E Mata, e Talitonu Faeloa Koe ki Auala o Ieova?

1-2. (a) Kaia e faigata ki tino e tokouke i aso nei ke tali‵tonu ki tino pule‵pule? (e) Ne a mea ka mafau‵fau tatou ki ei i te mataupu tenei?

I ASO nei, e faigata ki tino e tokouke ke tali‵tonu ki tino pule‵pule. Ne lavea ne latou a te fapito o tino fai tulafono mo faifaiga fakapolitiki ki tino mau‵mea mo tino ma‵luga kae e se fai ne latou te fakamasinoga tonu ki tino ma‵tiva. E fai ‵tonu mai a te Tusi Tapu, penei: “Ne pule ei te tagata ki te suā tagata kae logo‵mae i ei.” (Fai. 8:9) E se gata i ei, e fai foki ne nisi takitaki lotu a amioga ma‵sei kolā ne fai ei ke se toe tali‵tonu a nisi tino ki te Atua. Tela la, kafai ko fiafia se tino ke sukesuke ki te Tusi Tapu fakatasi mo tatou, e ‵tau o fesoasoani tatou ki a ia ke ati aka tena talitonu ki a Ieova mo Ana sui i te lalolagi nei.

² E tonu, e se ko tino a‵koga ki te Tusi Tapu fua e ‵tau o tauloto ke tali‵tonu ki a Ieova mo tena fakapotopotoga. Ke oko foki loa ki a tatou kolā ko leva i te munatonu, e se ‵tau eiloa o puli i a tatou a te manatu me i auala o Ieova ko te ‵toe auala ‵lei eiloa. I nisi taimi, e ‵sae aka a fakalavelave kolā e mafai o tofotofo aka ei te ‵tou loto tali‵tonu. I te mataupu tenei, ka mafau‵fau tatou ki auala e tolu kolā e mafai o tofotofo aka ei te ‵tou fakatuanaki: (1) i te taimi e fai‵tau ei ki nisi tala i te Tusi Tapu, (2) māfai ko maua ne tatou a fakatakitakiga mai te fakapotopotoga a Ieova, kae ko te (3) māfai ko fe‵paki mo tulaga faiga‵ta i aso mai mua.

TALITONU KI A IEOVA I TE TAIMI E FAITAU KOE KI TE TUSI TAPU

3. E mafai pefea o tofotofo aka te ‵tou tali‵tonu ki a Ieova ona ko nisi tala i te Tusi Tapu?

³ I te taimi e fai‵tau tatou ki te Muna a te Atua, e mafai o ‵sae aka a fesili e uiga ki faifaiga a Ieova ki nisi tino mo ana nisi fakaikuga. E pelā mo te tusi o Numela, e fai‵tau tatou i ei ki te tamatega ne Ieova se tino Isalaelu me ne fai fafie i te Sapati. I te lua Samuelu, ne iloa ne tatou me i se fia senitenali mai tua ifo, ne fakamagalo ne Ieova a te Tupu ko Tavita i ana agasala ko te mulilua mo te tatino. (Nume. 15:32, 35; 2 Samu. 12:9, 13) Kāti ka mafau‵fau tatou, ‘Kaia ne fakamagalo ne Ieova a Tavita i ana agasala ko te tatino mo te mulilua, kae tamate ne ia a te suā tagata telā ne foliga sē matagā tena agasala?’ Ke tali aka te fesili tenei, mafaufau ki manatu e tolu kolā e ‵tau o masaua faka‵lei ne tatou i te taimi e fai‵tau ei ki te Tusi Tapu.

4. E fakamalosi aka pefea ne te Kenese 18:20, 21 mo te Teutelonome 10:17 a te ‵tou loto tali‵tonu ki fakamasinoga a Ieova?

