Ne a Mea e ‵Tau o Tauloto ne Tama‵liki e Uiga ki te Atua?

“Me i Tusitusiga Tapu katoa ne aumai mai i te Atua, kae aoga ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei.”—2 TIMOTEO 3:16.

E ‵TAU o akoako atu ki tama‵liki a te munatonu e uiga ki te Atua. Tefea te koga e mafai ei o tauloto ne latou a te munatonu tenā? Mai te ‵toe tusi fakalotu lauiloa kae āva ki ei i te lalolagi kātoa, ko te Tusi Tapu.

A te Tusi Tapu e fai e pelā me se tusi mai i te Atua. I te tusi tenā, e fakaasi mai i ei ne te Atua ana uiga totino kae tuku mai ne ia a fakatakitakiga ‵lei i mea tau amioga mō ana tama‵liki katoa, talavou mo tino ma‵tua. Ke mafau‵fau ki nisi akoakoga kolā e aofia i te Tusi Tapu mo akoakoga foki kolā e mafai o tauloto ne tama‵liki fo‵liki mai i ei.

Se a te mea e manako ki ei te Atua ke iloa ne tatou e uiga ki a ia?

▪ Mea kolā e akoako mai i te Tusi Tapu: “Ko te mea ke iloa ne latou me ko koe fua te Aliki [ko Ieova] e tokotasi, ko te pule tafasili i te lalolagi kātoa.”​—Salamo 83:18.

Akoakoga mō Tatou: A te Atua e sē se malosi fua, kae se Tino tonu telā e isi sena igoa totino.

▪ Mea kolā e akoako mai i te Tusi Tapu: “E iloa ne ia a ‵tou mafaufauga mo ‵tou manakoga katoa. Kafai e tautali koe i a ia, kae ka talia ne ia a koe.”​—1 Nofoaiga Tupu 28:9.

Akoakoga mō Tatou: A Ieova te Atua e atafai mai ki a tatou katoa, e aofia i ei a tama‵liki fo‵liki. (Salamo 10:14; 146:9) E manako a ia ke tauloto ne tatou a mea e uiga ki a ia.

▪ Mea kolā e akoako mai i te Tusi Tapu: “Sa fakapuapuagagina a . . . tama‵liki ko seai ne mātua. Me kafai e fai ne koutou, ko au ka tali atu ki a latou manafai e ka‵laga mai mō se fesoasoani.”​—Esoto 22:​22-​24.

Akoakoga mō tatou: E fakalogologo foki eiloa a Ieova ki ‵talo a tama‵liki fo‵liki. E mafai o fai‵pati faeloa tatou ki te Atua kae fakaasi atu a ‵tou mafaufauga ‵loto mo lagonaga ki a ia.

▪ Mea kolā e akoako mai i te Tusi Tapu: “E tofotofo sāle faeloa ne latou te Atua, kae faka‵mae ne latou te Atua Tapu o Isalaelu.”​—Salamo 78:41.

Akoakoga mō Tatou: A ‵tou pati mo faiga e pokotia i ei a lagonaga o Ieova, tela la, e ‵tau mo tatou o mafau‵fau muamua a koituai o fai‵pati kae gasue‵sue tatou.

E ‵tau o pefea ‵tou faifaiga ki tino kolā e ‵kese mai i a tatou?

▪ Mea kolā e akoako mai i te Tusi Tapu: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”​—Galuega 10:​34, 35.

Akoakoga mō Tatou: Kafai e talia ne te Atua a tino mai itukāiga kese‵kese, e se ‵tau o faka‵kese ne tatou a nisi tino ona fua ko olotou ‵lanu, io me ko olo tou foliga e ‵kese mai i a tatou.

▪ Mea kolā e akoako mai i te Tusi Tapu: “Ke toka koutou i so se taimi o fakamatala atu ki so se tino e fesili mai ki a koutou, ke fakamatala atu a te fakamoemoega tenā e i a koutou. Kae ke fai ne koutou i te loto maulalo mo te āva.”​—1 Petelu 3:​15, 16.

Akoakoga mō Tatou: Kafai e sau‵tala e uiga ki lotu, e ‵tau o fakaasi atu ne tatou a ‵tou kilokiloga mo te loto tali‵tonu e aunoa mo te kaitaua. E ‵tau foki mo tatou o fakaasi atu a te āva ki tino kolā e ‵kese olotou talitonuga mai i a tatou.

E ‵tau o pefea ‵tou faifaiga ki ‵tou kāiga?

▪ Mea kolā e akoako mai i te Tusi Tapu: “Tama‵liki, e ‵tau mo koutou o faka‵logo ki otou mātua i mea katoa, me se mea fakafiafia loto tenā ki te Aliki.”​—Kolose 3:​20.

Akoakoga mō Tatou: E fakatalitonu mai ne tama‵liki faka‵logo me e se a‵lofa fua latou ki olotou mātua kae e ma‵nako foki latou o fakafiafia atu ki te Atua.

▪ Mea kolā e akoako mai i te Tusi Tapu: “Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo.”​—Kolose 3:​13.

Akoakoga mō Tatou: A nisi tino, e aofia i ei a tino o ‵tou kāiga, ka fakafanoa‵noa mai ki a tatou i nisi taimi. Kae kafai e ma‵nako tatou ke fakamagalo tatou ne te Atua, e ‵tau foki o fakamasani tatou ki te fakamagalo atu o nisi tino.​—Mataio 6:​14, 15.

Kaia e ‵tau ei o fakamaoni kae atafai?

▪ Mea kolā e akoako mai i te Tusi Tapu: “A tino katoa e ‵tau o fai‵pati ki olotou taina ki te mea tonu, i te mea ko tasi katoa tatou i te foitino o Keliso.”​—Efeso 4:​25.

Akoakoga mō Tatou: Kafai e fai‵pati atu tatou ki te munatonu, e fakaakoako eiloa tatou ki te Atua kae fai ei ke fiafia a ia. Kafai e ati aka ne tatou a te uiga ko te loi, e fai eiloa tatou e pelā mo te fili o te Atua, ko te Tiapolo, telā ko te “tamana foki eiloa o tino ‵loi.”​—Ioane 8:​44; Tito 1:2.

▪ Mea kolā e akoako mai i te Tusi Tapu: “E pelā mo te mea e ma‵nako koutou ke fai atu ne nisi tino ki a koutou, ke fai foki eiloa ne koutou penā ki a latou.”​​—Mataio 7:​12, “Contemporary English Version.”

Akoakoga mō Tatou: E ‵tau o malamalama tatou i lagonaga, mafaufauga, mo manakoga o ‵tou kāiga mo nisi tino aka foki. Kafai e fakaasi atu ne tatou a te “fakatau a‵lofa e pelā mo ne tautaina,” ka atafai mai eiloa a nisi tino ki a tatou.​—1 Petelu 3:8; Luka 6:​38.

E pelā mo te mea e fakaasi mai i fakaakoakoga konei, a akoakoga kolā e maua i te Tusi Tapu e mafai o fesoasoani atu ki tama‵liki ke fai pelā me ne tino ma‵tua kolā e fia‵fia, e āva kae atafai. Kae ko oi e ‵tau o akoako ne latou a akoakoga konei ki tama‵liki?