Ko oti ne fakagata aka ne tino e tokouke te lotou ‵kau atu ki lotu ona ko te mea e seai se takitakiga faka-te-agaga io me se fakamafanafanaga e maua ne latou i ei. Kaia la e ‵tau ei o kau mai koe ki fakatasiga Kelisiano kolā ne fakatoka ne Molimau a Ieova? Ne a au me ka lavea atu i konā?

Te fiafia ke nofo atu i va o tino a‵lofa kae atafai. I te senitenali muamua, ne fakatoka a Kelisiano ki fakapotopotoga, kae ne fai olotou fakatasiga ke tapuaki atu ki te Atua, ke sukesuke ki te Tusi Tapu, kae ke fakatau fakamalosi atu foki latou. (Epelu 10:24, 25) A te maopoopo fakatasi i se vaegā tulaga penā, ne maua i ei ne latou a te lagonaga me ko ‵kau atu latou ki taugasoa ‵tonu—ko olotou taina faka-te-agaga. (2 Tesalonia 1:3; 3 Ioane 14) E tau‵tali atu eiloa matou ki te fakaakoakoga a Kelisiano i te senitenali muamua kae maua foki te fiafia tai ‵pau.

Mea aoga e maua mai i te fakagalue aka o akoakoga fakavae i te Tusi Tapu. E pelā mo taimi o te Tusi Tapu, e maopoopo fakatasi katoa a tāgata, fāfine, mo tama‵liki. E fakaaoga ne faiakoga kolā ko fetaui ‵lei a te Tusi Tapu ke fesoasoani mai ke maina matou i te auala e fakagalue aka ei a akoakoga fakavae i omotou olaga i aso katoa. (Teutelonome 31:12; Neemia 8:8) E mafai o aofia a tino katoa i sau‵talaga mo te kautaina mo te usuga o pese, telā e maua ei ne matou a te avanoaga ke fakaasi atu te motou fakamoemoega faka-Kelisiano.—Epelu 10:23.

A te fakamanuiaga o te fakatuanaki ki te Atua ne fakamalosi aka. Ne fai atu te apositolo ko Paulo ki se fakapotopotoga e tasi i ana aso: “Ko oko eiloa i te fia lavea ne au a koutou, .  . . ke fakatau fakama‵losi aka ei te ‵tou fakatuanaki, ko koutou ki a au a ko au ki a koutou.” (Loma 1:11, 12) A te motou fesokotaki atu faeloa ki taina tali‵tonu i fakatasiga, e fakamalosi aka ei te motou fakatuanaki mo te fakaikuga ke ola i se olaga faka-Kelisiano.

Kaia e se talia ei a te ‵kamiga tenei ke kau atu ki te suā fakatasiga a te fakapotopotoga kae ke lavea eiloa ne koe ki ou mata a mea konei? Ka talimālō faka‵lei eiloa koe mo te alofa. E se ‵togi a fakatasiga katoa—e seai foki ne tupe e ‵tae i ei.

• Se te fakaakoakoga e fakavae ki ei a fakatasiga Kelisiano a matou?

• E mafai pefea o aoga ki a tatou a te ‵kau atu ki fakatasiga Kelisiano?

Kafai foki loa e ‵tau o olo atu matou i loto i se togavao matolu io me ko tau-o-aso ma‵sei, e ‵kau atu faeloa matou ki motou fakatasiga Kelisiano. Faitalia a tulaga faiga‵ta o te olaga mo te fi‵ta mai tua o te galuega i se aso, kaia e taumafai malosi ei a Molimau a Ieova ke ‵kau fakatasi mo taina tali‵tonu?

