E seai ne motou faifeau e ‵togi i te fakapotopotoga. I lō te fai penā, e pelā mo te mea ne fai i te taimi ne kamata ei te fakapotopotoga Kelisiano, ne ‵tofi aka a ovasia kolā e fetaui ‵lei ke fai mo “tausi mamoe o te fakapotopotoga a te Atua.” (Galuega 20:28) E ma‵tua ‵ki a toeaina i te feitu faka-te-agaga kolā e fai ne latou te takitakiga i te fakapotopotoga mo te tausiga o mamoe, “e se i te fai fitoi, kae i te loto fiafia; e se ona ko te fia fai mea i se auala sē tonu, kae i te fiafia tonu.” (1 Petelu 5:1-3) Ne a galuega e fai ne latou mō te ‵lei o matou?

E atafai kae tausi mai latou ki a matou. E takitaki kae fesoasoani mai a toeaina ke puipui a te fakapotopotoga i te feitu faka-te-agaga. Ona ko te iloa ‵lei ne latou me ne tuku atu ne te Atua te tulaga tāua tenei ki a latou, e se fia pule atu latou ki tino, kae e tumau latou i te fesoasoani atu ke ‵lei kae fia‵fia matou. (2 Kolinito 1:24) E pelā eiloa mo te tausi mamoe e tausi atu mo te loto fiafia ki ana mamoe taki tokotasi, e taumafai a toeaina ke iloa ‵lei ne latou a tino takitasi katoa i te fakapotopotoga.​—Faataoto 27:23.

E akoako ne latou a matou ki te auala ke fai ei te loto o te Atua. I vaiaso katoa, e fai ne toeaina a fakatasiga a te fakapotopotoga ko te mea ke fakamalosi aka te motou fakatuanaki. (Galuega 15:32) Ne fai ne tāgata tukugina atu konei a te takitakiga i te galuega talai, mai i te ga‵lue fakatasi kae fakamasani foki matou ki vaega katoa o te galuega talai.

E tuku mai ne latou a fakamalosiga totino. Ko te mea ke tausi mai ki motou manakoga faka-te-agaga, e mafai o āsi mai a toeaina ki a matou i motou fale io me ko te Kingdom Hall ke fesoasoani kae fakamafanafana mai e auala i te Tusi Tapu.​—Iakopo 5:14, 15.

I tafa o olotou galuega i te fakapotopotoga, a te tokoukega o toeaina e isi foki ne olotou galuega ‵togi mo tiute i te kāiga kolā e manakogina ei olotou taimi ke ‵saga faka‵lei atu ki ei. E ‵tau eiloa o fakaasi atu te āva ki taina ga‵lue malosi konei.​—1 Tesalonia 5:12, 13.

• Se a te tulaga o toeaina i te fakapotopotoga?

• Ne a auala e fakaasi mai ei ne toeaina te lotou ‵saga tonu mai ki a matou?

E fakamatala mai ne te Tusi Tapu a potukau e lua o tāgata Kelisiano kolā e tausi atu ki tiute i te fakapotopotoga—ko “ovasia mo tavini fesoasoani.” (Filipi 1:1) A te ‵tonuga loa, e tokouke eiloa a taina penā e tavini atu i te fakapotopotoga. Ne a galuega aoga e fai ne tavini fesoasoani mō matou?

E fesoasoani atu latou ki toeaina. E ma‵tua ‵lei a mafaufau o tavini fesoasoani i te feitu faka-te-agaga, e fakatuagagina, kae ga‵lue malosi foki, e fo‵liki a nisi o latou, kae ko nisi e ma‵tua atu. E tausi ne latou a galuega masani kae tāua mo galuega ‵mafa kolā e ‵tau o fai i te fakapotopotoga. E fai ne te mea tenei ke ‵saga tonu atu a toeaina ki te akoakoga mo tiute e pelā me ne tausi mamoe.

E fai ne latou a galuega aoga. E ‵tofi aka a nisi tavini fesoasoani e pelā me ne tino fesoasoani ke fakatalofa atu ki tino katoa kolā e olo atu ki fakatasiga. E mafai o tausi atu a nisi o latou ki mea fakatagi‵tagi, te tufatufaga o tusi, tupe a te fakapotopotoga, mo te fakatokaga o koga talai ki tino o te fakapotopotoga. E fesoasoani atu foki latou ki te tausiga o te Kingdom Hall. E mafai o fakamolemole atu a toeaina ke fesoasoani atu latou ki tino ma‵tua. Faitalia me ne a tiute e tuku atu ki tavini fesoasoani, a te lotou loto fia‵fia ke fai a mea katoa e ‵tau ei o fakaasi atu ne tino katoa te āva ki a latou.—1 Timoteo 3:13.

