“E Se ‵Fiu Tatou”

1, 2. Ne fakamalosi aka pefea a ‵tou loto talitonu ne te mafaufau ki te fakapotopotoga a Ieova i te lagi mo te lalolagi?

SE MEA fakaofoofogia ke mafaufau me i a tatou ne vaega o se fakapotopotoga lasi i te lagi mo te lalolagi. A fakaasiga kolā ne tusi i te Esekielu mataupu 1 mo te Tanielu mataupu e 7 e fakaata faka‵lei mai i ei a Ieova e gasuesue o fakataunu a tena fuafuaga. E takitaki ne Iesu a te vaega faka-te-lalolagi o te fakapotopotoga a Ieova kae fakatonu atu ki ei ke ‵saga tonu ki te talaiga o te tala ‵lei, te tausiga o latou kolā e fai a te galuega tenei i te feitu faka-te-agaga, kae ke fakamaluga aka a te tapuakiga tonu a Ieova. E fakamalosi aka tatou ne te mea tenei ke tali‵tonu ki te fakapotopotoga a Ieova!​—Mata. 24:45.

² E mata, e olo tasi eiloa tatou taki tokotasi mo te fakapotopotoga fakaofoofogia tenei? E mata, e gasolo aka ki luga a ‵tou loto finafinau mō te munatonu io me gasolo ifo ki lalo? Kafai e mafau‵fau tatou ki fesili penā, e mafai o lavea ne tatou i ei me ko oti ne kamata tatou o ‵fiu io me e se loto finafinau. E mafai o tupu a te mea tenā. I te senitenali muamua, ne ‵tau o fakamalosi atu te apositolo ko Paulo ki taina Kelisiano ke mafau‵fau ki te fakaakoakoga loto finafinau a Iesu. Muna a Paulo me ka fesoasoani atu a te mea tenei ki a latou “ke mo a . . . ma fi‵ta kae loto vāi‵vai.” (Epe. 12:3) I se auala tai ‵pau, i te sukesukega telā ne fai ki te mataupu mai mua atu e fakaasi mai i ei a mea kolā ne fai ne te fakapotopotoga a Ieova, ne fai eiloa ke fesoasoani mai ki a tatou ke fakatumau a ‵tou loto finafinau mo te kufaki.

3. Se a te mea e manakogina ko te mea ke mo a ma ‵fiu tatou, kae se a te mea ka mafau‵fau tatou ki ei i te mataupu tenei?

³ E ui i ei, ne fakaasi mai ne Paulo me e uke atu a mea e ‵tau o fai māfai e se ‵fiu tatou. Ne fai mai tou tagata me e ‵tau o ga‵lue tatou i te “faiga o mea ‵lei.” (Kala. 6:9) Tela la, e manakogina ke gasue‵sue tatou. Ke mafaufau tatou ki mea e lima kolā e mafai o fesoasoani mai ke ‵mautakitaki tatou kae olo tasi faeloa mo te fakapotopotoga a Ieova. Mai konā ko mafai ei ne tatou taki tokotasi o fakaiku aka a mea kolā e manakogina ke ‵saga tonu atu tatou ki ei io me ko ‵tou kāiga.

E MAOPOOPO FAKATASI O TAPUAKI KAE MAUA A FAKAMALOSIGA

4. Kaia e mafai ei o fai atu tatou i fakatasiga se vaega tāua o te tapuakiga tonu?

⁴ A te maopoopo fakatasi e tāua faeloa ki tavini a Ieova. I te lagi, e ‵kami a agelu ke olo atu ki mua o Ieova i te taimi ‵tau. (1 Tupu 22:19; Iopu 1:6; 2:1; Tani. 7:10) I Isalaelu mua, e ‵tau o maopoopo a te fenua “ko te mea ke lagona kae ke iloa foki ne latou.” (Teu. 31:10-12) I te senitenali muamua, ne masani o olo sāle a te kau Iutaia ki sunako o fai‵tau ki muna mai i Tusitusiga Tapu. (Luka 4:16; Galu. 15:21) Ne tumau eiloa te tāua o fakatasiga i te taimi ne faka‵tu ei a fakapotopotoga Kelisiano, kae koi fai eiloa mo fai se vaega lasi o te ‵tou tapuakiga. A Kelisiano ‵tonu e “‵saga atu . . . te suā tino ki te suā tino o fakama‵losi atu ke fakatau a‵lofa kae fai a mea ‵lei.” E ‵tau mo tatou o tumau i te “fakamalosi atu te suā tino ki te suā tino, kae maise eiloa me ko iloa ne [tatou] i te aso [o Ieova] ko pili mai.”​—Epe. 10:24, 25.

