Ne Fiafia Au i Taku Taviniga ki a Ieova

I te tausaga mai tua, ne faka‵pula i te Peteli me manakogina ne volenitia ke ga‵lue i te ofisa lagolago i Afelika ki Saute telā ka faka‵piki i ei se masini ‵lomi tusi fou. Ne ave toku igoa kae ne filigina au. E tokotolu aka foki nisi tino mai te Peteli i Kanata ne fili​—Dennis Leech , Bill McLellan, mo Ken Nordin. Ne fakailoa mai i tiketi o matou e auala tasi fua!

Ne telefoni au ki toku mātua: “Mami, e isi saku tala ki a koe. Au ka fano ki Afelika ki Saute!” A toku mātua se tino sē gutu faipati, kae malosi ‵ki tena fakatuanaki mo tena fesokotakiga mo Ieova. E se uke ana pati ne fai mai, kae iloa ne au me ‵lago mai a ia ki a au. A lāua katoa mo toku tamana ne seki ita ki taku fakaikuga, faitalia e ‵mao te koga ka fano au ki ei.

NE FANO AU KI AFELIKA KI SAUTE!

Ne olo matou mo nisi taina tokotolu mō se tolu masina o a‵koga ki te fakaaogaga o te masini ‵lomi fou. Oti, olo ei matou i se vaka kākō ki Cape Town, i Afelika ki Saute. I te taimi tenā fatoa katoa toku 20 tausaga. Ne kamata te motou malaga loa mai Cape Town ki Johannesburg i se tuleni kae ko afiafi. Te koga muamua ne ma‵nava matou i ei i te vaveao se tamā fakai foliki e igoa ki a Karoo. Se koga ‵vela kae ‵pefu. Ne fa‵tio matou tokofa ki tua i te famalama kae ‵segi me se a te vaegā koga tenei. Ne manava‵se matou me ne a motou mea ka fai i te galuega fou a matou tenei. Kae i tausaga fakamuli ifo kafai ko toe ‵foki mai matou ki te koga tenei ne lavea ne matou te gali kae filemu o tamā fakai fo‵liki konei.

Mō ne nāi tausaga ne galue au i te fakaaogaga o se masini e fakaigoa ki te Linotype telā e faka‵tu faka‵lei ne ia a laina o pati kolā ka ‵lomi i mekesini ko te Watchtower mo te Awake!. Ne ‵lomi ne te ofisa lagolago a mekesini konei i ‵gana e uke i Afelika kae e se fua ko te ‵gana Afelika ki Saute. Ne fia‵fia matou me ne lasi te aoga o te masini fou tenei ne ‵mai matou o ga‵lue i ei!

Fakamuli ifo ne galue au i te matagaluega telā e onoono ki vaega kese‵kese o te ‵lomi tusi, te avega i vaka, mo te galuega ‵fulitusi. Ne fakalavelave ‵ki toku olaga kae ne lotomalie eiloa au me ne maua mai ei a mea aoga.

AVAGA MO TE GALUEGA FOU

I te 1968 ne avaga au ki se tuagane paenia e igoa ki a Laura Bowen, telā ne nofo pili ki te Peteli. Ne galue foki a ia pelā me se tino taipa i te Matagaluega Fulitusi. I aso konā, e seai se fakatokaga mō tauavaga ‵fou ke ‵nofo i te Peteli, tela la, ne ‵tofi māua ke ga‵lue pelā me ne paenia fakapito. Ne tai manavase loa au. Mai tua o te sefulu tausaga ne galue i te Peteli telā e toka te koga ‵nofo mo meakai, e mafai pefea o ola māua ki te alauenisi o te paenia fakapito? E maua ne māua se 25 tupe Afelika (i aso konā e ‵pau mo te $35, tupe Amelika) i masina katoa—māfai e kātoa mā itula, toe asiga, mo tusi e tufa. Mai te sene tenā, e manakogina ke ‵togi ki ei te ‵togi o te fale, mea‵kai, faima‵laga, vailakau mo nisi mea aka foki.

