Te Kilokiloga a te Atua ki te Toto

E tāua ‵ki a te toto. E aunoa mo te toto, e seai se tino i a tatou e mafai o ola. E pelā me ko te Mafuaga, e maua ne te Atua a te aiā ke fai mai ne ia a te auala ke fakaaoga ei te toto. Ne a ana pati ne fai mai e uiga ki te toto? E mata, e mafai o ‵kai io me ‵suki ki ei? Kae e mafai pefea o fai ne koe a fakaikuga ‵lei e uiga ki te mataupu tenei?

1. Se a te kilokiloga a Ieova ki te toto?

Ne fai atu a Ieova ki ana tino tapuaki i aso o te Tusi Tapu: “Me i te ola o mea ola katoa ko te toto.” (Levitiko 17:14) A te toto ki a Ieova ko te ola. Ona ko te ola se meaalofa ‵malu kae tapu ki te Atua, e ‵malu foki a te toto.

2. Se a te fakaaogaga o te toto e fakatapu ne te Atua?

Ne fakatonu atu a Ieova ki ana tino tapuaki mai mua o te kau Kelisiano ke mo a ma ‵kai ki te toto. (Faitau te Kenese 9:4 mo te Levitiko 17:10.) Ne toe fakamautinoa mai ne ia te tulafono tenei i te taimi ne fakatonu atu ei a te potukau pule ki Kelisiano “ke ‵kalo faeloa kea‵tea . . . mai te toto.”—Faitau te Galuega 15:28, 29.

Se a te mea e fakauiga ki ei a te ‵kalo kea‵tea mai te toto? Kafai e fai atu se tokita ki a koe ke ‵kalo keatea mai meainu ma‵losi, ka se inu eiloa koe ki ei. Kae e mata, ka kai koe ki mea‵kai kolā e isi ne meainu ma‵losi i ei io me e talia ke ‵suki atu ki loto i a koe? Ikai. E penā foki loa a te fakatonuga a te Atua ke ‵kalo keatea mai te toto, e fakauiga i ei me e se ‵tau o inu ki ei io me ‵kai ki ‵kano o manu kolā e seki faka‵sali te toto. E se ‵tau foki o ‵kai ki mea‵kai kolā ne palu fakatasi mo toto.

Kae e a te fakaaogaga o te toto e pelā me se togafiti fakatokita? E ‵teke tonu atu a nisi faifaiga ki te tulafono a te Atua. E aofia i ei a te ‵suki ki te toto io me ko vaega ‵lasi o te toto—sela ‵kula, sela ‵kena, potopotogā toto, mo te sua. Kae ko nisi faifaiga fakatokita kāti e se ‵teke katoatoa atu ei ki te tulafono a te Atua. E pelā mo nisi faifaiga, e fakaaoga i ei se vaega foliki mai i se vaega lasi o te toto. A nisi faifaiga e aofia i ei a te fakaaogaga o te toto eiloa o te tino. Kafai e mafaufau faka‵lei ki faifaiga konei, e ‵tau o fai ne tatou taki tokotasi se fakaikuga totino.a—Kalatia 6:5.

KELI MALOSI IFO

3. Fai a fakaikuga ki togafiti fakatokita kolā e fakafiafia atu ki a Ieova

E mafai pefea o fai ne koe se fakaikuga ki togafiti fakatokita kolā e fetaui mo te kilokiloga a te Atua? Pei te VITIO, ko sau‵tala ei ki te tāua ke fai ne koe a mea konei.

VITIO: Auala ke Fai a Fakaikuga ki Togafiti Fakatokita e Uiga ki te Toto (5:47)

• ‵Talo ke maua te poto.—Iakopo 1:5.

• Sukesuke ki akoakoga fakavae mai te Tusi Tapu mo te auala ke fakagalue aka ei.—Faataoto 13:16.

• ‵Sala ki togafiti kolā ko mafai o fakaaoga i te koga e nofo koe i ei.

• Fai ke iloa faka‵lei ne koe a togafiti kolā e se talia ne koe.

