Te 5 O Auala
Fakamalie Ou Manakoga Faka-te-Agaga
SE A TE MEA E AKOAKO MAI I TE TUSI TAPU? “Amutia a latou kolā e iloa ne latou i a latou e ma‵tiva faka-te-agaga me e o latou te Malo o te lagi.”—Mataio 5:3, Tusi Paia, Samoa.
SE A TE MEA FAIGATA? E lau i afe o lotu kese‵kese, kolā e akoako mai ne latou a auala faka‵numi ke fakamalie aka ei ou manakoga faka-te-agaga. E mafai pefea o iloa ne koe a te lotu telā e akoako i ei a te munatonu kae fakafiafia tonu atu ki te Atua? E mafau‵fau a nisi tino tusitala lauiloa me i te talitonu mo te tuku atu ki te Atua e se ne mea e ‵tau o fai, kae e fakalogo‵mae foki. E fakatoetoe aka ne te mekesini ko te Maclean a te kilokiloga a se tino sē talitonu ki te Atua i te auala tenei: “A te talitonuga faka-Kelisiano tenei, me e isi se mea e sili atu i mea fakasaienitisi mo te ‵tou malamalama . . . e fakaseaoga ei a te tāua o te ola fua e tasi ko maua ne tatou kae fai ei tatou ke amio fakasaua.”
NE A AU MEA E MAFAI O FAI? Ke iloilo aka a te fakamaoniga me e ola tonu te Atua. (Loma 1:20; Epelu 3:4) Ke mo a ma taofi aka koe ne se tino mai i te ‵sala atu ki tali ki fesili tāua, e pelā mo fesili konei: Kaia e ‵nofo ei tatou i konei? E mata, e isi se ola mai tua atu o te mate? Kaia ko uke katoa ei penei a logo‵maega? Ne a mea e manako te Atua ke fai ne au? A te mauaga o tali fakalotomalie ki fesili konā ko te fakavae ke maua ei a te lotomalie tumau.
Kae ke mo a ma taliagofie ne koe a mea katoa e fai atu ne nisi tino. E fakamalosi koe ne te Muna a te Atua ke fakaaoga tou “mafaufau” ke fakatalitonu aka ne koe a te mea e logomalie ki a ia. (Loma 12:1, 2) Ka taui atu eiloa ki au taumafaiga. Kafai e fakaavanoa ne koe a taimi ke sukesuke ki te Tusi Tapu kae fakagalue aka a manatu fakatonutonu aoga i ei, ka ‵kalo keatea koe mai i fakalavelave, e fakafeoloolo aka ei tou manavase, kae momea aka tou fiafia ki te olaga. E mafai eiloa o talitonu koe ki te folafolaga tenā. Ko oti eiloa ne maua ne te fia miliona o tino mai i vaegā olaga kese‵kese a mea aoga mai i te tauloto ki te munatonu e uiga ki te Atua mo ana fuafuaga.
Kafai e maua ne koe a mea aoga mai i te fakagalue aka o manatu fakatonutonu ‵poto, ka momea aka foki tou tuku katoatoa atu ki te Atua. Kaia e se talia ei ne koe a te ‵kamiga ke sukesuke ki te Tusi Tapu mo Molimau a Ieova? Kafai e fai ne koe a te mea tenā, ka mafai o lotomalie koe ki pati a te apositolo ko Paulo, telā ne tusi mai: “A te lotu e fai ne ia ke maumea te tino, manafai e lotomalie eiloa a ia ki ana mea e i ona lima.”—1 Timoteo 6:6.
[Ata i te itulau e 8]
Ke fakatalitonu aka ne koe a te mea e logomalie ki te Atua