Te Mea Tonu e Uiga ki te Agasala

E MATA, e mafai o fakamaoni atu ne te tagata masaki me i a ia e se pokotia ne te fiva mai te fakamasei ne ia o te mea e fua ei te ‵vela mo te ‵moko? Ikai, e se fai eiloa penā! I se auala tai ‵pau, ona ko te mea e tokouke a tino e ‵teke ki te kilokiloga a te Atua e uiga ki te agasala, e se fakauiga i ei me e seai se māfuaga o te agasala. E maua i te Tena Muna ko te Tusi Tapu a mea e uiga ki te mataupu tenei. Kae se a la te akoakoga tonu e uiga ki te agasala?

E Agasala a Tino Katoa

I se lua afe tausaga ko ‵teka, ne fakaasi mai ne te apositolo ko Paulo a te fanoanoa e uiga ki te manatu me ‘e se fai ne ia te ‵lei e manako a ia o fai, kae fai ne ia te masei telā e se manako a ia o fai.’ (Loma 7:19) Kafai tatou e fakamaoni, e ‵tau o fakaasi atu ne tatou me e ‵pau eiloa ‵tou tulaga mo Paulo. Kāti e ma‵nako tatou ke ola e ‵tusa mo Tulafono e Sefulu io me ko nisi tulaga i mea tau amioga, kae faitalia me fai penā io me ikai, a tatou katoa ne tino agasala. E se fakauiga i ei me i a tatou ne filifili ke se faka‵logo ki se fakatonuga, kae ona eiloa ko te vāi‵vai o tatou. Se a te fakamatalaga e uiga ki ei? E tuku mai eiloa ne Paulo a te tali ki ei: “Kafai la e fai ne au a te mea telā e se fiafia au o fai, ko tena uiga e se ko au telā ne fai ne ia; ka ko te agasala telā e nofo i loto i a au.”​—Loma 7:20.

E pelā mo Paulo, ne pokotia eiloa tatou i ‵tou vāivāiga ne fa‵nau mai mo tatou​—se fakamaoniga o te agasala telā ne fa‵nau mai mo tatou mo te tulaga sē ‵lei katoatoa. “Ko ‵mao tatou mai te ‵malu o te Atua, me ko agasala a tino katoa,” ko muna a Paulo. Se a te ikuga o te tulaga tenei? E toe fai mai a Paulo: “Ne oko mai te agasala ki te lalolagi i te tagata e tokotasi [ko Atamu], ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.”​—Loma 3:23; 5:12.

E tiga eiloa e tokouke a tino e ‵teke ki te manatu tenei me i te agasala telā ne māfua mai i ‵tou mātua muamua e fai ne ia tatou ke ‵mao mai te Atua kae fai ei ke galo atu i a tatou a te tulaga ‵lei katoatoa, e tonu, tenei eiloa te mea e akoako mai i te Tusi Tapu. A Iesu, telā ne siki mai ne ia a pati i mataupu muamua o te Kenese e pelā me ne pati fakatonutonu, ne fakaasi mai i ei me ne talitonu a ia ki te tala o Atamu mo Eva.​—Kenese 1:27; 2:24; 5:2; Mataio 19:1-5.

E tasi te fakavae tāua o te fekau i loto i te Tusi Tapu ko te vauga a Iesu ki te lalolagi nei ke fakasaoloto ei a tino kolā e fakatuanaki ki a ia mai i olotou tulaga agasala. (Ioane 3:16) E fakalagolago eiloa a te ‵tou fakamoemoega mō aso mai mua ki te talia ne tatou a te auala e faka‵sao ei ne Ieova a tino fia‵fia mai se tulaga fakanoanoa telā e se mafai o fakafesagai atu ki ei. Kae kafai e se maina faka‵lei tatou i te kilokiloga a te Atua e uiga ki te agasala, ka sē loto fakafetai tatou ki te pogai ne fai ei ne ia a te mea tenā ke ‵sao ei tatou.

Te Taulaga a Iesu mo te Pogai e Manakogina ei

Ne tuku atu ne Ieova ki te tagata muamua a te fakamoemoega ke ola ki te se-gata-mai. E mafai fua o galo i a Atamu a te fakamoemoega gali tenā māfai e ‵teke atu a ia ki te Atua. Ne ‵teke atu eiloa a Atamu, kae i te faiga tenā, ne kamata ei o fai a ia e pelā me se tino agasala. (Kenese 2:15-17; 3:6) Ne gasuesue eiloa a Atamu i se auala telā e ‵teke atu ki te loto o te Atua, ne seki ‵lei katoatoa a ia, kae ne fakamasei foki ne ia tena fesokotakiga mo te Atua. I te taimi ne fai ei ne ia te agasala mai te ofa ne ia o te tulafono a te Atua, ne gasolo ei a ia o matua kae mate. Se mea fakanoanoa, me i tama katoa a Atamu e aofia ei tatou​—ne fa‵nau mai i te agasala, kae iku atu katoa ki te mate. Kaia?

