‘Olo Atu o Fai a Soko, Papatiso Foki Latou’

“Telā la, olo atu koutou ki fenua katoa ke fai a tino i ei mo oku soko; papatiso foki latou. . . .  Akoako atu foki latou ke faka‵logo ki mea katoa kolā ne fakatonu atu ne au ki a koutou.”​—⁠MATAIO 28:​19, 20.

1. Se a te fakaikuga ne fai ne te fenua ko Isalaelu i te Mauga o Sinai?

I SE 3,500 tausaga ko ‵teka, ne fai ei ne se fenua se tautoga ki te Atua. I te taimi ne maopoopo ei latou i te Mauga o Sinai, ne fai atu ne te kau Isalaelu te lotou fakaikuga: “Ka fai ne matou a mea katoa kolā ne faipati mai ei te Aliki.” Mai te taimi eiloa tenā, ne tukugina atu ei a tino Isalaelu ki te Atua e pelā me ko ana “tino ‵tonu.” (Esoto 19:​5, 8; 24:⁠3) Ne fakamoe‵moe latou ke maua tena puipuiga kae ke ‵nofo atu foki a tupulaga mai tua ifo i te fenua “maumea kae ola.”​​—⁠Levitiko 20:⁠24.

2. Se a te fesokotakiga e mafai o maua ne tino i aso nei mo te Atua?

² E pelā mo te mea ne fakaasi mai ne te faisalamo ko Asafo, a tino Isalaelu ne “seki tausi ne latou te lotou feagaiga mo te Atua, ne seki tausi foki ne latou ana tulafono.” (Salamo 78:10) Ne seki fakamaoni latou o tausi te tautoga telā ne fai ne olotou tupuga ki a Ieova. Fakamuli ifo, ne galo atu te vā fakataugasoa fakapito o te fenua mo te Atua. (Failauga 5:4; Mataio 23:​37, 38) Telā la, ne ‵fuli ei te Atua ki “tino o fenua fakaa‵tea, i te filifiliga o nisi tino mai i a latou ke fai katoa mo ona tino tonu.” (Galuega 15:14) Kae i aso fakaoti konei, ko fakamaopoopo mai ne ia se “vaitino tokouke, ko se mafai eiloa o faitau a latou katoa ne se tino! Ne o‵mai katoa mai fenua katoa, matakāiga, tino valevale” kae taku ‵tonu mai mo te fia‵fia penei: “A te ‵tou fakaolataga e maua mai i te Atua, telā e nofo i tona nofogaaliki; e maua foki te ‵tou fakaolataga i te Tamā Mamoe!”​​—⁠Fakaasiga 7:​9, 10.

3. Ne a mea e ‵tau o fai ne se tino ke maua ne ia se fesokotakiga ‵lei mo te Atua?

³ Ke aofia i tino kolā e mafai o maua ne latou te fesokotakiga tāua tenā mo te Atua, e ‵tau o tuku atu ne se tino a ia eiloa ki a Ieova kae ke fakaasi atu te mea tenā e auala i te papatisoga ki te vai. A te faiga penā ko te fakalogo katoatoa ki te fakatonuga a Iesu ki ana soko: “Telā la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:​19, 20) Ne fakalogo‵logo a tino Isalaelu ki te faitauga o te “tusi o te feagaiga.” (Esoto 24:​3, 7, 8) Ne malamalama i ei latou i olotou tiute e ‵tau o fai ki a Ieova. E penā foki tatou, e tāua ‵ki ke iloa ne se tino a te iloaga tonu e uiga ki te loto o te Atua telā e maua i tena Muna ko te Tusi Tapu, mai mua o fai tena fakaikuga ke papatiso a ia.