Ne ‵tofi māua ke ‵kau ki se potukau i tafa o te fakai ko Durban, i te kogā tai o Initia. E tokouke ‵ki a tino Initia i te koga tenā, a te tokoukega o latou ne ‵tupu mai i tino kolā ne fakagāmua ke ga‵lue i te koga fai suka i te 1800 tupu. Nei la, ko ga‵lue latou i nisi galuega, kae koi ‵piki ‵mau loa ki olotou tū, mea‵kai e aofia i ei a kale. Kae fai‵pati fakapalagi, telā la ne faigofie ki a matou.

A paenia fakapito e ‵tau o 150 itula i masina takitasi i te galuega talai, tela la i te aso muamua, ne maua ne māua mo Laura a itula e 6. Ne tai ‵vela loa te aso tenā. E seai ne ma toe asiga io me ne akoga faka-te-Tusi Tapu—ono itula mai te galuega fua fale ki fale. Ko oti ne kamata te ma galuega kae kilo au ki taku itula—ko 40 fua minute ko ‵teka! Ne mafaufau au me mafai pefea o fakataunu te ma paenia i konei.

Seki leva kae ne fakatoka ne māua se fakasologa tumau. I aso katoa ne fakatoka ne māua ma falaoa mo sūpu io me se kōfe i loto i se fagu ‵vela. Kafai e fia ma‵nava māua, e fakatū te ma motoka i lalo o se malūga o se lakau—kae fakatamilo eiloa māua ne tamaliki fo‵liki Initia e fia ‵logo e uiga ki a māua! I loto i ne nāi aso fua, kafai ko oti te lua io me se tolu itula mea loa ko vave ki a māua a te aso.

Ko oko loa te ma fia‵fia ke fakaoko atu a te munatonu mai te Tusi Tapu ki tino talimālō ‵lei i te koga tenei! Ne lavea ne māua i tino Initia ne tino āva, atafai, kae a‵lofa ki te Atua. E tokouke a tino Hinitu ne talia ne latou te ma fekau. Ne fia tauloto latou e uiga ki a Ieova, Iesu, te Tusi Tapu, te lalolagi fou filemu, mo te fakamoemoega mō tino ‵mate. Mai tua o se tausaga, ne fai ne māua a akoga faka-te-Tusi Tapu e 20. I aso katoa e ‵kai fakatasi faeloa māua mo se kāiga telā e a‵koga matou. Ko oko loa te ma fia‵fia.

E seki leva kae toe maua ne māua se tōfiga fou—ko te galuega a te seketi i fenua ‵gali i kogātai Initia. I vaiaso takitasi e fai faeloa māua pelā me ne mālō i se fale o se kāiga māfai e āsi kae ga‵lue māua o fakamalosi a tino talai i se fakapotopotoga. Ne fai ne latou a māua e pelā me ne kāiga o latou, kae ne a‵lofa foki māua ki olotou tama‵liki mo olotou manu fagai. Ne ‵teka atu a tausaga e lua kae telefoni mai se tino mai te ofisa lagolago. Tenei te fekau, “E mafau‵fau matou ke toe puke mai koulua ki te Peteli.” Ne tali atu au, “E iloa ne koe, māua ko fia‵fia ‵ki i konei.” Kae ui i ei, e fia‵fia loa māua o ga‵lue i so se koga e ‵tofi māua ki ei.

TOE ‵FOKI KI TE PETELI

Ne galue au i te Service Department i te Peteli, ne maua i ei ne au te tauliaga ke ga‵lue mo taina tokouke kolā ko ma‵tua kae apo. I aso konā, e maua sāle ne fakapotopotoga takitasi se tusi e uiga ki asiga mai te ovasia o te seketi māfai ko oti tena asiga. A tusi konā ne fai ke fakamalosi kae ke tuku atu so se fakatakitakiga telā e manakogina ke fai. Kae aofia i mea konei a galuega e uke e fai ne failautusi kolā e ‵fuli ne latou a mea mai te ‵gana Xhosa, Zulu, mo nisi ‵gana aka ki te ‵gana palagi kae ka oti ko toe ‵fuli ei mai te ‵gana palagi ki ‵gana Afelika. E loto fakafetai au ki tino ‵fuli tusi loto ma‵losi konā kolā ne fesoasoani mai ke malamalama au i mea fai‵gata e fe‵paki mo ‵tou taina mo tuagane uli i Afelika.