E tuku atu ne latou se fakaakoakoga ‵lei e pelā me ne tāgata Kelisiano. E filifili aka a tavini fesoasoani ona ko olotou uiga ‵gali faka-te-agaga. I te taimi e fai ei olotou vaega i fakatasiga, e fakamalosi aka ne latou te motou fakatuanaki. Mai i te faiga o te takitakiga i te galuega talai, e fakamalosi aka foki ne latou te motou loto finafinau. Ona ko te lotou ga‵lue fakatasi, e fakamalosi aka ne latou a te fiafia mo te fealofani. (Efeso 4:16) E se leva kae ka fetaui ‵lei foki latou ke tavini atu e pelā me ne toeaina.

• A tavini fesoasoani ne vaegā tāgata pefea?

• E fesoasoani atu pefea a tavini ki te fakateletelega faka‵lei o mea i te fakapotopotoga?

E taku mai faeloa ne te Tusi Tapu i te ‵gana Eleni a Panapa mo te apositolo ko Paulo. Ne tavini atu a tāgata konei e pelā me ne ovasia faima‵laga kolā ne āsi atu ki fakapotopotoga ‵fou. Kaia? Ne manava‵se tonu lāua ki te ‵lei o lā taina faka-te-agaga. Ne fai atu a Paulo me e manako a ia ke toe “‵foki o āsi atu ki taina” ke onoono aka me e a latou. Ne loto fiafia a ia o faimalaga atu i te fia selau maila (kilomita) ko te mea ke fanatu kae fakamalosi atu latou. (Galuega 15:36) Tenā eiloa te manakoga o motou ovasia faima‵laga i aso nei.

E o‵mai latou o fakamalosi mai ki a matou. E āsi atu a ovasia o te fenua takitasi ki fakapotopotoga e 20 io me e sili atu, kae e fakamāumāu ne ia se vaiaso e tasi mo fakapotopotoga takitasi fakalua i te tausaga. E mafai eiloa o maua ne matou a mea aoga e uke mai i te ata‵mai o taina konei mo olotou avaga, māfai ko oti ne a‵vaga latou. E taumafai latou ke iloa ‵lei ne latou a tamaliki mo tino ma‵tua, kae e loto fia‵fia foki ke ‵kau mai ki a matou i te galuega talai mo motou akoga faka-te-Tusi Tapu. E fai a ovasia konei e pelā me ne tausi mamoe ki toeaina, kae e fakamalosi mai foki ki a matou, e tuku mai ne latou a lāuga fakamalosi loto i fakatasiga mo fono.​—Galuega 15:35.

E fakaasi atu ne latou te lotou fia‵fia ki tino katoa. E fia‵fia malosi eiloa a ovasia o te fenua ki te tulaga faka-te-agaga o fakapotopotoga. E fono latou mo toeaina mo tavini fesoasoani ke mafau‵fau ki feitu ne ga‵solo ei latou ki mua kae tuku atu foki a fakatakitakiga aoga i te faiga o olotou tiute. E fesoasoani atu latou ki paenia ke magoi te lotou galuega, kae e fia‵fia foki ke iloa ne latou a tino ‵fou kae fakalogo‵logo ki mea ne fai ne latou ke ga‵solo atu latou ki mua i te feitu faka-te-agaga. A taina takitasi konei e tuku atu eiloa latou mo te loto fia‵fia e pelā me se “taugasoa telā e ga‵lue fakatasi [matou] mō [motou] manakoga.” (2 Kolinito 8:23) E ‵tau o fakaakoako tatou ki te lotou fakatuanaki mo te tuku katoatoa atu ki te Atua.​—Epelu 13:7.

• Se a te pogai e āsi atu ei a ovasia o te fenua ki fakapotopotoga?

• E mafai pefea o maua ne koe a mea aoga mai i olotou āsiga?

Kafai ko tupu se fakalavelave, e gasue‵sue fakavave a Molimau a Ieova ke fesoasoani atu ki taina kolā e pokotia. E fakaasi mai ne vaegā taumafaiga penā a te ‵tonu o te motou fakatau a‵lofa. (Ioane 13:34, 35; 1 Ioane 3:17, 18) Ne a auala e fesoasoani atu ei matou?

E fesoasoani atu i mea tau tupe. I te taimi o te ogegā meakai i Iutaia, a Kelisiano mua i Anitioka ne avatu ne latou se fesoasoani i mea tau tupe ki olotou taina faka-te-agaga. (Galuega 11:27-30) E penā foki loa, kafai ko iloa ne matou me ko fe‵paki a motou taina i nisi koga o te lalolagi mo mea faiga‵ta, e avatu ne matou a meaalofa e auala i motou fakapotopotoga ke ‵togi ki ei a mea kolā e manakogina malosi ne latou.​—2 Kolinito 8:13-15.