⁴ E se taku mai faeloa i te Tusi Tapu a fakamatalaga likiliki e uiga ki se tala. E pelā mo Tavita, e iloa ne tatou me ne salamō tonu a ia i ana mea ne fai. (Sala. 51:2-4) Kae ne a mea e iloa ne tatou e uiga ki te tagata telā ne soli ne ia te tulafono o te Sapati? E mata, ne salamō a ia i tena mea ne fai? E mata, ne seki fakalogo sāle a ia ki tulafono a Ieova i aso mua? E mata, ne manatu māmā io me ne ‵teke sāle atu a ia ki pati fakatonutonu? E se fakaasi mai i te Tusi Tapu. Kae e mafai o mautinoa i a tatou te mea tenei: A Ieova “e se mafai o ‵se.” (Teu. 32:4) E fakavae ana fakaikuga ki manatu ‵tonu katoa—e se ki mea fua e lagona ne ia, te fapito, io me ko so se mea telā e fai ei ke se ‵lei a fakaikuga e fai ne tino. (Faitau te Kenese 18:20, 21; Teutelonome 10:17.) Ko te uke o mea e tauloto ne tatou ki a Ieova mo ana tulaga, ko te lasi foki o te ‵tou tali‵tonu ki ana fakamasinoga. Kae kafai e fakasae aka ne se tala i te Tusi Tapu a fesili kolā e se mafai nei ne tatou o tali, ko lava ‵lei eiloa a mea e iloa ne tatou e uiga ki te Atua me i a ia “e amiotonu i ana auala katoa.”—Sala. 145:17.

5. E pokotia pefea te auala e fai ei ‵tou fakamasinoga ona ko ‵tou tulaga sē ‵lei katoatoa? (Onoono foki ki te pokisi “E se ‵Tonu Faeloa ‵Tou Fakamasinoga Ona ko ‵Tou Tulaga sē ‵Lei Katoatoa.”)

⁵ Ko se mafai o fai ne tatou a te fakamasinoga tonu ona ko te tulaga sē ‵lei katoatoa. Ne faite ne te Atua a tatou ki ana foliga, tela la, e ma‵nako tatou ke fai faka‵lei a tino. (Kene. 1:26) Kae ona ko ‵tou tulaga sē ‵lei katoatoa, e mafai o fai ne tatou se fakamasinoga sē tonu, faitalia me e mafau‵fau tatou me ko maua ne tatou a fakamatalaga ‵tonu katoa. E pelā mo te sē fiafia o Iona ki te fakaikuga ne fai ne Ieova ke fakamagalo a tino Nineva. (Iona 3:10–4:1) Kae mafaufau la ki mea ne iku mai i ei. Ne ‵sao atu i ei a ola o te toko 120,000 tupu o tino Nineva kolā ne sala‵mō! Tela la, ko Iona—ne ‵tau o faka‵tonu aka tena kilokiloga—kae e se ko Ieova.

6. Kaia ne seki ‵tau o fakamatala mai ne Ieova a pogai o ana fakaikuga?

⁶ E se manakogina ke fakamatala mai ne Ieova ki tino ana fakaikuga. E tonu, ne talia ne Ieova ana tavini i aso ko ‵teka ke fakaasi atu olotou lagonaga e uiga ki ana fakaikuga kolā ko oti ne fai io me ka fai ne ia. (Kene. 18:25; Iona 4:2, 3) Kae i nisi taimi, e fakamatala atu ne ia a pogai o ana fakaikuga. (Iona 4:10, 11) E tiga eiloa te feitu tenā, ne seki ‵tau o fakamatala mai ne ia a mea konā ki a tatou. E pelā me ko te ‵tou Mafuaga, e se manakogina ne ia a te ‵tou taliaga mai mua io me mai tua o tena fakaikuga.—Isa. 40:13, 14; 55:9.

