Taumafai ke Oko Atu ki te Loto

Faataoto 3:1

MEA E ‵TAU O FAI: Fesoasoani ki au tino fakalogo‵logo ke malamalama latou i te tāua o olotou mea ne tauloto mo te auala ke fakagalue aka a mea konā.

TE AUALA KE FAI EI:

• Fesoasoani ki au tino fakalogo‵logo ke iloilo ne latou a latou eiloa. Fai atu a fesili kolā e fai ei ke iloilo aka ne te kau fakalogo‵logo olotou lagonaga ‵tonu.

• Fakamalosi atu ke maua se lagonaga tonu. Fakamalosi au tino fakalogo‵logo ke iloilo ifo ne latou te pogai e fai ei ne latou a galuega ‵lei. Fesoasoani ki a latou ke ati aka a toe lagonaga ‵lei—te alofa ki a Ieova, ki tino, mo akoakoga i te Tusi Tapu. Fakasakosako mo au tino fakalogo‵logo; kae sa polopoloki latou. I lō te fakamasiasi ne koe latou, fai ke olo latou mo fakamalosiga e uke ma oti tau lāuga, mo te loto malosi ke fai te ‵toe mea e mafai.

• Fai ke ‵saga tonu atu ki a Ieova. Faka‵mafa atu te auala e fakaasi mai ne akoakoga i te Tusi Tapu, fakatakitakiga, mo fakatonuga i ei a uiga o te Atua mo tena alofa mō tatou. Fakamalosi au tino fakalogo‵logo ke maua ne latou te manakoga ke amanaia ki lagonaga o Ieova mo te faiga ke fiafia a ia.