E fesoasoani atu matou i auala aoga. A toeaina kolā e ‵nofo atu i te koga e tupu ei te fakalavelave e ‵sala atu ki tino katoa o te fakapotopotoga ke fakamautinoa aka me ko maua kae ‵lei a tino katoa. E mafai o ga‵lue fakatasi mo te komiti fesoasoani i te tukuatuga o meakai, vai ‵ma, gatu, koga ‵nofo, mo vailakau fakatokita. E tokouke a Molimau kolā e manakogina te lotou atamai, ne volenitia ke olo atu i a latou eiloa kae aofia i te galuega fesoasoani ke faite a fale mo Kingdom Hall kolā ne fakamaseigina. A te fealofani e maua ne matou e pelā me se fakapotopotoga mo te atamai ne maua i te ga‵lue fakatasi e fai ei matou ke gasue‵sue fakavave i taimi penei. E tiga eiloa e fesoasoani atu tatou ki a “latou kolā e kāiga tatou i te tapuakiga tonu,” e fesoasoani atu foki tatou ki nisi tino māfai e mafai, faitalia me se a te lotou lotu.​—Kalatia 6:10.

E fesoasoani atu matou i te feitu faka-te-agaga mo mea tau lagonaga. E ma‵nako malosi eiloa a tino kolā ne pokotia masei i fakalavelave ‵tupu ki fakamafanafanaga. I taimi penā, e maua ne matou a te malosi mai i a Ieova, “te Atua o fakamafanafanaga katoa.” (2 Kolinito 1:3, 4) E fakaasi atu ne matou mo te fia‵fia a folafolaga a te Tusi Tapu ki tino loto fanoa‵noa, mai i te fakatalitonu atu me ko pili o aumai ne te Malo o te Atua a te gataga ki fakalavelave katoa kolā e māfua mai i ei a te ‵mae mo logo‵maega.​—Fakaasiga 21:4.

• Kaia e mafai ei o gasue‵sue fakavave a Molimau i taimi o fakalavelave ‵tupu?

• Se a te fakamafanafanaga faka-te-agaga e mafai o fakaasi atu ne tatou ki tino kolā ne ‵sao?

Mai mua faeloa o tena mate, ne sau‵tala eiloa a Iesu mo ana soko e tokofa—ko Petelu, Iakopo, Ioane, mo Anitelea. I te taimi ne ‵valo mai ei ne ia a te fakailoga o tena fakatasi mai i aso fakaoti, ne fakasae aka ne ia se fesili: “Ko oi la te tavini fakamaoni kae poto telā ne fili ne tena Matai ke tausi atu ki ana nisi tavini, kae fakasoa atu olotou meakai i te taimi tonu?” (Mataio 24:3, 45; Maleko 13:3, 4) Ne fakatalitonu atu ne Iesu ki ana soko me e pelā mo te lotou “pule,” ka ‵tofi aka ne ia latou kolā ka tuku mai faeloa ne latou a mea‵kai faka-te-agaga mō ana soko i te taimi tenei o te gataga. Ko oi e aofia i te tavini tenei?

A latou se tamā potukau o soko o Iesu kolā ne fakaekegina ki te agaga. E isi eiloa se sokoga pili o te “tavini” ki te Potukau Pule o Molimau a Ieova. E tuku mai ne te “tavini” a mea‵kai faka-te-agaga i te taimi tonu ki tino tapuaki ki a Ieova. E fakalagolago matou ki te tavini fakamaoni tenei ke tumau eiloa i te tuku mai ki a tatou a “mea‵kai i te taimi tonu.”—Luka 12:42.

E tausi ne ia te kaukāiga o te Atua. (1 Timoteo 3:15) Ne tuku atu ne Iesu ki te tavini a te tiute ‵mafa i te tausiga o te galuega i te vaega o te fakapotopotoga a Ieova i te lalolagi—te tausiga o ana kope faka-te-foitino, te takitakiga o te galuega talai, mo te akoakoga o matou e auala i motou fakapotopotoga. Tela la, ke tuku mai a mea e manakogina ne tatou, e tufatufa mai ne “te tavini fakamaoni kae poto” a mea‵kai faka-te-agaga e auala i tusi e fakaaoga ne tatou i te ‵tou galuega, e pelā foki mo polokalame i ‵tou fakatasiga mo fono.

E fakamaoni eiloa te tavini ki muna‵tonu i te Tusi Tapu mo tena galuega ke talai atu te tala ‵lei, kae e poto foki i te auala e tausi atu ei ki manakoga o Keliso i te lalolagi. (Galuega 10:42) E fakamanuia ne Ieova ana galuega ki te gasolo aka mo te uke o fakatokaga faka-te-agaga.—Isaia 60:22; 65:13.

• Ko oi ne ‵tofi aka ne Iesu ke fagai ana soko i te feitu faka-te-agaga?

• Ne a auala e fakamaoni kae poto ei te tavini?

I te senitenali muamua, ne tavini atu a “te kau apositolo mo toeaina i Ielusalema,” e pelā me ko te potukau pule ke fai a fakaikuga tāua e uiga loa ki te fakapotopotoga kātoa o Kelisiano fakaekegina. (Galuega 15:2) Kafai e fai ne latou se fakaikuga kae lotoma‵lie katoa ki ei, ne fai eiloa penā ona ko te sau‵talaga e uiga ki muna i te Tusi Tapu kae talia foki te takitakiga a te agaga o te Atua. (Galuega 15:25) Tenā foki eiloa te fakaakoakoga e tau‵tali ki ei i aso nei.

