Te Kilokiloga a te Tusi Tapu ki te ‵Talaga mo te Mavae o te Avaga

E fakamoemoe a Ieova ke fakamaoni a tino a‵vaga ki olotou feagaiga. I te taimi ne fakaipoipo ei ne Ieova te tagata mo te fafine muamua, ne fai mai a ia: “Tenā te pogai e tiakina ei ne te tagata tena tamana mo tena matua kae ‵nofo fakatasi mo te fafine, telā ko tasi ei laua.” Fakamuli ifo, ne faka‵foki mai ne Iesu a pati konā kae toe fakaopoopo mai: “A lāua kolā ko oti ne fakatasi ne te Atua, e seai se tino e mafai ne ia o ‵tala.” (Kenese 2:24; Mataio 19:3-6) Tela la, e ‵kilo atu a Ieova mo Iesu ki te feagaiga o te avaga me se mea telā e gata fua māfai e mate se tino i a lāua. (1 Kolinito 7:39) Ona ko te tāua o te fakatokaga e uiga ki te avaga, e se ‵tau o manatu māmā ki te ‵talaga o te avaga. E tonu, e takalialia a Ieova ki te ‵talaga o avaga kolā e se fakavae ki te Tusi Tapu.​—Malaki 2:15, 16.

Se a te pogai fakavae e tuku mai i te Tusi Tapu mō te ‵talaga o te avaga? Ia, e takalialia a Ieova ki te mulilua mo te finalalolagi. (Kenese 39:9; 2 Samuelu 11:26, 27; Salamo 51:4) E tonu, ona ko te lasi o tena takalialia ki te finalalolagi, ne talia ei ne ia te mea tenā ke fai mo pogai e ‵tala ei te avaga. (Mō fakamatalaga e uiga ki mea kolā e aofia i te finalalolagi, ke onoono ki te Mataupu e 9, te palakalafa e 7.) E tuku atu ne Ieova te saolotoga ke filifili te tino sē agasala me e ‵nofo tasi eiloa lāua mo te tino agasala io me e ‵tala te la avaga. (Mataio 19: 9) Tela la, kafai e filifili te tino sē agasala ke ‵tala te avaga, e se takalialia a Ieova ki te ‵talaga o te avaga tenā. E ui i ei, e se fakamalosi atu te fakapotopotoga Kelisiano ki so se tino ke ‵tala tena avaga. E tonu, e mafai o fakaiku aka ne te avaga sē agasala mai lalo i nisi fakanofonofoga ke ‵nofo fakatasi eiloa lāua mo tena avaga agasala, maise eiloa māfai e salamō tonu tena avaga. Kae i te fakaotiga eiloa, e ‵tau o fai ne latou kolā e fakavae te ‵talaga o olotou avaga ki te Tusi Tapu olotou fakaikuga kae talia foki ne latou so se mea telā e mafai o iku mai i ei.​—Kalatia 6:5.

I toe tulaga faiga‵ta i nisi taimi, ko oti ne fakaiku aka ne nisi Kelisiano ke ‵nofo mavae latou io me ‵tala te avaga e tiga eiloa ne seki aofia i ei a faifaiga finalalolagi. Konei a pati i te Tusi Tapu e uiga ki vaegā tulaga penā: “Kafai la e tiakina ne te fafine tena avaga, e ‵tau mo ia o se toe avaga, io me toe faka‵lei a ia mo tena avaga.” (1 Kolinito 7:11) E se saoloto se Kelisiano penā ke toe avaga ki se isi tino. (Mataio 5:32) Ke mafau‵fau ki nai tulaga faiga‵ta kolā ko oti ne fai ne nisi tino mo fai ne pogai e ‵nofo mavae ei te tauavaga.

Te sē fia tausi atu ki te kāiga. E mafai o mativa ‵ki te kāiga, ko te seai o mea masani kolā e tausi ki ei te ola, ona ko te fakatamala o te tagata, e tiga eiloa e mafai o fai ne ia te mea tenā. E fai mai te Tusi Tapu: “Kae kafai e isi se tino e se fia tausi ki sona kāiga, kae maise eiloa tino o tona kāiga tonu, ko tona uiga ko ‵teke ne ia te fakatuanaki, kae sili atu tona masei i lō te tino sē kelisiano.” (1 Timoteo 5:8) Kafai e se ‵fuli a uiga o se tagata penā, e ‵tau o fai ne tena avaga se fakaikuga telā e mafai o puipui ei a ia mo ana tama‵liki mai te faiga ke maua se taliaga mai se fono fakamasino ke mavae te avaga. Kae se mea ‵tau ke mafaufau faka‵lei a toeaina Kelisiano ki te mataupu e uiga ki se Kelisiano telā ko se tausi atu ki tena kāiga. A te sē tausi atu o se tino ki tena kāiga e mafai o iku atu ki tena fakatea mai te fakapotopotoga.

Toe amioga fakasaua. E mafai o fakama‵taku a amioga fakasauā a se tino avaga ki te malosi, ke oko ki te ola o tena avaga. Kafai te avaga fakasaua se Kelisiano, e ‵tau o sukesuke ne toeaina i te fakapotopotoga a te mea tenā. A te kaitaua mo te faiga faeloa o amioga fakasaua e mafai o fakatea i ei se tino mai te fakapotopotoga.​—Kalatia 5:19-21.

Te fakamataku ki te olaga i te feitu faka-te-agaga. E mafai o taumafai faeloa se tino avaga o fai ke mo a eiloa e fanatu tena avaga ki te tapuakiga tonu io me e taumafai a ia o faimalo ke soli ne tena avaga a fakatonuga a te Atua i nisi auala. I se tulaga penā, e mafai o fakaiku aka ne te avaga telā ko tu i se tulaga fakamataku me i te auala fua e tasi ke “fakalogo ki te Atua i lō te fakalogo ki tino” ko te faiga ke mavae te avaga.​—Galuega 5:29.

I feitu faiga‵ta katoa kolā ko oti ne sau‵tala tatou ki ei, e seai se tino e faimalo ne ia se avaga sē agasala ke mavae io me ke ‵nofo fakatasi mo tena avaga. E tiga eiloa e mafai o fesoasoani atu a taugasoa ma‵tua i te feitu faka-te-agaga kae ‵lago atu a toeaina mai te avatuga o pati fakatonutonu mai te Tusi Tapu, e se mafai o iloa katoa ne latou a mea likiliki i te va o te tagata mo tena avaga. Ko Ieova fua e iloa ne ia. E tonu, e se mafai o faka‵malu atu se fafine avaga Kelisiano ki te Atua io me ko te fakatokaga e uiga ki te avaga māfai e fakalasi‵lasi fua ne ia ana fakalavelave fakatauavaga ko te mea ke ‵nofo mavae lāua mo tena avaga kae e penā foki te tagata. E iloa ne Ieova māfai e fai se togafiti ko te mea ke mavae te avaga, faitalia a taumafaiga e fai ke ‵funa aka te mea tenā. E tonu, a “mea katoa ne faite i te lalolagi, e fakaasi kae tuku faka‵sau eiloa i ona mata; ko ia foki e ‵tau o avatu ki ei ne tatou a tala e uiga mō tatou.” (Epelu 4:13) Kae kafai ko oti ne tupu se mea fakamataku i se taimi leva, e se ‵tau o ‵losi atu se tino māfai ko fai ne se Kelisiano te ‵toe mea eiloa telā e ‵tau o fai, ko te mavae o te avaga. I te fakaotiga eiloa, “ka ‵tu katoa tatou i mua o te nofoga fakamasino o te Atua.”​—Loma 14:10-12.