Filifili a Taugasoa Kolā e A‵lofa ki te Atua

1-3. (a) Ne a mea e tauloto ne tatou mai te Faataoto 13:20? (e) Kaia e ‵tau ei o ‵poto tatou i te filifiliga o ‵tou taugasoa?

KAI onoono aka eiloa koe ki te auala e kilo atu ei se pepe ki ana mātua? Koi tuai a ia o faipati, ko kamata o tauloto a ia ki mea katoa e lavea kae lagona ne ia. Kafai ko gasolo o tai matua, e kamata o fakaakoako a ia ki ana mātua e aunoa mo taumafaiga ke fai penā. E se ‵poi foki tatou me mafai foki a tino ma‵tua o kamata o mafau‵fau kae fai a mea e pelā mo tino kolā e fakatasitasi mo latou i taimi e uke.

² E tauloto tatou i te Faataoto 13:20 penei: “A te tino e sa‵sale fakatasi mo tino ‵poto ka poto.” I konei, a te manatu ke “sa‵sale fakatasi” mo se tino e aofia i ei te filifiliga o taimi e uke ke fakatasitasi mo ia. E uke atu a mea e aofia i ei i lō te ‵nofo fakatasi fua mo se tino. E fakaasi mai ne se tino akoga ki te Tusi Tapu me i te sa‵sale fakatasi mo se tino e fai ei ke alofa kae pili koe ki a ia. E mafai o fakaakoako tatou ki uiga o tino māfai e uke ‵tou taimi e fakamaumau mo latou, maise eiloa māfai e ‵pili ‵tou fesokotakiga mo latou.

³ E mafai o fakamalosi tatou ne ‵tou taugasoa ki auala ‵lei io me ko auala ma‵sei. E faka‵soko mai te Faataoto 13:20: “Te tino telā e fai mea fakatasi mo tino va‵lea ka iku atu ki te masei.” I te ‵gana Epelu, a te “fai mea fakatasi mo” se tino e mafai o fakauiga ki te “fai taugasoa” mo te tino tenā. (Faataoto 22:24; Famasino 14:20) A taugasoa kolā e a‵lofa ki te Atua, ka fakamalosi mai ki a tatou ke tumau i te fakamaoni ki a ia. Ko te mea ke filifili faka‵lei ‵tou taugasoa, ke sau‵tala nei tatou ki vaegā tino kolā e filifili ne Ieova ke fai mo ana taugasoa.

KO OI A TAUGASOA O TE ATUA?

4. Kaia e fai ei pelā me se tauliaga tāua ke fai mo taugasoa o te Atua? Kaia ne taku ei ne Ieova a Apelaamo ko “toku taugasoa”?

⁴ A Ieova te Aliki Sili o te Iunivesi, ne tuku mai ne ia se avanoaga ki a tatou ke fai mo ana taugasoa. Se tauliaga tāua ‵ki eiloa tenā. E filifili faka‵lei ne Ieova ana taugasoa. E filifili ne ia a latou kolā e a‵lofa kae fakatuanaki ki a ia. Mafaufau ki a Apelaamo. Ne toka a ia o fai so se mea mō te Atua. E uke a taimi ne fakaasi faeloa ne Apelaamo me i a ia e fakatuanaki kae fakalogo. Ne lotomalie foki a ia o ofo atu tena tama ko Isaako. Ne fakatuanaki a Apelaamo me “e mafai ne te Atua o toe fakatu mai a Isaako mai te mate.” (Epelu 11:17-19; Kenese 22:1, 2, 9-13) Ne fakatuanaki a Apelaamo kae fakalogo, kae ne taku ne Ieova a ia ko “toku taugasoa.”—Isaia 41:8; Iakopo 2:21-23.

5. Ne a lagonaga o Ieova ki tino kolā e fakamaoni ki a ia?

⁵ E fakatāua eiloa ne Ieova ana taugasoa. Ana taugasoa e fakatāua atu ne latou te lotou fakamaoni ki a ia i lō so se isi mea aka. (Faitau te 2 Samuelu 22:26.) A latou e fakamaoni kae faka‵logo ona ko te lotou a‵lofa ki a ia. E fai mai te Tusi Tapu me i te Atua “e pili tena va fakataugasoa mo te tino fai mea tonu,” ko latou kolā e faka‵logo ki a ia. (Faataoto 3:32) E ‵kami eiloa ne Ieova ana taugasoa ke fai mo mālō tāua i tena “faleie.” E ‵kami mai ne ia latou ke tapuaki ki a ia kae ‵talo atu ki a ia i so se taimi.—Salamo 15:1-5.