TALITONU KI A IEOVA MĀFAI KO MAUA A FAKATAKITAKIGA

7. Se a te tulaga faigata e mafai o fe‵paki mo tatou, kae kaia?

⁷ E mautinoa me e lotoma‵lie katoatoa tatou me e fai faeloa ne Ieova a te mea tonu. Kae ko te mea faigata ki a tatou, ko te talitonu ki ana sui i te lalolagi nei. E mafai o mafau‵fau tatou me e mata, a latou kolā e maua se tulaga pule i te fakapotopotoga a Ieova e fai eiloa ne latou a mea e ‵tusa mo fakatakitakiga a Ieova io me i olotou auala eiloa. Kāti tenā te mafaufauga o nisi tino kolā ne ola i taimi o te Tusi Tapu. Mafaufau ki tala kolā ne ‵sae mai i te palakalafa e 3. Kāti ne mafaufau se kāiga o te tagata telā ne soli ne ia te tulafono o te Sapati, me ko Mose nei ne fesokotaki ki a Ieova kae koi tuai o fakasala ne ia a te tagata tenā ki te mate. Kae kāti ne fakaiku aka ne se taugasoa o Ulia, te tino Heti, telā ne mulilua tena avaga mo Tavita, me ne fakaaoga ne Tavita tena tulaga pelā me se tupu ke sao a ia mai te fakasalaga telā ne ‵tau eiloa o maua ne ia. Tenei te manatu tonu tāua, e se mafai ne tatou o fai atu me e tali‵tonu tatou ki a Ieova māfai e se tali‵tonu ki ana sui i te lalolagi—ko latou kolā e talitonu ki ei a Ieova.

8. Ne a mea e tai ‵pau ei a mea e fakaasi mai i te Galuega 16:4, 5 mo te auala e fakatoka ei te fakapotopotoga i aso nei?

⁸ I aso nei, e takitaki ne Ieova te vaega o tena fakapotopotoga i te laloalgi nei e auala i “te tavini fakamaoni kae poto.” (Mata. 24:45) E pelā mo te potukau pule i te senitenali muamua, e onoono te tavini tenei ki tino o te Atua i te lalolagi kātoa kae tuku atu a fakatakitakiga ki toeaina i te fakapotopotoga. (Faitau te Galuega 16:4, 5.) Kae fakamautinoa aka ne toeaina me e tau‵tali atu latou ki fakatakitakiga konā i te fakapotopotoga. E fakaasi atu te ‵tou tali‵tonu ki auala o Ieova mai te faka‵logo ki fakatonuga e maua ne tatou mai te fakapotopotoga saukātoa mo toeaina.

9. Ko te taimi fea e mafai ei o faigata ke ‵lago atu tatou ki se fakaikuga a toeaina, kae kaia?

⁹ I nisi taimi, e mafai o faigata ki a tatou ke ‵lago atu ki fakaikuga a toeaina. E pelā mo tausaga fakamuli nei, ne fai a fakama‵fuliga ki fakapotopotoga mo seketi e uke. I nisi tulaga, ne fakamolemole atu ki tino talai ke ‵kau atu ki se isi fakapotopotoga mo te kilokiloga ke fakaaoga faka‵lei a nofoga i fale tapuaki. Kafai ko fai mai ke kau atu ki se fakapotopotoga fou, kāti ka faigata ke tiaki ne tatou ‵tou taugasoa mo kāiga. E mata, e maua ne toeaina a fakatakitakiga mai te Atua ki koga ke ‵tofi ki ei a tino taki tokotasi? Ikai. Kae e mafai o fakafaigata ne te mea tenā ke tau‵tali tatou ki fakatakitakiga e maua ne tatou. E talitonu a Ieova ki toeaina ke fai a fakaikuga penā, kae e ‵tau foki o tali‵tonu tatou ki a latou.b

