Akatarhwa na Marko
15 Comacibesi, atungamiriri e apristi, akuru no atari, Sinedriyo yese kamare, akaungana kuti aziye zvokuita, mumasure mazvo akasunga Djesu uye akaenda koomukanda mu nyara dza Pirato. 2 Hino Pirato wakamubvunzisa kuti: “Ndiwe Mambo we Adjudha?” Djesu akamudaira kuti: “Ndimwi muri kuzvibhuya.” 3 Asi atungamiriri e apristi aimupumha zviro zvakawanda. 4 Pirato wakatangazve kumubvunzisa, eciti: “Audairi ciro kani? Izwa basi zvaari kukupumha.” 5 Asi Djesu aazi kudairazve, zvekuti Pirato wakashamiswa nazvo.
6 Pa mutambo wese we Paskwa, iyena waibudisa musungwa umwe, waisanangurhwa no anhu kuti abudiswe. 7 Pa nguwa iyona, mwanarume waizwi Bharabhaa wainga ari mu kadheya pamwepo no apanduki amweni, awona ainga auraya anhu. 8 Hino anhu akauya, akatanga kukumbira kuti Pirato aaitire zvaaigara eciita. 9 Ngokudaro, iyena wakaabvunzisa kuti: “Munoda kuti ndisudzunure Mambo we Adjudha here?” 10 Ngokuti Pirato waizviziya kuti atungamiriri e apristi akamuunzisa kaari nge ndaa yo bibvu. 11 Asi atungamiriri e apristi akakohomedzesa anhu kuti pane kudaro, asudzunure Bharabhaa. 12 Hino, Pirato wakaabvunzisazve kuti: “Munoda kuti ndiitei no uya wa munodainza kuti Mambo we Adjudha?” 13 Asi awona akakhuwazve eciti: “Ngaakhomerhwe pa mutanda!”* 14 Asi Pirato wakaabvunzisa kuti: “Ngei? Iyena washaishei?” Asi awona akabambirira kukhuwa eciti: “Ngaakhomerhwe pa mutanda!”* 15 Ecida kupfadza anhu, Pirato wakasudzunura Bharabhaa; uye mumasure mekuita kuti Djesu abvengwe, wakamuendesa kuti auraiwe pa mutanda.
16 Masurudado akamutora, oenda naye pa ruanze ro nyumba yo mutungamiriri, uye akadainza cikwata cese ce masurudado. 17 Awona akamupfekedza djira ro kupsvuka, akaruka korowa yo minzwa oikanda mu musoro make; 18 uye akatanga kumubvunza kuti: “Mucaita wani Mambo we Adjudha!” 19 Uyewo, akamuponda mu musoro make no mupini uye akamupfirira mata, hino akagodama pamberi pake uye akamuhwararira. 20 Pakupedzesera, mumasure me kumuseka, akamukhumura djira ro kupsvuka uye akamupfekedzazve macira ake. Pedzepo akamutora kuti aende koomukhomera pa mutanda. 21 Uyewo, mwanarume umweni waipinda no ipona waibva kumunda, waizwi Simoni wo ku Sirene, baba a Areshandre na Rufo. Awona akamubambidzira kuti athware mutanda.*
22 Hino akamutora oenda naye ku mbuto inozwi Gorokota, zvinoreya kuti: “Mbuto ye Dehenya.” 23 Kweneyo akaedza kumupasa vhinyu yakavhengerhwa no mira, asi iyena akaramba kuimwa. 24 Akamukhomera pa mutanda uye akakhandira mudjenya kuti akoanisane macira ake kuti aone kuti musurudado umwe na umwe waizotora cipi. 25 Dzainga dziri 9 dze macibesi,* paakamukhomera pa mutanda. 26 Uye painga pakatarhwa masoko okupumha ekuti: “Mambo we Adjudha.” 27 Uyezve, pakakhomerhwawo mbavha mbiri, imwe ku moko wake kwawo uye imweni ku moko we boshwe. 28* —— 29 Aipinda ndipona, aimutuka ecidzungudza misoro yawo, eciti: “Iwewe waiti waizophwanya tempro woiwaka mu mazuwa matatu, 30 dziponese ngo kucita pa mutanda.”* 31 Ngo mushobo umwewo, atungamiriri e apristi pamwepo no atari aimuseka, eciti: “Akaponesa amweni; asi iyena aakwanisi kudziponesa! 32 Kristu, Mambo we Aisraeri, cita zvino pa mutanda,* kuti tione uye titende.” Kunyazi mbavha dzainga dzakakhomerhwa pa mutanda pa muceto pake dzaimutukawo.
33 Padzakaguma 12 dze masikati,* pakaitika cidima cakafukidza nyika iyona dakara 15 dze masikati.* 34 Padzakaguma 15 dze masikati, Djesu akadainzira no izwi guru eciti: “Eri, Eri, rama sabhakitani?” zvinoreya kuti: “Mwari wangu, Mwari wangu, ngei mandisiya ndega?” 35 Uye anhu amweni ainga ari ipona, paakazwa izvi, akati: “Izwai! Iyena ari kudainza Eriya.” 36 Hino munhu umweni wakagogoma, wobata shiponja woinyika mu vhinyu inojaja, woikanda pa cimuti, uye wakamupasa kuti amwe, eciti: “Musiyei akadaro! Tione kana Eriya acauya koomubvisepo.” 37 Asi Djesu akakhuwa no izwi guru uye akafa.* 38 Uye djira re mbuto yakacena rakamweka pakati no pakati kubvira ku musoro dakara pasi. 39 Mutungamiriri we masurudado wainga wakaima ngo padhuze naye paakaona zviitiko zvese izvi pa rufu rake, wakabhuya kuti: “Zvezvirokwazvo mwanarume uu wainga ari mwana wa Mwari.”
40 Painga pano anakadzi amweni ainga ecizviona nge kure, pakati pawo painga pana Mariya Madharena, Mariya mai a Tiyago mudoko na Djosesi, uye Sarome, 41 anakadzi aya aimuperekedza uye aimubetsera paainga ari ku Garireya, uyezve painga pano anakadzi akawanda ainga aenda naye ku Djerusarema.
42 Hino ngokuti kunza kainga kasvipa, uye rainga riri zuwa ro kugadzirira, kana kuti, zuwa raizoteerhwa no Sabudu,* 43 pakaguma Zuzee we ku Arimateya, nhengo ye Dare yaireremedzwa, uwo waietserawo Umambo wa Mwari. Iyena wakagara no ushingi uye wakaenda kuna Pirato, wokumbira mutumbi wa Djesu. 44 Asi Pirato waida kuziya kuti Djesu ainga afa here, uye wakadainza mutungamiriri we masurudado, womubvunzisa kuti Djesu ainga afa here. 45 Hino paakazwa no mutungamiriri we masurudado kuti ainga afa, wakatendera kuti Zuzee apaswe mutumbi. 46 Zuzee wakatenga djira rakanaka uye wakabvisa mutumbi pa mutanda, pedzepo wakauputiridza no djirero uye wakaukanda mu guwa* rainga rakacerhwa pa buwe; hino wakamburumbudzira buwe pa musuwo pe guwa. 47 Asi Mariya Madharena na Mariya mai a Djosesi akasarepo akaringira paainga aigwa.