ma‵taku a nisi Tino A‵koga ki te Tusi Tapu ki tino. Kae ne ‵saga tonu eiloa latou katoa mo te loto fia‵fia ki te galuega ko te faka‵maga telā ne fai ne Iesu, kae fai ne latou a fakama‵fuliga kolā ne manakogina ke fai. Tela la, ne talia ei ne Iesu a latou e pelā me ne Kelisiano ‵tonu kolā e fai pelā me ne saito, kae ‵teke ne ia a Kelisiano ‵loi katoa, e aofia i ei ko latou kolā i lotu Kelisiano ‵se. (Mala. 3:5; 2 Timo. 2:19) Ne a mea ne ‵tupu mai tua ifo i ei? Ke iloa ne tatou a mea konā, ke toe ‵foki tatou ki ‵tou tala fakatusa e uiga ki saito mo mouku ma‵sei.

NE A MEA NE ‵TUPU MAI TUA O TE KAMATAGA O TE ‵KATIGA O SAITO?

9, 10. (a) Ne a mea ka fai‵pati tatou ki ei e uiga ki te taimi o te ‵katiga o saito? (e) Ne a mea ne ‵tupu muamua i te taimi o te ‵katiga o saito?

⁹ “A te ‵katiga o saito ko te vaitaimi o te gataga o te olaga tenei,” ko pati a Iesu. (Mata. 13:39) A te ‵katiga o saito tenā ne kamata i te 1914. Ka mafau‵fau tatou ki mea e lima kolā ne ‵valo mai ne Iesu me ka ‵tupu i te taimi tenā.

¹⁰ Muamua la, ko te unuga o mouku ma‵sei. Ne fai mai Iesu penei: “I te ‵tau e ‵kati ei a saito; ko fai atu ei au ki tino ‵kati saito: Unu muamua aka a mouku, saisai” ei ki fusiga mouku. Mai tua o te 1914, ne kamata ei o “unu” ne agelu a Kelisiano kolā e fai pelā me ne mouku ma‵sei mai te ‵vae keatea o latou mai i “fanau o te Malo” kolā ne fakaekegina.”​—Mata. 13:30, 38, 41.

11. Ke oko mai ki aso nei, se a te mea telā ne tu ‵kese ei a Kelisiano ‵tonu mai Kelisiano ‵loi?

¹¹ I te gasologa ki mua o te galuega tenei, ne kamata o manino mai i ei a te ‵kese o potukau e lua konei. (Faka. 18:1, 4) I te 1919, ne manino ‵lei mai i te taimi tenā me ko pakū a Papelonia te Sili. Se a te mea tāua ne lavea atu ei te tu ‵kese o Kelisiano ‵tonu mai Kelisiano ‵loi? Ko te galuega talai. Ne kamata o faka‵mafa atu ne latou kolā ne fai ne latou a te takitakiga o Tino A‵koga ki te Tusi Tapu, a te tāua ke aofia a tino taki tokotasi i te galuega ko te talaiatuga o te Malo. E pelā me se fakaakoakoga, ne ‵lomi aka a te tamā tusi ko te To Whom the Work Is Entrusted, i te 1919 kae ne fakamalosi atu i ei ki Kelisiano fakaekegina katoa ke talai mai fale ki fale. E fai mai penei: “E foliga mai me i te galuega tenei se galuega lasi ‵ki, kae i a te Aliki a te galuega, kae ka fai ne tatou te galuega tenei i tena malosi. E maua eiloa ne koe a te tauliaga ke kau atu ki ei.” Ne ‵saga atu pefea ki ei? Mai te taimi tenā o fano ki mua, ne lipoti mai The Watch Tower i te 1922, me ne toe fakamalosi aka ne Tino A‵koga ki te Tusi Tapu a te faiga o te lotou galuega talai. E seki leva, kae fai a te galuega mai fale ki fale e pelā me se fakailoga lauiloa o Kelisiano fakamaoni konā​—e pelā eiloa mo aso nei.

