Fakamatalaga mō te Tusi ko te ‵Tou Olaga mo te Galuega Talai
IANUALI 3-9
Taemani Faka-te-Agaga
w05 3/15 27 ¶6
Ne Manumalo a Samasoni Ona ko te Malosi o Ieova!
E tasi loa te mea ne mafaufau a Samasoni ke fakataunu ne ia, ko te taua atu ki tino Filisitia. Ne nofo a ia i te fale o se fafine talitāgata i Kasa ke mafai o taua atu ki fili o te Atua. Ne manako a Samasoni ki se koga mo ana faka‵lafi i te po i te fakai o te fili, ne maua aka ei ne ia te fale o se fafine talitāgata. Ne seki mafaufau a Samasoni ke fai ne ia se amioga masei. Ne tiaki ne ia te fale o te fafine i te valuapo, ne puke ne ia a mataloa o te fakai mo pou e lua i feitu kae amo ne ia ki luga i te taulu o te mauga e pili ki Hepelona, telā e 37 maila [60 km]. Ne fai ne ia te mea tenei ona ko te taliaga mo te malosi ne tuku atu ne te Atua.—Famasino 16:1-3.
IANUALI 10-16
KOLOA MAI TE MUNA A TE ATUA | FAMASINO 17-19
“A te sē Fakalogo ki Tulafono a te Atua e Iku Atu ki Fakalavelave”
it-2 390-391
Mika
1. Se tagata Efalaima. Ne soli ne Mika te tulafono i te valu o Tulafono e Sefulu (Eso 20:15), mai te puke ne ia e 1,100 tupe siliva mai tena mātua. I te taimi ne fakaasi kae toe fakafoki ne ia ki tena mātua, ne fai atu tou fafine: “Ka fakatapu eiloa ne au a tupe siliva i oku lima ki a Ieova ke fakaaoga ne taku tama ke faite ki ei se tupua lakau mo se tupua fiti. I te taimi nei ko toe faka‵foki atu ne au ki a koe.” Ne puke ne tou fafine a tupe siliva e 200 kae tuku atu ki te tino faite mea ki siliva, telā ne faite ne ia “se tupua lakau mo se tupua fiti” kae tuku atu ki loto i te fale o Mika. A Mika e isi sena “fale e tuku i ei ana atua,” kae ne faite foki ne ia se efota mo te telafimi kae tuku atu tena tama tagata e tokotasi ke fai pelā me se faitaulaga a ia. E tiga loa ne fai te fakatokaga tenei e pelā me se faifaiga ke faka‵malu i ei a Ieova, e ‵se te faifaiga tenei, me soli ne ia te tulafono telā e fakatapu i ei a te ifo ki tupua (Eso 20:4-6) kae e se fakaaoga foki ne ia te faleie tapu o Ieova mo ana faitaulaga (Fam 17: 1-6; Teu 12: 1-14) Fakamuli ifo ne puke ne Mika a Ionatana, mai te gafa o te tama a Mose ko Kelesoma ki tena fale, ke fai te tamataene Levi tenei mo fai tena faitaulaga. (Fam 18:4, 30) Ne faka‵se a Mika i a ia ko tokagamalie, kae ne fai mai: “Ko iloa nei ne au me ka fai ne Ieova a mea ‵lei ki a au.” (Fam 17:7-13) Kae ko Ionatana ne seki vau i te gafa o Alona tela la e se fetaui ‵lei a ia ki te taviniga fakafaitaulaga, telā ne fakaopoopo atu fua a te mea tenā ki te mea ‵se a Mika.—Num 3:10.
it-2 391 ¶2
Mika
Mai tua malie ifo, ne afuli ne Mika mo se potukau o tāgata a tino Tanu. I te lotou okoatuga kae ne fesili atu ki a latou me se a te mea e tupu, ne fai atu a Mika: “Ko oti ne puke ne koutou aku atua kolā ne faite ne au, kae olo foki koutou mo te faitaulaga. Ne a la aku mea koi ‵toe?” Tenā ne fai atu ei a tāgata Tanu me ka taua atu latou ki a ia māfai e tumau a ia i te tautali atu kae faipati ki luga. Ne lavea ne ia me ma‵losi atu a tino Tanu i a latou, tenā ne foki ei a Mika ki tena fale. (Fam 18:22-26) Ne tamate ne tino Tanu kae ‵sunu te fakai o Laisa, kae toe faite ne latou te fakai o Tanu i te koga tenā. Ne fai a Ionatana mo ana tama tāgata e pelā me ne faitaulaga ki tino Tanu, kolā “ne fakatu aka ne latou a te tupua lakau telā ne faite ne Mika, kae ne tumau eiloa i konā i aso katoa ne tu ei te fale o te Atua tonu i Sailo.”—Fam 18: 27-31.
