Mea ka Fai ne te Atua ki Mea Ma‵sei

E fakaasi manino mai ne te Tusi Tapu a mea ka fai ne Ieova mo tena Tama, ko Iesu Keliso, ki logo‵maega kolā ne māfua mai i a Satani te Tiapolo. E folafola mai te Tusi Tapu: “Tenā te pogai ne fakaasi mai ei te Tama a te Atua, ke lepe ne ia a galuega a te Tiapolo.” (1 Ioane 3:8) Ka lepe katoa a te olaga masei tenei telā e fakavae ki te kaimanako, takalialia, mo amioga ma‵sei. Kae ko “te pule o te lalolagi tenei”—Satani te Tiapolo—ne folafola mai ne Iesu me “ka ‵tuli keatea.” (Ioane 12:31) E aunoa mo te fakamalosiga a Satani, ka mafai ei o maua atu se lalolagi fou kae amiotonu, kae ka fai te lalolagi tenei mo fai se koga filemu.—2 Petelu 3:13.

Kae e a latou kolā e ita fitifiti mo te loto ‵fika ke ‵fuli olotou auala kae tumau eiloa i te faiga o mea ma‵sei? Mafaufau la ki te folafolaga telā e fai ‵tonu mai penei: “A tino amiotonu kae fai mea ‵tonu ka ola i te fenua tenei. Ka ko te Atua ka tapale keatea ne ia a tagata amio ma‵sei mai i te fenua, kae unu keatea a tino agasala, e pelā me ne lakau e unu keatea mai i te laukele.” (Faataoto 2:21, 22) Ka ‵galo atu ei a fakamalosiga mai tino ma‵sei. Mai lalo i vaegā tulaga filemu penā, ka fakasaoloto malielie atu ei a tino faka‵logo mai te tulaga sē ‵lei katoatoa.—Loma 6:17, 18; 8:21.

I te lalolagi fou tenā, ka ave keatea pefea ne te Atua a mea ma‵sei? E se fai penā mai te fakaseaogaga o te meaalofa ko te saolotoga o fai a filifiliga kae fai a tino e pelā me ne masini kolā ko oti ne fakapolokalame. I lō te fai penā, ka akoako ne ia a tino faka‵logo ki ana auala, mai te fesoasoani atu ke fulitua atu latou ki mafaufauga mo faifaiga fakalogo‵mae.

Ne a mea ka fai ne te Atua ki fakalavelave ‵tupu fakafuasei? Ne folafola mai ne ia me ko pili o pule mai tena Malo ki te lalolagi. A te Tupu o te Malo tenā ne fakasopo aka ne te Atua, ko Iesu Keliso, telā e isi sena ‵mana ke faka‵lei a tino ma‵saki. (Mataio 14:14) E maua foki ne Iesu a te ‵mana ke pule faka‵lei atu ki malosi o te natula. (Maleko 4:35-41) Tela la, ka ‵galo atu ei a logo‵maega kolā e māfua mai i te “malaia [telā] e maua ne tino katoa.” (Failauga 9:11) Mai lalo i te pulega a Keliso, ka se toe ai ne fakalavelave faiga‵ta e oko atu ki tino.—Faataoto 1:33.

Kae e a te fia miliona o tino ‵lei kolā ne ‵mate atu mo te logo‵mae? Mai mua faeloa o te ‵toe fakafokimaiga ne ia o Lasalo ki te ola, ne fai mai a Iesu: “Au ko te toetu mo te ola.” (Ioane 11:25) Ao, e maua eiloa ne Iesu a te ‵mana ke toe faka‵tu, io me toe faka‵foki mai ki te ola, a tino kolā ko oti ne ‵mate!

Kafai e gali ki a koe a te manatu e uiga ki te ola i se lalolagi telā ka seai ne mea ma‵sei e ‵tupu i ei ki tino ‵lei, kaia e se taumafai ei koe, ke tauloto ki mea e uke atu e uiga ki te Atua tonu mo tena fuafuaga, mai te sukesuke ki te Tusi Tapu? Ka fia‵fia eiloa a Molimau a Ieova i te kogā koga e nofo koe i ei ke fesoasoani atu ki a koe ke malamalama i te Tusi Tapu. E ‵kami atu eiloa koe mo te atafai ne matou ke fesokotaki atu ki a latou io me e tusi atu ki te kau ‵lomi tusi o te mekesini tenei.