12. Anafea ne ‵luku mai ei te potukau o saito?

¹² A te lua o mea, ko te ‵lukumaiga o saito. Ne fakatonu atu a Iesu ki ana agelu penei: “Ka oti ko ‵luku mai ei a saito ki loto i toku fale saito.” (Mata. 13:30) Talu mai te 1919, ne kamata ei o ‵luku mai a te kau fakaekegina ki loto i te fakapotopotoga Kelisiano telā ne toe fakatu aka. Kae mō Kelisiano fakaekegina kolā e ola i te gataga o te olaga tenei, a te lotou toe ‵lukumaiga ki loto i te fale saito ka fai māfai ko maua ne latou te lotou taui i te lagi.​—Tani. 7:18, 22, 27.

13. Se a te mea e fakaasi mai i te Fakaasiga 18:7 e uiga ki te tulaga o te fafine talitāgata io me ko Papelonia te Sili i aso nei, e aofia i ei a Fenua Lotu Kelisiano?

¹³ A te tolu o mea, ko te ‵tagi mautuutu mo te faiga o olotou lili. I te otiga ne fusi ne agelu a mouku ma‵sei, ne a mea ne ‵tupu mai tua i ei? I tena faipatiatuga e uiga ki te tulaga o te potukau e pelā me ne mouku ma‵sei, ne fai mai a Iesu penei: “Tenā eiloa te koga ka ‵tagi mautuutu kae fai olotou lili i ei.” (Mata. 13:42) E mata, ko tupu te mea tenā i aso nei? Ikai. I aso nei, e fai mai a lotu Kelisiano ‵se, telā se vaega o te fafine talitagata, e uiga ki a ia eiloa penei: “Au e sagasaga pelā me se tupu fafine kae e sē se fafine ko mate tena avaga. Ka se mafai eiloa au o tagi fanoanoa.” (Faka. 18:7) E tonu, e mafau‵fau a lotu Kelisiano ‵se me i a latou e fai pelā me ne pule, kae fai mai me i a latou e ‘saga‵saga pelā me se tupu fafine’ i luga i te potukau o takitaki fakapolitiki. Nei la, a tino kolā e fai pelā me ne mouku ma‵sei e fakamata‵mata, kae e se ‵tagi mautuutu. Kae ko pili fua o mafuli te tulaga tenā.

14. (a) Ko te taimi fea ka ‘fai ei a lili’ o Kelisiano ‵loi, kae kaia? (e) E fetaui pefea a te mainaga fou o tatou e uiga ki te Mataio 13:42 mo te manatu i te Salamo 112:10? (Onoono ki te fakamatalaga i te fakaotiga.)

¹⁴ I te taimi o te fakalavelave lasi, māfai ko oti ne fakaseai atu a lotu ‵se katoa, ka ‵tele eiloa olotou tino o ‵sala se koga mo olotou ‵muni kae ka seai se koga ‵muni e maua ne latou. (Luka 23:30; Faka. 6:15-17) I te taimi e iloa ei ne latou me ko se mafai o ‵sao latou, ka ‵tagi ei latou mo te fanoa‵noa kae ‘fai olotou lili’ i te kaitāua. E ‵tusa mo te valoaga a Iesu e uiga ki te fakalavelave lasi, “ka ‵tagi fanoa‵noa latou” i te vaitaimi pouli tenā.”e​—Mata. 24:30; Faka. 1:7.

15. Ne a mea ka ‵tupu ki mouku ma‵sei, kae ka tupu mafea a te mea tenā?

¹⁵ A te fa o mea, ka ‵pei atu ki loto i te afi ‵ka ulaula. Ne a mea ka ‵tupu ki fusi mouku ma‵sei konā? A te kau agelu “ka ‵pei ne latou ki loto i te afi ‵ka ulaula.” (Mata. 13:42) E fakauiga eiloa ki te lotou fakaseaiga se-gata-mai. Tela la, a tino kolā ne ‵kau ki fakapotopotoga o lotu ‵se ka fakaseai atu i te vaega fakaoti o te fakalavelave lasi, i Amaketo.​—Mala. 4:1.

16, 17. (a) Se a te mea fakaoti ka tupu ne faipati ki ei a Iesu i tena tala fakatusa? (e) Kaia e fakaiku ei ne tatou me i te fakataunuga o te mea tenā ka tupu i aso mai mua?