10. E ‵tusa mo te Epelu 13:17, kaia e ‵tau ei o ‵lago atu tatou ki toeaina?

¹⁰ Kaia e ‵tau ei mo tatou o ‵lago atu ki fakaikuga a toeaina faitalia me e se ‵lei ki a tatou? Me i te faiga penā, ko fesoasoani atu tatou ki te ‵kau fakatasi o tino o te Atua. (Efe. 4:2, 3) E gasolo ki mua te fakapotopotoga māfai e faka‵logo a tino katoa mo te loto maulalo ki fakaikuga mai te potukau o toeaina. (Faitau te Epelu 13:17.) A te mea tāua, ke fakaasi atu ne tatou ki a Ieova me e tali‵tonu tatou ki a ia mai te faka‵logo ki a latou kolā e talitonu a ia ke tausi mai ki a tatou.—Galu. 20:28.

11. Se a te mea ka fesoasoani mai ke fakamalosi aka te ‵tou tali‵tonu ki fakatakitakiga e maua ne tatou mai toeaina?

¹¹ E mafai o fakamalosi aka te ‵tou tali‵tonu ki fakatakitakiga e maua ne tatou mai i toeaina, māfai e masaua ne tatou me e ‵talo latou mō te agaga tapu i te taimi ko fai ne latou se fakaikuga e uiga ki te fakapotopotoga. E mafau‵fau faka‵lei foki latou ki akoakoga fakavae i te Tusi Tapu kolā e fetaui ‵lei, pelā foki mo fakatakitakiga mai te fakapotopotoga saukātoa a Ieova. E ma‵nako eiloa latou ke fakafiafia atu ki a Ieova kae tausi faka‵lei ana tino. E iloa ne tāgata fakamaoni konei me e ‵tau o tuku atu ne latou se tala ki te Atua mō te auala e fai ei olotou tiute. (1 Pe. 5:2, 3) Mafaufau ki te manatu tonu tenei: I se lalolagi telā e mavae‵vae ona ko fenua, lotu, mo mea fakapolitiki, e ‵kau fakatasi eiloa a tino o Ieova i te tapuaki atu ki te Atua tonu e tokotasi. E mafai fua o tupu te mea tenei ona ko te fakamanuiaga a Ieova ki tena fakapotopotoga saukātoa!

12. Ne a manatu ‵tonu e ‵tau o mafau‵fau ki ei a toeaina ke fakaiku aka me ko salamō tonu se tino io me ikai?

¹² Ko oti ne tuku atu ne Ieova ki toeaina a te tiute tāua ke tausi te tulaga ‵ma o te fakapotopotoga. Kafai e fai ne se Kelisiano se agasala matagā, e manako a Ieova ke fakaiku aka ne toeaina me e ‵tau mo te tino tenā o tumau i te fakapotopotoga io me ikai. I tafa o nisi mea, e ‵tau mo latou o fakamautinoa aka me ko salamō tonu io me ikai a te tino tenā. E mafai o fai mai a ia me i a ia ko salamō, kae e mata, e takalialia ‵tonu a ia ki tena mea ne fai? E mata, ko oti ne fakaiku ne ia ke mo a ma toe fai te agasala tenā? Kafai ko taugasoa ma‵sei ne iku atu ei a ia ki te faiga o te mea ‵se tenā, e mata, e loto fiafia a ia o ‵kalo keatea mai i taugasoa konā? E ‵talo atu a toeaina kae mafaufau faka‵lei ki manatu ‵tonu e ‵tusa mo mea kolā e fakaasi mai i te Tusi Tapu, kae e iloilo foki ne latou a te kilokiloga a te tino agasala ki te mea ne tupu. Tenā, ko fakaiku ei ne latou me e ‵tau o tumau te tino agasala i te fakapotopotoga io me ikai. I nisi taimi, e ‵tau eiloa o fakatea a ia.—1 Koli. 5:11-13.