Ne fakaaoga ne te Atua ke fai tena loto. A taina fakaekegina kolā e tavini atu i te Potukau Pule e lasi ‵ki eiloa te lotou fia‵fia ki te Muna a te Atua kae lasi foki te lotou atamai i te fakafesagai atu ki mataupu aoga mo mea faka-te-agaga. E fono latou i vaiaso takitasi ke mafau‵fau ki manakoga o te kautaina i te lalolagi kātoa. E pelā eiloa mo te senitenali muamua, e tuku mai eiloa a akoakoga kolā e fakavae ki te Tusi Tapu e auala i tusi io me ko ovasia faima‵laga mo nisi tusi aka. E fakamalosi aka ne te mea tenei a te fealofani i mafaufauga mo faifaiga a tino o te Atua. (Galuega 16:4, 5) E tausi ne te Potukau Pule a te fakatokatokaga o mea‵kai faka-te-agaga, e fakamalosi ne latou a te galuega talai o te Malo, kae tausi foki ne latou te ‵tofiga o taina ki tauliaga.

E taliagofie ne latou te takitakiga a te agaga o te Atua. E kilo atu te Potukau Pule ki te Tino Tafasili i te Maluga i te Iunivesi, ko Ieova, mo te Ulu o te fakapotopotoga, ko Iesu, mō takitakiga. (1 Kolinito 11:3; Efeso 5:23) E se ‵kilo atu latou ki a latou eiloa e pelā me ne takitaki i tino o te Atua. A latou, fakatasi mo Kelisiano fakaekegina katoa, “e tau‵tali atu faeloa i te Tamā Mamoe [Iesu] faitalia me tefea te koga e fanatu a ia ki ei.” (Fakaasiga 14:4) E fakatāua ne te Potukau Pule a ‵talo a matou mō latou.

• Ko oi ne aofia i te potukau pule i te senitenali muamua?

• E ‵sala atu pefea te Potukau Pule i aso nei ki te takitakiga a te Atua?

Peteli, se pati Epelu, telā e fakauiga ki te “Fale o te Atua.” (Kenese 28:17, 19) E fetaui ‵lei eiloa te igoa tenā ki fale kolā ne faite ne Molimau a Ieova i te lalolagi kātoa kolā e takitaki kae ‵lago atu ki te galuega talai. E tavini atu a te Potukau Pule i te laumua o te lalolagi kātoa i Niu Ioki, Iunaite Sitete, kae e onoono latou ki galuega a ofisa lagolago kolā e tausi atu ki nai fenua. E pelā me se potukau, a latou kolā e tavini atu i fale konei e fakaigoa ki te kāiga Peteli. E pelā me se kāiga, e ‵nofo kae ga‵lue fakatasi latou, e ‵kai fakatasi, e suke‵suke fakatasi ki te Tusi Tapu mo te fealofani.​—Salamo 133:1.

Se koga tu ‵kese telā e fakaasi atu ne tino o te kāiga a te alofa sē fakapito. I fale Peteli katoa, e isi ne tāgata mo fāfine Kelisiano kolā e tuku katoatoa atu ki te faiga o te loto o te Atua kae tavini atu i se auala tumau ki manakoga o te Malo. (Mataio 6:33) E seai se tino e ‵togi, kae e maua ne latou se potu mo se tamā alauenisi ke fesoasoani atu ki manakoga totino. E tofu eiloa a tino katoa i te Peteli mo se galuega, faitalia me ko te ofisa, umu kuka, io me ko te potu ‵kai. E tavini atu a nisi tino i te ‵lomiga io me ko te faitega o tusi, ‵teuga o potu, ‵ta gatu, te tausiga o fale, io me ko nisi mea aka.

Se koga telā e fakalavelave faeloa i te ‵lago atu ki te talaiga o te Malo. A te fakamoemoega tāua o Peteli katoa ko te faiga ke mafai o maua ne tino e tokouke a te munatonu i te Tusi Tapu. A te polosiua tenei se fakaakoakoga e tasi o te mea tenā. Ne tusi mai lalo i te tausiga a te Potukau Pule, ne lafo atu i te itaneti ki tīmu ‵fulitusi i te lalolagi kātoa, e ‵lomi i masini ‵lomi tusi ma‵kini eiloa i nai Peteli, kae lafo atu ki fakapotopotoga e silia atu i te 110,000. I te fakasologa o mea katoa konei, e tuku atu ne kāiga Peteli a te fesoasoani e manakogina ki te ‵toe galuega tāua eiloa​—ko te talaiatuga o te tala ‵lei.​—Maleko 13:10.

• Ko oi e tavini atu i te Peteli, kae ne a fakatokaga e maua ne latou i ei?

• Se a te galuega tāua telā e ‵lago atu ki ei i Peteli takitasi?

E tavini atu a tino o te kāiga Peteli i matagaluega kese‵kese, mai i te tausi atu ki te galuega talai telā e fai i se fenua e tasi io me e uke atu. E mafai o tavini atu latou i tīmu ‵fulitusi, ‵lomiga o mekesini, faitega o tusi, fale ‵lomi tusi, te faiga o kaseti fakalogo‵logo/vitio, io me ko te tausi atu ki nisi mea aka mō koga konā.