I taimi konā, a Afelika ki Saute e nofo mai lalo i se malo telā e faka‵kese a tino uli. A itukāiga taki tasi e isi loa ne koga e nofo i ei, tela la, e se lasi te taimi e fakatasitasi a tino o itukāiga kese‵kese. A ‵tou taina uli i Afelika e fai‵pati loa ki olotou ‵gana, talai i olotou ‵gana, kae ‵kau ki fakapotopotoga i olotou ‵gana loa.

E se tokouke a taina Afelika uli e iloa ne au, ona ko fakapotopotoga kolā e ‵tofi au ki ei e fai‵pati ki te ‵gana palagi. Nei la, ko maua ne au te avanoaga ke iloa ne au a taina uli Afelika mo olotou tū. Ne lavea ne au a mea faiga‵ta e fe‵paki mo ‵tou taina i tū a olotou fenua mo faifaiga fakalotu. Ko oko loa te loto ma‵losi ke tiaki ne latou a faifaiga kolā e se fetaui mo te Tusi Tapu, kae fakafesagai atu ki ‵tekemaiga i olotou kāiga mo te fakai māfai e se talia ne latou o tau‵tali i faifaiga faivailakau! I fakai fo‵liki, a te tokoukega o tino i ei e ma‵tiva. A te tokoukega o latou e seki a‵koga faka‵lei, kae fia‵fia latou ki te Tusi Tapu.

Ne maua foki ne au te tauliaga ke galue i nisi fakalavelave tau tulafono e aofia ei te saolotoga ki tapuakiga mo te sē ‵kau ki se feitu. Ko oko loa te fakamalosi mai ki te fakatuanaki māfai e ‵kilo atu ki talavou Molimau fakamaoni kae loto ma‵losi e faka‵tea mai te akoga ona ko te sē ‵kau atu ki ‵talo mo te usuga o pese ‵lotu.

Ne fe‵paki foki a taina mo se sūa fakalavelave i se fenua foliki o Afelika ko Swaziland. I te taimi ne mate i ei a te tupu ko Sobhuza, ne ‵tau mo tino o te fenua o ‵kau atu ki faifaiga e fai ma mate se tino. E ‵tau mo tāgata o ‵vele olotou ulu, kae ko fāfine e ‵kati olotou ulu ke ‵mutu. E tokouke a taina mo tuagane ne tamate ona ko te ita ma ‵kau atu ki te faifaiga tenei telā e isi sena sokoga ki te tapuaki ki tino mua ko ‵mate. Ko oko loa te fakamalosi loto ki a matou a te lotou fakamaoni! E uke a mea ne tauloto ne matou e uiga ki te fakamaoni, alofa fakamaoni, mo te kufaki mai ‵tou taina Afelika, ke fakamalosi te motou fakatuanaki.

TOE FOKI O GALUE I MASINI ‵LOMI

I te 1981, ne ‵tofi aka au ke fesoasoani ki te ‵lomiga o tusi e auala i te fakaaogaga o komupiuta. Nei la, ko toe foki au ki te ‵lomi tusi kae ko oko loa toku fiafia i ei! Ko ‵kese ‵ki a auala e ‵lomi i ei a tusi. Ne tuku mai ne se tagata faipisinisi se masini ko te phototypesetter ke ‵tofo ne matou kae e se ‵togi. Ne sui ei ne matou a masini e iva ko Linotype ki masini ‵fou ko phototypesetter e lima. Ne faka‵piki foki ne matou se masini ‵lomi tusi fou. Nei la ko uke ‵ki a mea ko mafai o ‵lomi!

Ne fakaaoga ne matou te MEPS telā ko te Multilanguage Electronic Publishing System, se auala fou e fakaaoga a komupiuta ke faka‵tu faka‵lei a pati i loto i lōmiga. E uke ‵ki a poto ‵fou ne tauloto ne matou tokofa kolā ne ‵mai i te Peteli i Kanata ki Afelika ki Saute, ke momea aka te vave mo te ‵lei o te galuega ‵lomi tusi! (Isa. 60:17) Kae ko te motou tokofa foki konei ne a‵vaga katoa ki ne tuagane ‵malosi kolā e tavini ki a Ieova. Ne tumau māua mo Bill i te ga‵lue i te Peteli. Kae ko Ken mo Dennis ne ‵nofo pili atu ki te Peteli mo lā kāiga.