Se mea ‵lei eiloa mō matou. “Ke na ‵saga atu tatou te suā tino ki te suā tino,” ne tusi mai a Paulo, i ana pati e uiga ki tino kolā e ‵kau tasi matou i te fakapotopotoga. (Epelu 10:24) A te tugapati tenei e fakauiga ki te “mafaufau faka‵lei e uiga ki ei,” telā ko te iloa ‵lei ne tatou, te suā tino ki te suā tino. Tela la, e fakamalosi mai a pati a te apositolo ki a matou ke mafau‵fau e uiga ki nisi tino. Mai i te taumafai ke iloa ‵lei atu a nisi kāiga Kelisiano, e fatoa iloa ei ne matou me ne manumalo eiloa a nisi tino o latou mo te manuia i tulaga faiga‵ta kolā e tai ‵pau mo ‵tou tulaga kae e mafai ne latou o fesoasoani mai ke manumalo foki matou.

E ati aka ei a taugasoa tumau. I fakatasiga a matou, e maopoopo fakatasi matou, e se mo tino fua kolā e masani mo matou, kae mo taugasoa ‵pili. I nisi taimi, e ‵kau fakatasi matou i nisi fakafiafiaga ‵lei. Ne a mea aoga e maua mai i vaegā fesokotakiga penā? E fakamasani matou ke fakatāua ne matou, te suā tino ki te suā tino, kae e fakamalosi aka ei motou lagonaga a‵lofa. Tela la, kafai ko fe‵paki motou taugasoa mo fakalavelave, e toka eiloa matou o fesoasoani atu ki a latou ona ko te malosi ‵mautakitaki o te motou va fakataugasoa. (Faataoto 17:17) Mai i te fesokotaki atu ki tino katoa o te motou fakapotopotoga, e fakaasi atu ei ne matou me e “fakatau amanaia te suā vaega ki te suā vaega.”​—1 Kolinito 12:25, 26.

E fakamalosi atu matou ke filifili ne koe a tino kolā e fai ne latou te loto o te Atua mo fai ou taugasoa. Ka maua ne koe a vaegā taugasoa penā i Molimau a Ieova. E fakamolemole atu ke mo a ma talia ne koe so se mea ke taofi aka ei tou kau mai ki a matou.

• Kaia e aoga malosi ei ki a matou a te ‵kau atu ki fakatasiga?

• Se a te taimi ‵lei e manako ei koe o fakamasani mo te motou fakapotopotoga?

Ne aofia eiloa i fakatasiga Kelisiano mua a pese, ‵talo, mo te faitauga mo te fakamatalaga o te Tusi Tapu​—kae e sē se faifaiga masani fua. (1 Kolinito 14:26) E mafai eiloa o tai ‵pau a mea e fai i fakatasiga a matou.

E fakavae a akoakoga ki te Tusi Tapu kae e aoga foki. I te fakaotiga o vaiaso, e maopoopo a fakapotopotoga takitasi o fakalogo‵logo ki se lāuga faka-te-Tusi Tapu telā e 30 minute ki te auala e fetaui ei a te Tusi Tapu ki ‵tou olaga mo te taimi e ola i ei tatou. E fakamalosi mai ki a matou katoa ke tau‵tali atu ki motou ‵kopi eiloa o te Tusi Tapu. Mai tua o te lāuga, e tasi te itula e fai ei a te Sukesukega ki te “Faleleoleo Maluga,” telā ka mafai o aofia i ei a tino o te fakapotopotoga i se sau‵talaga e uiga ki se mataupu mai i te ‵kopi o Te Faleleoleo Maluga mō sukesukega. E fesoasoani mai a te sau‵talaga tenei ke fakagalue aka ne matou a takitakiga a te Tusi Tapu i motou olaga. E ‵pau eiloa te mataupu e suke‵suke ki ei i fakapotopotoga e 110,000 tupu i te lalolagi kātoa.

