MATAUPU 20

Te Auala ne Fakatoka ei te Fakapotopotoga

Printed Edition

A Ieova se Atua e fakatoka faka‵lei ana mea. (1 Kolinito 14:33) Tela la, e fakamoe‵moe tatou ke fakatoka faka‵lei foki ana tino. Ne fakatoka pefea a te fakapotopotoga Kelisiano? E fesoasoani atu pefea tatou ke fakateletele faka‵lei?

1. Ko oi te ulu o te fakapotopotoga?

A “Keliso ko te ulu o te fakapotopotoga.” (Efeso 5:23) E takitaki ne ia mai te lagi a galuega a tino o Ieova i te lalolagi kātoa. Ne ‵tofi aka ne Iesu a “te tavini fakamaoni kae poto”—se potukau foliki o toeaina ma‵tua ‵lei faka-te-agaga kolā e taku foki ko te Potukau Pule. (Faitau te Mataio 24:45-47.) E pelā mo apositolo mo toeaina i te senitenali muamua i Ielusalema, e tuku atu foki ne te Potukau Pule a fakatonutonuga ki fakapotopotoga i te lalolagi kātoa. (Galuega 15:2) Kae ko tāgata konei e se ko takitaki o te motou fakapotopotoga. E ‵kilo latou ki a Ieova mo tena Muna ke maua mai ei te takitakiga, kae faka‵logo latou ki te pulega a Iesu.

2. Se a te tulaga o toeaina?

A toeaina ne tāgata Kelisiano ma‵tua ‵lei faka-te-agaga kolā e fakaaoga ne latou te Tusi Tapu ke akoako atu kae tausi ki tino o Ieova mai te fesoasoani mo te fakamalosi atu ki a latou. E se ‵togi latou. I lō te fai penā, e tavini atu latou mo “te loto fiafia i mua o te Atua; e se ona ko te fia fai mea i se auala sē tonu, kae i te fiafia tonu.” (1 Petelu 5:1, 2) E ‵lago atu a tavini fesoasoani ki toeaina kae e mafai o fetaui ‵lei fakamuli latou ke fai mo toeaina.

E ‵tofi ne te Potukau Pule a nisi toeaina ke fai pelā me ne ovasia o te seketi. E asi atu latou ki fakapotopotoga kese‵kese ke tuku atu a fakatonutonuga mo fakamalosiga ki a latou. E ‵tofi ne latou a toeaina mo tavini fesoasoani kolā e fetaui ‵lei mo mea kolā e manakogina i te Tusi Tapu.—1 Timoteo 3:1-10, 12; Tito 1:5-9.

3. Se a te tulaga o Molimau taki tokotasi?

A tino katoa i te fakapotopotoga e “‵viki atu latou ki te igoa o Ieova” mai te faiga olotou tusaga i fakatasiga a te fakapotopotoga kae ‵kau atu ki te galuega talai e ‵tusa mo olotou fakanofonofoga.—Faitau te Salamo 148:12, 13.

KELI MALOSI IFO

Iloilo aka me ko Iesu se takitaki pefea, te auala e taumafai ei a toeaina ke fakaakoako ki a ia, mo te auala ke ‵lago atu tatou ki a Iesu mo toeaina.

4. A Iesu se takitaki atafai

E tuku mai ne Iesu ki a tatou se ‵kamiga gali. Faitau te Mataio 11:28-30, ko sau‵tala ei ki te fesili tenei:

Ne a lagonaga e manako a Iesu ke maua ne tatou mai tena takitakiga?

E fakaakoako atu pefea a toeaina ki a Iesu? Pei te VITIO.

VITIO: Ne ‵Saga Atu a Toeaina ki te Mafuie i Nepal (4:56)

E akoako faka‵lei mai i te Tusi Tapu a te auala e ‵tau ei o fai ne toeaina olotou galuega.

Faitau te Isaia 32:2 mo te 1 Petelu 5:1-3, ko sau‵tala ei ki fesili konei:

E pefea ou lagonaga ke iloa atu me e taumafai malosi a toeaina o fakamalosi atu ki nisi tino, e pelā mo Iesu?
Ne a nisi auala e fakaakoako atu ei a toeaina ki a Iesu?

5. E akoako a toeaina e auala i olotou faifaiga

Se a te kilokiloga e manako a Iesu ke maua ne toeaina e uiga ki te lotou tulaga? Pei te VITIO.

VITIO: E Fai ne Toeaina te Takitakiga! (7:39)

Ne tuku mai ne Iesu a mea kolā e manakogina mō tino kolā e fai te takitakiga i te fakapotopotoga. Faitau te Mataio 23:8-12, ko sau‵tala ei ki te fesili tenei:

Ne a mea fakaofoofogia ki a koe e uiga ki te ‵kese o tulaga i te Tusi Tapu mō toeaina mo mea ne lavea ne koe i takitaki lotu?

A. Ata valevale: Se toeaina e tausi faka‵lei ki manakoga faka-te-agaga o ia mo tena kāiga. 1. E ‵talo a koi tuai o sukesuke ki te Tusi Tapu. 2. E akoako ne ia tena tamaliki fafine ki te Tusi Tapu fakatasi mo te fesoasoani o tena avaga.

E. Ko te toeaina foki tenā mo tena avaga e asi atu ki se tuagane masaki mai te lotou fakapotopotoga i te fakaimasaki.

E tausi ne toeaina a latou mo olotou kāiga ke ma‵losi i te feitu faka-te-agaga
E atafai a toeaina ki tino katoa i te fakapotopotoga
E ga‵lue faeloa a toeaina i te galuega talai
A toeaina ne faiakoga. E fesoasoani foki latou ki te ‵teuga mo nisi galuega

6. E mafai o ‵lago atu tatou ki toeaina

E tuku mai i te Tusi Tapu se pogai tāua e ‵tau ei o ‵lago atu tatou ki toeaina. Faitau te Epelu 13:17, ko sau‵tala ei ki fesili konei:

Kaia e fakamalosi mai ei te Tusi Tapu ke faka‵logo tatou ki tino kolā e fai ne latou te takitakiga? Ne a ou lagonaga ki ei?

Faitau te Luka 16:10, ko sau‵tala ei ki te fesili tenei:

Kaia e tāua ei ke ‵lago atu ki toeaina ke oko foki loa ki mea kolā e foliga mai me ne tamā mea fua?

MEA E FAI MAI NE NISI TINO: “E se manakogina ke kau koe ki se lotu telā ne fakatoka faka‵lei.”

Se a tau faka‵tau, ne a mea e mafai o maua ne se tino telā e tapuaki atu ki te Atua i se fakapotopotoga?

MANATU AOGA

A Iesu ko te ulu o te fakapotopotoga. E fia‵fia tatou ke ‵lago atu ki toeaina mai lalo i tena takitakiga me e fakamalosi kae akoako ne latou a tatou e auala i olotou faifaiga ‵lei.