E tokofia a Molimau a Ieova e iloa ne koe? Kāti e fai eiloa a nisi tino o matou mo fai ou tuakoi, ga‵lue tasi, io me e a‵koga tasi. Io me kāti ne sau‵tala matou mo koe e uiga ki te Tusi Tapu. Ko oi tonu eiloa matou, kae kaia e fakaasi atu ei ne matou omotou talitonuga ki tino katoa?

E ‵pau eiloa matou mo nisi tino. E o‵mai loa matou mai telega mo tulaga kese‵kese i te olaga. A nisi tino o matou ne ‵kau atu muamua ki se lotu fakaatea, kae ko nisi tino e se tali‵tonu ki te Atua. Kae koi tuai o fai mo fai ne Molimau, ne fakaaoga ne matou se taimi tai leva ke iloilo faka‵lei aka a akoakoga i te Tusi Tapu. (Galuega 17:11) Ne lotoma‵lie matou ki mea ne tauloto ne matou, kae ne fai ei ne matou se fakaikuga totino ke tapuaki atu ki a Ieova te Atua.

E maua ne matou a mea aoga mai i te sukesukega ki te Tusi Tapu. E pelā eiloa mo so se tino, e ‵tau o fe‵paki matou mo fakalavelave pelā foki mo motou vāivāiga. Kae mai i te taumafai ke fakagalue aka a akoakoga fakavae i te Tusi Tapu i motou olaga i aso katoa, ne momea aka ei te ‵lei o motou olaga. (Salamo 128:1, 2) Tenā eiloa te pogai e tasi e fakaasi atu ei ne matou ki nisi tino a mea ‵lei kolā ne tauloto ne matou mai te Tusi Tapu.

E ola matou e ‵tusa mo tulaga faka-te-Atua. A tulaga konei, e pelā mo mea e akoako mai i te Tusi Tapu, e fakamalosi aka ei a te nofo ‵lei mo te āva ki nisi tino, fakatasi mo vaegā uiga pelā mo te fakamaoni mo te atafai. E fesoasoani atu latou ki te atiakaga o te malosi ‵lei mo te faiga o tino ke fai mo tino ‵lei o te fenua, kae e fakamalosi aka foki ne latou a te fealofani o te kāiga mo amioga ‵lei. Ona ko te tali‵tonu me i te “Atua e se fakailoga tino,” e aofia eiloa matou i se kautaina faka-te-agaga telā e ‵kau fakatasi i te lalolagi kātoa, e saoloto mai i te fakailoga tino mo mea fakapolitiki faiga‵ta. E tiga eiloa e ‵pau matou mo tino katoa, e fai eiloa matou mo fai ne tino tu ‵kese.—Galuega 4:13; 10:34, 35.

• Ne a mea e ‵pau ei a Molimau a Ieova mo nisi tino?

• Ne a tulaga ne tauloto ne Molimau mai te sukesuke ki te Tusi Tapu?

E mafau‵fau a tino e tokouke me i Molimau a Ieova se igoa o se lotu fou. Kae e silia atu i te 2,700 tausaga ko ‵teka, ne fakasino atu ki tavini a te Atua tonu e tokotasi e pelā me ko tena “molimau.” (Isaia 43:10-12) Ne lauiloa eiloa matou muamua e pelā me ko Tino A‵koga i te Tusi Tapu, ke oko eiloa ki te 1931. Kaia ne fakaaoga ei ne matou a te igoa ko Molimau a Ieova?

E fakailoa atu ei te motou Atua. E ‵tusa mo tusitusiga mua, e lau i afe o taimi e sae mai ei a te igoa o te Atua, ko Ieova, i te Tusi Tapu. I ‵fuliga e uke, ko oti eiloa ne sui a te igoa tenei ki tofi, e pelā mo te Aliki io me ko te Atua. Kae ne fakaasi atu eiloa ne te Atua tonu tena igoa totino, ko Ieova, ki a Mose, ana muna: “Tenā toku igoa ki te se gata mai.” (Esoto 3:15) I te auala tenei, e faka‵kese ei ne ia a ia eiloa mai i atua ‵se katoa. E fakamata‵mata eiloa matou ke tauave te igoa tapu o te Atua.

