‵Talo Faeloa ke Maua te Taliaga a te Atua

Ne tuku mai ne te Atua se meaalofa tu ‵kese ki tino—ko te ata‵mai ke fesokotaki mo ia kae ke fakaasi atu olotou lagonaga ki a ia e auala i ‵talo. Ne ‵talo atu te pelofeta ko Tavita: “Te Tino e Lagona ne ia a ‵talo, ka o‵mai ki a koe a vaegā tino valevale katoa.” (Salamo 65:2) Kae e mafai pefea o ‵talo atu tatou ko te mea ke lagona ne te Atua kae ke fakamanuia ne ia tatou?

‵TALO MO TE LOTO KĀTOA MO TE LOTO MAULALO

Au ‵talo totino se avanoaga ke ‵ligi atu ki mua o te Atua a mea i tou loto—ke fakaasi atu ou lagonaga ‵tonu. (Salamo 62:8) E fiafia a te Atua Malosi Katoatoa ki ‵talo kolā e fai atu mo te loto kātoa.

FAKAAOGA TE IGOA TOTINO O TE ATUA I AU ‵TALO

E tiga eiloa e uke a tofi o te Atua, kae e tasi fua tena igoa. “Au ko Ieova. Tenā toku igoa.” (Isaia 42:8) A te igoa, Ieova, e sae mai faka-7,000 taimi i te Tusi Tapu. E tokouke a pelofeta ne fakaaoga ne latou te igoa o te Atua i olotou ‵tao. Ne fai mai Apelaamo: “Ieova fakamolemole, . . . talia mai au ke faipati [mo koe].” (Kenese 18:30) E ‵tau foki mo tatou o fakaaoga te igoa o te Atua ko Ieova, māfai e ‵talo tatou.

‵TALO ATU I TAU ‵GANA TOTINO

A te Atua e malamalama i ‵tou mafaufauga mo lagonaga faitalia me se a te ‵gana e fai‵pati tatou ki ei. E fakatalitonu mai tena Muna ki a tatou, penei: “Te Atua e se fakailoga tino, kae ko te tino mai so se fenua telā e mataku ki a ia kae fai mea tonu e talia eiloa ne ia.”—Galuega 10:34, 35.

Kae ke fakamanuiagina tatou ne te Atua, e ‵tau o uke atu ‵tou mea e fai i lō fua te ‵talo atu ki a ia. I mataupu konei e ‵soko mai, ka suke‵suke tatou ki mea kolā e manakogina ke fai ne tatou.