E tausi ne te Komiti o te Ofisa Lagolago a te galuega. E tuku atu ne te Potukau Pule a te tausiga o ofisa lagolago ki se Komiti o te Ofisa Lagolago telā e aofia i ei a toeaina kolā e fetaui ‵lei e tokotolu io me e uke atu. E fakailoa atu faeloa ne te komiti ki te Potukau Pule a te gasolo ki mua o te galuega i fenua takitasi mai lalo i tena tausiga mo so se fakalavelave e mafai o sae aka. E fesoasoani atu a vaegā lipoti penā ki te Potukau Pule ke fakaiku aka a mataupu e ‵tau o mafau‵fau ki ei i tusi mō aso mai mua mo fakatasiga mo fono. E uga atu faeloa a sui o te Potukau Pule ke āsi ki ofisa lagolago kae e tuku atu foki a takitakiga mō te Komiti o te Ofisa Lagolago i te faiga o olotou tofiga. (Faataoto 11:14) E fakatoka se polokalame fakapito e aofia i ei se lāuga telā e fai ne se sui mai te laumua ke fakamalosi aka ei a tino kolā e ‵nofo i koga e tausi ne te ofisa lagolago.

E ‵lago atu ki fakapotopotoga mai lalo i ei. E talia ne taina tofia i te ofisa lagolago a te faka‵tuga o fakapotopotoga ‵fou. E fai foki ne taina a te takitakiga i galuega a paenia, misionale, mo ovasia o te fenua kolā e tavini atu i te koga talai mai lalo i te ofisa lagolago. E fakatoka ne latou a fono mo fono o atufenua, e fakatoka te faitega o Kingdom Halls ‵fou, kae onoono foki ki te lafoatuga o tusi ki fakapotopotoga e ‵tusa mo olotou manakoga. A mea katoa e fai i se ofisa lagolago e fesoasoani atu ki te fakataunuga o te galuega talai i se auala tokagamalie.​—1 Kolinito 14:33, 40.

• E fesoasoani atu pefea a Komiti o Ofisa Lagolago ki te Potukau Pule?

• Ne a tiute e tausi atu ki ei a te ofisa lagolago?

Ko te mea ke fai te ‵toe mea e mafai ne tatou o fai ke folafola atu te “tala ‵lei” ki “fenua katoa, mo matakāiga, ‵gana mo tino katoa,” e ‵lomi ne matou a tusi i ‵gana e silia atu i te 750. (Fakaasiga 14:6) E fakataunu pefea ne matou a te galuega faigata tenei? E fai ne matou ona ko te fesoasoani o te kau tusitusi i te lalolagi kātoa mo tino ‵fulitusi kolā e tuku katoatoa atu​—ne Molimau a Ieova katoa.

A te mataupu e fakatoka muamua eiloa i te ‵gana Palagi. E tausi ne te Potukau Pule a te galuega a te Matagaluega Tusitusi i te motou laumua. E tausi ne te matagaluega tenei a galuega a te kau tusitusi kolā e tavini atu i te laumua mo nisi ofisa lagolago. Ona ko te kau tusitusi ne ‵mai mai fenua kese‵kese, ko mafai ei ne matou o fakaaoga a mataupu kese‵kese kolā e ‵gali ki tino i te lalolagi kātoa.

E lafo atu a mataupu konā ki tino ‵fulitusi. Kafai ko oti ne tusi, fakatonutonu kae taliagina a mataupu konā, ko lafo atu ei i te itaneti ki tīmu ‵fulitusi i te lalolagi kātoa, kolā e ‵fuli, e fakatusatusa ki te mea palagi, kae faitau te mataupu i te ‵gana ne ‵fuli ki ei. E taumafai latou ke filifili aka a “muna‵tonu” kolā e fakamatala mai i ei a te uiga kātoa o te mea palagi i te lotou ‵gana.​—Failauga 12:10.

E fai ne komupiuta ke vave te galuega. E se mafai o sui ne se komupiuta a tino tusitusi mo tino ‵fulitusi. Kae e mafai o vave te faiga o te lotou galuega mai i te fakaaogaga o tikisionale, nisi fesoasoani i mea tau te ‵gana, mo tusi fesoasoani i te komupiuta. Ne faite ne Molimau a Ieova se polokalame ko te Multilanguage Electronic Publishing System (MEPS) telā e mafai ei o ‵fuli a mataupu ki te fia selau o ‵gana, kae fai fakatasi mo ata, mo te fakatokaga o tusi mō te ‵lomiga.

Kaia e fai ei ne tatou a taumafaiga katoa konei ke oko foki loa ki te ‵fuliga o mea konei ki ‵gana kolā e fakaaoga ne nai afe fua o tino? Ona ko te loto o Ieova “ke faka‵sao a tino katoa kae ke iloa tonu ne latou a te munatonu.”​—1 Timoteo 2:3, 4.

