Ne Māfua Mai Fea Tatou?

KAIA E TĀUA EI TE TALI KI EI? Ne akoako atu ki tino e tokouke me ne māfua fakafuasei mai fua te olaga i te lalolagi nei. Ne fai atu ki a latou me e auala i se fakasologa o mea ‵tupu fakafuasei, ne fakamāfua aka i ei ne te evolusione a tino mo olotou lagonaga, te poto, mo manakoga faka-te-agaga.

Kae mafaufau la: Kafai ne māfua tonu mai tatou i te evolusione kae e seai se Atua, kāti ka fai eiloa a te matakāiga o tino e pelā me se tamaliki fakaalofa e seai ne ana mātua. Ka seai se koga ka maua i ei ne tino te poto telā e maluga atu—ko tena uiga ka seai se tino ke fesoasoani mai o ‵teu aka ‵tou fakalavelave. Ka fakalago‵lago eiloa tatou ki poto o tino ke fakaseai aka i ei a fakalavelave ‵tupu fakafuasei, ke faka‵lei aka a kinauga fakapolitiki, kae ke takitaki ei tatou māfai ko fe‵paki mo fakalavelave totino.

E mata, ka maua ne koe te filemu tonu o te mafaufau māfai e fakalagolago ki mea konei? Kafai e se penā loa, mafaufau la ki te filifiliga a se tino telā e lasi atu tena poto. E se gali fua te mea tenā, kae e ‵lei atu foki.

Pati a te Tusi Tapu

E akoako mai a te Tusi Tapu me i tino ne mea ‵tonu a te Atua ne faite. Ne seki māfua mai tatou i se mea sē alofa kae seai sena mafaufau e pelā mo te evolusione. E ‵kese mai ei, a tatou ne tama a se Tamana alofa kae poto. Ke mafaufau ki fakamatalaga ma‵nino konei mai i te Tusi Tapu.

Kenese 1:27. “Telā ne faite ei ne te Atua a te tino ke foliga ki a ia. Ne faite ne ia te tagata mo te fafine.”

Salamo 139:14. “Ko tavae koe ne au, me ‵tau o ma‵taku ki a koe a tino; e iloa ne au mo toku loto kātoa, i au mea katoa e fai e fakaofoofogina kae ‵gali.”

Mataio 19:4-6. “E a, e seki fai‵tau ne koutou i te Tusi? ‘A ia telā ne faite ne ia a tino i te kamataga, ne faite ne ia a te tagata mo te fafine. Ne fai atu, ‘Tenā te pogai ko tuku ei ne te tagata tena tamana mo tena mātua, kae fakatasi mo tena avaga, ko fai ei laua mo foitino e tasi.’ Tela la, ko se toe tokolua laua, ka ko tasi. A laua kolā ko oti ne fakatasi ne te Atua, e seai se tino e mafai ne ia o ‵tala.”

Galuega 17:24, 25. “Ko te Atua telā ne fai ne ia a te lalolagi mo mea katoa i ei, ko te Aliki o te lagi mo te lalolagi, kae se nofo i fale tapu ne faite ne tino. E se manako a ia o maua mai se mea mai galuega a tino mō ia, me ko ia fua e tuku mai ne ia te ola mo te manava, mo mea katoa eiloa ki tino katoa.”

Fakaasiga 4:11. “Te motou Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.”

Te Auala e Maua ei te Filemu Tonu o te Mafaufau Ona ko Tali Mai te Tusi Tapu

A te iloaga me e ‘maua ne kāiga katoa i te lalolagi olotou igoa’ mai te Atua, e fai ei ke ‵fuli ‵tou kilokiloga ki nisi tino. (Efeso 3:15) A te mauaga o se vaegā iloaga penā e pokotia foki i ei a ‵tou kilokiloga ki a tatou eiloa e pelā foki mo ‵tou fakalavelave. Ka pokotia foki te auala e mafau‵fau ei tatou i feitu konei.

Kafai e fe‵paki mo fakaikuga faiga‵ta, e se ‵tau o manava‵se malosi tatou ki manatu ‵teke o tino. I lō te fai penā, e fakalago‵lago tatou mo te tali‵tonu ki fakatakitakiga i te Tusi Tapu. Kaia? Me i “Tusitusiga Tapu katoa ne aumai mai te Atua, kae aogā ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei, ko te mea, ko te tino telā e tavini ki te Atua, ke maua ne ia te fakamaoniga, ke lava tena uta e fai ei ne ia so se galuega ‵lei.”—2 Timoteo 3:16, 17.

E tonu, a te fakagalue ne tatou a fakatakitakiga mai te Tusi Tapu e aofia i ei a taumafaiga mo te loto pulea. I nisi taimi kāti e manakogina ke fakagalue a fakatakitakiga i ei i auala kolā e tai ‵kese mo ‵tou mafaufauga. (Kenese 8:21) E tiga te feitu tenā, kafai e tali‵tonu tatou me ne faite tatou ne se Tamana faka-te-lagi alofa, se mea ‵tau ke fakaiku aka me e iloa ne ia te ‵toe auala ‵lei mō tatou. (Isaia 55:9) Tela la, e fakatalitonu mai tena Muna ki a tatou, penei: “Talitonu ki te Aliki [ko Ieova] mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto 3:5, 6) Kafai e fakagalue ne tatou te fakatakitakiga tenā, ka fakaseai atu eiloa a te ‵tou manava‵se māfai ko fe‵paki tatou mo fakalavelave mo fakaikuga.

Kafai ko fe‵paki mo faifaiga fakailoga tino, e se fakalavelave mai a te lagonaga se aogā, mai te mafau‵fau me se tāua tatou māfai ko fakatusa ki tino o nisi fenua. I lō te fai penā, ka ati aka ne tatou se kilokiloga ‵lei e uiga ki a tatou eiloa. Kaia? Me i te ‵tou Tamana, ko Ieova te Atua, “e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”—Galuega 10:34, 35.

A te iloaga o te mea nei e puipui foki i ei a tatou ke se fakamasei ne te fakailoga tino a ‵tou faifaiga ki nisi tino. Ka malamalama tatou me e seai eiloa se fakavae ‵lei o te fiasili atu i tino mai nisi fenua, me “ne faite ei ne te Atua a itukāiga katoa, kae ne fai foki ne ia ke ola latou i luga i te lalolagi kātoa.”—Galuega 17:26.

E tonu, a te iloa atu me ne faite tatou kae e atafai mai foki a te Tino ne faite ne ia a mea katoa, e fai pelā me se fakavae ke maua i ei te filemu tonu o te mafaufau. Kae e manakogina a mea e tai uke atu māfai e fakatumau ne tatou te filemu i loto i a tatou.

[Te Manatu Tāua i te itulau e 4]

E mata, ne māfua fakafuasei mai fua a tino?

[Ata i te itulau e 5]

E mafai eiloa o maua ne tatou te filemu tonu o te mafaufau, mai te iloaga me e atafai mai eiloa a te Tino ne faite ne ia mea katoa