13. Ne a mea e mafai o manava‵se tatou ki ei māfai ko fakatea se taugasoa io me se kāiga?

¹³ E mafai pefea o tofotofo aka te ‵tou tali‵tonu ki toeaina? E mafai o talia katoatoa ne tatou te fakaikuga a te kau toeaina māfai e se taugasoa io me kāiga tatou mo te tino ne fakatea. Kae kāti ka ‵kese ‵tou lagonaga māfai se taugasoa pili ko fakatea. Kāti ka manava‵se tatou me ne seki mafau‵fau a toeaina ki manatu ‵tonu katoa, io me kāti ka mafau‵fau tatou me ne fai eiloa te lotou fakamasinoga e ‵tusa mo auala o Ieova io me ikai. Se a te mea e mafai o fesoasoani mai ke maua ne tatou se kilokiloga ‵lei ki te fakaikuga?

14. Ne a mea e mafai o fesoasoani mai māfai e pokotia tatou i se fakaikuga ne fai ne te kau toeaina?

¹⁴ Se mea ‵lei ke masaua ne tatou me i te fakatea se fakatokaga a Ieova kae e aoga ki te fakapotopotoga kae e mafai foki o aoga ki te tino agasala. Kafai e tumau se tino agasala sē salamō i te fakapotopotoga, e mafai o fai a ia mo fakamalosiga sē ‵lei ki nisi tino. (Kala. 5:9) E se gata i ei, e mafai o se lavea ne ia te matagā o tena agasala, kae e seai foki se manakoga ke ‵fuli ana mafaufauga mo ana faifaiga ke mafai o toe maua ne ia te taliaga a Ieova. (Fai. 8:11) E mautinoa i a tatou me kafai e fakaiku aka ke fakatea se tino, ko tena uiga, ko fai faka‵lei eiloa ne toeaina te lotou tiute tenā. E iloa ne latou me e pelā mo famasino i aso mua, “e se fai ne [latou] a fakamasinoga mō se tagata kae mō Ieova.”—2 Nofo. 19:6, 7.

A TE TALITONU NEI KI A IEOVA KA AOGA KI A TATOU I ASO MAI MUA

15. Kaia ko ‵tau ei o sili atu nei te ‵tou tali‵tonu ki fakatakitakiga a Ieova i lō aso mua?

¹⁵ Ona ko te pili mai o te gataga o te olaga masei tenei, ko ‵tau o sili atu nei te ‵tou tali‵tonu ki auala o Ieova i lō aso mua. Kaia? Me i te taimi o te fakalavelave lasi, e mafai o maua ne tatou a fakatonuga kolā e foliga fai fakaa‵tea, se aoga io me faigata ke malamalama i ei. E tonu, ka se faipati ‵tonu mai a Ieova ki a tatou. Kāti ka tuku mai ne ia a fakatakitakiga e auala i ana sui filifilia. E se tenā te taimi ke fakalotolotolua io me ke ‵kilo atu ki ei mo te sē mautinoa kae mafaufau aka me e mata, ne aumai eiloa a te fakatonuga tenei mai i a Ieova io me mai i taina tōfia fua konei?’ Ne a au mea ka fai i te taimi faigata tenā? E mafai o maua te tali e auala i tau kilokiloga ki fakatakitakiga e maua mai i sui o te Atua i te taimi nei. Kafai e talitonu koe ki fakatakitakiga e maua ne tatou i aso nei kae fakalogo ki ei, e mautinoa me ka fai foki koe penā i te taimi o te fakalavelave lasi.—Luka 16:10.