• Ne a mea e aofia i te tusitusiga o motou ‵tusi?

• Kaia e ‵fuli ei motou tusi ki ‵gana e uke?

E fakatoka kae tufatufa atu ne te motou fakapotopotoga a te fia miliona o Tusi Tapu mo nisi tusi i tausaga katoa e aunoa mo te ‵togi. E faite kae tausi ne matou a Kingdom Hall mo ofisa lagolago. E fesoasoani atu foki matou ki tino ga‵lue i Peteli, mo misionale, kae e fesoasoani atu foki matou i taimi o fakalavelave ‵tupu. Tela la, e mafai eiloa o mafaufau koe, ‘E maua pefea a tupe ke ‵lago atu ki mea katoa konei?’

E seai ne tasi-vae-sefulu, ‵togi o mea, io me ne taegā tupe. E tiga eiloa e ‵togi ‵mafa te ‵lago atu ki te motou galuega talai, e se akai atu matou ki tupe. E sili atu i te 10 tausaga ko ‵teka, ne fai mai te lua o lōmiga o te Faleleoleo Maluga me e tali‵tonu matou ki a Ieova e pelā me ko te motou fesoasoani kae “ka se akai io me fakamolemole lele atu eiloa matou ki tino ke ‵lago mai i mea tau tupe”—kae ka se fai lele eiloa ne matou te mea tenā.​—Mataio 10:8.

E ‵lago atu eiloa ki te motou galuega a meaalofa kolā e tuku mai mo te lotomalie. E fakatāua ne tino e tokouke a te motou galuega ki te akoakoatuga o te Tusi Tapu kae e tuku mai olotou meaalofa ki ei. E fia‵fia foki a Molimau o tuku atu olotou taimi, malosi, tupe, mo nisi kope ki te faiga o te loto o te Atua i te lalolagi kātoa. (1 Nofoaiga Tupu 29:9) I te Kingdom Hall mo ‵tou fono o te fenua mo fono o te atufenua, e isi ne pokisi kolā e tuku atu ki ei a meaalofa a tino. A te ukega o meaalofa e tuku mai eiloa ne tino kolā e se mau‵mea malosi, e pelā mo te fafine mativa telā ne tavae malosi ne Iesu me ne tuku atu ne ia a tupe fo‵liki e lua ki te pokisi o meaalofa i te faletapu. (Luka 21:1-4) Tela la, e mafai faeloa o “tuku fakaa‵tea” ne tino taki tokotasi “se mea ko oti ne fakaiku aka i tena loto.”​—1 Kolinito 16:2; 2 Kolinito 9:7.

E tali‵tonu matou me ka tumau eiloa a Ieova i te fakagasuesue ne ia a loto o tino kolā e fia ‘fakaaloalo atu ki a ia mo olotou fuataga tafasili i te ‵lei’ i te ‵lago atu ki te galuega o te Malo, ko te mea ke fakataunu ei tena loto.​—Faataoto 3:9.

• Se a te mea e fai ei te motou fakapotopotoga ke ‵kese mai nisi lotu?

• E fakaaoga pefea a tupe kolā e tuku fakameaalofa mai?

E pelā eiloa mo te uiga o te Kingdom Hall, tenā te koga e fakavae ki ei a akoakoga mai te Tusi Tapu kolā e fakasino tonu atu eiloa ki te Malo o te Atua—te matua o te galuega talai a Iesu.​—Luka 8:1.

E fai eiloa mo koga fakavae o te tapuakiga tonu i te fa‵kai. E fakatoka eiloa i konā a te talaiatuga o te tala ‵lei o te Malo. (Mataio 24:14) E kese‵kese a te ‵lasi mo te faitega o Kingdom Hall, kae e mata ‵tau katoa, e uke a Kingdom Hall e fakaaoga ne fakapotopotoga e uke atu. I tausaga fakamuli nei, ko oti eiloa ne faite ne matou a te fia sefulu afe o Kingdom Hall ‵fou (kāti e lima i aso takitasi) ko te mea ke fakafetaui aka ki te gasolo aka o tokouke a tino i motou fakapotopotoga. E mafai pefea o tupu te mea tenei?​—Mataio 19:26.

E faite eiloa ki meaalofa tupe kolā e tuku mai. E avatu a meaalofa tupe konei ki te ofisa lagolago ko te mea ke mafai o avanoa ki fakapotopotoga kolā ko manakogina ke faite io me ke fakafou se Kingdom Hall.

