“Te Loto Finafinau mo te Alofa Telā e Sili Atu i lō Aso Mua”

NE KAMATA o gasolo aka o ‵vela i te taeao tenā o te Aso Lima i a Setema 1922 i te taimi ne ua‵lolo atu ei a tino e toko 8,000 ki te koga e fai ei te fono. Ne faka‵pula atu ne te takitakifono me i te taimi tāua tenei o te polokalame, e saoloto eiloa so se tino ke fano keatea, kae e seai se tino e talia ke toe foki mai ki loto.

Ne usu a pese i te kamataga o te “Lotu ‵Talo,” kae i te otiga, ne fanatu ei a Joseph F. Rutherford ki te tulaga o te failauga. Ne saga‵saga eiloa mo te filemu a te tokoukega o tino i te kautaina. Ne nai tino fua ne gasue‵sue faeloa ona ko te ‵vela. Ne fakamalosi atu eiloa mo te loto finafinau a te failauga ki a latou ke saga‵saga kae fakalogo‵logo. I te taimi ne kamata ei te lāuga, e mata, e isi se tino ne lavea ne ia se laugatu lasi telā ne pelu faka‵lei eiloa ki luga kae tautau mai luga i a latou?

Ne faipati atu a te Taina ko Rutherford ki te lāuga ko te “Ko pili mai te Malo o te lagi.” Kāti e nofo ki se itula mo te āfa, ne lagona atu te fakafokifoki mai o tena leo malosi i te fale kātoa i te taimi ne fakamatala mai ne ia a te auala ne folafola atu ei ne pelofeta i aso mua e aunoa mo te ma‵taku a te Malo telā ka oko mai. I te fakaotiga o te lāuga, ne fesili atu a ia, “E talitonu koutou me ko oti ne kamata ne te Tupu ‵malu tena pulega?” Ne tali atu a te kautaina mo te paka‵laga atu: “Ao!”

“Ke na olo atu la ki te galuega talai, koutou tama a te Atua tafasili i te malosi!” Ne pakalaga malosi atu a te Taina ko Rutherford. “‵Kilo atu, ki te Tupu ko pule mai! A koutou ko ana avefekau. Tela la, ke fakasalalau, fakasalalau, fakasalalau atu.”

I te taimi tenā, ne talatala malie mai a te laugatu mai i luga i a latou, telā ne fakaasi mai i ei a te tugapati tenei: “Fakasalalau Atu te Tupu mo te Malo.”

“Ne fia‵fia malosi a te kautaina,” ko muna a Ray Bopp. Ne fakamatala mai ne Anna Gardner a te auala “ne patipati ei mo te fia‵fia a tino kolā ne taofi ne latou a lakau faka‵lava.” “Ne ‵tu ki luga a te kautaina kātoa,” ko muna a Fred Twarosh. Ne fai mai a Evangelos Scouffas: “Ne fai pelā me se ‵mana malosi ne ‵futi aka ne ia matou mai i motou nofoga kae ne ‵tu aka matou ki luga mo omotou mata ko ‵fonu i loimata.”

Ko leva ne fakasalalau atu ne tino e tokouke i te fono tenā a te tala ‵lei o te Malo. Kae nei la ko toe ati aka te lotou loto malosi ne se pogai tāua fou. Ne fai mai a Ethel Bennecoff me ne olo atu a Tino A‵koga o te Tusi Tapu “i te loto finafinau mo te alofa telā e sili atu i lō aso mua.” Ne fakaiku aka ne Odessa Tuck, telā ko 18 ana tausaga i te taimi tenā, mai tua o te fono ke tali atu a ia ki te ‵kamiga “Ko oi ka fano?” Muna a tou fafine: “E se iloa ne au me tefea te koga, te auala io me se a foki. E tasi fua te mea e iloa ne au me ne manako au ke fai pelā mo Isaia, telā ne fai atu ‘Ko au! Uga mai au!’” (Isa. 6:8) “A te aso fakafiafia tenā,” ko muna a Ralph Leffler, “ko te kamataga tonu eiloa o te galuega fakapito ko te fakasalalau atu o te Malo telā ko soko i te lalolagi i aso nei.”

E se tioa eiloa o fai a te fono i Cedar Point, Ohio, i te 1922 mo fai se mea faka-te-agaga tāua e tasi i tala mua! Ne fai mai a George Gangas: “Ne fakamalosi aka au ne te fono tenā ke mo a eiloa ma galo au i se mea e tasi.” E pelā mo mea ne masaua ne ia, e seki galo eiloa a ia i se mea e tasi. Ne tusi mai a Julia Wilcox: “Ne seki mafai eiloa ne au o fakamatala atu a te fiafia ne maua ne au i taimi katoa e fakasino atu ei ki Cedar Point i te 1922 i ‵tou tusi. E fia fai atu faeloa au, ‘Fakafetai Ieova mō te talia mai ke kau atu au ki ei i konā.’”

E pelā mo tatou katoa i aso nei, e maua foki ne tatou a taimi ‵gali tāua penā i se fono telā ne fai ei ke fia‵fia ‵tou loto kae momea aka foki te ‵tou loto finafinau mo te a‵lofa ki te ‵tou Atua sili mo tena Tupu. I te taimi e mafau‵fau ei tatou ki vaegā taimi penā, e fakaosofia foki tatou ke fai atu, “Fakafetai Ieova, mō te talia mai ke kau atu au ki ei i konā.”