Fakalagolago ki a Ieova Māfai ko Mafatia

1. Kaia e ‵tau ei o faka‵logo tatou ki te faka‵pulaga a Iesu?

I TENA valoaga e uiga ki aso fakaoti, ne fai mai Iesu: “‵Saga tonu ki a koutou eiloa ke mo a ma faka‵mafa otou loto ki te . . . manavase ki te olaga nei [io me “manavase ki tupe mo tausi te olaga; manavase ki mea o te olaga,” nwtsty fml.].” (Luka 21:34) E ‵tau o faka‵logo tatou ki te faka‵pulaga tenā. Kaia? Me fe‵paki tatou i te taimi nei mo fakalavelave kolā e fe‵paki mo tino katoa.

2. Ne a fakalavelave fakamafatia loto e fe‵paki mo ‵tou taina mo tuagane?

² I nisi taimi e fe‵paki tatou mo fakalavelave fakamafatia loto i te taimi eiloa e tasi. Mafaufau ki fakaakoakoga konei. A te Molimau ko John,b telā e maua ne te masaki ko te multiple sclerosis, ne fanoanoa ‵ki i te taimi ne tiaki ei a ia ne tena avaga mai tua o tausaga e 19 ne avaga ei lāua. Oti aka ne tiaki ne ana tama fāfine e tokolua a Ieova. A te tauavaga ko Bob mo Linda e ‵kese foki a lā fakalavelave. Ne ‵galo atu lā galuega ‵togi pelā foki mo te lā fale. I tafa o fakalavelave konā, ne iloa aka me masaki a Linda ki tena fatu, kae ko kamata o fakamasei tena foitino i loto ne te suā masaki.

3. E ‵tusa mo te Filipi 4:6, 7, se a te mea e mautinoa ne tatou?

³ E mautinoa i a tatou me i te ‵tou Mafuaga telā ko te ‵tou Tamana alofa ko Ieova, e maina i mea kolā e mafatia ei tatou. Kae manako a ia o fesoasoani mai ke fakafesagai mo fakalavelave e fe‵paki mo tatou. (Faitau te Filipi 4:6, 7.) E maua i te Muna a te Atua a tala e uke kolā e fakaasi mai ei a fakalavelave ne kufaki ne ana tavini. E fakamau foki i ei a te auala ne fesoasoani atu a Ieova ke fakafesagai latou mo tulaga fakamafatia loto penā. Ke sau‵tala nei tatou ki nai fakaakoakoga.

ELIA—“SE TAGATA E ISI NE ANA LAGONAGA E PENEI MO TATOU”

4. Ne a mea faiga‵ta ne fepaki mo Elia, kae ne pefea ana lagonaga e uiga ki a Ieova?

⁴ A Elia ne tavini ki a Ieova i taimi faiga‵ta kae ne fepaki mo fakalavelave e uke. A te Tupu ko Aapo, se tokotasi o tupu sē fakamaoni i Isalaelu, ne avaga ki a Iesepela, se tino tapuaki ki a Paala telā e matagā ‵ki. Ne faka‵fonu ne lāua a te fenua ki te tapuakiga ki a Paala kae tamate ne lāua a pelofeta e tokouke a Ieova. Kae ko Elia ne sao. Ne sao foki a ia i se oge meakai lasi telā ne poko ona ko tena fakalagolago ki a Ieova. (1 Tupu 17:2-4, 14-16) E se gata i ei, ne fakalagolago a Elia ki a Ieova, i te taimi ne fakafesagai atu ei ki pelofeta mo tino tapuaki a Paala. Ne fakamalosi ne ia a tino Isalaelu ke tavini ki a Ieova. (1 Tupu 18:21-24, 36-38) E uke fakamaoniga ne lavea ne Elia me ‵lago atu a Ieova ki a ia i taimi faiga‵ta konā.

5-6. E ‵tusa mo te 1 Tupu 19:1-4, ne a lagonaga o Elia, kae ne fakaasi atu pefea ne Ieova me alofa a ia ki a Elia?