6. E fakaasi atu pefea ne tatou a ‵tou a‵lofa ki a Iesu?

⁶ E fai mai a Iesu: “Kafai e alofa mai se tino ki a au, ka fakalogo a ia ki aku muna, kae ka alofa toku Tamana ki a ia.” (Ioane 14:23) Tela la, ke fai mo taugasoa o Ieova, e ‵tau foki mo tatou o a‵lofa ki a Iesu kae fai a mea ne akoako mai ne ia ki a tatou. E pelā mo te faka‵logo o tatou ki fakatonuga a Iesu ke talai atu te tala ‵lei kae fai a soko. (Mataio 28:19, 20; Ioane 14:15, 21) Ona ko ‵tou a‵lofa ki a Iesu, e ‵tau mo tatou o “tau‵tali fakapili‵pili atu i ana kalafaga.” (1 Petelu 2:21) E fiafia eiloa a Ieova māfai e lavea ne ia tatou e fai te ‵toe mea e mafai o fai ke fakaakoako ki tena Tama i ‵tou pati mo faiga.

7. Kaia e ‵tau o fakamautinoa aka ne tatou me i ‵tou taugasoa ko taugasoa foki o Ieova?

⁷ A taugasoa o Ieova e fakatuanaki, e fakamaoni, e faka‵logo kae e a‵lofa latou ki tena Tama. E a, e filifili ne tatou a vaegā taugasoa penā e pelā mo Ieova? Kafai e fakaakoako ou taugasoa ki a Iesu kae e fakalave‵lave i te akoakoga o tino e uiga ki te Malo o te Atua, e mafai eiloa o fesoasoani atu latou ki a koe ke fai pelā me se tino tai ‵lei atu kae ke tumau i te fakamaoni ki a Ieova.

TAULOTO MAI FAKAAKOAKOGA I TE TUSI TAPU

8. Se a te mea e gali ki a koe e uiga ki te va fakataugasoa o Luta mo Naomi?

⁸ I te Tusi Tapu, e uke a va fakataugasoa e fai‵tau ne tatou i ei, e pelā mo Luta mo te mātua o tena avaga ko Naomi. A fāfine konei e ‵kese a fenua ne o‵mai ei e penā foki mo te lā tupuakaga, kae ko Naomi ne matua fakafia atu ki a Luta. Kae ne ‵pili ‵ki te lā va fakataugasoa me ne a‵lofa eiloa lāua ki a Ieova. I te taimi ne manako a Naomi o tiakina a te fenua ko Moapi ke foki atu ki Isalaelu, “Kae ko Luta ne ‵piki eiloa ki a ia.” Ne fai atu a ia ki a Naomi: “Ou tino ka fai mo oku tino, kae ko tou Atua ko toku Atua.” (Luta 1:14, 16) A Luta ko ia eiloa ko atafai ki a Naomi. I te lā okoatuga ki Isalaelu, ne galue malosi a Luta o tausi tena taugasoa. Ne alofa malosi a Naomi ki a Luta telā ne tuku atu ne ia ne pati fakatonutonu ‵lei ki tou fafine. Ne fakalogo a Luta ki a ia, kae ne iku atu ei ki te mauaga ne lāua a fakamanuiaga e uke.—Luta 3:6.

9. Se a te mea e fakaofoofogia ki a koe e uiga ki te taugasoa o Tavita mo Ionatana?

⁹ A te suā fakaakoakoga gali o te va fakataugasoa ko Tavita mo Ionatana kolā ne fakamaoni katoa ki a Ieova. E ‵tusa mo te 30 tausaga te matua o Ionatana i a Tavita kae ko Ionatana ko ia te tino ka sui ne ia te tupu o Isalaelu. (1 Samuelu 17:33; 31:2; 2 Samuelu 5:4) Kae i te taimi ne iloa ei ne ia me ko oti ne filifili ne Ieova a Tavita ke fai mo tupu, ne seki loto masei io me fia fakataufai a ia ki a Tavita. I lō te fai penā, ne fai eiloa ne Ionatana a mea katoa ke ‵lago atu ki a Tavita. E pelā mo te taimi ne tu atu te ola o Tavita i se tulaga fakamataku, ne fesoasoani atu a Ionatana “o fakamalosi tena loto talitonu ki a Ieova.” Ne toka foki a ia o ofo tena ola mō Tavita. (1 Samuelu 23:16, 17) A Tavita foki se taugasoa fakamaoni. Ne tauto a ia me ka tausi ne ia te kāiga o Ionatana, kae ne tausi eiloa ne ia tena tautoga tenā faitalia me ko oti ne mate a Ionatana.—1 Samuelu 18:1; 20:15-17, 30-34; 2 Samuelu 9:1-7.