E faigofie fua te tali ki ei. E se mafai o fanau mai ne mātua sē ‵lei katoatoa a tama‵liki ‵lei katoatoa. Ne agasala a tama‵liki katoa a Atamu, kae e pelā mo te mea e fai mai ne te apositolo ko Paulo, “me i te taui o te agasala ko te mate.” (Loma 6:23) Kae e tuku mai i te fakaotiga o te fuaiupu tenā a te fakamoemoega ki a tatou: “Ka ko te meaalofa faivasaga a te Atua; ko te ola se gata mai i a Keliso Iesu te ‵tou Aliki.” Ke fai atu me e auala i te mate o Iesu e pelā me se taulaga, ko mafai ei ne tino faka‵logo kae fia‵fia o faka‵ma mai i ikuga o te agasala telā ne fai ne Atamu.a (Mataio 20:28; 1 Petelu 1:18, 19) E pokotia pefea koe i te mea tenā?

‘Ko Pule Tatou’ ne te Alofa o Keliso

Ne tuku mai ne te apositolo ko Paulo a te tali a te Atua ki te fesili telā mai luga. Ne tusi mai a ia: “A matou e pule ne te alofa o Keliso mō tatou, kae nei ko iloa tonu foki ne matou takitokotasi i a Iesu ne mate mō tino katoa, . . . ko te mea ko tino kolā e ola ke sē ola mō latou, kae ke ola mō ia telā ne mate kae ne toetu ake.” (2 Kolinito 5:14, 15) Kafai e talia ne se tino me i te taulaga a Iesu e mafai o fakasaoloto ei a ia mai ikuga o te agasala​—kae e manako foki ke fakaasi atu tena loto fakafetai mō te fakatokaga tenā​—⁠e ‵tau mo ia o taumafai malosi o ola e ‵tusa mo mea kolā e manako ki ei te Atua ke fai ne ia. E aofia i te mea tenei a te mauaga o se malamalama i mea kolā e manako ki ei te Atua, ke akoako atu tena loto lagona e ‵tusa mo tulaga o te Tusi Tapu, kae ke ola a ia e ‵tusa mo mea konā.​—Ioane 17:3, 17.

A te faiga o mea ‵se e fakamasei ne ia a te ‵tou fesokotakiga mo Ieova te Atua. I te taimi ne iloa ei ne te Tupu ko Tavita a te matagā o tena finalalolagi mo Patisepa mo te tamatega ne ia o te avaga a tou fafine, ne mautinoa eiloa me ne masiasi tou tagata i ei. A ko te mea telā ne manavase malosi a ia ki ei ko tena agasala telā ne fakalogo‵mae atu ki te Atua. Ne fakaasi ‵tonu atu ne ia mo te salamō ki a Ieova: “Ko agasala atu au ki a koe​—na ko koe eiloa. Ka ko oti foki ne fai ne au a mea kolā e iloa ne koe e ‵se.” (Salamo 51:4) I se auala tai ‵pau, i te taimi ne tofotofo aka ei a Iosefa ke finalalolagi, ne fai ne tena loto lagona ke fesili ifo a ia penei: “E mafai pefea ne au o fai se vaegā mea masei penā, e agasala ei au i mua o te Atua?”​—Kenese 39:9.

A ko te agasala e sē se mea telā e fai ei ke ma‵sei ‵tou lagonaga ona ko te mea ne ‵poa aka tatou e fai se mea ‵se. E sē se fakamasakoga e fai ne tatou ki tino ona ko te ‵tou tulaga sē ‵lei katoatoa. A te ofa ne tatou o tulafono a te Atua e uiga ki te ‵moe fakatauavaga, te fakamaoni, te āva, te tapuakiga, mo nisi mea aka, e fakamasei ei te ‵tou fesokotakiga totino mo te Atua. Kafai e fai ne tatou a te agasala mo te iloa tonu, ko fai ei tatou mo fili o te Atua. A te mea tenei se munatonu telā e manakogina ke mafaufau faka‵lei ki ei.​—1 Ioane 3:4, 8.

Tela la, se a tou iloa e uiga ki te agasala? A te tonuga loa, e seai se mea ne tupu ki ei. E akoako atu ne tino a akoakoga e uke e uiga ki te agasala ko te mea ke fakamāmā aka ei a te tāua o te mea tenā. E tokouke a tino ko se fia‵fia io me sē fia ‵saga atu ki olotou loto lagona. A tino katoa kolā e ma‵nako ki te taliaga a te Atua e ‵tau o ‵teke atu ki te vaegā lagonaga tenā. E pelā mo te mea ko lavea ne tatou, a te taui o te agasala e sē se pakiaga io me se mea fakamasiasi, kae ko te mate eiloa. A te agasala e fakauiga eiloa ki te ola mo te mate.

