Ke Fakamaoni i Mea Katoa

E ma‵nako a tino katoa ki taugasoa kolā e fakamaoni. E manako foki a Ieova ke fakamaoni ana taugasoa. E se faigofie te mea tenei i te lalolagi telā e se fakamaoni a tino e tokouke i ei. Ne a mea aoga e maua mai te fakamaoni i mea katoa?

1. Se a te ‵toe pogai tāua ke fakamaoni?

Kafai e fakamaoni tatou ki nisi tino, e fakaasi atu ne tatou ki a Ieova me e a‵lofa kae āva tatou ki a ia. Masaua: E iloa ne Ieova a mea katoa e mafau‵fau kae fai ne tatou. (Epelu 4:13) E iloa ne ia māfai ko filifili tatou ke fakamaoni, kae fai ei ke fiafia a ia ki ei. E fai mai tena Muna: “A Ieova e takalialia ki te tino amio fakaloiloi, kae e pili Tena va fakataugasoa mo te tino fai mea tonu.”—Faataoto 3:32.

2. Ne a nisi auala e mafai ei o fakamaoni tatou i ‵tou olaga i aso takitasi?

E manako a Ieova ko tatou ke “fai‵pati ki te mea tonu te suā tino ki te suā tino.” (Sakalia 8:16, 17) Se a te uiga o te mea tenei? Faitalia me e fai‵pati tatou ki tino o ‵tou kāiga, tino e ga‵lue tasi tatou, ‵tou taina mo tuagane Kelisiano, io me ko tino o te malo, e se ‵loi tatou io me tuku atu a fakamatalaga sē ‵tonu. A tino fakamaoni e se kai‵soa io me fakaloiloi ne latou a nisi tino. (Faitau te Faataoto 24:28 mo te Efeso 4:28.) Kae e ‵togi ne latou a lafoga katoa kolā e ‵tau o ‵togi. (Loma 13:5-7) Mai te faiga o mea konei mo nisi mea aka, e ma‵nako tatou “ke fakamaoni i mea katoa.”—Epelu 13:18.

3. Ne a mea aoga e maua mai i te fakamaoni?

Kafai e lauiloa tatou pelā me ne tino fakamaoni, e tali‵tonu a nisi tino ki a tatou. E fesoasoani foki tatou ki te faiga o te fakapotopotoga ke tokagamalie kae fealofani e pelā me se kāiga. E maua ne tatou se loto lagona ‵ma. A ‵tou fakamaoni e “fakagaligali ne latou i feitu katoa a akoakoga a te ‵tou Fakaola, ko te Atua,” kae e fai foki i ei ke tosina mai a tino mai tua o te fakapotopotoga ki te tapuakiga tonu.—Tito 2:10.

KELI MALOSI IFO

4. A te fakamaoni se mea fakafiafia ki a Ieova

Faitau te Salamo 44:21 mo te Malaki 3:16, ko sau‵tala ei ki fesili konei:

• Kaia e mafaufau ei koe me se mea valea ke talitonu me e mafai ne tatou o ‵funa a te mea tonu?

• Se a tau faka‵tau, ka pefea a lagonaga o Ieova māfai e filifili ne tatou ke fakaasi atu te munatonu, faitalia te faigata ke fai penā?

5. Ke gasuesue mo te fakamaoni i mea katoa

VITIO: Se a te Mea e Fakamalosi Aka ei te Fiafia?—Se Loto Lagona ‵Ma (2:32)

Faitau te Epelu 13:18, ko sau‵tala ei ki auala e mafai o fakamaoni tatou . . .

• i ‵tou kāiga.

• i te galuega io me ko te akoga.

• i nisi tulaga.

6. E maua ne tatou a mea aoga mai te fakamaoni

E mafai o ‵sae aka a fakalavelave ona ko te fakamaoni. Kae tenā loa te ‵toe mea ‵lei e ‵tau o fai i te olaga kātoa. Faitau te Salamo 34:12-16, ko sau‵tala ei ki te fesili tenei:

• E fai pefea ne te fakamaoni ke ‵lei atu tou olaga?

1. E fakamalosi aka ne tauavaga fakamaoni a te lā olaga avaga

2. A tino ga‵lue fakamaoni e fai ei ke tali‵tonu olotou pule ki a latou

3. E maua ne tino fakamaoni o te fenua se ata ‵lei i tino o te malo

MANATU AOGA

E manako a Ieova ke fakamaoni ana taugasoa i olotou pati mo olotou faifaiga katoa.

Fesili

• Ne a nisi auala e mafai ei o fakamaoni tatou?

• Kaia e fai ei pelā me se mea valea ke mafau‵fau me e mafai ne tatou o ‵funa te mea tonu?

• Kaia e manako ei koe ke fakamaoni i taimi katoa?

NISI FAKAMATALAGA

E akoako pefea ne mātua olotou tama‵liki ke fakamaoni?

Ke Faipati ‵Tonu (1:44)

Ne a mea aoga ka maua ne tatou māfai e tausi ‵tou tautoga?

Tausi a Tautoga, Kae Maua Fakamanuiaga (9:09)

Mafaufau me e ‵tau io me se ‵tau o ‵togi ‵tou lafoga ke oko foki loa māfai ko fakaaoga ‵se.

“Lafoga—E Mata, e ‵Tau o ‵Togi Atu ne Koe?” (Te Faleleoleo Maluga, Setema 1, 2011)

Se a te mea ne fakamalosi atu ki se tagata sē fakamaoni ke ‵fuli tena olaga kae ola i se olaga fakamaoni?

“Ne Tauloto ne Au me i a Ieova e Alofa Fakamagalo Kae Loto Fakamagalo” (Te Faleleoleo Maluga, Me 1, 2015)