10. Ne a mea e tauloto ne koe mai talavou Epelu e tokotolu konei e uiga ki te fai taugasoa?

¹⁰ A Satalaka, Mesako mo Apeteniko ne taugasoa talavou Epelu kolā ne puke kea‵tea mai olotou fale kae koi fo‵liki eiloa. E ‵nofo ‵mao latou mai olotou kāiga, kae ne fakatau fesoasoani eiloa latou ke fakatumau te lotou fakamaoni ki a Ieova. Fakamuli ifo, i te taimi ko ma‵tua ei, ne tofotofo te lotou fakatuanaki ne te Tupu ko Nepukanesa telā ne fakatonu atu ke ifo latou ki te tupua aulo. Ne ita a Satalaka, Mesako mo Apeteniko ma ifo atu ki te tupua kae fai atu latou ki te tupu: “Ka se tavini atu matou ki ou atua io me ifo atu ki te tupua aulo telā ne fakatu aka ne koe.” I te taimi ne tofotofogina ei te lotou fakatuanaki, a te tokotolu taugasoa konei ne tumau eiloa i te fakamaoni ki te Atua.—Tanielu 1:1-17; 3:12, 16-28.

11. E iloa pefea ne tatou me i a Paulo mo Timoteo ne fai mō taugasoa ‵lei?

¹¹ I te taimi ne fetaui ei te apositolo ko Paulo mo te talavou tagata ko Timoteo, ne lavea ne ia me ne alofa a Timoteo ki a Ieova e penā foki tena fakapotopotoga. Tela la, ne fakaakoako ne Paulo a Timoteo ke fesoasoani atu ki taina mo tuagane i kogā koga valevale e uke. (Galuega 16:1-8; 17:10-14) Ne galue malosi eiloa a Timoteo, telā ne fai atu ei a Paulo: “Ne ga‵lue fakapologa eiloa māua i te fakatelega ki mua o te tala ‵lei.” Ne iloa faka‵lei ne Paulo me i a Timoteo ka “saga faka‵lei” ki taina mo tuagane. I taimi ne ga‵lue fakatasi lāua i te taviniga ki a Ieova, ne fai a Paulo mo Timoteo e pelā me ne taugasoa ‵lei.—Filipi 2:20-22; 1 Kolinito 4:17.

TE AUALA KE FILIFILI AKA ‵TOU TAUGASOA

12, 13. (a) Kaia e ‵tau ei o filifili faka‵lei a ‵tou taugasoa penā foki loa i loto i te fakapotopotoga? (e) Kaia ne tuku mai ei ne te apositolo ko Paulo a te fakamasauaga i te 1 Kolinito 15:33?

¹² I loto i te fakapotopotoga, e mafai o tauloto tatou mai ‵tou taina mo tuagane kae fakatau fesoasoani ke tumau i te fakamaoni. (Faitau te Loma 1:11, 12.) Kae i loto foki eiloa i te fakapotopotoga, e ‵tau foki o fakaeteete tatou i te filifiliga o ‵tou taugasoa ‵pili. E tokouke a taina mo tuagane ‵gali mai tuu mo ‵tupuakaga kese‵kese. E isi ne tino e ‵fou ki te fakapotopotoga, kae ko nisi tino ko leva ne tavini ki a Ieova mō se fia tausaga. E manakogina se taimi leva ke ati aka ne te tino tena alofa ki a Ieova, e pelā eiloa mo te leva o te taimi ke ‵pala se fuagalakau. Tela la, e manakogina ke fakaasi atu ne tatou a te kufaki mo te alofa ki te suā tino kae ke filifili faeloa mo te poto a ‵tou taugasoa.—Loma 14:1; 15:1; Epelu 5:12–6:3.

¹³ I nisi taimi, e mafai o sae aka se fakalavelave i loto i te fakapotoptoga, e manakogina ko tatou ke fakaeteete malosi. E mafai se taina io me se tuagane ko fai ne ia a mea kolā e taku mai ne te Tusi Tapu me e masei. Io me isi se tino ko kamata o fameo, se uiga telā e mafai o fakamasei ei te fakapotopotoga. E se ‵tau o ‵poi tatou i ei, i te senitenali muamua, i nisi taimi ne isi foki ne fakalavelave i loto i te fakapotopotoga. A te ‵tonuga loa, ne polopoloki atu a te apositolo ko Paulo ki Kelisiano konā: “Ke se faka‵segina koutou. A taugasoa ma‵sei e fakama‵sei ne latou a amioga ‵lei.” (1 Kolinito 15:12, 33) Ne fakamasaua atu a Paulo ki a Timoteo ke fakaeteete foki i te filifiliga o ana taugasoa ‵pili. E ‵tau foki o fai tatou penā i aso nei.—Faitau te 2 Timoteo 2:20-22.