4. Ne a mea e ‵tau o fai ne se tino ke talia ei a ia ke papatiso? (Ke aofia te pokisi mai luga nei.)

⁴ E manino ‵lei, me ne manako a Iesu ke maua ne ana soko se fakavae ‵mautakitaki o te lotou fakatuanaki a koi tuai o papatiso latou. Ne fakatonu atu a ia ki ana soko ke se olo atu fua o fai a soko kae ke akoako foki latou ke ‘faka‵logo ki mea katoa kolā ne fakatonu atu ne ia.’ (Mataio 7:​24, 25; Efeso 3:​17-​19) Telā la, a tino kolā ko toka ‵lei o papatiso, ko oti ne sukesuke ki te Tusi Tapu i se fia o masina io me se tausaga e tasi io me lua, ko te mea ke se fai fakavave te lotou ikuga kae ke lava foki te lotou iloaga. I te taimi o te papatisoga e ‵tau o tali ne te tino ka papatiso a fesili tāua e lua, mai te fai atu penei, Ao. Ona ko te mea ne faka‵mafa mai ne Iesu a te tāua ke fakamaoni tatou ki ‵tou ‘Ao io me ko ‵tou Ikai,’ ka fesoasoani malosi mai a te mea tenei ke iloilo faka‵lei ne tatou a te tāua o fesili e lua konei.​​—⁠Mataio 5:​37.

Te Salamo mo te Tukuatuga

5. Ne a mea tāua e lua kolā e faka‵mafa mai i te fesili muamua o te papatisoga?

⁵ A te fesili muamua o te papatisoga e ‵sili atu ei ki te tino me e mata, ko salamo a ia ki tena olaga mua kae ko oti ne tuku atu a ia ke fai te loto o Ieova. E faka‵mafa mai i te fesili tenei a mea tāua e lua kolā e ‵tau o fai mai mua o te papatisoga, ko te salamo mo te tukuatuga.

6, 7. (a) Kaia e manakogina ei ke salamo a tino katoa kolā ka papatiso? (e) Ne a ‵fuliga e ‵tau o fai māfai ko salamo se tino?

⁶ Kaia e ‵tau ei o salamo se tino a koi tuai o papatiso a ia? E fakamatala mai te apositolo ko Paulo: “E tonu i a tatou katoa nei, ne ‵pau eiloa mo latou, kae ne ola foki tatou i manako faka te foitino.” (Efeso 2:⁠3) A koi tuai o maua ne tatou te iloaga tonu e uiga ki te loto o te Atua, ne ola tatou e ‵tusa mo mea kolā e fakatāua ne te lalolagi mo olotou tulaga. Ne pule mai a Satani, te atua o te lalolagi nei, ki ‵tou olaga. (2 Kolinito 4:⁠4) I te taimi ko iloa ei ne tatou a te loto o te Atua, ne fakaiku aka ei ne tatou ke se toe ola e ‵tusa mo ‘manakoga faka te foitino kae ke pulea ne te loto o te Atua.’​​—⁠1 Petelu 4:⁠2.

⁷ E uke ‵ki eiloa a mea aogā e maua ne tatou mai te olaga fou tenei. E sili atu i mea katoa, e ‵tala mai i ei te avanoaga ke maua ne tatou se fesokotakiga tāua mo Ieova, telā ne fakatusa ne Tavita ki se ‵kamiga ke ulu ki loto i te “Faletapu” mo te “mauga tapu”​​—⁠se tauliaga tāua ‵ki. (Salamo 15:⁠1) Se mea ‵lei me e se ‵kami ne Ieova so se tino kae ko te tino fua telā e “fai ne ia mea katoa e loto ki ei te Atua, kae fai faeloa ne ia a mea ‵tonu, kae faipati ki muna tonu mo te alofa.” (Salamo 15:⁠2) E ‵tusa mo ‵tou tulaga mua a koi tuai o tauloto tatou ki te munatonu, kāti e ‵tau o fai ne tatou a nisi ‵fuliga​​—⁠i ‵tou amioga mo uiga​​—⁠ko te mea ke fetaui ‵lei tatou mo mea kolā e fakaasi mai konei. (1 Kolinito 6:​9-​11; Kolose 3:​5-​10) A te mea telā e fakamalosi aka i ei tatou ke fai a ‵fuliga penā ko te salamo​​—⁠ko te salamo tonu ki ‵tou olaga mua mo te loto malosi o fakafiafia atu ki a Ieova. E takitaki atu i ei tatou ke fai se ‵fuliga lasi​​—⁠ke tiakina te olaga kaimanako o te lalolagi kae taumafai o ola i se olaga telā e fakafiafia atu ki te Atua.​​—⁠Galuega 3:​19.