E faite ne volenitia sē ‵togi kolā e kese‵kese katoa latou. I fenua e uke, a Potukau Faite Kingdom Hall ko oti eiloa ne fakatoka faka‵lei. E olo atu eiloa a tīmu fakatū‵tu o tavini mo volenitia mai te fakapotopotoga e tasi ki te suā fakapotopotoga i te fenua, ke oko foki eiloa ki fa‵kai fo‵liki, o fesoasoani atu ki fakapotopotoga i te faitega o olotou Kingdom Hall. I nisi fenua, ne ‵tofi aka a Molimau ata‵mai ke tausi atu ki te faitega mo te fakafouga o Kingdom Hall i fenua kolā e tausi atu ki ei. E tiga eiloa e loto fia‵fia a tāgata ata‵mai e uke mai te koga tenā ke fesoasoani atu. I koga katoa e faite ei a Kingdom Hall, e tokouke atu eiloa a tino o te fakapotopotoga e aofia i volenitia kolā e fesoasoani atu ki te galuega. Ko te agaga eiloa o Ieova mo taumafaiga mo te loto kātoa o ana tino e mafai ei o fai a mea katoa konei.​—Salamo 127:1; Kolose 3:23.

• Kaia e fakaigoa ei motou koga tapuaki ki Kingdom Hall?

• E mafai pefea o faite a Kingdom Hall katoa i te lalolagi kātoa?

I Kingdom Hall katoa o Molimau a Ieova, e fakaaoga eiloa i ei a te igoa tapu o te Atua. Tela la, e maua ne matou te lagonaga ke ‵kau atu faeloa ki te tausiga o te fale ke ‵ma, ke ‵lei, kae ko te faitega o mea ma‵sei i ei se tauliaga mo se vaega tāua o te motou tapuakiga tapu. E mafai ne tino katoa o ‵kau atu ki ei.

Volenitia mai tua o fakatasiga ke ‵fulu. Mai tua o fakatasiga takitasi, e fia‵fia eiloa a taina mo tuagane ke ‵teu malie te Kingdom Hall. Kae e fai fakatasi i te vaiaso a te ‵fuluga fakamaea. E tausi ne se toeaina io me se tavini fesoasoani a te galuega, kae e masani eiloa o tau‵tali ki se fakasologa o mea e ‵tau o fai. E faka‵na eiloa ki mea e ‵tau o fai, e volenitia atu a tino taki tokotasi ki te ‵teuga, mōpu, io me ‵teu te fola, ‵solo a ‵pefu, faka‵tonu a nofoga, ‵fulu kae fakama‵nogi a fale fo‵liki, ‵fulu a famalama mo kilo, ‵pei a kaiga, io me ko te faiga o galuega ki te ‵teuga o te tafāfale. Fakatasi i te tausaga, e fakatoka ei se aso ke fai se ‵teuga lasi eiloa. A te aofia o motou tama‵liki i nisi galuega, e akoako ei ne matou a latou ke āva ki te koga e fai ei motou tapuakiga.​—Failauga 5:1.

Ke fesoasoani i te faitega o koga ma‵sei. I tausaga takitasi, e fai ei se iloiloga likiliki o te Kingdom Hall, i loto mo tua. E faka‵na ki te iloiloga tenā, a te faitega o mea ma‵sei ke fakatumau ei a foliga ‵lei o te hall, telā e fesoasoani atu ki te ‵kalo keatea mai i te fakamāumāuga o tupe e uke atu. (2 Nofoaiga Tupu 24:13; 34:10) A te Kingdom Hall telā e ‵ma kae tausi faka‵lei atu ki ei e fetaui ‵lei eiloa ke tapuaki atu i ei ki te motou Atua. Mai i te kau atu ki te galuega tenei, e fakaasi atu ei a te lasi o te fakatāua ne matou o Ieova mo koga tapuaki. (Salamo 122:1) E tuku atu foki ne te mea tenei se ata ‵lei i te fa‵kai.​—2 Kolinito 6:3.

• Kaia e se ‵tau ei o manatu mā‵ma matou ki motou koga tapuaki?

• Ne a fakatokaga ne fai ke fakatumau aka ei te ‵ma o te Kingdom Hall?

E mata, e fia fai ne au sukesukega ke momea aka tou malamalama i te Tusi Tapu? E mata, e fia iloa ne koe te uiga o se tusi faitau e tasi io me se tino, se koga, io me se mea telā ne taku mai i te Tusi Tapu? Io me e fia iloa ne koe me e mafai o fesoasoani atu te Muna a te Atua ki se mea totino e manavase koe ki ei? Kafai e penā loa, ke āsi atu koe ki te fatatusi i te Kingdom Hall.

E tuku mai i ei a tusi fesoasoani mō sukesukega. Kāti e se maua ne koe a tusi faka-te-Tusi Tapu katoa a Molimau a Ieova kolā e avanoa i tau ‵gana. Kae e maua eiloa i te fatatusi i te Kingdom Hall a te ukega o tusi ‵fou. Kāti e maua foki i ei a ‵fuliga kese‵kese o te Tusi Tapu, se tikisionale ‵lei, mo nisi tusi fesoasoani foki. E mafai eiloa o fakaaoga ne koe a te fatatusi mai mua io me mai tua o fakatasiga. Kafai e isi se komupiuta, e mafai o fakaaoga ne koe i ei a te Watchtower Library. A te mea tenei se polokalame telā e maua i ei a ‵tou tusi e uke kae e isi se vaega i ei telā e faigofie ke maua ne koe a fakamatalaga e uiga ki se mataupu, se pati, io me se tusi faitau.

