Fakamatalaga mō te Tusi mō Fakatasiga

MATI 1-7

KOLOA MAI TE MUNA A TE ATUA | NUMELA 7-8

“Akoakoga Mai te Fakai o Tino Isalaelu”

it-1 497 ¶3

Fakapotopotoga

I Isalaelu, e isi ne tino ne ‵tofi ke sui ne latou a te fenua. (Esl 10:14) Tela la, a “takitaki o matakāiga” ne tuku atu olotou taulaga i te otiga ne fakatu a te faleie tapu. (Num 7:1-11) E se gata i ei, a sui kolā ne fakatalitonugina e auala i te “feagaiga” i aso o Neemia, ne faitaulaga, tino Levi, mo “takitaki o tino.” (Nee 9:38–10:27) I te taimi ne olo i ei a tino Isalaelu i te koga lavaki, ne ‵kau atu ki a Kola, Tatano, Apilamo, mo Onu a “takitaki o te fakapotopotoga, ko tino filifilia o te fakapotopotoga, ko tāgata takutakua,” kolā e toko 250 o ‵teke ki a Mose mo Alona. (Num 16:1-3) Mai te fakalogo ki te fakatonuga a te Atua, ne fili ne Mose a toeaina o Isalaelu e toko 70 kolā ne takitaki ke fesoasoani atu ki a ia “ke amo a amoga a tino” kolā e se mafai o fai ne ia tokotasi. (Num 11:16, 17, 24, 25) I te Levitiko 4:15 e taku mai ei a “toeaina o te fakapotopotoga” kae foliga mai i sui o te fenua ko toeaina, ulu, famasino, mo takitaki.—Num 1:4, 16; Ios 23:2; 24:1.

it-2 796 ¶1

Leupena

I te fakai o tino Isalaelu, a tino Simeona mo tino Kato e ‵nofo i feitu o tino Leupena kae ‵nofo katoa latou i te feitu ki Saute o te faleie tapu. Kafai e faima‵laga, e mua a matakāiga e tolu o Iuta, Isakala, mo Sepulona kae ‵tao atu i olotou tua ko matakāiga e tolu konei kae takitaki latou ne te matakāiga o Leupena. (Num 2:10-16; 10:14-20) Tenei foki loa te fakatokaga ne ave i ei ne matakāiga a olotou taulaga i te aso o te fakatapūga o te faleie tapu.—Num 7:1, 2, 10-47.

Taemani Faka-te-Agaga

it-1 835

Toekimua, Tama Muamua

Ona ko toekimua tāgata i Isalaelu ko latou kolā ka sui ne latou a ulu o kāiga kese‵kese, ne sui ei ne latou te fenua kātoa. Ne fakasino atu a Ieova ki te fenua kātoa e pelā me ko tena “toekimua,” ne fai pelā me ko tena toekimua i fenua ona ko te feagaiga ne fai mo Apelaamo. (Eso 4:22) Ona ko te faka‵saoga ne ia olotou ola, ne fakatonu atu a Ieova me i so se “tama tagata muamua e fanau, faitalia me se tino io me se manu,” e ‵tau o fakatapu mā ia. (Eso 13:2) Tela la, ne tuku atu a tama tāgata toekimua ki te Atua.

MATI 8-14

KOLOA MAI TE MUNA A TE ATUA | NUMELA 9-10

“Te Auala e Takitaki ne Ieova Ana Tino”

it-1 398 ¶3

Fakai

A te ga‵suega o tino e tokouke konei mai se koga ki se suā koga (ne fakaasi mai ne Mose i te Numela 33 me nofo ki se 40 koga ne ‵nofo i ei) e fakaasi mai foki i ei me ne fakatoka faka‵lei latou. I te taimi e tu te kaumana i luga o te faleie tapu, a te fakai e ‵nofo i ei a tino e tumau loa i te koga tenā. Kafai ko gasue te kaumana, ko ga‵sue foki te fakai. “E ‵tusa mo te fakatonuga a Ieova e ‵nofo ei latou, kae e ‵tusa mo te fakatonuga a Ieova e faima‵laga ei latou.” (Num 9:15-23) E lua a pu kolā ne faite ki siliva ne tuki, ne fakailoa atu ei a fakatonuga a Ieova konei ki tino o te fakai. (Num 10:2, 5, 6) A te kese‵kese o tagi o pu e fakaasi atu ei me ko ‵tau o ga‵sue te fakai. A te taimi muamua ne tupu i ei a te mea tenei ko te “te lua o tausaga [1512 T.L.M.], i te lua o masina, i te po 20 o te masina.” Kafai ko ga‵sue, ko te pusa o te feagaiga e mua tafa atu ki ei ko matakāiga e tolu muamua kolā e takitaki ne Iuta tao atu ki ei ko Isakala mo Sepulona. Mai tua o latou ko tino Kelesona mo tino Melali kolā e sau ne latou a vaega o te faleie tapu kolā ne ‵tofi ki a latou. Tafa atu ki ei ko matakāiga e tolu kolā e mua a Leupena kae ‵tao atu a Simeona mo Kato. Mai tua o latou ko tino Koate mo te koga tapuaki, kae ko te tolu ko matakāiga e tolu ko Efalaima kae ‵tao atu ki ei ko Manase mo Peniamina. Kae i te fakaotiga ko matakāiga e tolu kolā e takitaki ne Tanu kae ‵tao atu ki ei ko Asela mo Nafatali kolā ko leoleo tafa ki tua. Tela la, a matakāiga e lua kolā e tokouke kae ma‵losi e olo i te feitu ki mua mo te feitu ki tua.—Num 10:11-28.