5. E mafai pefea o fakatau fakamalosi te suā tino ki te suā tino i ‵tou fakatasiga?

⁵ A te auala tāua e tasi e mafai ei o fakamalosi atu te suā tino ki te suā tino ko te faiga o ‵tou tali i fakatasiga. E mafai o fakaasi atu a ‵tou fakatuanaki i mua o tino mai te tali atu ki se fesili, fai se fakamatalaga ki se tusi siki, fai se tala toetoe ki te tāua o te tautali i fakatakitakiga mai te Tusi Tapu, io me ko nisi auala aka. (Sala. 22:22; 40:9) E loto malie koe me faitalia te uke o tausaga ne ‵kau ei tatou ki fakatasiga, koi maua eiloa ne tatou a fakamalosiga mai i tali a taina mo tuagane kolā e fai mai i olotou loto eiloa​—tino ma‵tua mo tamaliki.

6. E fesoasoani mai pefea a ‵tou fakatasiga ke tumau tatou i te ma‵losi i te feitu faka-te-agaga?

⁶ Ne a nisi pogai e fakatāua ei ne te ‵tou Atua a te maopoopo fakatasi faeloa o tatou? E fesoasoani mai a ‵tou fakatasiga, fono o te fenua, mo fono o te atufenua ke maua ne tatou a te loto malosi o fai‵pati atu mo te loto toa kae fakafesagai atu ki ‵tekemaiga io me ko te sē fia ‵saga mai o tino i ‵tou koga talai. (Galu. 4:23, 31) E fakamalosi aka tatou kae faka‵mautakitaki a ‵tou fakatuanaki ne sau‵talaga ki Tusitusiga Tapu. (Galu. 15:32; Lo. 1:11, 12) A akoakoga mo fakamalosiga kolā e maua ne tatou mai i ‵tou fakatasiga e fesoasoani mai ke maua ne tatou a te fiafia tonu kae tuku mai i ei ki a tatou a te “filemu i taimi o puapuaga.” (Sala. 94:12, 13) E onoono a Te Komiti o Akoakoga a te Potukau Pule ki te fakatokaga o polokalame faka-te-agaga katoa ke fakatonutonu ei a tino o Ieova i te lalolagi kātoa. Ko oko eiloa i te loto fakafetai o tatou ki akoakoga tāua kolā e maua ne tatou i ‵tou fakatasiga i vaiaso katoa o te tausaga!

7, 8. (a) Se a te pogai tāua e fai ei a fakatasiga a ‵tou fakapotopotoga? (e) E fesoasoani atu pefea a fakatasiga ki a koe i te feitu faka-te-agaga?

⁷ E isi se mea telā e tāua atu i lō mea aoga kolā e maua ne tatou tokotasi mai i ‵tou fakatasiga. A te pogai tonu o ‵tou fakatasiga ko te tapuaki atu ki a Ieova. (Faitau te Salamo 95:6.) Ma‵faga o tauliaga ke tavae atu ki ‵tou Atua fakaofoofogia! (Ko. 3:16) E ‵tau eiloa o maua ne Ieova a tavaega e auala i ‵tou ‵kau faeloa ki fakatasiga kae fai tusaga i ei. (Faka. 4:11) E setioa eiloa o fakamalosi mai “ke mo a ma ‵galo sale tatou i ‵tou fakatasiga, e pelā mo te masani a nisi tino.”!​—Epe. 10:25.

⁸ E mata, e ‵kilo atu tatou ki ‵tou fakatasiga e pelā me se fakatokaga ne fai ke fesoasoani mai ki a tatou ke kufaki ke oko ki te taimi e fakaseai ei ne Ieova a te olaga masei tenei? Kafai e penā, ka aofia a fakatasiga i “mea kolā e sili atu i te tāua” kolā e talia ne tatou i ‵tou olaga. (Fili. 1:10) E se ‵tau eiloa o ‵galo tatou i se fakatasiga vaganā ke isi se pogai tāua telā ko sē mafai ei o ‵kau fakatasi tatou mo ‵tou taina mo tuagane o tapuaki atu ki a Ieova.