14. E mafai pefea ne te filifiliga o ‵tou taugasoa o fakamasei ‵tou fesokotakiga mo Ieova?

¹⁴ E ‵tau mo tatou o puipui a ‵tou fesokotakiga mo Ieova. E tenā eiloa te ‵toe koloa tāua a tatou. Tela la, e ‵kalo kea‵tea tatou mai te fai taugasoa ki te tino telā e mafai o fakavaivai mai ki ‵tou fakatuanaki kae fakamasei ‵tou fesokotakiga mo Ieova. E pelā eiloa mo te omomi telā e ufi ki te vinika e se mafai o maua mai ei te vai, e se mafai o fai taugasoa tatou mo latou kolā e fai mea ma‵sei kae fakamoemoe me ka faigofie ki a tatou ke fai a mea ‵lei. E ‵tau mo tatou o filifili faka‵lei a ‵tou taugasoa ‵pili.—1 Kolinito 5:6; 2 Tesalonia 3:6, 7, 14.

15. Ne a mea e mafai ne koe o fai ke maua ne taugasoa ‵lei i te fakapotopotoga?

¹⁵ I loto i te fakapotopotoga, e maua i ei ne koe a tino kolā e a‵lofa tonu ki a Ieova. E mafai o fai latou mo ou taugasoa ‵pili. (Salamo 133:1) Sa ‵sala ki taugasoa kolā e kautama koulua io me ‵pau lua ‵tupuakaga. Masaua i a Ionatana ne matua fakafia atu ki a Tavita, kae ko Luta ne foliki ‵ki ki a Naomi. E ma‵nako tatou o tau‵tali i pati a te Tusi Tapu: “‵Tala otou loto ke ma‵tala ‵lei.” (2 Kolinito 6:13; faitau te 1 Petelu 2:17.) Kae ko te lasi o tou fakaakoako ki a Ieova, ko te tokouke foki o tino e ma‵nako ke fai taugasoa ki a koe.

MĀFAI KO ISI NE FAKALAVELAVE

16, 17. Kafai se tino e fakafanoanoa mai ki a tatou i te fakapotopotoga, se a te mea e se ‵tau o fai ne tatou?

¹⁶ I loto i te kāiga, e kese‵kese a uiga o tino taki tokotasi, mafaufauga, mo te auala e fai ei ne latou a mea. E penā foki eiloa i loto i te fakapotopotoga. A te kese‵kesega tenei e fai ei ke gali te olaga, kae mafai foki o uke a mea e tauloto ne tatou mai te suā tino. Kae i nisi taimi a ‵tou uiga kese‵kese e mafai ei o fai ke se fia‵fia tatou ki ‵tou taina mo tuagane ona ko te sē malamalama. I nisi taimi, e mafai o se fia‵fia tatou ki se mea io me logo‵mae ‵tou lagonaga. (Faataoto 12:18) E mata, e ‵tau o talia ne tatou a fakalavelave penā ke fakavāivāi mai io me ‵vae ei tatou kea‵tea mo te fakapotopotoga?

¹⁷ Ikai. Kafai foki eiloa e se fia‵fia tatou ki se tino, e se ‵tau eiloa o tiakina ne tatou a te fakapotopotoga. E se ko Ieova te tino e ita tatou ki ei. Ne tuku mai ne ia te ola mo nisi mea aka katoa. E ‵tau eiloa o a‵lofa kae fakamaoni tatou ki a ia. (Fakaasiga 4:11) A te fakapotopotoga se meaalofa mai i a Ieova telā e fakamalosi mai ki ‵tou fakatuanaki. (Epelu 13:17) E se ‵tau eiloa mo tatou o ‵teke atu ki tena meaalofa ona fua ko ‵tou se fia‵fia ki se tino.—Faitau te Salamo 119:165.

18. (a) Se a te mea ka fesoasoani mai ke ‵kau fakatasi tatou mo ‵tou taina mo tuagane? (e) Kaia e ‵tau o fakamagalo atu ne tatou a nisi tino?