w11 4/15 4-5

E Mata, e Lavea ne Koe a te Fakamaoniga o te Takitakiga a te Atua?

E fakaasi atu pefea ne tatou a te loto fakafetai ki te takitakiga a te Atua? Ne fai mai te apositolo ko Paulo: “Ke faka‵logo ki a latou kolā e fai ne latou te takitakiga i a koutou kae ke ‵lago atu ki ei.” (Epe. 13:17) E se faigofie faeloa ke fai penā. Ke fai se fakaakoakoga: Mafaufau i a koe se tino Isalaelu telā ne ola i aso o Mose. Mai tua o se taimi leva ne sasale i ei koe ne se gasue a te pou. E pefea te leva ka tu i ei i konā? Se aso? Se vaiaso? Io me ne masina? Kāti ka mafaufau koe, ‘E mata e ‵tau o toe talatala katoa oku kope?’ I te taimi muamua, kāti ka talatala fua ne koe a kope kolā e manakogina. Kae mai tua o se fia o aso, ona ko te fi‵ta i te ‵sala ki ou kope, kāti ka talatala ne koe a mea katoa. Kae i te taimi ko tai oti ei ne talatala ou kope, ne lavea ne koe a te pou ko masagi—kae ko ‵tau o toe fakatoka ou kope! Ne seki faigofie te mea tenā. Kae tiga i ei ne ‵tau mo tino Isalaelu o “tiaki” fakavave te koga tenā.—Num 9:17-22.

Ne a ‵tou mea e fai māfai e maua ne tatou se fakatonuga mai te Atua? E mata, e ‵tau o fakagalue “fakavave”? Io me fai eiloa ne tatou a mea kolā ne masani o fai faeloa ne tatou? E mata, e iloa ne tatou a fakatonuga fou, e pelā mo te faiga o akoga faka-te-Tusi Tapu, talai ki tino e fai‵pati ki se ‵gana fakaa‵tea, ‵kau atu faeloa ki tapuakiga a kāiga, ga‵lue fakatasi mo te Komiti o Fakaimasaki, kae fai faka‵lei ‵tou amioga i taimi o fono? E fakaasi atu foki ne tatou te loto fakafetai ki te takitakiga a te Atua mai te talia o ana pati polopoloki. Kafai e ‵tau o fai se fakaikuga faigata, ke mo a ma tali‵tonu ki ‵tou poto totino kae ke ‵kilo atu tatou ki a Ieova mō tena takitakiga mo se puipuiga. E pelā me se tamaliki telā e ‵sala ki se puipuiga mai ana mātua māfai e poko se matagi malosi, e ‵sala foki tatou ki te puipuiga i te fakapotopotoga a Ieova, māfai e poko se matagi malosi, telā ko fakalavelave o te lalolagi tenei e pokotia i ei tatou.