Ne gasolo aka o uke a galuega i te ofisa lagolago. Ne gasolo aka o uke a tusi e ‵fuli kae ‵lomi i ‵gana e uke, kae ave ki nisi ofisa lagolago. Tela la, ne manakogina ke faite se suā Peteli fou. Ne faite ne taina te Peteli fou i se koga gali ki te togala o Johannesburg kae ne fakaulufale i te 1987. Ko oko loa toku fiafia ke aofia i galuega e uke konei kae ke tavini atu i te Ofisa Lagolago i Afelika ki Saute mō tausaga e uke.

SE SUĀ TOFIGA FOU!

Ne ‵poi māua i te mauaga ne au te ‵kamiga i te 2001 ke fai pelā me se sui o te Komiti o te Ofisa Lagolago i te Iunaite Sitete telā ne fatoa fakatu aka fua. Ne fanoa‵noa māua me ka tiaki ma taugasoa i Afelika ki Saute kae fia‵fia foki māua ke fai pelā me ne vaega o te kāiga Peteli i te Iunaite Sitete.

Ne tai manava‵se māua māfai e olo kae tiaki te mātua o Laura telā ko matua me e se mafai ne māua o tausi ki a ia mai Niu Ioki, kae fai mai a taina o Laura e tokotolu ke tausi ne latou. Ne fai mai latou, “E se mafai ne matou o ‵kau atu ki te taviniga tumau, kae kafai e tausi ne matou a te ‵tou mātua i feitu katoa, ka fesoasoani atu loa matou ke fakatumau te lua taviniga.” Ko oko loa te loto fakafetai o māua ki a latou.

Kae penā foki toku taina mo tena avaga, kolā e ‵nofo i Toronto, Kanata, ne tausi atu lāua ki te mā mātua telā ko mate foki tena avaga. I te taimi tenā, ko siliga atu mo te 20 tausaga ne tausi ne lāua te mā mātua. Ne loto fakafetai māua ki a lāua ona ko te a‵lofa o tausi atu ki tou fafine ke oko ki te taimi ne mate i ei mai tua malie o te ma okoga ki Niu Ioki. E fai eiloa pelā me se fakamanuiaga ke isi ne kāiga kolā e ‵lago malosi mai kae loto fia‵fia o fai a tiute kolā e faiga‵ta i nisi taimi!

Ne galue au mō ne nāi tausaga i te faitega o tusi i te Iunaite Sitete, kae ko gasolo atu nei o faigofie kae ‵fou a mea e fai i ei. Kae fakamuli nei ne galue au i te Matagaluega e Tausi ki te ‵Togiga o Mea. Ko oko loa i toku fiafia ke galue mō se 20 tausaga ko ‵teka i te ofisa lagolago lasi tenei, telā ko nofo nei ki se 5,000 tino i te kāiga Peteli fakatasi mo te toko 2,000 tino e ga‵lue mai tua!

I se ono sefulu tausaga ko ‵teka, ne seki mafaufau au me tenei te koga ka nofo au i ei. Ne ‵lago malosi mai a Laura i tausaga katoa konei. Ne maua ne au se olaga fiafia! Ne masaua faeloa ne māua a tauliaga kese‵kese ne ga‵lue māua i ei penā foki a tino gali kolā ne ga‵lue tasi matou, e aofia ei a latou i ofisa lagolago e uke ne ga‵lue kae āsi māua ki ei. Nei la, ko silia oku tausaga mo te 80, ko se uke aku galuega e fai, me ko tokouke a taina talavou apo kolā e mafai o fai ne latou te galuega.

Ne tusi mai te faisalamo: “Ke fiafia te fenua telā ko Ieova te lotou Atua.” (Sala. 33:12) Tonu ‵ki loa a pati konā! Ko oko loa toku loto fakafetai me ne tavini fakatasi au mo te fia‵fia mo tino o Ieova.