8. E fai pefea ne tatou ‵tou tukuatuga, kae e fetaui pefea te mea tenei mo te papatisoga?

⁸ A te lua o vaega o te fesili muamua o te papatisoga e ‵sili atu ei ki tino papatiso me e mata, ko oti ne tuku atu ne latou a latou eiloa ki a Ieova ke fai tena loto. A te tukuatuga se vaega tāua telā e ‵tau o fai mai mua o te papatisoga. E fai te mea tenā e auala i te ‵talo, telā e fakaasi atu ei ne tatou ‵tou manakoga ke tuku atu ‵tou ola mō Ieova e auala i a Keliso. (Loma 14:​7, 8; 2 Kolinito 5:​15) I te faiga penā, ko fai ei a Ieova mo fai ‵tou Matai mo ‵tou Pule, kae e pelā mo Iesu e fia‵fia eiloa tatou o fai te loto o te Atua. (Salamo 40:8; Efeso 6:⁠6) A te tautoga ‵malu tenei ki a Ieova e fai fua fakatasi. Ona ko te mea e fai lēmū eiloa ne tatou ‵tou tukuatuga, a te aso e papatiso ei tatou se fakaasiga tenā ki tino katoa me ko oti ne fai ne tatou te tautoga ‵malu tenā ki ‵tou Tamana i te lagi.​​—⁠Loma 10:⁠10.

9, 10. (a) Ne a mea e aofia i te faiga o te loto o te Atua? (e) Ne talia pefea ne ofisa o te kau Nasi a te uiga o ‵tou tukuatuga?

⁹ Ne a mea e aofia i te fakaakoakoga a Iesu ke fai te loto o te Atua? Ne fai atu Iesu ki ana soko: “So se tino e tautali mai i a au, ke se mafaufau ki a ia eiloa, kae ke amo tena sataulo, ko tautali mai ei i a au.” (Mataio 16:24) E fakaasi mai ne ia i konei a mea e tolu kolā e ‵tau o fai ne tatou. Muamua la, e ‵tau mo se tino o “se mafaufau ki a ia eiloa.” I nisi tugāpati e ‵tau o ‵teke tatou ki ‵tou manakoga kaimanako kae se ‵lei, kae ke talia ne tatou a pati fakatonutonu mo fakatakitakiga a te Atua. A te lua o mea ko te ‘amo o ‵tou sataulo.’ I aso o Iesu, a te sataulo se fakailoga o te masiasi mo te logo‵mae. E pelā me ne Kelisiano, e talia ne tatou a logo‵maega ona ko te tala ‵lei. (2 Timoteo 1:⁠8) E ui eiloa e fakatauemu kae fakamasei ne te lalolagi a tatou, e pelā mo Keliso, e se ‘fia ‵saga atu tatou ki mea fakalumaluma’ konā, kae fia‵fia eiloa tatou ki te iloaga me ko fakafiafia ne tatou a te Atua. (Epelu 12:⁠2) A te ‵toe mea, ko te “tautali” atu faeloa i a Iesu.​​—⁠Salamo 73:26; 119:44; 145:⁠2.