Taemani Faka-te-Agaga

it-1 199 ¶3

Maopoopoga

Te Tāua o Maopoopoga. A te tāua ke ‵kau katoatoa atu ki te fakatokaga a Ieova ki maopoopoga ke maua a mea aoga faka-te-agaga e fakaasi mai i te fakamanatuga o te Paseka i te tausaga. So se tagata telā e ‵ma, e seki fano i se malaga kae seki kau atu ki te Paseka e ‵tau o tamate. (Num 9:9-14) I te taimi ne fakatonu atu te Tupu ko Hesekia ki tino Iuta mo Isalaelu ke ‵mai ki Ielusalema ke ‵kau ki te fakamanatuga o te Paseka, ne aofia i tena fekau a pati konei: “Tino Isalaelu, toe ‵foki mai ki a Ieova . . . Sa loto ma‵keke e pelā mo otou tupuga. Faka‵logo ki a Ieova kae o‵mai ki tena koga tapuaki telā ko oti ne fakatapu ne ia ki te se-gata-mai kae tavini atu ki a Ieova te otou Atua, ko te mea ke se oko atu ki a koe a tena kaitaua telā e ‵ka pelā me se afi me i a Ieova te otou Atua e alofa atafai kae alofa fakamagalo, kae ka se ‵fuli kea‵tea ana mata mai i a koutou māfai e toe ‵foki mai koutou ki a ia.” (2No 30:6-9) A te tino telā ne manako ke se kau eiloa ki te Paseka ne fakaasi faka‵lei mai me ko manako ke tiaki ne ia a te Atua. Kae tiga a fakamanatuga e pelā mo te Paseka ko se fakamanatu ne Kelisiano, ne fetaui ‵lei te fakatonuga a Paulo ke se tiaki ne latou a maopoopoga masani a tino o te Atua i ana pati konei: “Ke na mafau‵fau tatou te suā tino ki te suā tino o fakama‵losi atu ke fakatau a‵lofa kae fai a mea ‵lei, ke mo a ma ‵galo sāle tatou i ‵tou fakatasiga, e pelā mo te masani a nisi tino, kae ke fakamalosi atu te suā tino ki te suā tino, kae maise eiloa me ko iloa ne koutou i te aso tenā ko pili mai.”—Epe 10:24, 25; onoono ki te CONGREGATION.

MATI 15-21

KOLOA MAI TE MUNA A TE ATUA | NUMELA 11-12

“Kaia e ‵Tau o Kalo Kea‵tea Mai te Muimui?”

it-2 719 ¶4

Kinauga

Muimui. A te muimui e fakavāivāi ne ia se tino. Mai tua malie o te tiakinaga ne tino Isalaelu a Aikupito, ne kamata o muimui latou ki a Ieova, mai te ‵kilo atu ki mea ‵se e fai ne ana tavini ko Mose mo Alona kolā ne ‵tofi ne ia ke fai ne lāua te takitakiga. (Eso 16:2, 7) Fakamuli ifo, ne fakavāivāi atu a olotou fameo ki a Mose tenā ne fakatagi i ei ke tamate a ia. (Num 11:13-15) A te muimui e mafai o tamate ne ia a te tino muimui. Ne kilo atu a Ieova ki mea kolā ne fai ne tino muimui ki a Mose e pelā me ‵teke tonu ki Tena takitakiga. (Num 14:26-30) E tokouke a tino ne ‵mate ona ko te ‵kilo atu ki mea ‵se a nisi tino.

Taemani Faka-te-Agaga

it-2 309

Manai

Fakamatalaga. A te manai e “‵kena e pelā mo te fuaga o te koliano” kae “foliga” e pelā mo te pulukau o te peliuma, e ‵pili kae ‵kena e pelā loa me se penina. Kae ko tena tami e pelā me se “falaoa fakapa‵pa e kai mo te hani” io “me se keke magalo ne fai ki sinu.” Kafai ko oti ne tuki ki mea solo saito io me tuki i se talituki, e ‵tunu a te manai io me fai pelā me ne keke kae tao.—Eso 16:23, 31; Num 11:7, 8.

MATI 22-28

Taemani Faka-te-Agaga

it-1 740

Te Fenua Telā ne Tuku ne te Atua ki Tino Isalaelu

A TE fenua telā ne tuku ne te Atua ki tino Isalaelu se fenua ‵lei. I te taimi ne uga ne Mose a tino iloilo ke olo o iloilo a te Fenua o te Folafolaga kae ke puke ne fuataga mai i ei, ne aumai ne latou a mati, pomekalanite, mo kaufui vine lasi ‵ki kolā e sau ne tāgata tokolua i se amo! E tiga eiloa ne loto vāivāi latou ona ko te sē lava o te fakatuanaki ne lipoti mai eiloa ne latou: Te fenua “e ‵tafe i ei a susu mo hani.”—Num 13:23, 27.

APELILA 5-11

Taemani Faka-te-Agaga

g02 6/8 14 ¶2

Masima—Se Kope Tāua e Masani o Fakatau Atu

Ne fai foki te masima e pelā me se fakailoga o te tumau. Tela la, ne fakaigoa i te Tusi Tapu se feagaiga tumau ki “se feagaiga o te masima,” a tino kolā e aofia i te feagaiga e masani o ‵kai fakatasi kae fakaaoga te masima ke faka‵mautakitaki ki ei se feagaiga. (Numela 18:19) Mai lalo i te Tulafono faka-Mose, ne fakaopoopo a te masima ki taulaga kolā ne ofo i te fatafaitaulaga, e fakaasi mai ei me seai se mea masei i ei.