A te fakamagaloga o agasala e auala i te tāua o te taulaga a Iesu e fai e pelā me se tala ‵lei māfai e sala‵mo tonu tatou ki ‵tou agasala kae sē toe fai ne tatou. “Amutia a latou kolā ko fakamagalogina olotou amio ma‵sei, mo olotou agasala foki ko fakapulougina,” ko muna a Paulo. “Ke amutia foki a te tino telā ko sē saga atu te Aliki ki ana agasala!”​—Loma 4:7, 8.

[Fakamatalaga fakaopoopo]

[Ata i te itulau e 10]

Ko ‵Fuli Katoatoa ne te Lotu se Akoakoga Fakalotu

A te tokoukega o tino ‵lotu i te Lotu Katolika e seki malamalama faka‵lei eiloa i te uiga tonu o te Limbo. Fakamuli nei, ko gasolo o matafitafi atu a te akoakoga e uiga ki te Limbo i tusi fakalotu a te Lotu Katolika. I te 2007, ne fakaseai ne te Lotu Katolika a te lotou akoakoga e uiga ki te Limbo i se tusi telā e fakamatala atu ei a “akoakoga mo pogai fakalotu me i pepe kolā e ‵mate kae seki papatiso e mafai o ‵sao kae maua ne latou te fiafia se-gata-mai.”​—International Theological Commission.

Kaia ko ‵fuli ei te akoakoga fakalotu tenei? A te pogai tonu ne fai ei penā, ke fakasaoloto a te lotu mai te mea telā ne taku ne te tino tusitala Falani ko Henri Tincq e pelā me se “amoga ‵mafa telā ne akoako atu i taimi o te pouliuli ke oko mai ki te 20 senitenali tenei, ne se lotu telā ne fakaaoga faeloa ne latou a te akoakoga e uiga ki te Limbo ke fakamatakutaku atu ki mātua ke papatiso fakavave olotou tama‵liki.” Kae ne ‵sae aka a nisi fakalavelave ona ko te ‵fuliga o te akoakoga e uiga ki te Limbo.

Tuu mo Aganuu io me ko te Tusi Tapu? A fakamatalaga ne maua mai i tala fakasolopito e uiga ki te Limbo, ne māfua mai i te 12 senitenali i te kinauga fakalotu telā e isi sena sokoga ki te akoakoga e uiga ki pekatuli. Ne akoako mai ne te Lotu Katolika me e tumau eiloa i te ola a te agaga mai tua o te mate, tela la e ‵tau o maua se fakamatalaga e uiga ki koga ka olo atu ki ei a agaga o tama‵liki kolā ko sē mafai o olo ki te lagi me ne seki papatiso latou, kae e se ‵tau foki mō latou o olo atu ki seoli. Tenā loa te mafuaga o te akoakoga e uiga ki te Limbo.

Kae e se akoako mai i te Tusi Tapu me ka tumau eiloa i te ola a te agaga mai tua o te mate. E fakaasi manino mai me i lo te tumau i te ola mai tua o te mate, a te tino telā e agasala e mafai o “fakamaseigina” kae “ka mate” eiloa. (Galuega 3:23; Esekielu 18:4) Ona ko te seai o se vaega o te foitino e tumau i te ola mai tua o te mate, e mautinoa i a tatou me e seai eiloa se vaegā koga e pelā mo te Limbo. E se gata i ei, e fakamatala mai i te Tusi Tapu me i te mate e pelā eiloa me se tino telā e seai sena mea e iloa, kae e ‵pau eiloa mo te tino telā e to tena moe.​—Failauga 9:5, 10; Ioane 11:11-14.

E fakaasi mai te Tusi Tapu me i te Atua e kilo atu ki tama‵liki a mātua Kelisiano e pelā me e tapu. (1 Kolinito 7:14) A vaegā fakamatalaga penei, e mafai o sē aoga māfai a te papatisoga o tama‵liki e manakogina ke ‵sao atu ei latou.

A te akoakoga e uiga ki te Limbo e fai pelā me e fakamasei atu ki te Atua, mai te fakasino atu ki a ia e pelā me se pule fakasaua telā e fakasala ne ia a tino ‵lei, i lo te fai pelā me se Tamana fai mea tonu kae alofa. (Teutelonome 32:4; Mataio 5:45; 1 Ioane 4:8) Kae se tioa eiloa o se malamalama a Kelisiano ‵tonu e uiga ki te akoakoga tenei, me e se fakavae ki te Tusi Tapu!

[Ata i te itulau e 9]

A te ola e ‵tusa mo te Muna a te Atua e iku atu ki se fesokotakiga ‵lei mo te Atua mo tino katoa