¹⁰ Se mea gali me ko malamalama a nisi tino ‵teke i te tukuatuga telā ne fai ne Molimau a Ieova ke tavini katoatoa atu latou ki te Atua. E pelā mo te falepuipui matagā ko Buchenwald, i Nasi Siamani, ne ‵tau o saina ne Molimau, kolā e ita fitifiti ma fakafiti te lotou talitonuga, se pepa telā e tusi i ei a pati konei: “Au se Tino Akoga fakamaoni i te Tusi Tapu kae e se mafai o ofa ne au taku tautoga ko oti ne fai ki a Ieova.” E fakaasi faka‵lei mai i konei a te kilokiloga a tavini tukugina atu kae fakamaoni katoa a te Atua!​​—⁠Galuega 5:​32.

Ko Fakamailogagina e Pelā me se Tokotasi o Molimau a Ieova

11. Se a te tauliaga ka maua ne se tino telā ka papatiso?

¹¹ A te lua o fesili e ‵sili atu ki te tino papatiso, me e mata e malamalama a ia me i tena papatisoga se fakamailoga me ko fai a ia e pelā me se tokotasi o Molimau a Ieova. Mai tua o te papatisoga, ko fai ei a ia mo fai se faifeau ko oti ne faū kae tauave ne ia te igoa o Ieova. E fai eiloa te mea tenei mo fai se tauliaga lasi kae se tiute tāua ‵ki foki. E fai foki i ei ke maua ne te tino papatiso te fakaolataga se-gata-mai, māfai e tumau a ia i te fakamaoni ki a Ieova.​​—⁠Mataio 24:⁠13.

12. Se a te tiute telā e olo tasi mo te tauliga ke tauave te igoa o Ieova?

¹² Ao, se mea tafasili eiloa i te gali ke tauave ne koe te igoa o te Atua, ko Ieova. Ne fai mai te pelofeta ko Mika: “A malo katoa e tapuaki kae faka‵logo ki olotou atua, kae ko matou e tapuaki kae faka‵logo ki te Aliki te motou Atua ki te se gata mai.” (Mika 4:⁠5) E se gata i ei, e isi se tiute telā e maua mai i te tulaga ‵malu tenei. E ‵tau eiloa o kausaki atu tatou ke ola i se olaga telā e faka‵malu i ei te igoa o Ieova, telā e tauave ne tatou. Ne fakamasaua mai ne Paulo ki Kelisiano i Loma, me kafai e se fai ne se tino a mea kolā e talai atu ne ia, ka “takumaseigina” io me masiasi i ei te igoa o te Atua.​​—⁠Loma 2:​21-​24.

13. Kaia e maua ei ne tavini tukugina atu a Ieova a te tiute ke molimau atu e uiga ki te lotou Atua?

¹³ I te taimi ko fai i ei se tino mo fai se Molimau a Ieova, e ‵tau o talia ne ia te tiute ke molimau atu e uiga ki tena Atua. Ne ‵kami ne Ieova te fenua tukugina atu o Isalaelu ke fai mo fai se molimau ki ana uiga Fakaatua. (Isaia 43:​10-​12, 21) Kae ne fakatamala te fenua o fakataunu te tiute tenei, kae ne galo katoatoa ei i a latou te taliaga a Ieova. I aso nei, e fakamata‵mata a Kelisiano ‵tonu ki te tauliaga tenei, ke molimau atu e uiga ki a Ieova. E molimau tatou e uiga ki a ia me e a‵lofa tatou ki a ia kae ma‵nako foki ke faka‵malu tena igoa. E mafai pefea o ‵nofo ‵mū tatou māfai e iloa ne tatou te munatonu e uiga ki ‵tou Tamana i te lagi mo ana fuafuaga? E ‵pau ‵tou lagonaga mo te apositolo ko Paulo i te taimi ne fai mai ei a ia: “Au e pulea ne fakatonuga ke fai ne au. Kae ka pefea eiloa i te masei a mea ka ‵tupu ki a au, manafai e se folafola ne au a te tala ‵lei!”​​—⁠1 Kolinito 9:​16.