IANUALI 17-23
KOLOA MAI TE MUNA A TE ATUA | FAMASINO 20-21
“Ke Tumau i te Fesili Atu ki a Ieova”
w11 9/15 32 ¶2
E Mafai Koe o Fai Pelā mo Fineaso Māfai ko Fepaki Koe mo Fakalavelave?
Mai tua o te pukemālōga kae tamate te avaga fakasalasala a se tagata Levi ne tāgata Kipea mai te matakāiga o Peniamina, ne olo atu a nisi matakāiga o taua ki tino Peniamina. (Fam 20: 1-11) Ne ‵talo latou ki te fesoasaoni o Ieova mai mua o olo ki te taua, kae ne takavale fakalua latou. (Fam. 20: 14-25) E mata ne fakaiku aka ne latou me se aoga olotou ‵talo? E mata e fiafia a Ieova ki te taua atu o latou ki te mea ‵se ne fai?
w11 9/15 32 ¶4
E Mafai Koe o Fai Pelā mo Fineaso Māfai ko Fepaki Koe mo Fakalavelave?
Se a te akoakoga e maua ne tatou mai te tala tenei? E isi ne fakalavelave e tumau loa i loto i te fakapotopotoga faitalia a taumafaiga a toeaina o ‵talo malosi ki te fesoasoani o te Atua. Kafai e tupu te mea tenei, e ‵tau o masaua ‵lei ne toeaina a pati a Iesu: “Tumau i te fakamolemole atu [io me ‵talo], kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou.” (Luka 11:9) Kafai foki e foliga mai me tai tuai te tali ki ‵talo, e ‵tau o loto tali‵tonu a ovasia i a Ieova ka tali mai eiloa i tena taimi tonu.
IANUALI 31–FEPUALI 6
KOLOA MAI TE MUNA A TE ATUA | LUTA 3-4
“Ati Aka Kae Fakatumau se Igoa ‵Lei”
w12 10/1 22 ¶5
“Se Fafine ‵Lei ‵Ki”
I te taimi ne faipati ei a Poasa, e mautinoa loa i tena ata faipati mo tena leo ‵lei ne fakamafanafana atu ki a Luta. Ne fai atu tou tagata: “Ke fakamanuia koe ne Ieova, e taku tama. Ko sili atu te alofa fakamaoni ne fakaasi mai ne koe i te taimi fakamuli tenei i lō te taimi muamua, me i a koe ne seki fano o ‵sala ki tamataene, faitalia me ma‵tiva io me mau‵mea latou.” (Luta 3:10) A“te taimi muamua” ne fakasino ki te alofa fakamaoni o Luta i te taimi ne ‵foki fakatasi mai ei mo Naomi ki Isalaelu kae tausi faka‵lei ne ia. A “te taimi fakamuli” ko te taimi nei. Ne lavea ne Poasa me ne faigofie fua ki te tamafine ko Luta ke ‵sala sena avaga i tamataene fatalia me maumea io me ma‵tiva. I lō te fai penā, ne manako a ia ke fai te mea ‵lei ki a Naomi penā foki mo te avaga a Naomi telā ko mate, ke mafai o fakatumau te igoa o te tagata ko mate i tena fenua tonu. Tela la, e faigofie fua ke lavea te pogai ne fiafia ei a Poasa ki te tamafine sē kaimanako tenei.
w12 10/1 23 ¶1
“Se Fafine ‵Lei ‵Ki”
Ko oko loa te fakamalie loto ki a Luta ke fakalogo ki pati a Poasa ne fai—i tou fafine ne lauiloa i tino e pelā me se “fafine ‵lei ‵ki”! E mautinoa eiloa me ko tena loto finafinau ke iloa ne ia a Ieova kae tavini ki a ia, ne maua ei ne ia se igoa ‵lei. Ne fakaasi atu foki ne ia te atafai lasi kae saga tonu ki a Naomi mo ana tino, mai te talia ne ia o faifaiga mo tū kolā ne seki masani a ia ki ei. Kafai e fakaakoako tatou ki te fakatuanaki o Luta, ka fakaasi atu ne tatou a te āva malosi ki faifaiga mo tū a nisi tino. Kafai e fai tatou penā, ka lavea foki ne tatou me ko ati aka ne tatou se igoa ‵lei ‵ki.