• Ke fakamautinoa faka‵lei me ka maua ne koe se loto lagona ‵ma i tau fakaikuga.—Galuega 24:16.b

• Ke mo a ma talia se tino—ke oko ki tau avaga, se toeaina, io me ko tou faiakoga i te Tusi Tapu—ke fai ne ia te fakaikuga mō koe ki mea kolā e tuku loa ki te loto lagona o te tino.—Loma 14:12.

• Ke tusi ki lalo tau fakaikuga.

4. E ‵sala a Molimau a Ieova ki toe togafiti fakatokita ‵lei

E mafai eiloa o faka‵logo ki te tulafono a te Atua e uiga ki te toto kae maua foki te ‵toe togafiti fakatokita ‵lei e aunoa mo te toto. Pei te VITIO.

VITIO: Te Fakasau‵talaga o te Polofesa ko Massimo P. Franchi, M.D. (1:36)

Faitau te Tito 3:2, ko sau‵tala ei ki te fesili tenei:

• Kaia e ‵tau ei o fakaasi atu faeloa te āva mo te agamalu māfai ko fai‵pati mo tokita?

Se talia	E fakaiku ne te Kelisiano
A. Sua	Vaega fo‵liki mai te sua
B. Sela ‵kena	Vaega fo‵liki mai sela ‵kena
C. Potopotogā toto	Vaega fo‵liki mai potopotogā toto
D. Sela ‵kula	Vaega fo‵liki mai sela ‵kula

5. Vaega fo‵liki o te toto

E fa a vaega ‵lasi o te toto—sela ‵kula, sela ‵kena, potopotogā toto, mo te sua. E aofia i vaega ‵lasi konei a tamā vaega, kolā e taku ki vaega fo‵liki o te toto.c E fakaaoga a nisi vaega fo‵liki i ei ke faka‵lei ki ei a masaki io me ke taofi ki ei a te ‵sali o te toto.

Kafai ko aofia a vaega fo‵liki o te toto, e ‵tau o fai ne se Kelisiano tena fakaikuga e ‵tusa mo tena loto lagona telā ne akoako faka‵lei ki te Tusi Tapu. E mafai o fakaiku aka ne nisi tino ke se talia ne latou a togafiti fakatokita io me ko faifaiga kolā e fakaaoga i ei a vaega fo‵liki o te toto. Kae ko nisi tino e mafau‵fau me e talia ne olotou loto lagona ke fakaaoga a vaega fo‵liki konā.

Kafai ko ‵tau o fai tau fakaikuga, mafaufau ki te fesili tenei:

• Ka fakamatala atu pefea ne au ki te tokita a te pogai e se talia io me talia ne au ke fakaaoga a nisi vaega fo‵liki o te toto?

MANATU AOGA

E manako a Ieova ke ‵kalo kea‵tea tatou mai te fakaaogaga ‵se o te toto.

Fesili

• Kaia e ‵malu ei te toto i te kilokiloga a Ieova?

• E iloa pefea ne tatou me i te fakatonuga a te Atua ke ‵kalo keatea mai te toto e fakasino atu foki ki te fagai ki te toto?

• E mafai pefea o fai ne koe au filifiliga e uiga ki te fakaaogaga o te toto i togafiti fakatokita?

NISI FAKAMATALAGA

Ne a manatu ‵tonu e ‵tau o mafaufau faka‵lei ki ei a koi tuai o fai tau fakaikuga e uiga ki togafiti fakatokita kolā e fakaaoga i ei tou toto?

“Fesili Mai te Kau Fai‵tau” (Te Faleleoleo Maluga, Novema 1, 2000)

Ne a mea e ‵tau o mafaufau faka‵lei koe ki ei māfai ko fai se fakaikuga ke talia io me se talia a vaega fo‵liki o te toto?

“Fesili Mai te Kau Fai‵tau” (Te Faleleoleo Maluga, Iulai 1, 2004)

Ne a mea ne fai ei ke talia ne se tokita a te kilokiloga a Ieova ki te toto?

“I Accepted God’s View of Blood” (Awake!, December 8, 2003)

Tauloto ki auala e fesoasoani atu ei a taina kolā e aofia i Komiti mō Fa‵kaimasaki ki olotou taina mo tuagane.

E ‵Lago Atu Ieova ki Tino Ma‵saki (10:23)