E maua ne matou a te fesoasoani ke momea aka te atamai i te akoako atu. E maopoopo fakatasi foki matou i te afiafi o se aso i loto i te vaiaso mō vaega e tolu i te polokalame ko te ‵Tou Olaga Kelisiano mo te Galuega Talai, telā e fakavae ki mataupu mai te Tusi mō Fakatasiga. A te vaega muamua o te fakatasiga tenei, Koloa Mai te Muna a te Atua, e fesoasoani mai ke masani ‵lei tatou mo te vaega o te Tusi Tapu telā e fai ‵tau muamua ki ei te fakapotopotoga. Ka oti ko te Ke Fakaaoga ne Koe i te Galuega Talai, e aofia i ei a fakaasiga ki te auala ke sau ‵tala mo nisi tino ki te Tusi Tapu. E onoono ki ei te tino fakatonutonu ko te mea ke fesoasoani mai ki a matou ke momea aka te ata‵mai o matou i te faitau mo te faipati. (1 Timoteo 4:13) Kae ko te ‵toe vaega, ko te Ke Ola e Pelā me ne Kelisiano. E fakaasi mai i ei a te fakagaluegaga o akoakoga fakavae i te Tusi Tapu i te olaga i aso katoa. E aofia i ei a te faiga o fesili mo tali telā e fai ei ke ‵loto atu ‵tou malamalama i te Tusi Tapu.

Kafai e kau mai koe ki motou fakatasiga, e mautinoa eiloa me ka ofo koe i te ‵lei o akoakoga faka-te-Tusi Tapu e maua ne koe i ei.​—Isaia 54:13.

• Ne a mea e fakamoemoe koe ke lagona atu i fakatasiga a Molimau a Ieova?

• Se a te fakatasiga a matou i te vaiaso e fia kau atu koe ki ei?

Kai lavea aka eiloa ne koe i ata i te polosiua tenei a te fai faka‵lei o gatu o Molimau a Ieova i te taimi e ‵kau atu ei latou ki fakatasiga a olotou fakapotopotoga? Kaia e ‵tau ei o ‵saga faka‵lei atu matou ki motou gatu mo teuga?

Ke fakaasi atu ei te āva ki te motou Atua. Se mea tonu me e sili atu te kilo mai o te Atua ki a tatou i lō ‵tou foliga faka-te-foitino. (1 Samuelu 16:7) Kae kafai ko maopoopo fakatasi matou o tapuaki atu ki a ia, e ma‵nako eiloa matou ke fakaasi atu te āva ki a ia mo taina tapuaki o matou. Kafai e ‵tau o ‵tu atu tatou i mua o se fono fakamasino, ka manava‵se eiloa tatou ki ‵tou foliga ona ko ‵tou āva ki tena tulaga. E penā foki loa motou foliga i fakatasiga e fakaasi atu ei te fakaaloalo o matou ki te “Famasino o te lalolagi,” ko Ieova te Atua, mo te koga e tapuaki atu ei matou ki a ia.—Kenese 18:25.

Ke fakaasi atu a tulaga kolā e tau‵tali matou ki ei. E fakamalosi atu te Tusi Tapu ki Kelisiano ke ‵pei ki “gatu kolā e mata ‵tau i te agamalu mo te mafaufau ‵lei.” (1 Timoteo 2:9, 10) A te pei ki gatu kolā e “mata ‵tau” e fakauiga ki te ‵kalo keatea mai i gatu kolā e mafai o ‵saga malosi mai a tino ki a matou ona ko te ‵togi ‵mafa, tō palau‵lau io me tuku faka‵sau atu i ei motou foitino. A te mauaga foki o te “mafaufau ‵lei” e fesoasoani mai ke filifili aka ne matou a gatu ‵gali kolā e se tō ‵lasi. A akoakoga fakavae konei e tuku mai i ei se avanoaga lasi mō te faiga o filifiliga totino kese‵kese e uke. E aunoa mo te fai atu o se pati, e mafai ne motou foliga ‵gali kae ‵lei o “fakagaligali ne latou a akoakoga a te ‵tou Fakaola” kae ‘‵viki atu ki te Atua.’ (Tito 2:10; 1 Petelu 2:12) Mai i te faiga faka‵lei o motou gatu mō fakatasiga, e fakamalosi aka ei ne matou a te kilokiloga a nisi tino ki te tapuakiga ki a Ieova.