¹⁶ A te lima o mea, ka maina mai. Ne fakaoti ne Iesu tena valoaga i ana pati penei: “I te taimi tenā, ka maina mai i ei a tino amio‵tonu e pelā mo te la i te Malo o te lotou Tamana.” (Mata. 13:43) Ka tupu mafea a te mea tenā kae i fea foki? A te fakataunuga o pati konei ka ‵tupu i aso mai mua. Ne ‵valo mai ne Iesu se mea telā ka tupu i te lagi i aso mai mua, kae e sē se mea telā e tupu nei i te lalolagi.f Ke na mafau‵fau nei ki pogai e lua ne fakaiku ei penei.

¹⁷ A te mea muamua ko te fesili me “mafea.” Ne tali mai a Iesu penei: “I te taimi tenā, ka maina mai i ei a tino amio‵tonu.” A te tugapati “i te taimi tenā” e mautinoa eiloa me e fakasino atu ki mea kolā ne fatoa oti ne fai mai ne Iesu me ka ‵tupu, e aofia i ei te ‘‵peiga o mouku ma‵sei ki loto i te afi ‵ka ulaula.’ Ka tupu a te mea tenā i te vaega fakaoti o te fakalavelave lasi. Tela la, a te ‘maina mai’ o te kau fakaekegina se mea foki telā e ‵tau o tupu i aso mai mua. A te lua ko te fesili me “i fea.” Ne fai mai Iesu me i tino amio‵tonu ka ‘maina i te Malo.’ Se a te uiga o te mea tenā? Kafai ko oti atu te vaega muamua o te fakalavelave lasi, ko oti ne ‵tau o maua ne tino fakamaoni kae fakaekegina katoa kolā koi ‵nofo i te lalolagi a te lotou toe fakamailogaga. Kae e pelā mo te valoaga a Iesu e uiga ki te fakalavelave lasi, ka ‵luku latou ki te lagi. (Mata. 24:31) Tenā te koga ka maina ei latou “i te Malo o te lotou Tamana,” kae mai tua malie o te taua i Amaketo, ka ‵kau fakatasi latou e pelā me ko te fafine fiafia telā ka fakaipoipo mo Iesu i te taimi o te “fakaipoipoga a te Tamā Mamoe.”​—Faka. 19:6-9.

TE AOGA O MEA KONEI KI A TATOU

18, 19. Ka aoga pefea ki a tatou taki tokotasi a te ‵tou malamalama i te tala fakatusa a Iesu e uiga ki saito mo mouku ma‵sei?

¹⁸ Ne a mea aoga e maua ne tatou taki tokotasi mai te ata manino ne maua ne tatou mai te tala fakatusa tenei? Ke mafau‵fau ki auala e tolu. Muamua la, e fai ei ke ‵poko te iloa o tatou. E fakaasi mai i te tala fakatusa a te pogai tāua ne talia ei ne Ieova a amioga ma‵sei. Ne “kufaki ne ia . . . a ipu o te kaitaua” ke fakatoka ei a “ipu o te alofa”​—ko te potukau o saito.g (Loma 9:22-24) A te lua o mea e fakamalosi aka ei te ‵tou loto tali‵tonu. I te pili mai o te gataga, ka taua malosi mai eiloa a ‵tou fili ki a tatou kae “e se mafai o fakatakavale ne latou” a tatou. (Faitau te Ielemia 1:19.) E pelā eiloa mo Ieova ne puipui ne ia te potukau e pelā me ne saito i te gasologa o taimi, ka ‵kau fakatasi mai foki a te ‵tou Tamana i te lagi e auala i a Iesu mo te kau agelu “i aso katoa” mai mua nei.​—Mata. 28:20.

¹⁹ A te tolu o mea, ko mafai o iloa ne tatou mai te tala fakatusa me ko oi e aofia i te potukau e pelā me ne saito. Kaia e tāua ‵ki ei a te mea tenā? E tāua ‵ki ke iloa ne tatou me ko oi a Kelisiano kolā e fai pelā me ne saito, ke maua aka ei te tali ki te fesili telā ne fakasae aka ne Iesu i te suā vaega o tena valoaga e uiga ki aso fakaoti. Ne fesili mai a ia penei: “Ko oi la te tavini fakamaoni kae poto?” (Mata. 24:45) A mataupu e lua kolā ka ‵soko mai ka tuku mai ei a te tali fakamalie loto ki te fesili tenā.