¹⁸ E a‵lofa tatou ki ‵tou taina mo tuagane kae ma‵nako o ‵kau fakatasi mo latou. E se fakamoemoe a Ieova ko tino ke ‵lei katoatoa, kae e ‵tau foki o fai tatou penā. (Faataoto 17:9; 1 Petelu 4:8) E fai mea ‵se katoa tatou, kae ko te alofa e fai ne ia ko tatou ke tumau i te “fakatau fakamagalo atu te suā tino ki te suā tino.” (Kolose 3:13) A te alofa e fai ei ke mo a e fakalasilasi ne tatou se tamā fakalavelave. E tonu, kafai e se fia‵fia tatou ki se tino, e mafai o faigata ke se mafaufau ki ei. E faigofie atu ke kaitaua kae ita fakamoemoe ki te tino tenā. Kae fai ne te mea tenā ke fanoa‵noa tatou kae ke ita faeloa. Kae i te suā feitu, kafai e fakamagalo ne tatou se tino telā ne fai ne ia tatou ke kaitāua, ka filemu ‵tou mafaufau, ka ‵kau fakatasi a te fakapotopotoga, kae ko te ‵toe mea tāua, ko te mauaga o se fesokotakiga ‵lei mo Ieova.—Mataio 6:14, 15; Luka 17:3, 4; Loma 14:19.

MĀFAI KO FAKATEA SE TINO

19. Ko te taimi fea ko ‵tau o fakagata ne tatou a te ‵kau fakatasi mo se tino i te fakapotopotoga?

¹⁹ I loto i se kāiga fakatau a‵lofa, e fai katoa ne tino taki tokotasi lotou tusaga ke fakafiafia atu ki nisi tino. Kae mafaufau māfai se tino tokotasi ko ‵teke. E taumafai faeloa a tino katoa i te kāiga o fesoasoani ki tou tagata, kae ko ia e ‵teke ki ei. E mafai o fakaiku aka ne ia ke tiakina te fale, io me ko te ulu o te kāiga ko fai ke fano a ia kea‵tea. E mafai foki o tupu se mea penā i loto i te fakapotopotoga. E mafai o filifili ne se tino ke fai a mea kolā e fakafanoanoa atu ki a Ieova kae fakamasei foki i ei te fakapotopotoga. E ‵teke foki a ia ki pati fesoasoani mai te fakaasi atu i ana faifaiga me ko se fia aofia a ia i te fakapotopotoga. E mafai o fakaiku loa ne ia ke tiakina te fakapotopotoga, io me mafai o fakatea a ia. Kafai e tupu se mea penā, e fakaasi faka‵lei mai i te Tusi Tapu me ‵tau o “fakagata te otou ‵kau fakatasi” mo tou tagata. (Faitau te 1 Kolinito 5:11-13; 2 Ioane 9-11) E mafai o faigata te mea tenei māfai a ia se taugasoa o koe io me se tino o tou kāiga. Kae i vaegā tulaga penei, a ‵tou fakamaoni ki a Ieova e ‵tau o malosi atu i lō ‵tou fakamaoni ki so se tino.—Onoono ki te Fakamatalaga Fakaopoopo i te 8.

20, 21. (a) I se auala fea e fai ei te fakateaga o se tino mo fai se fakatokaga alofa? (e) Kaia e tāua ei ke filifili faka‵lei a ‵tou taugasoa?

²⁰ A te fakatea o se tino se fakatokaga alofa mai i a Ieova. E fakatumau aka i ei te ‵lei o te fakapotopotoga mai tino kolā e se fakatāua ne latou a tulaga amio‵tonu a Ieova. (1 Kolinito 5:7; Epelu 12:15, 16) E fesoasoani mai ke fakaasi atu ‵tou a‵lofa ki te igoa tapu o Ieova, ana tulaga ma‵luga penā foki eiloa ki a Ieova. (1 Petelu 1:15, 16) Kae ko te fakatokaga foki tenei ki te tino fakatea e fakaasi atu foki i ei te ‵tou a‵lofa ki a ia telā ko se fai mo vaega o te fakapotopotoga. A te polopolokiga ‵mafa tenei e mafai o fesoasoani atu ki a ia ke lavea ne ia tena mea e fai e masei kae fakamalosi atu ke ‵fuli a ia. E tokouke a tino ne faka‵tea ne ‵foki fakamuli mai ki a Ieova kae ne tali fiafia eiloa ne te fakapotopotoga a tena foki mai.—Epelu 12:11.

²¹ E mafai eiloa o fakamasei mai a ‵tou taugasoa i auala kese‵kese. Tela la, e tāua eiloa ke filifili faka‵lei ‵tou taugasoa. Kafai e a‵lofa tatou ki a latou kolā e alofa ki ei a Ieova, ka sikomia eiloa tatou ne tino kolā e mafai o fesoasoani mai ke tumau tatou i te fakamaoni ki a ia ki te se-gata-mai.