TALI KI FESILI MAI TE TUSI TAPU
E mata, e isi se pogai ne faite ei te ‵tou paneta?
Ne ‵tau o fai te lalolagi mo fai se fale fakafiafia mō tino
Ko te ‵tou paneta fua e mafai o ola i ei. E uke a vai i ei, telā e aoga ki te ola. A te tamilosaga mo te gasuesuega o te lalolagi e fetaui ‵lei eiloa ki te puipuiga o te moana mai te liu aisa io me mai te ‵vela ‵ki. Kae ko te vanimonimo mo te maneta i te lalolagi e puipui i ei mai i mea fakama‵taku. E fakaofoofogia foki a te fakalagolago atu ki lakau mo manu i te lalolagi. Tela la, ne fakaiku aka ne tino e tokouke me e isi se pogai ne faite ei te ‵tou paneta.—Faitau te Isaia 45:18.
Kae e mafai o fesili mai koe: E mata, e fai a logo‵maega mo faifaiga sē fakamaoni mo fai se vaega o te pogai tenā?—Faitau te Teutelonome 32:4, 5.
E mata, ka fakataunu eiloa te pogai tenā?
Ne faite te lalolagi ko te mea ke fai mo fai se fale fakafiafia ki tino kolā e fakatau āva kae a‵lofa ki te lotou Mafuaga. Tela la, e sili atu i te tāua o te ola o te tino i lō lakau mo manu. E mafai o malamalama tatou me ko oi te ‵tou Mafuaga ke fakatāua kae fakaakoako atu tatou ki tena alofa mo tena fakamaoni.—Faitau te Failauga 12:13; Mika 6:8.
E mafai o fakataunu ne te Tino ne faite ne ia tatou a mea katoa ne mafaufau a ia o fai. Tela la, e mafai o tali‵tonu katoatoa tatou me ka fakaseai atu ne ia a logo‵maega mo faifaiga sē fakamaoni kae ka fai a te ‵tou paneta mo fai se fale ‵lei katoatoa mō tino.—Faitau te Salamo 37:11, 29; Isaia 55:11.