Ke mo a ma talia ne koe ou gatu ke taofi aka ei tou fanatu ki te Kingdom Hall. E se ‵tau o ‵togi ‵mafa ‵tou gatu io me tu ‵kese ko te mea ke ‵lei, ‵ma kae mata ‵tau.

• E pefea te tāua o motou gatu i te taimi e tapuaki ei matou ki te Atua?

• Ne a akoakoga fakavae kolā e takitaki ne ia te faiga o motou filifiliga ki gatu mo teuga?

Kafai e sukesuke koe ki te Tusi Tapu mo se Molimau a Ieova e tokotasi, kāti ka taumafai koe o onoono ki te mataupu a koi tuai o fai te akoga i taimi takitasi. Ke maua a toe mea aoga e uke, se mea ‵lei ke fai foki penā a koi tuai o kau atu ki se fakatasiga a te fakapotopotoga. E maua eiloa a toe ikuga ‵lei māfai e fai ne tatou se fakatokaga mautinoa ‵lei.

Ke fakaiku aka te taimi mo te koga e fai ei a sukesukega. Se a te ‵toe taimi ‵lei e mafai ei o tuku tonu atu tou mafaufau? E mata, ko te tafataeao ‵malu a koi tuai o kamata au galuega mō te aso io me ko te afiafi māfai ko ‵moe a tama‵liki? Kafai foki loa e se mafai o fai au sukesukega mō se taimi leva, ke fakaiku aka ne koe se taimi ke fakaavanoa ki ei, kae taumafai ke se talia se mea ke fakalavelave atu ki ei. ‵Sala aka se koga sē logoā, kae ave katoa keatea a mea kolā e mafai o fakalavelave mai e auala i te tamatega o te letiō, televise, mo te telefoni. A te ‵talo atu mai mua o fai au sukesukega ka fesoasoani atu ke fakafeoloolo aka a mea e manavase koe ki ei i te aso ko te mea ke mafai o saga tonu atu koe ki te Muna a te Atua.​—Filipi 4:6, 7.

Ke fakamailoga te mataupu, kae fakatoka ke fai sau tali. Ke kamata mai i te onoono atu ki te manatu tāua i te mataupu kātoa. Mafaufau ki te ulutala o te mataupu io me ko mataupu, mafaufau ki te sokoga o ulutala fo‵liki takitasi ki te matua tenā, kae iloilo aka so se ata mo fesili kolā e faka‵mafa mai i ei a manatu tāua. Ka oti, ko faitau ei ki palakalafa takitasi, kae onoono ki te tali o te fesili tenā. Ke ‵suke kae faitau a tusi fai‵tau kolā e se siki mai, kae mafaufau ki te auala e ‵lago atu ei ki te mataupu. (Galuega 17:11) Kafai ko maua ne koe te tali ki te fesili, ko fakamailoga ei ne koe a pati io me ko te fuaiupu tāua i te palakalafa telā ka fakamasaua atu i ei a te tali ki a koe. I te fakatasiga, e mafai o sisi tou lima māfai e fia fai ne koe se tali toetoe i au pati eiloa.

Mai i te iloilo aka o mataupu kese‵kese kolā e suke‵suke ki ei i vaiaso takitasi i fakatasiga, ka fakaopoopo atu ei a manatu ‵fou ki tou “fale koloa” telā ko te malamalama ‵lei i te Tusi Tapu.​—Mataio 13:51, 52.

• Se a te faifaiga masani e mafai o fakaaoga ke fakatoka ei koe mō fakatasiga?

• E mafai pefea o fakatoka ne koe eiloa se tali ke fai i te fakatasiga?