E aoga ki tino kolā e aofia i te Akoga mō Tino Talai. Kafai e kau atu koe ki te akoga, e mafai o fakaaoga faka‵lei ne koe a te fatatusi i te Kingdom Hall i te taimi e fakatoka ei tou tōfiga. E tausi ne te ovasia o te akoga a te fatatusi. E fakamautinoa aka ne ia me e tuku atu ki ei a toe tusi ‵fou kae ke fakatoka faka‵lei foki. E mafai ne ia io me ko tou faiakoga faka-te-Tusi Tapu o fakaasi atu ki a koe a te auala ke maua a fakamatalaga kolā e manako koe ki ei. Kae e se ‵tau lele eiloa o ave keatea mai te Kingdom Hall so se tusi. Kae e ma‵nako foki tatou ke sukesuke faka‵lei ki tusi kae ke mo a ma fakalailaigina.

E fakamatala mai i te Tusi Tapu me ke maua ne tatou a ‘te poto o te Atua,’ e ‵tau o ‵sala atu mo te loto fiafia e pelā eiloa mo te tou ‵sala atu ki “koloa tāua.” (Faataoto 2:1-5) E mafai eiloa o fesoasoani atu a te fatatusi i te Kingdom Hall ke kamata tau salasalaga ki ei.

• Ne a tusi mō sukesukega e mafai o maua i te fatatusi i te Kingdom Hall?

• Ko oi e mafai o fesoasoani atu ki a koe ke fakaaoga faka‵lei a te fatatusi?

Ne fai atu a Iesu Keliso ki ana soko: “Ke penā foki o maina atu te otou mainaga ki tino, ko te mea ke mafai o matea ne latou otou galuega ‵lei kae ‵viki atu ei ki te otou Tamana telā i te lagi.” (Mataio 5:16) Ona ko te mea tenā, e fakaaoga faka‵lei eiloa ne matou a poto ‵fou i aso nei, e aofia i ei a te Itaneti. A te fakatuatusi o matou, ko te jw.org, ko te koga tonu i te Itaneti e maua ei a fakamatalaga e uiga ki talitonuga mo faifaiga a Molimau a Ieova. Ne a mea e aofia i ei?

Ko tali i te Tusi Tapu ki fesili masani. E mafai o maua ne koe a tali ki nisi fesili tāua kolā e ‵sili sāle mai ne tino. E pelā mo tamā pepa ko te E Mata, ka Gata Atu Eiloa a Logo ‵Maega? mo te E Mata, e Mafai Eiloa o Toe Ōla Mai a Tino ‵Mate? ko avanoa nei i ‵gana e silia atu i te 600. E mafai foki o maua ne koe a te New World Translation i ‵gana e 130 tupu mo nai tusi faka-te-Tusi Tapu, e aofia i ei a te tusi ko te Ne a Mea e Akoako ‵Tonu Mai i te Tusi Tapu? mo lōmiga ‵fou o Te Faleleoleo Maluga mo te Ala Mai! E mafai eiloa o faitau io me e fakalogo‵logo ki tusi e uke konei i te itaneti io me e fai ne ‵kopi totino ma koe i te MP3, PDF, io me ko te EPUB. E mafai foki o ‵lomi ne koe a nai itulau ke fakaasi atu ki se tino fiafia i tena ‵gana eiloa! E nofo pelā ki te 12 tupu o tusi fakavitio i ‵gana fai tāga e uke. E mafai o fai ne au ‵kopi ki te faitauga o te Tusi Tapu, koniseti faka-te-Tusi Tapu, mo pese ‵gali ke fakalogologo ki ei i ou taimi sao‵sao.

Fakamatalaga ‵tonu e uiga ki Molimau a Ieova. E maua foki i ei a tala ‵fou mo nai ata fakavitio e uiga ki te motou galuega i te lalolagi kātoa, ko mea ‵tupu kolā e pokotia ei a Molimau a Ieova, mo motou taumafaiga ke fesoasoani atu i taimi o fakalavelave ‵tupu. E mafai o maua ne koe a faka‵pulaga e uiga ki fono i aso mai mua mo auala e fesokotaki atu ei ki motou ofisa lagolago mō fakamatalaga.

E auala i mea konei, e fakamaina atu ei ne matou a te mainaga o te munatonu ki toe koga ‵mao eiloa i te lalolagi. A tino mai i fenua katoa, e aofia i ei a te ‵toe fenua ‵mao kae ‵moko ko Antarctica, ko maua ne latou a mea aoga mai i ei. E ‵talo eiloa matou me ka “tumau te muna a Ieova i te salalau atu fakavave” ki te lalolagi kātoa, mō te vikiga o te Atua.​—2 Tesalonia 3:1.

• E fesoasoani atu pefea a te jw.org ki tino e tokouke ke tauloto ki te munatonu i te Tusi Tapu?

• Ne a mea e fia onoono koe ki ei i te motou Fakatuatusi i te Itaneti?