14, 15. (a) Se a te tusaga o te fakapotopotoga a Ieova ki te ‵tou gasolo atu ki mua i te feitu faka-te-agaga? (e) Ne a fakatokaga ne fai ke fesoasoani mai ki a tatou i te feitu faka-te-agaga?

¹⁴ E fakamasaua atu foki ne te lua o fesili ki te tino papatiso tena tiute ke ga‵lue fakatasi mo te fakapotopotoga a Ieova telā e takitakigina ne te agaga tapu. E se mafai o tavini atu tatou i a tatou eiloa ki te Atua, kae e ‵tau o maua ne tatou te fesoasoani, te ‵lago malosi mo fakamalosiga mai ‵tou “taina tali‵tonu.” (1 Petelu 2:​17; 1 Kolinito 12:​12, 13) E tāua ‵ki te fakapotopotoga a te Atua ki ‵tou gasolo atu ki mua i te feitu faka-te-agaga. E tuku mai i ei a tusi faka-te-Tusi Tapu e uke kolā e fesoasoani mai ke gasolo tatou ki mua i te iloaga tonu, ke ‵poto tatou māfai ko fe‵paki mo fakalavelave, kae ke fakamalosi aka foki se fesokotakiga pili mo te Atua. E pelā mo te mātua telā e fagai kae tausi faka‵lei ki tena tama, e tuku mai ne te “tavini fakamaoni kae poto” a meakai faka-te-agaga e uke i te taimi tonu ke gasolo atu faeloa tatou ki mua.​​—⁠Mataio 24:​45-​47; 1 Tesalonia 2:​7, 8.

¹⁵ I fakatasiga i vaiaso takitasi, e maua ne tino o Ieova a akoakoga mo fakamalosiga ke fai pelā me ne Molimau fakamaoni a Ieova. (Epelu 10:​24, 25) E akoakogina tatou i te Akoga mō Tino Talai ke mafai o fai‵pati atu tatou i mua o tino, kae e akoakogina tatou i te Fakatasiga mō te Galuega Talai ke fakaasi atu ne tatou ‵tou fekau i se auala magoi. I ‵tou fakatasiga mo ‵tou sukesukega totino ki tusi faka-te-Tusi Tapu, e lavea i ei ne tatou te galuega a te agaga o Ieova i te takitakiga o tena fakapotopotoga. E auala i fakatokaga masani konei, e fakaasi mai ne Ieova ki a tatou a mea fakama‵taku, kae akoako ne ia tatou ke fai pelā me ne faifeau ma‵goi, kae fesoasoani mai foki ke mataala faeloa tatou i te feitu faka-te-agaga.​​—⁠Salamo 19:​7, 8, 11; 1 Tesalonia 5:​6, 11; 1 Timoteo 4:​13.

Te Pogai o Tau Fakaikuga

16. Se a te pogai e fakamalosi aka ei tatou ke tuku atu ki a Ieova?

¹⁶ A fesili e lua o te papatisoga e fakamasaua atu ki tino papatiso a te tāua o te papatisoga ki te vai mo tiute kolā e maua mai i ei. Se a la te pogai telā e ‵tau o fakamalosi atu ki a latou ke fai te lotou fakaikuga ke papatiso? E fai tatou mo fai ne soko papatiso, ona ko te mea ne “māfua” mai i a Ieova, kae e se ko te faimālō mai o se tino. (Ioane 6:​44) Ona ko “te Atua ko te alofa,” e se pule mālō mai ne ia te lagi mo te lalolagi, kae pule mai a ia mo te alofa. (1 Ioane 4:⁠8) E fakapili‵pili atu tatou ki a Ieova ona ko ana uiga ‵gali mo ana faifaiga ki a tatou. Ne tuku mai ne Ieova a tena Tama eiloa e tokotasi ki a tatou, kae tuku mai foki ki a tatou a te ‵toe fakamoemoega ‵lei mō aso mai mua. (Ioane 3:​16) Ona ko te mea tenā, e fakamalosi mai ei ki a tatou ke tuku atu ‵tou ola ki a ia.​​—⁠Faataoto 3;9; 2 Kolinito 5:​14, 15.