Mai i aso mua loa, ne manako a Ieova ke fakamāumāu fakatasi ne kāiga a taimi ke fakamalosi aka ei te lotou feitu faka-te-agaga kae fakamalosi aka foki olotou kāiga. (Teutelonome 6:6, 7) Tenā te pogai e fakatoka ei ne Molimau a Ieova se taimi i vaiaso takitasi mō te kāiga ke tapuaki fakatasi​—ke sau‵tala, i se fakanofonofoga ‵lei, ki mataupu faka-te-agaga kolā e fetaui ‵lei mo olotou manakoga. Kafai foki loa e nofo tokotasi koe, e mafai o fakaaoga faka‵lei a vaegā taimi penā mo te Atua i te faiga o se sukesukega ki se mataupu faka-te-Tusi Tapu telā e filifili aka ne koe.

Se taimi ke momea aka te fakapilipili atu ki a Ieova. “Fakapilipili atu ki te Atua, kae fakapilipili mai a ia ki a koutou.” (Iakopo 4:8) E momea aka te iloa ‵lei ne tatou a Ieova i te taimi e tauloto ei tatou ki ana uiga mo ana faifaiga e auala i itulau o tena Muna tusia. A te auala faigofie ke kamata te tapuakiga a tou kāiga ko te fakamāumāu o taimi ke fai‵tau fakatasi ki te Tusi Tapu i se leo maluga, kāti mai i te tautali atu ki te fakasologa i vaiaso katoa o te Akoga mō Tino Talai. E mafai o filifili aka a tino taki tokotasi i te kāiga ke faitau ne latou se vaega i te faitauga, kae ka oti, ko mafai ei ne tino katoa o sau‵tala ki mea aoga ne tauloto ne latou mai i te Tusi Tapu.

Se taimi ke momea aka ei te fakapilipili atu ki tino o te kāiga. A tāgata a‵vaga mo fāfine a‵vaga, e pelā foki mo mātua mo tama‵liki, e fakamalosi aka te lotou fesokotakiga māfai e suke‵suke ki te Tusi Tapu e pelā me se kāiga. E ‵tau o fai mo fai se taimi fakafiafia, filemu kae gali i te vaiaso. E faka‵na eiloa ki te ma‵tua o olotou tama‵liki, e mafai o filifili aka ne mātua a mataupu aoga ke sau‵tala ki ei, kāti mai te fakaaogaga o nisi mataupu mai i Te Faleleoleo Maluga mo te Ala Mai! io me ko te ‵tou Fakatuatusi i te itaneti, ko te (tv.jw.org). E mafai ne koe o faipati ki se fakalavelave telā ne fepaki mo au tama‵liki i te akoga mo te auala ke fakafesagai atu ki ei. E mafai o fakaakoako koutou ki pese kolā ka usu i te fakatasiga kae inu tī malie mai tua o te tapuakiga a te kāiga.

A te taimi fakapito tenei e fakamāumāu i vaiaso katoa ke tapuaki fakatasi ki a Ieova ka fesoasoani atu ki tino katoa i te kāiga ke fia‵fia ki te Muna a te Atua, kae ka fakamanuia malosi ne ia au taumafaiga.—Salamo 1:1-3.

• Kaia e fakaavanoa ei ne tatou se taimi mō tapuakiga a kāiga?

• E mafai pefea ne mātua o fai a te taimi tenei mo fai se taimi fakafiafia mō tino katoa i te kāiga?

Kaia e mata fia‵fia ei a tino konei? E ‵kau atu latou ki se fono e tasi i motou fono. E pelā mo tavini a te Atua i aso ko ‵teka, kolā ne fakatonu atu ke maopoopo fakatolu taimi i te tausaga, e olioli foki eiloa matou ke toe maopoopo fakatasi i potukau tai ‵lasi atu. (Teutelonome 16:16) I tausaga katoa, e tolu a fono e fai ne matou: fono o te fenua e lua kolā e takitasi aso mo te fono i te atufenua e tolu aso. E aoga pefea ki a matou a maopoopoga konei?