16. E mafai pefea o tofotofo aka te ‵tou tali‵tonu ki fakamasinoga a Ieova i aso mai mua nei?

¹⁶ E isi foki se mea tāua ke mafau‵fau faka‵lei tatou ki ei—ko fakamasinoga a Ieova i te gataga o te olaga masei tenei. I te taimi nei, e fakamoe‵moe eiloa tatou ki tino e tokouke kolā e se tavini ki a Ieova, e aofia i ei ‵tou kāiga sē tali‵tonu, ke ‵kau mai. Kae ka fai eiloa ne Ieova e auala i a Iesu a te ‵toe fakaikuga mō latou i Amaketo. (Mata. 25:31-33; 2 Tesa. 1:7-9) Ka se fakaiku aka ne tatou me ko oi e ‵tau io me se ‵tau o fakaasi atu ki ei te alofa fakamagalo o Ieova. (Mata. 25:34, 41, 46) E mata, ka mafai o tali‵tonu tatou ki fakamasinoga a Ieova, io me ka fai ei mo fai se mea ke fakavāivāi mai ki a tatou? E manino ‵lei, me e ‵tau mo tatou o fakamalosi aka te ‵tou tali‵tonu ki a Ieova i te taimi nei ko te mea ke mafai o tali‵tonu katoatoa ki a ia i aso mai mua.

17. Ka aoga pefea ki a tatou a fakamasinoga a Ieova i te gataga o te olaga masei tenei?

¹⁷ Mafaufau ki ‵tou lagonaga i te lalolagi fou a te Atua māfai ko ‵kilo atu tatou ki ikuga o fakamasinoga a Ieova. Ka seai ne lotu ‵se e penā foki mo faifaiga fakapisinisi kaima‵nako, fakatasi mo mea fakapolitiki kolā ne fakasaua ne latou a tino kae māfua mai i ei a puapuaga e uke i tala fakasolopito mua. A masaki, te olaga matua mo te mate atu o se tino pele ka se toe fai mo fai ne fakalavelave o tatou i aso katoa. Ka ‵loka faka‵mau a Satani mo ana temoni i loto i se afe tausaga. Ka ‵galo atu a ikuga ma‵sei o te lotou ‵teke atu. (Faka. 20:2, 3) Ka loto fakafetai eiloa tatou i te taimi tenā, me ne tali‵tonu tatou ki auala o Ieova!

18. Ne a akoakoga e mafai o tauloto ne tatou mai i tino Isalaelu, e pelā mo te mea ne fakamau i te Numela 11:4-6 mo te 21:5?

¹⁸ E mata, ka isi ne fakalavelave i te olaga i te lalolagi fou a te Atua kolā ka tofotofo aka ei te ‵tou tali‵tonu ki auala o Ieova? Mafaufau ki mea ne ‵tupu mai tua malie o te fakasaolotoga o tino Isalaelu mai te ‵nofo pologa i Aikupito. Ne kamata o fameo a nisi tino me ko seai ne mea‵kai ‵fou e maua ne latou, kae ‵kilo fakatakalialia atu ki te manai ne tuku mai ne Ieova. (Faitau te Numela 11:4-6; 21:5.) E mata, ka penā foki ‵tou mafaufauga māfai ko oti atu te fakalavelave lasi? E se iloa ne tatou a te uke o galuega e ‵tau o fai mai tua o te fakamaseiga mo te ‵fuliga malielie o te lalolagi mo fai se palataiso. Kāti ka uke a galuega e ‵tau o fai kae e mafai foki o se faigofie muamua te olaga. E mata, ka fameo tatou ki mea e tuku mai ne Ieova i te taimi tenā? E tasi te mea e mautinoa i a tatou: Ko te lasi o te ‵tou loto fakafetai ki fakatokaga nei a Ieova, ko te lasi foki o te ‵tou loto fakafetai i te taimi tenā.

19. Ka fakamatala fakatoetoe mai pefea ne koe a manatu tāua i te mataupu tenei?

¹⁹ E ‵tonu faeloa a auala o Ieova. E ‵tau mo tatou o tali‵tonu ki te mea tenā. E ‵tau foki mo tatou o loto tali‵tonu ki tino kolā e talitonu ki ei a Ieova ke fakataunu ne latou ana fakatonuga. Ke mo a eiloa ma puli a pati a Ieova ne fai atu e auala i tena pelofeta ko Isaia: “A te malosi o koutou ko te otou ‵nofo filemu kae fakaasi atu te loto talitonu.”—Isa. 30:15.