17. Ne a mea ne seki tuku atu tatou ki ei?

¹⁷ E se tuku atu ne tatou a tatou eiloa ki se mea io me se galuega, kae ki a Ieova eiloa. E mafai o mafuli te galuega ne tuku atu ne ia ki ana tino, kae e tumau eiloa te lotou tukuatuga ki a ia. E pelā me se fakaakoakoga, ne ‵kese ‵ki te galuega ne tuku atu ne ia ke fai ne Apelaamo mo te galuega ne fai ne Ielemia. (Kenese 13:​17, 18; Ielemia 1:​6, 7) Kae ne fakataunu eiloa ne laua a galuega ne tuku atu ne te Atua ki a laua ona ko te lā a‵lofa ki a Ieova mo te manakoga ke fai tena loto mo te fakamaoni. I taimi tenei o te gataga, e taumafai eiloa a soko papatiso o Keliso o fakataunu te fakatonuga a Keliso ke folafola atu te tala ‵lei o te Malo mo te faiga o soko. (Mataio 24:14; 28:​19, 20) A te faiga o te galuega tenā mo te loto kātoa se auala ‵lei ke fakaasi atu ne tatou te ‵tou a‵lofa mo te ‵tou tuku katoatoa atu ki ‵tou Tamana i te lagi.​​—⁠1 Ioane 5:⁠3.

18, 19. (a) Se a te fakailoaga e taku atu ne tatou i mua o tino e auala i ‵tou papatisoga? (e) Ne a mea ka sau‵tala ki ei i te mataupu telā e ‵soko mai?

¹⁸ E aunoa mo te fakalotolotolua, e ‵tala mai ne te papatisoga a te auala ki fakamanuiaga e uke, kae e se ‵tau o manatu māmā ki ei. (Luka 14:​26-​33) E fakaasi mai i ei a te fakaikuga telā e ‵tau o fakatāua ne tatou i lō nisi tiute aka. (Luka 9:​62) Kafai ko papatiso tatou, ko taku atu eiloa ne tatou i mua o tino a pati konei: “Te Atua tenei ko te ‵tou Atua ki te se gata mai, se gata mai eiloa; ka takitaki ne ia tatou i taimi katoa fakamuli.”​​—⁠Salamo 48:⁠14.

¹⁹ Ka fakamatala mai i te suā mataupu a nisi fesili kolā e mafai o ‵sae aka e uiga ki te papatisoga ki te vai. E mata, e isi ne pogai tāua e se fia papatiso ei se tino? E mata, a te matua o te tino se pogai ‵lei? E mafai pefea o fesoasoani atu tatou katoa ki te faka‵malūga o te papatisoga?

E Mafai o Fakamatala Mai ne Koe?

• Kaia e ‵tau ei o salamo a Kelisiano takitasi a koi tuai o papatiso latou?

• Se a te pogai telā e fakamalosi aka ei tatou ke fai ‵tou fakaikuga ke papatiso?

[Pokisi/Ata i te itulau e 20]

Fesili e Lua o te Papatisoga

E auala i te taulaga togiola a Iesu Keliso, e mata, ko oti koe ne salamo ki au agasala katoa kae tuku katoatoa atu koe ki a Ieova ke fai tena loto?

E mata, e malamalama koe me i tou tukuatuga mo te papatisoga ko fai ei koe mo fai se tokotasi o Molimau a Ieova i te ‵kau fakatasi mo te fakapotopotoga a te Atua telā e takitaki ne tena agaga tapu?

[Ata i te itulau e 21]

A te tukuatuga se tautoga ‵malu telā e fai atu ki a Ieova e auala i te ‵talo

[Ata i te itulau e 23]

E fakaasi atu i ‵tou galuega talai te ‵tou tukuatuga ki te Atua