E fakamatala atu i ei te motou galuega. Ne avatu eiloa ne se fakasologa loa o tino mua, mai i te tagata amiotonu ko Apelu, se molimau e uiga ki te lotou fakatuanaki ki a Ieova. I te fia o senitenali ko ‵teka, ne aofia foki a Noa, Apelaamo, Sala, Mose, Tavita, mo nisi tino i “molimau e tokouke.” (Epelu 11:4–12:1) E pelā eiloa mo te tukuatuga ne se tino se molimau i se fono fakamasino e uiga mō te tino ‵lei, e fakaiku aka foki ne matou ke fakailoa atu a te munatonu e uiga ki te motou Atua.

E fakaakoako matou ki a Iesu. E taku ne te Tusi Tapu a ia ki “te molimau fakamaoni kae tonu.” (Fakaasiga 3:14) Ne fai mai eiloa a Iesu me ne ‘fakailoa atu ne ia te igoa o te Atua’ kae ne tumau eiloa i te ‘molimau atu ki te munatonu’ e uiga ki te Atua. (Ioane 17:26; 18:37) Tela la, e ‵tau o tauave ne soko ‵tonu o Keliso a te igoa o Ieova kae ke fakasalalau atu foki. Tenei eiloa te mea e taumafai a Molimau a Ieova ke fai.

• Kaia ne fakaaoga ei ne Tino A‵koga i te Tusi Tapu a te igoa o Molimau a Ieova?

• E pefea te leva ne fakaaoga ei ne Ieova a molimau i te lalolagi?

• Ko oi te ‵toe Molimau sili a Ieova?

Ne ‵valo mai i te Tusi Tapu me mai tua o te mate o Keliso, ka ‵sae aka a faiakoga ‵loi i va o Kelisiano mua kae fakamasei ne latou te munatonu i te Tusi Tapu. (Galuega 20:29, 30) E seki leva, kae tenā eiloa te mea ne tupu. Ne palu tasi ne latou a akoakoga a Iesu mo manatu fakalotu fapaupau, kae ne ati aka i ei se vaegā Lotu Kelisiano fakaloiloi. (2 Timoteo 4:3, 4) E mafai pefea o fakamautinoa aka ne tatou i aso nei me e malamalama tonu tatou i mea kolā e akoako ‵tonu mai i te Tusi Tapu?

Ne oko mai te taimi ke fakaasi mai ne Ieova te munatonu. Ne ‵valo mai ne ia me i te vaitaimi o te “gataga o te lalolagi,” ka salalau te “malamalama.” (Tanielu 12:4) I te 1870, ne iloa aka ne se tamā potukau o tino kolā ne salasala ki te munatonu me e se fakavae ki te Tusi Tapu a akoakoga e uke a lotu. Tela la, ne kamata o taumafai latou ke malamalama i akoakoga a te Tusi Tapu, kae ne fakamanuia ne Ieova a latou mai i te tukuatuga o te mainaga faka-te-agaga.

Ne suke‵suke eiloa mo te fakaeteete a tāgata loto fakamaoni ki te Tusi Tapu. A Tino A‵koga i te Tusi Tapu loto finafinau konā, ne fakaaoga ne latou se auala ke fai ei a sukesukega telā koi tau‵tali eiloa matou ki ei i aso nei. E sau‵tala latou ki mataupu faka-te-Tusi Tapu takitasi. Kafai ko oko atu latou ki se fuaiupu i te Tusi Tapu telā ne faigata ke malamalama i ei, ne onoono atu latou ki nisi fuaiupu ke fakamatala mai i ei. Kafai ko oko atu latou ki se fakaikuga telā e fetaui ‵lei mo te Tusi Tapu kātoa, ne tusi ne latou ki lalo te manatu tenā. Tela la, mai i te taliaga o te Tusi Tapu ke fakamatala mai ne ia a ia eiloa, ne toe maua aka ei ne latou a te munatonu e uiga ki te igoa o te Atua mo te Malo, tena fuafuaga mō tino mo te lalolagi, te tulaga o tino ‵mate, mo te fakamoemoega ki te toe‵tuga. A te lotou salasalaga ne fakasaoloto ei latou mai i talitonuga mo faifaiga ‵se e uke.—Ioane 8:31, 32.

