MATAUPU 17

A Iesu se Vaegā Tino Pefea?

Printed Edition

I te taimi e tauloto tatou ki pati mo faifaiga a Iesu i te lalolagi, ko iloa ei ne tatou a uiga kolā e fai ei ke fia fai taugasoa tatou ki a ia mo tena Tamana, ko Ieova. Ne a nisi uiga ‵gali konei? Kae e mafai pefea o fakaakoako eiloa tatou ki a Iesu?

1. I auala fea e fai ei a Iesu e pelā mo tena Tamana?

Ne onoono faeloa a Iesu ki tena Tamana alofa i te lagi kae tauloto mai i a Ia mō se fia piliona tausaga. Tela la, ne fai eiloa a ia pelā mo tena Tamana i te auala e mafaufau ei a ia, ana lagonaga mo ana faifaiga. (Faitau te Ioane 5:19.) Ne fakaata atu ne Iesu a uiga o tena Tamana i se auala ‵lei katoatoa, telā ne fai mai ei a ia, penei: “So se tino e kilo mai ki a au ko kilo foki ki te Tamana.” (Ioane 14:9) I te taimi e tauloto ei koe ki uiga o Iesu, ka mafai foki o iloa ‵lei ne koe a Ieova. E pelā mo te alofa atafai o Iesu ki tino e fakaasi mai ei, me e penā foki a lagonaga o Ieova ki a koe.

2. Ne fakaasi mai pefea ne Iesu me e alofa a ia ki a Ieova?

Muna a Iesu: “Ko te mea ke iloa ne te lalolagi i a au e alofa ki te Tamana, e fai eiloa ne au a te fakatonuga ne tuku mai ne te Tamana ke fai ne au.” (Ioane 14:31) I tena nofoga i te lalolagi, ne fakaasi atu ne Iesu a te lasi o tena alofa ki tena Tamana mai te fakalogo ki a ia faitalia foki loa māfai e faigata ke fai penā. Ne fiafia foki a Iesu o faipati e uiga ki tena Tamana kae fesoasoani ki nisi tino ke ati aka se va fakataugasoa mo Ia.—Ioane 14:23.

3. Ne fakaasi mai pefea ne Iesu me e alofa a ia ki tino?

E fai mai te Tusi Tapu me e “alofa fakapito eiloa [a Iesu ki] tino.” (Faataoto 8:31, fml) Ne fakaasi mai ne ia te alofa tenei e auala i te fakamalosi mo te fesoasoani atu ki tino. Ne fai ne ia a vavega kolā ne fakaasi atu i ei a tena ‵mana penā foki mo tena alofa atafai. (Maleko 1:40-42) Ne ata fai faka‵lei ne ia a tino i se auala alofa e aunoa mo te fakailoga tino. Ne maua ne tino loto ‵lei a fakamafanafanaga mo te fakamoemoega i ana pati. Ne loto fiafia a Iesu ke logo‵mae kae mate a ia ona ko tena alofa ki tino katoa. Kae e sili atu eiloa tena alofa ki tino kolā e tau‵tali ki ana akoakoga.—Faitau te Ioane 15:13, 14.

KELI MALOSI IFO

Tauloto ki uiga e uke atu o Iesu. Kae mafaufau ki auala ke fakaasi atu te alofa mo te kaimalie e pelā mo ia.

4. E alofa a Iesu ki tena Tamana

A faifaiga a Iesu e akoako mai i ei a te auala ke fakaasi atu ne tatou a te alofa ki te Atua. Faitau te Luka 6:12 mo te Ioane 15:10; 17:26. Kafai ko oti ne fai‵tau ki tusi fai‵tau takitasi, ke sau‵tala ki te fesili tenei:

Mai te fakaakoako ki a Iesu, e fakaasi atu pefea ne tatou me e a‵lofa tatou ki a Ieova?

Ko Iesu e ‵talo. — Ne alofa Iesu ki tena Tamana i te lagi kae faipati atu faeloa ki a ia e auala i ‵talo

5. E atafai a Iesu ki tino kolā e ma‵nako ki se fesoasoani

Ne fakamuamua ne Iesu a manakoga o nisi tino i lō ana manakoga. Faitalia tena fi‵ta, ne fakaaoga ne ia ana taimi mo tena malosi ke fesoasoani ki tino. Faitau te Maleko 6:30-44, ko sau‵tala ei ki fesili konei:

I te tala tenei, ne a auala ne fakaasi mai ei ne Iesu tena atafai ki nisi tino?—Onoono ki te fuaiupu e 31, 34, 41, mo te 42.
Se a te mea ne fakamalosi atu ki a Iesu ke fesoasoani ki tino?—Onoono ki te fuaiupu e 34.
Ona ko te mea e fakaata atu ne Iesu a uiga o Ieova, se a te mea e akoako mai i ei e uiga ki a Ieova?
Ne a nisi auala e mafai ei o fakaakoako tatou ki te atafai o Iesu ki nisi tino?

Ko Iesu e fagai fakavavega ne ia te fia afe o tino mai te faiga ke uke atu a falaoa e lima mo ika e lua. Ne fakasoa atu ei ne ana soko a meakai ki tāgata, fāfine mo tama‵liki.

6. A Iesu e kaimalie

A Iesu e kaimalie faitalia me e se uke ana kope faka-te-foitino, kae ne fakamalosi mai a ia ki a tatou ke fakaasi atu foki te uiga kaima‵lie. Faitau te Galuega 20:35, ko sau‵tala ei ki te fesili tenei:

E ‵tusa mo pati a Iesu, e mafai pefea o fia‵fia tatou?

Pei te VITIO, ko sau‵tala ei ki fesili konei.

VITIO: “E Sili Atu te Fiafia o te Tino Telā e Tuku Atu Ana Mea”—Se vaega i ei (4:00)

Ne a nisi auala kolā e mafai o tuku atu ne tatou a mea, faitalia me e se uke ‵tou kope faka-te-foitino?

E iloa ne koe?

E akoako mai te Tusi Tapu ke ‵talo atu tatou ki a Ieova i te igoa o Iesu. (Faitau te Ioane 16:23, 24.) Kafai e ‵talo tatou i te auala tenā, ko fakaasi atu ei ‵tou loto fakafetai ki mea ne fai ne Iesu ke fesoasoani mai ke fai tatou mo taugasoa o Ieova.

MEA E FAI MAI NE NISI TINO: “A te Atua e se fia saga mai ki ‵tou logo‵maega.”

Ona ko te mea e fakaata atu ne Iesu a uiga o tena Tamana, e fakamaoni mai pefea i ana faifaiga a te atafai mai o Ieova ki a tatou?

MANATU AOGA

E alofa a Iesu ki a Ieova, kae alofa foki ki tino. Ona ko te mea e fai a Iesu e pelā mo tena Tamana, kafai e uke au mea e iloa e uiga ki a Iesu ko te momea aka foki o te iloa ‵lei ne koe a Ieova.