‵SALA ATU KI TINO LOTO FAKAMAONI

9. E iloa pefea ne tatou me i te galuega talai e tāua?

⁹ A te kau katoatoa atu ki te galuega talai e fesoasoani mai foki ke tumau tatou i te olo tasi mo te fakapotopotoga a Ieova. Ne kamata ne Iesu a te galuega tenei i tena nofoga i te lalolagi. (Mata. 28:19, 20) Talu mai te taimi tenā, a te galuega talai o te Malo mo te faiga o soko ko te mea fua telā ne saga tonu ki ei a te fakapotopotoga saukātoa a Ieova. E fakatalitonu mai i tala e uke i aso nei me e ‵lago mai te kau agelu ki ‵tou galuega kae takitaki atu tatou ki tino kolā “e ‵tau o maua ne latou a te ola se-gata-mai.” (Galu. 13:48; Faka. 14:6, 7) E isi se vaega faka-te-lalolagi o te fakapotopotoga a Ieova i aso nei kae ne fakatoka ke ‵lago atu ki te galuega tāua ‵ki tenei. E mata, a te galuega talai ko te ‵toe mea tāua foki i ‵tou olaga?

10. (a) Fakamatala mai te auala e mafai ei ne tatou o fakatumau a ‵tou fia‵fia ki te munatonu. (e) Ne fesoasoani atu pefea a te galuega talai ke sē fi‵ta koe?

¹⁰ A te loto finafinau i te galuega talai e fesoasoani mai ki a tatou ke fakatumau a ‵tou fia‵fia ki te munatonu. Mafau‵fau ki pati a Mitchel telā ko leva ne fai pelā me se toeaina kae se paenia tumau. Ana muna: “E fiafia au o faipati atu ki nisi tino e uiga ki te munatonu. E mafaufau au ki se mataupu fou i Te Faleleoleo Maluga io me ko te Awake! kae ofo i te poto, te malamalama, mo te paleni ‵lei o lōmiga takitasi. Ne manako au o fano o talai ke lavea ne au a faifaiga a tino, me e mafai pefea o fakaoso aka ne au a te lotou fia‵fia. Ne fai ne taku galuega talai ke ‵mautakitaki au. A nisi mea aka katoa kolā e manako au o fai, e mafai o fai mai mua io me mai tua o te taimi telā ko oti ne fakaavanoa ne au mō te galuega talai.” E mafai foki o ‵mautakitaki tatou i aso fakaoti konei māfai e fakalave‵lave faeloa tatou i ‵tou taviniga tapu.​—Faitau te 1 Kolinito 15:58.

‵KAI KI MEA‵KAI FAKA-TE-AGAGA

11. Kaia e ‵tau ei o fakaaoga katoatoa ne tatou a mea‵kai faka-te-agaga kolā e maua ne tatou mai i a Ieova?

¹¹ Ko oti ne tuku mai ne Ieova a mea‵kai faka-te-agaga e uke e auala i tusi ke fakama‵losi aka ei tatou. E se taumate, e masaua ne koe se taimi mai tua o te faitauga ki se tusi, ne manatu aka koe: ‘E tenā eiloa te mea ne manako au ki ei! E pelā eiloa me ne tusi ne Ieova a te mea tenei mō oku!’ Ne seki sōna tupu a te mea tenā. E akoako kae takitaki tatou ne Ieova e auala i tusi konei. Ko oti ne fai mai a ia: “Ka akoako atu ne au ki a koe te auala e ‵tau o fano koe i ei.” (Sala. 32:8) E mata, e ‵kai tatou ki mea‵kai faka-te-agaga katoa kolā e maua ne tatou kae mafaufau ‵loto ki ei? Ka fesoasoani mai a te faiga penā ke tumau tatou i te ‵fua mai kae sē mage‵mage i te feitu faka-te-agaga i aso fakaoti faiga‵ta konei.​—Faitau te Salamo 1:1-3; 35:28; 119:97.