Talu mai te 1879, ne iloa ei ne Tino A‵koga o te Tusi Tapu me ko oko mai te taimi ke fakasalalau atu ei te munatonu ki te lalolagi kātoa. Tela la, i te tausaga tenā, ne kamata ei o ‵lomi ne latou a te mekesini telā koi ‵lomi eiloa ne matou i aso nei, ko Te Faleleoleo Maluga E Folafola Atu ei te Malo o Ieova. Nei la, ko oti ne fakaasi atu ne matou a muna‵tonu i te Tusi Tapu ki tino i fenua e 240 mo ‵gana e silia atu i te 750. E seki salalau atu eiloa penei a te malamalama tonu i lō aso mua!

• Mai tua o te mate o Keliso, ne a mea ne ‵tupu ki te munatonu i te Tusi Tapu?

• Ne a mea ne fesoasoani mai ke toe maua aka a te munatonu mai te Muna a te Atua?

I te fia sefulu o tausaga, ne fakaaoga, ‵lomi, kae tufatufa atu ne Molimau a Ieova a ‵fuliga kese‵kese o te Tusi Tapu. Kae ne lavea atu ne matou a te manakoga ke fai se ‵fuliga fou telā ka fesoasoani malosi atu ki tino ke “iloa ne latou a te munatonu,” telā ko te loto o te Atua mō tino katoa. (1 Timoteo 2:3, 4) Tela la, i te 1950 ne kamata ei o ‵tala atu a vaega o te motou Tusi Tapu fou i te ‵gana faigofie, ko te New World Translation. Ko oti eiloa ne ‵fuli a te Tusi Tapu i se auala fakamaoni kae tonu ki ‵gana e silia atu i te 130, e aofia i ei te ‵gana Tuvalu.

Ne manakogina se Tusi Tapu telā ne faigofie ke malamalama i ei. E mafuli‵fuli a ‵gana mai tua o se vaitaimi leva, kae e aofia i ‵fuliga e uke a tugapati ‵mafa io me ko tugapati mua kolā e faigata ke malamalama i ei. E penā foki a tusitusiga mua kolā e ‵tonu atu kae tai ‵pau mo tusi muamua ko oti ne maua aka, telā ne iku atu ki te momea aka o te malamalama i tugapati faka-te-Tusi Tapu i te ‵gana Epelu, Alamaika, mo te Eleni.

Ne manakogina se ‵fuliga telā e alofa fakamaoni ki te muna a te Atua. I lō te fulifuli valevale fua o tusitusiga mai te Atua, e ‵tau o fakamaoni a tino ‵fulitusi o te Tusi Tapu ki fakamatalaga kolā ne tusi muamua ki lalo. Kae i te ukega o ‵fuliga, a te igoa o te Atua, ko Ieova, e se fakaaoga i te Tusi Tapu.

Ne manakogina se Tusi Tapu telā e avatu ei a tavaega ki te Tino ne aumai ne ia. (2 Samuelu 23:2) I te New World Translation, ko oti eiloa ne toe fakafoki atu te igoa o Ieova ki koga kolā ne sae mai i ei kāti faka-7,000 taimi i tusitusiga i te Tusi Tapu mua e pelā mo te mea e fakaasi atu mai lalo. (Salamo 83:18, Tusi Paia, Samoa) A te ikuga o sukesukega loto finafinau i te fia o tausaga, ko mafai ei o gali te faitauga ki te Tusi Tapu, me ko fakaasi manino mai i ei a mafaufauga o te Atua. Faitalia me e isi se New World Translation i tau ‵gana io me seai, e fakamalosi atu matou ke fai ne koe se fakatokaga masani o te faitauga ki te Muna a Ieova i aso katoa.—Iosua 1:8; Salamo 1:2, 3.

• Kaia ne fakaiku aka ei ne matou me e manakogina se ‵fuliga fou o te Tusi Tapu?

• Ne a faifaiga i aso katoa e ‵lei mō so se tino telā e fia tauloto ki te loto o te Atua?