⁵ Faitau te 1 Tupu 19:1-4. Kae ko Elia ne mataku i fakamatakutakuga a te Tupu fafine ko Iesepela ke tamate a ia. Tenā ne tele ei a ia ki Pelesepa. Ne loto vāivāi malosi a ia kae “fakamolemole atu ke na mate a ia.” Kaia ne maua ei ne ia a lagonaga penā? A Elia se tagata sē ‵lei katoatoa, “se tagata e isi ne ana lagonaga e penei mo tatou.” (Iako. 5:17) Kāti ko se ‵kafi ne ia o fa‵ki te lasi o te mafatia mo te lasi o te fi‵ta. E foliga mai me ne mafaufau a Elia me ko seai se aoga o ana taumafaiga ke fakamaluga aka te tapuakiga ‵ma, e seki ai ne fakama‵fuliga i Isalaelu, kae ko ia tokotasi fua koi tavini atu ki a Ieova. (1 Tupu 18:3, 4, 13; 19:10, 14) Kāti e ‵poi tatou i te kilokiloga ne maua ne te pelofeta fakamaoni tenei. Kae ne malamalama a Ieova i lagonaga o Elia.

⁶ Ne seki kote ne Ieova a Elia ona ko te fakaasimaiga ne ia ana lagonaga konā. I lō te fai penā, ne fesoasoani atu a ia ki a Elia ke toe maua te malosi. (1 Tupu 19:5-7) Fakamuli ifo, ne fakatonutonu ne Ieova mo te alofa a te mafaufau o Elia mai te fakaasiatuga o Tena ‵mana fakaofoofogia. Oti aka, fai atu ei a Ieova me e toko 7,000 tino i Isalaelu e ita fitifiti ma tapuaki atu ki a Paala. (1 Tupu 19:11-18) E auala i fakaakoakoga konei, ne fakaasi atu ne Ieova me e alofa eiloa a Ia ki a Elia.

AUALA KA FESOASOANI MAI EI A IEOVA

7. Se a te fakamalosiga e maua ne tatou mai te auala ne fesoasoani atu ei a Ieova ki a Elia?

⁷ E mata, e fakafesagai atu nei koe ki se tulaga faigata? Ko oko loa i te fakamafanafana mai ke iloa atu me ne malamalama a Ieova i lagonaga o Elia! E fakamautinoa mai ei ki a tatou me malamalama foki a ia i ‵tou fakalavelave. E iloa ne ia ‵tou tapula, kae e iloa foki ne ia a ‵tou mafaufauga mo lagonaga. (Sala. 103:14; 139:3, 4) Kafai e fakaakoako tatou ki a Elia mai te fakalagolago ki a Ieova, ka fesoasoani mai a ia ke iloa ne tatou o fakafesagai atu ki fakalavelave kolā e fai ei ke mafatia tatou.—Sala. 55:22.

8. Ka fesoasoani atu pefea a Ieova ki a koe ke fakafesagai atu ki te mafatia?

⁸ A te mafatia e mafai o fai ei ke mafaufau koe me ka se mafai o mafuli tou tulaga, kae ka fai fua i ei ke loto vāivāi koe. Kafai e tupu te mea tenā, ke masaua me ka fesoasoani atu a Ieova ke fakafesagai atu ki te tulaga mafatia tenā. Ka fesoasoani atu a ia pefea? E ‵kami ne ia koe ke fakaasi atu ki a ia a mea e manavase koe ki ei. Kae ka tali mai ne ia au fakatagi mō se fesoasoani. (Sala. 5:3; 1 Pe. 5:7) Tela la, ‵talo faeloa ki a Ieova e uiga ki ou fakalavelave. Ka se faipati ‵tonu a ia ki a koe e pelā mo tena mea ne fai ki a Elia, kae ka faipati a ia ki a koe e auala i tena Muna, ko te Tusi Tapu, e auala foki i tena fakapotopotoga. A tala e faitau ne koe i te Tusi Tapu e mafai o fakamafanafana atu ki a koe kae tuku atu foki se fakamoemoega ki a koe. E mafai foki ne ou taina mo tuagane o fakamalosi ne latou koe.—Loma 15:4; Epe. 10:24, 25.

9. E mafai pefea o fesoasoani mai se taugasoa fakatuagagina?

⁹ I te taimi ne fai atu a Ieova ki a Elia ke tuku nisi galuega ke fai ne Elisaia, ne tuku atu ne Ia ki a Elia se taugasoa ‵lei, telā ne mafai o fesoasoani atu ki a ia māfai ko loto vāivāi malosi a ia. I se auala tai ‵pau, kafai e fakaasi ne tatou ‵tou fakalavelave ki se taugasoa fakatuagagina, e mafai o fesoasoani mai a ia māfai ko loto vāivāi tatou. (2 Tupu 2:2; Faata. 17:17) Kafai e seai se tino e mafai o faipati koe ki ei, ‵talo ki a Ieova ke fesoasoani atu ke maua ne koe se Kelisiano matua faka-te-agaga telā e mafai o fakamalosi ne ia koe.