w12 10/1 24 ¶3
“Se Fafine ‵Lei ‵Ki”
Ne avaga a Poasa ki a Luta. Mai tua ifo, e fai‵tau tatou penei: “Ne fai ne Ieova ke faitama a ia kae fanau mai ne ia se tamaliki tagata.” Ne fakamanuia ne fāfine o Peteleema a Naomi kae tavae ne latou a Luta me ‵lei atu ki a Naomi i lō tama tāgata e tokofitu. Fakamuli ifo e tauloto ne tatou i te tama tagata a Luta ne fai pelā me se tupuga o te tupu malosi ko Tavita. (Luta 4:11-22) Kae ko Tavita se tupuga o Iesu Keliso.—Mataio 1:1.
FEPUALI 7-13
KOLOA MAI TE MUNA A TE ATUA | 1 SAMUELU 1-2
“‵Tala Tou Loto ki a Ieova i ‵Talo”
ia 55 ¶12
Ne ‵Tala ne ia Tena Loto ki te Atua i ‵Talo
12 Ne tuku mai ne Hana se fakaakoakoga ki tavini katoa a te Atua e uiga ki ‵talo. Ne ‵kami ne Ieova mo te alofa ana tino ke fai‵pati atu ki a ia e aunoa mo te fakatalave, ke ‵ligi atu ki a ia a mea e manava‵se latou ki ei e pelā loa me se tamaliki telā e talitonu ki tena mātua alofa. (Faitau te Salamo 62:8; 1 Tesalonia 5:17.) Ne fakaosofia te apositolo ko Petelu ke tusi ne ia a pati fakamafanafana konei e uiga ki te ‵talo ki a Ieova: “‵Pei atu . . . ne koutou otou manava‵sega katoa ki luga i a ia, me e atafai a ia ki a koutou.”—1 Pe. 5:7
w07 3/15 16 ¶4
Te Auala ne Maua ei ne Hana te Filemu
Ne a mea e tauloto ne tatou mai mea katoa konei? Kafai e ‵talo tatou ki a Ieova e uiga ki mea e manava‵se tatou ki ei, e mafai o fakaasi atu ke iloa ne ia ‵tou lagonaga kae ke fakaasi atu a mea i ‵tou loto. Kafai ko se mafai ne tatou o faka‵lei se fakalavelave, e ‵tau o tuku atu ne tatou te fakalavelave tenā ki ana lima. E seai loa se isi auala e ‵lei atu i te mea tenā.—Faataoto 3:5, 6.
FEPUALI 21-27
KOLOA MAI TE MUNA A TE ATUA | 1 SAMUELU 6-8
“Ko oi te Otou Tupu?”
it-2 163 ¶1
Te Malo o te Atua
Ne Fakatagi ki se Tino ke Fai mo Tupu. Ko pili o kātoa te 400 tausaga mai te taimi ne olo kea‵tea ei mai Aikupito kae ko sili atu mo te 800 tausaga mai te faiga ne te Atua tena feagaiga ki a Apelaamo, ne fakatagi a tino Isalaelu ki se Tupu ke ‵taki ne ia latou, e pelā mo nisi fenua e isi ne tupu o latou. Ne fai ne te lotou fakatagi tenei ke ‵teke atu latou ki te aiā o Ieova ke pule atu e pelā me se tupu ki a latou. (1Sa 8:4-8) Kāti ne fakamoe‵moe a tino ki se malo ke fakatu ne te Atua e tusa mo tena tautoga ki a Apelaamo mo Iakopo. Ne fakamalosi aka foki te lotou tali‵tonu ki te mea tenā ona ko te valoaga a Iakopo i te taimi ko pili ei o mate e uiga ki a Iuta (Ken 49:8-10), ko pati a Ieova ki Isalaelu i te taimi ne olo kea‵tea ei mo Aikupito (Eso 19:3-6), ki fakanofonofoga o te Tulafono o te feagaiga (Teu 17:14, 15), e penā foki te vaega o te fekau telā ne fai ne te Atua ki te pelofeta ko Palaamo ke faipati ne ia (Num 24:2-7, 17). Ne fakaasi mai foki ne te mātua o Samuelu ko Hana a te fakamoemoega tenei i tena ‵talo. (1Sa 2:7-10) Kae ui i ei, ne seki fakaasi katoatoa mai ne Ieova a te “mea ‵funa kae tapu” e uiga ki te Malo, e seki fakaasi mai foki ne ia te taimi ka fakatu i ei, io me ko te fakatulagaga mo mea e fai i te malo tenā—me mata se malo i te lalolagi io me i te lagi. Tela la, ne fakaasi atu ne tino konei a te fakamaua‵luga i te taimi ne ma‵nako ei ke fai se tino mo fai te tupu.
