Ke Loto Fakafetai ki te Meaalofa ko te Ola

E uke a mea ‵gali e mafai o ‵tupu i te olaga. Kafai foki loa e fe‵paki tatou mo fakalavelave, e mafai eiloa o fia‵fia tatou i nisi taimi. E fakaasi atu pefea ne tatou a te ‵tou loto fakafetai ki te meaalofa ko te ola? Kae se a te ‵toe pogai tāua e ‵tau ei o fai penā?

1. Kaia e ‵tau ei o loto fakafetai tatou ki te ola?

E ‵tau o loto fakafetai tatou ki te ola me se meaalofa ne aumai ne te ‵tou Tamana alofa, ko Ieova. A ia “ko te pogai o te ola”—ne faite ne ia a mea ola katoa. (Salamo 36:9) “Ko ia fua telā e tuku atu ne ia ki tino katoa a te ola mo te mānava e pelā foki mo mea katoa.” (Galuega 17:25, 28) E tuku mai ne Ieova a mea kolā e ‵tau o maua ne tatou ke tumau i te ola. Kae sili atu i ei, e fai foki ne ia ke mafai o ola tatou mo te fia‵fia.—Faitau te Galuega 14:17.

2. E mafai pefea o fakaasi atu ne tatou ki a Ieova a te ‵tou loto fakafetai ki te meaalofa ko te ola?

Mai te taimi eiloa ne fakafua ei koe, ne atafai atu a Ieova ki a koe. Ne fakaosofia se tino tapuaki a te Atua, ko Tavita, ke fai mai penei e uiga ki a ia: “Ne kilo mai ou mata ki a au e pelā me se pepe e seki fanau.” (Salamo 139:16) E fakatāua malosi ne Ieova a tou ola. (Faitau te Mataio 10:29-31.) Ka logo‵mae malosi eiloa a ia māfai e tamate ne se tino a te suā tino, kae ke oko foki eiloa māfai ko fakamate a ia.a (Esoto 20:13) Ka logo‵mae foki a Ieova māfai e se gasue‵sue tatou mo te fakaeteete ke puipui ‵tou ola io me ko te ola o nisi tino. Kafai e atafai tatou ki ‵tou ola kae āva ki ola o nisi tino, e fakaasi atu ei ‵tou loto fakafetai ki te meaalofa fakaofoofogia ko te ola.

KELI MALOSI IFO

3. Tausi faka‵lei tou ola ‵lei

E fakaaoga ne Kelisiano tukugina atu a vaega katoa o te lotou olaga ke tavini atu ki a Ieova. E pelā loa me ko tuku atu olotou foitino e pelā me se taulaga ki te Atua. Faitau te Loma 12:1, 2, ko sau‵tala ei ki fesili konei:

• Se a te mea e ‵tau o fakamalosi atu ki a koe ke tausi faka‵lei tou ola ‵lei?

• Ne a nisi auala e mafai ei o fai koe penā?

4. Fakaeteete ke mo a ma pakia io me mate se tino

E fakamalosi mai te Tusi Tapu ke ‵kalo keatea tatou mai i faifaiga fakama‵taku. Pei te VITIO ke iloa ne koe a nisi mea e ‵tau o fai ke se pakia koe.

VITIO: Ke Puipui Faeloa Tou Ola (8:34)

Faitau te Faataoto 22:3, ko sau‵tala ei ki auala e mafai o puipui ei koe mo nisi tino . . .

• i tou fale.

• i tou koga galue.

• i taimi ta‵fao.

• i taimi e fakatele io me e pasese koe i se mea fakateletele.

5. Ke āva ki te ola o se pepe seki fanau

I tugapati fakauiga, ne faipati a Tavita e uiga ki te saga tonu mai o Ieova ki te ola mo te ‵tupuakaga o se pepe e seki fanau. Faitau te Salamo 139:13-17, ko sau‵tala ei ki te fesili tenei:

• I te kilokiloga a Ieova, e mata, e kamata a te ola o te tino i te taimi e fakafua ei io me ko te taimi e fanau mai ei?

A tulafono a Ieova ki tino Isalaelu i aso mua, ne puipui ei a mātua mo olotou pepe kolā e seki fa‵nau mai. Faitau te Esoto 21:22, 23, ko sau‵tala ei ki fesili konei:

• Se a te kilokiloga a Ieova ki se tino ne mate fakafuasei i a ia se pepe telā e seki fanau mai?

• Ka pefea ana lagonaga māfai ne fai ne se tino a te mea tenā mo te iloa tonu?b

• E pefea ou lagonaga ki te kilokiloga a te Atua?

Pei te VITIO.

VITIO: Ke Fakatāua te Ola e Pelā mo te Atua (5:00)

Ke oko foki loa ki se fafine telā e iloa ne ia te tāua o te ola, e mafai o mafaufau me i te ‵toe fakaikuga ‵lei fua e tasi ko te fakatō o tena pepe. Faitau te Isaia 41:10, ko sau‵tala ei ki fesili konei:

• Kafai ko fepaki te fafine mo fakamalosiga ke fakatō tena pepe, ko oi e ‵tau o ‵sala a ia ki ei mō se fesoasoani? Kaia?

MANATU AOGA

E akoako mai te Tusi Tapu ke a‵lofa, āva, kae puipui ne tatou te meaalofa a Ieova ko te ola. E aofia i ei a ‵tou ola mo te ola o nisi tino.

Fesili

• Kaia e tāua ei a te ola o te tino ki a Ieova?

• E pefea a lagonaga o Ieova māfai e tamate ne se tino a te suā tino mo te iloa tonu?

• Kaia e loto fakafetai ei koe ki te meaalofa ko te ola?

NISI FAKAMATALAGA

E mafai pefea o fakafetai atu tatou ki a Ieova mō te meaalofa ko te ola?

Song 141—The Miracle of Life (2:41)

‵Sala ki te tali o te fesili, ‘E mata, ka fakamagalo ne te Atua se fafine telā ne fakatō tena pepe?

“Ne a Pati i te Tusi Tapu e Uiga ki te Faka‵toga o Pepe?” (Mataupu i te neti)

Tauloto ki te auala e pokotia ei a filifiliga o ‵tou fakafiafiaga ona ko te kilokiloga a te Atua ki te ola.

“‘Tafaoga Fakama‵taku’—E a, e ‵Tau o ‵Tofo Koe ki ei?” (Ala Mai!, Oketopa 8, 2000)

Kae e a māfai e maua ne se tino a lagonaga fia fakamate? Mafaufau ki te auala e mafai ei o fesoasoani mai te Tusi Tapu.

“Au ko Fia Mate—E Mata, e Mafai o Fesoasoani Mai te Tusi Tapu Māfai ko Maua ne Au a Lagonaga Penā?” (Mataupu i te neti)