10. E tuku mai pefea ne te mea ne tupu ki a Elia se fakamoemoega ki a tatou, kae aoga pefea ki a tatou te folafolaga i te Isaia 40:28, 29?

¹⁰ Ne fesoasoani atu a Ieova ki a Elia ke mafai o fakafesagai a ia mo te tulaga mafatia kae ke tavini atu mo te fakamaoni i tausaga e uke. A te mea ne tupu ki a Elia e tuku mai ei ki a tatou se fakamoemoega. E mafai o mafatia malosi tatou kae fai ei ke fi‵ta tatou i te feitu faka-te-foitino mo te feitu tau lagonaga. Kae kafai e fakalago‵lago tatou ki a Ieova, ka tuku mai ne ia te malosi e manakogina ne tatou ke tumau i te tavini atu ki a ia.—Faitau te Isaia 40:28, 29.

HANA, TAVITA, MO “ASAFO” NE FAKALAGO‵LAGO KI A IEOVA

11-13. Ne a mea fakamafatia ne pokotia i ei a tavini e tokotolu a te Atua i aso mua?

¹¹ Ne fe‵paki foki a nisi tino i te Tusi Tapu mo nisi tulaga mafatia. E pelā mo Hana ne kufaki ne ia te tulaga fakamasiasi o te sē fanafanau e pelā foki mo pati fakaitaita sē ‵tau mai te suā avaga a tena avaga. (1 Samu. 1:2, 6) A te lasi o te mafatia o Hana ne fai ei ke kaitaua malosi a ia telā ne tagi ei a ia kae e se kai.—1 Samu. 1:7, 10.

¹² I nisi taimi, ne mafatia malosi ‵ki te Tupu ko Tavita. Mafaufau ki fakalavelave ne fepaki mo ia. Ne se ‵lei valevale ana lagonaga ona ko mea ‵se ne fai ne ia. (Sala. 40:12) Ne ‵teke atu tena tama pele ko Apisaloma ki a ia, kae ne iku atu ei ki te mate o Apisaloma. (2 Samu. 15:13, 14; 18:33) Kae ne fakatogafiti a Tavita ne se tokotasi o ana taugasoa pili. (2 Samu. 16:23–17:2; Sala. 55:12-14) A salamo e uke ne tusi ne Tavita e fakamatala mai ei ana lagonaga loto vāivāi e pelā foki mo te ‵mautakitaki o tena talitonu ki a Ieova.—Sala. 38:5-10; 94:17-19.

¹³ Fakamuli ifo, ne kamata o loto masei se faisalamo ki te olaga o tino amio ma‵sei. Kāti a ia ne vau mai te gafa o te tino Levi ko Asafo, kae ne tavini atu a ia i “te koga tapuaki sili o te Atua.” Ne fepaki te faisalamo tenei mo lagonaga loto mafatia mo te sē lotomalie. Ne kamata foki o fakalotolotolua a ia ki fakamanuiaga ne maua mai tena taviniga ki te Atua.—Sala. 73:2-5, 7, 12-14, 16, 17, 21.

14-15. Ne a mea e tauloto ne tatou mai fakaakoakoga e tolu i te Tusi Tapu e uiga ki te ‵fuli atu ki a Ieova mō se fesoasoani?

¹⁴ A tino tapuaki ‵tonu e tokotolu konei ne fakalago‵lago katoa ki a Ieova mō se fesoasoani. Ne fakaasi ne latou olotou manavasega ki a ia e auala i te ‵talo malosi atu. Ne fai‵pati atu latou ki a ia e uiga ki pogai ne mafatia malosi ei latou. Kae ne tumau latou i te olo faeloa ki te koga tapuaki a Ieova.—1 Samu. 1:9, 10; Sala. 55:22; 73:17; 122:1.