E fakamalosi aka ei te motou kautaina Kelisiano. E pelā eiloa mo te fia‵fia o te kau Isalaelu i te avatu o vikiga ki a Ieova “i te fakapotopotoga o ona tino,” e fia‵fia foki matou ke tapuaki atu fakatasi i maopoopoga fakapito konei. (Salamo 26:12; 111:1) E tuku mai ne maopoopoga konei se avanoaga ke fetaui kae ‵kau fakatasi mo Molimau mai nisi fakapotopotoga io me mai i nisi fenua. I te fakatutonu, e ‵kai fakatasi matou i te koga e fai ei te fono, telā e fakaopoopo atu ei te gali ki maopoopoga faka-te-agaga konei. (Galuega 2:42) I konā e lavea eiloa ne matou ki motou mata a te alofa telā e fai ne ia ke ‵kau fakatasi te motou “kautaina kātoa” i te lalolagi.​—1 Petelu 2:17.

E fesoasoani mai ke gasolo atu matou ki mua i te feitu faka-te-agaga. Ne maua foki ne te kau Isalaelu a mea aoga mai i te “malamalama” o latou i te Tusi Tapu telā ne fakamatala atu ki a latou. (Neemia 8:8, 12) E fakatāua foki ne matou a fakatonutonuga mai te Tusi Tapu kolā e maua ne matou i motou fono. E fakavae eiloa a polokalame takitasi ki se matua faka-te-Tusi Tapu. E auala i lāuga, lāuga fakasolo, mo fakaasiga ‵gali, e tauloto ei matou ki te auala e fai ei te loto o te Atua i motou olaga. E fakamalosi mai ki a matou ke lagona atu a tala o latou kolā ne fakafesagai atu mo te manuia ki te tulaga faigata o te ola e pelā me ne Kelisiano i taimi faiga‵ta konei. I fono i atufenua, e fai ne koniseti ke foliga ‵tonu mai a tala i te Tusi Tapu kae e tuku mai i ei a akoakoga tāua. I fono katoa, e fai eiloa i ei a te papatisoga o tino kolā e fia fakamailoga te lotou tukuatuga ki te Atua.

• Kaia e fai ei a fono mo fai ne taimi fakafia‵fia?

• E maua pefea ne koe a mea aoga mai i te kau atu ki se fono?

Mai mua faeloa o tena mate, ne faka‵pula atu a Iesu: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.” (Mataio 24:14) Kae ka fakataunu pefea a te galuega talai tenei i te lalolagi kātoa? Mai i te tau‵tali atu ki te fakaakoakoga ne tuku mai ne Iesu i te taimi koi nofo ei a ia i te lalolagi.​—Luka 8:1.

E taumafai matou ke fesokotaki atu ki tino i olotou fale. Ne akoako ne Iesu ana soko ke talai atu te tala ‵lei mai fale ki fale. (Mataio 10:11-13; Galuega 5:42; 20:20) Ne tuku atu ki tino talai i te senitenali muamua a koga talai fakapito ke talai atu i ei. (Mataio 10:5, 6; 2 Kolinito 10:13) E penā foki loa i aso nei, ko oti eiloa ne fakatoka faka‵lei te faiga o te motou galuega talai, kae ko oti foki ne tuku atu ki fakapotopotoga takitasi se koga talai ke talai atu i ei. E fai ne te mea tenei ke fakataunu ne matou a te fakatonuga a Iesu ke “talai atu ki tino kae ke tuku atu se molimau maea.”​—Galuega 10:42.

