MANATU I TE 2

Fai Pelā me se Sau‵talaga

2 Kolinito 2:17

ME E ‵TAU O FAI: Faipati i te auala masani, ke fakaasi atu ei ou lagonaga ‵tonu e uiga ki te mataupu mo au tino fakalogo‵logo.

Fakatoka faka‵lei kae ‵talo. ‵Talo ke mafai o saga tonu koe ki tau fekau kae e se ki tou manavase. Faka‵mau i tou mafaufau a manatu tāua e ‵tau o fakaasi atu. Fakamatala a manatu i au pati eiloa; kae sa taumafai o tauloto a pati takitasi i luga i te pepa.

Kafai e manako koe o faitau mai te Tusi Tapu io me se isi tusi aka, fai ke masani koe mo fuaiupu i ei ko te mea ke ‵lei tau faitau. Kafai e faitau ne koe ne pati a se tino, faitau atu i se auala e fakaasi atu ei a lagonaga ‵tonu o te tino, e pelā loa mo te auala masani e fai‵pati ei a tino.
Faipati atu mo te loto kātoa. Mafaufau ki te pogai e ‵tau ei o lagona ne au tino fakalogo‵logo a te fekau. Saga tonu ki a latou. Tenā ko mafai ei o fakaasi atu ne koe te alofa mo te atafai i te auala e tu ei koe, au tāga, mo ou foliga fakaasi.

A te faipati atu i te auala masani e se fakauiga ki te auala e sau‵tala ei koe mo se taugasoa. Fakatumau te ‵malu o tau fekau mai te faipati atu i se auala manino mo te fakaaogaga faka‵lei o te ‵gana.
Kilo ‵tonu ki au tino fakalogo‵logo. Ke tumau i te kilo ‵tonu atu ki mata o au tino fakalogo‵logo māfai e ‵lei ke fai penā. Kafai e fai ne koe se lāuga, kilo ‵tonu ki se tino e tokotasi i te kau fakalogo‵logo i nisi taimi, i lō te kilo atu ki a latou katoa.