APELILA 12-18

KOLOA MAI TE MUNA A TE ATUA 20-21

w09 9/1 19 ¶5

Se Famasino Telā ne Tumau i te Fai o te Mea Tonu

Muamua la, ne seki fakatonu atu a te Atua ki a Mose ke faipati ki tino, i a latou ne tino ‵teke. Te lua, ne fakata‵mala a Mose mo Alona o faka‵malu a te Atua. ‘Ne seki faka‵malu ne koulua a au,’ ko pati a te Atua. (Fuaiupu e 12) Mai te fai atu “e ‵tau mo māua o aumai ne vai,” ne fai atu a Mose me pelā eiloa me ko lāua mo Alona ko tino ne aumai ne lāua te vai fakavavega, kae e se ko te Atua. Te tolu, a te fakasalaga e ‵pau eiloa mo te fakamasinoga ne fai i aso mua. Ne seki talia ne te Atua ke ulu atu a te kautama ‵teke ki loto i Kanana, ne fai foki ne ia penā ki a Mose mo Alona. (Numela 14:22, 23) Te fa, a Mose mo Alona ne takitaki o Isalaelu. A latou kolā e maua ne latou a tauliaga tāua, e uke foki a mea e manako a te Atua mai i a latou.—Luka 12:48.

APELILA 19-25

it-2 291

Valea

Se Mea Valea ke ‵Teke Atu ki a Ieova. A te pelofeta ko Palaamo ne valea mo tena manakoga ke fakamalaia ne ia a tino Isalaelu ke maua a tupe mai te tupu o Moapi ko Palako, kae ko Ieova ne fakaseaoga kae taofi ne ia ana taumafaiga konā. Ne tusi mai te apositolo ko Petelu me “ne taofi aka te malaga a te pelofeta valea tenā i te taimi ne faipati atu ei te asini telā e seai sena leo i se leo o se tagata.” E uiga ki te valea o Palaamo ne fakaaoga ne te apositolo a te pati Eleni pa·ra·phro·niʹa, telā e fakauiga ki te “tautali i te mafaufau o te suā tino.”—2Pe 2:15, 16; Num 22:26-31.

APELILA 26–ME 2

Taemani Faka-te-Agaga

it-1 359 ¶1-2

Tuakoi

E foliga mai i te vaevaega o te laukele i matakāiga ne fakavae ki mea konei e lua: te ikuga e maua mai i se faiga o te vili, mo te lasi o te matakāiga. E fakaasi mai ne te vili a te koga telā ka maua ne matakāiga takitasi, tela la, e vaevae mai ne ia a koga kesekese e ‵nofo i ei a matakāīga io me ko te laukele,e pelā mo te feitu ki Matu io me ko Saute, Saegala io me ko Togala, te feitu ki te tafatai io me ko koga maugā. A te ikuga e maua mai i te vili ne aumai mai i a Ieova ke fakaseai ei te loto masei io me ko kinauga i va o matakāiga. (Fat 16:33) Ne takitaki ne te Atua a te faiga o te mea tenei ko te mea ke fetaui ‵lei a mea e maua ne matakāiga takitasi mo te valoaga a Iakopo telā ne fai kae ko pili i ei o mate kae ne fakamau i te Kenese 49:1-33.

Kafai ko oti ne fakaasi mai ne te vili a te koga e nofo i ei se matakāiga, ko mafai foki o iloa a te lasi o te koga tenā e tusa mo te pogai i te lua: ko te lasi o te matakāiga. “E ‵tau o vaevae ne koutou te fenua mō otou kāiga mai te faiga o te vili. E ‵tau o lasi te tofi e tuku atu ki potukau kolā e tokouke, kae fakafoliki te tofi o potukau kolā e mu‵tana. Ko te koga e tu ki ei te vili tenā foki eiloa te tofi o te tino.” (Num 33:54) A te fakaikuga a te vili ki te koga, e tumau eiloa, kae mafai o fai ne fakama‵fuliga e tusa mo te lasi o te tofi. Tela la, i te iloaga me ko to lasi te koga e ‵nofo i ei te matakāiga o Iuta, ne fakafoliki te lotou koga ‵nofo mai te ‵vae atu se vaega ki te matakāiga o Simeona.—Ios 19:9.