E taumafai matou ke talai atu ki tino i so se koga e maua atu ei latou. Ne tuku mai foki ne Iesu se fakaakoakoga ‵lei mai i te talai atu ki tino i koga e tokouke a tino i ei, e pelā mo te tafātai io me ko vaikeli. (Maleko 4:1; Ioane 4:5-15) E fai‵pati atu foki matou ki tino e uiga ki te Tusi Tapu i so se koga e mafai ne matou​—i auala, i koga ga‵lue, i malae ta‵fao, io me i te telefoni. E talai atu foki matou ki tuakoi, tino ga‵lue tasi, tamaliki a‵koga, mo kāiga māfai e maua ne matou se avanoaga ‵lei. A taumafaiga katoa konei ne mafai ei ne te fia miliona o tino i te lalolagi kātoa o lagona ‘te tala ‵lei o te fakaolataga.’​—Salamo 96:2.

E mata, e mafai o mafaufau koe ki se tino telā e fia fakaasi atu ne koe ki ei a te tala ‵lei o te Malo o te Atua mo te aoga o te tala tenā ki te lotou olaga i aso mai mua? Sa taofi aka ne koe a te fekau tenei e uiga ki te fakamoemoega. Ke na fakaasi fakavave atu ki a latou!

• Se a te “tala ‵lei” e ‵tau o folafola atu?

• E tau‵tali atu pefea a Molimau a Ieova ki te auala ne talai atu ei a Iesu?

A te pati “paenia” e masani o fakasino atu ki tino kolā e maua ne latou a koga ‵fou kae ‵tala mai i ei a te auala mō nisi tino ke olo atu ki ei. Ne fai eiloa a Iesu mo fai se vaegā paenia penā, me ne uga mai a ia ki te lalolagi ke fai se galuega fakaola tino kae ke ‵tala mai foki te auala ki te fakaolataga. (Mataio 20:28) I aso nei, e tau‵tali atu ana soko ki a ia mai i te fakamāumāu ne ia a taimi e uke ki te ‘faiga o soko.’ (Mataio 28:19, 20) Ko oti ne ‵kau atu a nisi tino ki te taviniga telā e taku ne matou ki te paenia

A te paenia se tino talai tumau. A Molimau a Ieova katoa ne tino talai o te tala ‵lei. Kae e isi ne tino ko oti ne fakatoka faka‵lei olotou olaga ke tavini atu e pelā me ne paenia tumau, mai i te fakaaogaga o itula e 70 i masina takitasi i te galuega talai. Ke fai te mea tenei, ne fakamu‵tana ifo ne tino e tokouke olotou taimi ga‵lue. Ne filifili aka a nisi tino ke tavini atu e pelā me ne paenia fakapito i koga kolā e manakogina malosi ei a tino talai o te Malo, telā e fakamāumāu ne latou a itula e 130 io me e uke atu i te galuega talai i masina takitasi. E lotoma‵lie a paenia ke ola latou i se olaga faigofie, kae tali‵tonu me ka tuku mai ne Ieova a mea e manakogina mō te olaga. (Mataio 6:31-33; 1 Timoteo 6:6-8) A latou kolā e se mafai o paenia tumau e mafai o tavini atu e pelā me ne paenia lagolago māfai e mafai, mai i te momea aka olotou mea e fai i te galuega talai ki te 30 io me ko te 50 itula i te masina.

E fakamalosi aka se paenia ne te alofa ki te Atua mo tino. E pelā mo Iesu, e lavea ne tatou te tulaga fakaa‵lofa o tino e tokouke i aso nei i te feitu faka-te-foitino. (Maleko 6:34) Kae e maua nei ne tatou a te mainaga telā e mafai o fesoasoani atu ki a latou, mai i te fakaasiatuga o se fakamoemoega mautinoa mō aso mai mua. A te alofa ki ‵tou tuakoi e fakamalosi aka ei se paenia ke tuku atu mo te kaimalie ana taimi mo te malosi ke fesoasoani atu ki nisi tino i te feitu faka-te-agaga. (Mataio 22:39; 1 Tesalonia 2:8) E pelā me ko te ikuga, e fakamalosi aka ei tena fakatuanaki, e momea aka tena fakapilipili atu ki te Atua, kae e lagona foki ne ia a te fiafia lasi.​—Galuega 20:35.