12. Se a te mea e mafai o fesoasoani mai ke sē manatu māmā tatou ki ‵tou mea‵kai faka-te-agaga?

¹² Se mea ‵lei ke mafau‵fau tatou ki te galuega telā e aofia i te faiga ke maua faeloa ne tatou a mea‵kai faka-te-agaga. E onoono a te Komiti Tusitusi o te Potukau Pule ki te faiga o sukesukega, tusitusiga, faitauga, fakamatalaga, mo te ‵fuliga o ‵tou tusi e pelā foki mo mataupu kolā e faulu ki ‵tou Web site. E ave ne fale ‵lomi tusi a tusi ki fakapotopotoga ‵pili mo fakapotopotoga ‵mao. Kaia ne fai ei a te galuega tenei? Ko te mea ke ‵kai faka‵lei a tino o Ieova i te feitu faka-te-agaga. (Isa. 65:13) Ke fakamaoni tatou o ‵kai ki mea‵kai faka-te-agaga katoa kolā e maua ne tatou e auala i te fakapotopotoga a Ieova.​—Sala. 119:27.

‵LAGO ATU KI FAKATOKAGA A TE FAKAPOTOPOTOGA A IEOVA

13, 14. Ko oi e ‵lago atu ki fakatokaga a Ieova i te lagi, kae e mafai pefea o ‵lago atu foki tatou penā i te lalolagi nei?

¹³ I te fakaasiga telā ne tuku atu ki te apositolo ko Ioane, ne lavea atu i ei a Iesu e tele i luga i te solofanua ‵kena o fakatakavale a latou kolā e ‵teke atu ki Ieova. (Faka. 19:11-15) Ko oko eiloa i te fakamalosi mai ke iloa atu me i agelu fakamaoni e ‵tele atu eiloa i ana tua, kae fakatasi atu ki a ia ko te kau fakaekegina kolā ko oti ne maua te lotou taui i te lagi! (Faka. 2:26, 27) Se fakaakoakoga ‵lei ‵ki eiloa tenā o te ‵lago atu ki fakatokaga a Ieova!

¹⁴ I se auala tai ‵pau, e ‵lago katoatoa atu a te vaitino e tokouke ki galuega a taina fakaekegina o Keliso kolā koi ‵nofo i te lalolagi kae kolā e takitaki ne latou a te fakapotopotoga i aso nei. (Faitau te Sakalia 8:23.) E fakaasi atu pefea ne tatou a te ‵lago atu o tatou taki tokotasi ki fakatokaga a Ieova? E tasi te auala ko te faka‵logo ki a latou kolā e fai ne latou a te takitakiga. (Epe. 13:7, 17) E kamata a te mea tenei i ‵tou fakapotopotoga eiloa. E mata, a ‵tou pati e fai e uiga ki toeaina e ati aka i ei a te āva ki a latou mo olotou pulepulega? E mata, e fakama‵losi ne tatou a ‵tou tama‵liki ke āva ki tāgata fakamaoni konei kae ke ‵sala atu ki a latou ke maua ne manatu fakatonutonu mai i Tusitusiga Tapu? I tafa i ei, e mata, e sau‵tala tatou e pelā me se kāiga ki te auala e fakaaoga ei ‵tou tupe ke ‵lago atu ki te galuega i te lalolagi kātoa e auala i ‵tou meaalofa? (Faata. 3:9; 1 Koli. 16:2; 2 Koli. 8:12) E mata, e ‵kilo atu tatou ki te tausiga mo te ‵fuluga o te Kingdom Hall e pelā me se tauliaga tāua? E ‵tafe mai eiloa te agaga tapu o Ieova i te koga telā e isi i ei a te āva mo te ‵kau fakatasi. E auala i te agaga tenā, e maua faeloa ne tatou a te fesoasoani ke mo a ma ‵fiu tatou i aso fakaoti konei.​—Isa. 40:29-31.