Ne Kufaki Faitalia Tena sē Fiafia
Onoono ki te ‵tali a Ieova i te taimi ne fakaasi atu ne Samuelu a te mea tenei i te ‵talo: “Fakalogo ki pati katoa e fai atu ne tino ki a koe; me e se ‵teke atu latou ki a koe, kae e ‵teke mai eiloa latou ki a au e pelā me ko te lotou tupu.” E fakamafanafana a pati konā ki a Samuelu kae matagā a te mea ne fai ne tino konā ki te Atua Malosi Katoatoa! Ne fai atu ne Ieova ki te pelofeta ke fakailoa atu ki tino Isalaelu a te ‵mafa o mea kolā ka ‵togi ne latou ki te tino telā ka fai mo tupu. I te taimi ne fakailoa atu ei ne Samuelu, ne ‵losi mai latou penei: “Ikai, matou e ma‵nako eiloa ke pule mai se tupu.” Ne fakalogo a Samuelu ki tena Atua telā ne fakaeke ei ne ia te tupu telā ne fili ne Ieova.—1 Samuelu 8:7-19.
Taemani Faka-te-Agaga
w02 4/1 12 ¶13
Kaia e ‵Tau ei o Papatiso?
13 E ‵tau o fai a ‵fuliga mai mua o papatiso tatou e pelā me ne Molimau a Ieova. A te ‵fuliga tenei se fakaikuga totino telā e fai ne se tino mo te loto kātoa ke tautali atu a ia i a Keliso Iesu. E ‵teke ne tino konā a faifaiga ‵se ne fai ne latou muamua kae fakaiku aka ke fai te mea tonu i te kilokiloga a te Atua. I te Tusi Tapu, a te veape i te ‵gana Epelu mo te ‵gana Eleni telā e fakasino ki te ‵fuliga, e fakauiga ki te toe foki, io me ko te fulitua. Ko tena uiga ko te toe foki ki te Atua mai te fulitua ki te mea ‵se. (1 Tupu 8:33, 34) A te ‵fuliga e fakauiga ki te faiga o “galuega e fakaasi mai ei te salamō.” (Galu. 26:20) E manakogina ke tiaki ne tatou a tapuakiga ‵se, ola e tusa mo tulafono a te Atua kae tapuaki fua ki a Ieova tokotasi. (Teutelonome 30:2, 8-10; 1 Samuelu 7:3) A te ‵fuliga e iku atu ki te ‵fuli o tou mafaufau, fakamoemoega, mo ‵tou uiga. (Esekielu 18:31) A te“‵fuli mai” o tatou e fakauiga ki te sui o ‵tou faifaiga kolā e ‵teke ki te Atua ki se foitino fou.—Galuega 3:19; Efeso 4:20-24; Kolose 3:5-14.
FEPUALI 28–MATI 6
KOLOA MAI TE MUNA A TE ATUA | 1 SAMUELU 9-11
“Ne Loto Maulalo Kae Agamalu a Saulo i te Kamataga”
w95 12/15 10 ¶1
Tino Amoni—Ko Tino ne Taui ne Latou te Atafai ki te Taua
Ne toe taui foki ne tino Amoni a te atafai o Ieova ki te fai taua. Ne seki fakapuli ne Ieova a faifaiga fai taua a latou. “Ne fakamalosi aka a Saulo ne te agaga o te Atua i te lagonaga ne ia a pati konei [a Nahasa], kae ne kaitaua malosi ei a ia.” Mai lalo i te takitakiga a te agaga o te Atua, ne fakamaopoopo ne Saulo se kautau e toko 330,000 tāgata taua kolā ne fakatoka faka‵lei kae ne fakatakavale masei ne latou a tino Amoni kae “ne seki mafai o olo fakatasi ne tino e tokolua.”—1 Samuelu 11:6, 11.