• E fakamatala mai pefea ne koe a te paenia?

• Se a te mea ne fakamalosi aka ei a nisi tino ke paenia tumau?

Ko leva ne fai a akoga mai te Atua mo fai se fakailoga o Molimau a Ieova. Ne fakatoka a akoga fakapito mō tino kolā ko tuku kātoa atu olotou taimi ki te galuega talai o te Malo ko te mea ke mafai ne latou o ‘fakataunu katoatoa te lotou galuega.’—2 Timoteo 4:5.

Akoga mō Paenia. I te fakaotiga o te tausaga muamua i te taviniga o se paenia tumau, e kau atu a ia ki se akoga telā e ono a aso kae e mafai o fai i se Kingdom Hall pili mai. A te pogai o te akoga ke fesoasoani atu ki te paenia ke momea aka tena fakapilipili atu ki a Ieova, ke momea aka tena magoi i vaega katoa o te galuega talai, kae ke tumau i te tavini mo te fakamaoni.

Akoga mō Tino Talai o te Malo. Ne fakatoka a te akoga tenei e lua masina te leva ke fakamasani a paenia ata‵mai kolā e loto fia‵fia o tiaki olotou fenua ke tavini atu i so se koga e manakogina latou i ei. E pelā me fai mai latou, “Ko au! Uga mai au!” ona ko te lotou fakaakoako atu ki te ‵toe Tino talai sili telā ne tavini atu i te lalolagi, ko Iesu Keliso. (Isaia 6:8; Ioane 7:29) E mafai o aofia i te tiakinaga o se fenua a te fakafetaui aka ki se olaga faigofie. E mafai o ‵kese eiloa a tuu, tau o aso, mo mea‵kai mai i mea kolā ne masani ki ei se tino. Kāti e manakogina ke tauloto ki se ‵gana fou. E fesoasoani atu a te akoga tenei ki taina mo tuagane taka mo tauavaga, kolā e nofo olotou tausaga mai te 23 ki te 65 ke ati aka ne latou a uiga faka-te-agaga e manakogina ne latou i olotou tōfiga mo atamai kolā e mafai ei o fakaaoga katoatoa latou ne Ieova mo tena fakapotopotoga.

Akoga i Kiliata. I te ‵gana Epelu, e fakauiga loa a te pati “Kiliata” ki te “Molimau Lasi.” Talu mai te kamataga o te akoga i Kiliata i te 1943, ko oti eiloa ne uga atu a tino ne iku mai i te akoga tenei e toko 8,000 tupu e pelā me ne misionale ki “toe koga ‵mao o te lalolagi” kae ne iku manuia eiloa olotou taumafaiga. (Galuega 13:47) I te taimi muamua ne oko atu a tino konei ki Peru, e seai ne fakapotopotoga i te fenua. Nei la, ko sili atu i te 1,000. I te taimi ne kamata o tavini atu ‵tou misionale i Tiapani, e mu‵tana ifo i te toko sefulu o Molimau i te fenua. Nei la, ko silia atu i te toko 200,000. E aofia i te akoga i Kiliata telā e lima masina te leva a te sukesuke fakamaea ki te Muna a te Atua. E ‵kami eiloa ke ‵kau atu ki te akoga tenei, a tino kola e tavini atu e pelā me ne paenia fakapito io me ko misionale i te galuega talai, i te Peteli, io me ko te galuega a ovasia o te fenua, ke akoako latou ke iloa o fesoasoani atu ki te faka‵mautakitaki mo te fakamalosi aka o te galuega i te lalolagi kātoa.

• Se a te pogai o te Akoga mō Paenia?

• Ne fakatoka mo oi a te Akoga mō Tino Talai o te Malo?