¹⁵ Ne saga atu eiloa a Ieova mo te atafai ki a latou taki tokotasi. Ne maua ne Hana te filemu o te mafaufau. (1 Samu. 1:18) Ne tusi mai a Tavita: “E uke a fakalavelave faiga‵ta o te tino amiotonu, kae e fakasao ne Ieova a ia mai i mea katoa konā.” (Sala. 34:19) Kae ne lagona ne te faisalamo me ne ‘puke ‵mau a Ieova ki tena lima fakaatamai,’ kae fakatonutonu a ia ki pati a‵lofa. Ne usu mai a ia: “Kae pelā mo au, a te fakapilipili atu ki te Atua e ‵lei ki a au. Ko oti ne fai ne au te Aliki Sili ko Ieova mo fai toku lafiga.” (Sala. 73:23, 24, 28) Ne a mea e tauloto ne tatou mai fakaakoakoga konei? I nisi taimi, e mafatia tatou ona ko te uke o fakalavelave. Kae e mafai o fa‵ki tatou māfai e mafaufau ‵loto tatou ki te auala ne fesoasoani atu a Ieova ki nisi tino, fakalagolago ki a ia e auala i ‵talo, kae faka‵logo ki a ia mai te faiga o mea kolā e fai mai a ia ke fai ne tatou.—Sala. 143:1, 4-8.

FAKALAGOLAGO KI A IEOVA KAE KA MANUIA KOE

16-17. (a) Kaia e se ‵tau ei mo tatou o ‵vae kea‵tea? (e) E mafai pefea o toe maua ne tatou te malosi?

¹⁶ E isi foki se akoakoga tāua e maua ne tatou mai tala e tolu konā—e se ‵tau mo tatou o ‵vae kea‵tea mai i a Ieova mo ana tino. (Faata. 18:1) A Nancy, telā ne mafatia malosi ‵ki i te taimi ne tiakina a ia ne tena avaga, ne fai mai: “E uke a aso ne seki manako eiloa au o kilo io me faipati ki se tino. Kae ko te uke o taimi e ‵vae kea‵tea ei au mo tino, ko te lasi foki o toku fanoanoa.” Ne ma‵fuli a mea i te taimi ne ‵sala ei a Nancy ki auala ke fesoasoani ki tino kolā e isi ne olotou fakalavelave. Ana muna: “Ne fakalogologo au i te taimi ne fakamatala mai ne tino olotou fakalavelave. Ne iloa ne au me ko te lasi o toku saga atu ki a latou mo olotou fakalavelave, e fai ei ke se fia saga au ki oku fakalavelave.”

¹⁷ E mafai o toe maua ne tatou te malosi māfai e ‵kau atu ki fakatasiga a te fakapotopotoga. Kafai ko ‵nofo tatou i fakatasiga, ko tuku atu ne tatou se avanoaga fakaopoopo ki a Ieova ke “fesoasoani kae fakamafanafana mai” ki a tatou. (Sala. 86:17) E fakamalosi ne ia tatou e auala i tena agaga tapu, tena Muna, mo ana tino. E tuku mai i fakatasiga te avanoaga ke “fakatau fakama‵losi” tatou. (Loma 1:11, 12) Ne fai mai se tuagane e igoa ki a Sophia: “Ko Ieova mo ‵tou taina ne fai ne latou ke mafai ne au o kufaki. A te ‵toe mea tāua ki a au ko fakatasiga a te fakapotopotoga. Ne iloa ne au me ko te uke o oku taimi e kau au ki te galuega talai mo te fakapotopotoga, ko te mafai foki ne au o fakafesagai atu ki te mafatia mo te manavase.”

18. Kafai ko loto vāivāi tatou, ne a mea e mafai o tuku mai ne Ieova ki a tatou?

¹⁸ Kafai e loto vāivāi tatou, ke masaua ne tatou me ne seki folafola mai fua a Ieova me ka maua ne tatou te faka‵leiga tumau i aso mai mua, kae ka fesoasoani mai foki a ia ke fakafesagai atu ki te mafatia i te taimi nei. E tuku mai ne ia ki a tatou te manakoga “mo te ‵mana” ke manumalo i lagonaga o te loto vāivāi mo te seai o se fakamoemoega.—Fili. 2:13.

19. Se a te mea e fakamautinoa mai i te Loma 8:37-39 ki a tatou?

¹⁹ Faitau te Loma 8:37-39. Ne fakamautinoa mai ne te apositolo ko Paulo me seai se mea e mafai o ‵vae ne ia tatou kea‵tea mai te alofa o te Atua. E mafai pefea o fesoasoani atu tatou ki ‵tou taina mo tuagane kolā e taumafai o fa‵ki i mea e mafatia latou i ei? Te suā mataupu, ka faipati ki te auala e mafai ei ne tatou o fakaakoako ki a Ieova mai te fakaasiatuga o te alofa atafai kae mai te ‵lago atu ki ‵tou taina mo taugane māfai ko mafatia latou.