OLA E ‵TUSA MO ‵TOU FEKAU

15. Kaia e ‵tau ei mo tatou o ola e ‵tusa mo te fuafuaga tāua a Ieova?

¹⁵ Kafai e ma‵nako tatou ke kufaki kae tau‵tali i te fakapotopotoga a Ieova, e ‵tau mo tatou taki tokotasi o ola e ‵tusa mo te fekau telā e tauave ne tatou mai te “fakamautinoa aka faeloa . . . a mea kolā e talia ne te Aliki.” (Efe. 5:10, 11) E taua faeloa tatou mo fakamalosiga se ‵lei i ‵tou olaga ona ko ‵tou foitino se ‵lei katoatoa mo taumafaiga a Satani mo te lalolagi matagā tenei. E taua malosi eiloa a nisi o koutou taina mo tuagane fagasele i aso katoa ke fakatumau te otou fesokotakiga mo Ieova. E fai ne te mea tenā ke pele malosi koutou ki a ia. Ke mo a ma ‵fiu koutou! A te ola o tatou e ‵tusa mo te fuafuaga a Ieova ka maua i ei ne tatou se loto malie katoatoa kae fakatalitonu mai i ei me e talia eiloa ne ia a ‵tou tapuakiga.​—1 Koli. 9:24-27.

16, 17. (a) Se a te mea e ‵tau o fai ne tatou māfai e fai ne tatou se agasala matagā? (e) E aoga pefea ki a tatou a te fakaakoakoga a Anne?

¹⁶ Se a te mea e ‵tau mo tatou o fai māfai e fai ne tatou se agasala matagā? ‵Sala fakavave ki se fesoasoani. A te ‵funaga o se agasala ka fai fua i ei ke masei atu a te fakalavelave. Masaua me ne fai mai a Tavita me i te taimi ne seki fakaasi ei ne ia ana agasala, ‘au ne vāivāi eiloa i te aso kātoa i te mea ne seki fakaasi ne au aku agasala.’ (Sala. 32:3) Ao, a te ‵funaga o agasala ka fai fua i ei ke ‵fiu tatou i lagonaga mo te feitu faka-te-agaga, kae “fakaasi au agasala, kae sa toe fai, kae ka alofa atu te Atua ki a koe.”​—Faata. 28:13.

¹⁷ Mafaufau ki te fakaakoakoga a Anne.a I te taimi koi talavou ei a Anne, ne galue tou fafine e pelā me se paenia tumau. E ui i ei, ne kamata tou fafine o ola i se olaga magalua. Ne pokotia masei eiloa tou fafine i te mea tenei. Ana muna: “A te mea telā ne ‵toe mai ko te loto lagona sē ‵lei. Ne fanoanoa kae mafatia au i taimi katoa.” Se a te mea ne fai ne ia? E fai mai tou fafine me i te aso e tasi i te fakatasiga, ne fakamatala mai i ei a te Iakopo 5:14, 15. Ne iloa aka ne Anne me e manakogina ne ia se fesoasoani kae ne fano tou fafine ki te kau toeaina ke maua se fesoasoani. Kafai e toe kilo a ia ki tua, e fai mai tou fafine: “A tusi siki konā e pelā me se vailakau ne tusi ne Ieova ke faka‵lei aka ei a te masaki i te feitu faka-te-agaga. Ne tautali au i te fakatakitakiga mai i tusi siki konā, kae ne aoga eiloa.” Ona ko te malosi fou ko maua ne ia, ko toe tavini atu nei a Anne mo te loto finafinau ki Ieova fakatasi mo se loto lagona ‵lei.

18. Se a te mea e ‵tau o fakaiku aka ne tatou?

¹⁸ Se tauliaga gali ‵ki ke ola tatou i aso fakaoti konei kae fai mo vaega o te fakapotopotoga fakaofoofogia a Ieova! Ke na fakaiku aka ne tatou ke mo a eiloa e manatu māmā tatou ki mea kolā ko maua ne tatou. Ke ga‵lue fakatasi tatou e pelā me se kāiga ke ‵kau faeloa ki fakatasiga a te fakapotopotoga, ke ‵sala atu mo te fakamaoni ki tino loto fakamaoni i ‵tou koga talai, kae ke fakatāua a mea‵kai faka-te-agaga kolā e maua faeloa ne tatou. Ke ‵lago atu foki tatou ki a latou kolā e fai ne latou a te takitakiga kae ola e ‵tusa mo te fekau telā e tauave ne tatou. Kafai e fai tatou penā, ka sē olo tasi fua tatou mo te fakapotopotoga a Ieova kae ka sē ‵fiu lele foki tatou i te faiga o mea ‵lei!