Akatarhwa na Mateu
23 Hino, Djesu akabvunza anhu no afundi ake kuti: 2 “Atari no Afarisi akadzigadza pa mbuto ya Mozesi. 3 Hino, itai uye teererai zvaanomubvunzai, asi musaite zvaanoita, ngokuti zvaanoreketa andizvopi zvaanoita. 4 Anosunga mitoro inorema oikanda pa maphewa pe anhu, asi awona aatodi kumboipsvasa no cikunwe cawo. 5 Mabasa ese aanoita, anoita kuti aonekwe nge anhu, ngokuti anokudza zvimabhokisi zvakatarhwa zvaanosungira hinga zviro zvinoadziirira, uye anokudza zviusaru zve macira awo. 6 Pa mabiko, anoda kugara pa mbuto dzinonyasa kuoneka, mu masinagoga anoda kugara pa mbuto dzekutanga.* 7 Awona anodawo kucungamidzwa mu mabazari no kudainzwa no anhu kuti Rabhi.* 8 Asi, imwimwi musadainzwe Rabhi, ngokuti Mufundisi wenyu ndi umwe basi, uye imwimwi mwese muri hama. 9 Uyezve, musadainze munhu upi hake ari panyika pano kuti Baba, ngokuti Baba enyu ndi amwe basi, ekudenga. 10 Uyezve, musadainzwe kuti atungamiriri, ngokuti Mutungamiriri wenyu ndi umwe basi, Kristu. 11 Asi mukuru pakati penyu anodikana kugara museenzi wenyu. 12 Munhu wese anodzikudza acadodoswa, uya anodzidodosa acakudzwa.
13 “Mune nyathwa imwimwi atari no Afarisi, acengedzi! Ngokuti munofungira anhu Umambo we kudenga; imwimwi amupindimo, uye amusii kuti anoda kupinda apinde. 14* ——
15 “Mune nyathwa imwimwi atari no Afarisi, acengedzi! Ngokuti munohamba mu bahari no pa nyika mecida kutendeudza munhu kuti agare Mudjudha, paanogara Mudjudha, munomuita kuti asisire kuenda mu Gehena,* ozogara no ndaa yakakura kupinda yenyu.
16 “Mune nyathwa imwimwi atungamiriri asikaoni, munobhuya kuti: ‘Kana munhu akapika ngo mu zina ro tempro, azvina basa; asi kana munhu akapika ngo mu zina ro oro yo tempro, iyena unodikana kudzadzisa zvaapikira.’ 17 Mapenzi no mapofu! Zvezvirokwazvo cinyi cinonyanya kukosha, oro kana kuti tempro inocenesa oro? 18 Munobhuyazve kuti: ‘Kana munhu akapika ngo mu zina re artari, azvina basa; asi kana munhu akapika ngo mu zina re cipo cinonga ciri pa denga pe artari, iyena unodikana kudzadzisa zvaapikira.’ 19 Mapofu! Cinyi cinonyanya kukosha, cipo kana kuti artari inocenesa cipo? 20 Hino, uya anopika ngo mu zina re artari, ari kupikira artariyo no zvese zviri pamusoro payo; 21 uye uya anopika ngo mu zina ro tempro, anopikirawo tempro no Uya anogaremo; 22 uya anopika no denga, anopika no cigaro ce umambo ca Mwari, no Uya anogarepo.
23 “Mune nyathwa imwimwi atari no Afarisi, acengedzi! Ngokuti munopasa cegumi ce minti, endro, no kumini,* asi munosiya shwiro dzinokosha dze Mutemo, dzakaita hingana kutonga no unatsi, usisi, no kutendeka. Zviro izvi maidikana kuzviita, asi musikasii kuita zvimweni zvakhona. 24 Atungamiriri asikaoni, munobvisa nhunga yawira mu kopo, asi munomedza kamero!
25 “Mune nyathwa imwimwi atari no Afarisi, acengedzi! Ngokuti munosuka nge cekunza kopo no paratu, asi mukati makadzara no makaro* no kutama kudzibata. 26 Iwe Mufarisi bofu, tanga kusuka mukati me kopo no paratu, kuti dii rokunza ricenewo.
27 “Mune nyathwa imwimwi atari no Afarisi, acengedzi! Ngokuti makaezana no makuwa akadzurhwa no mavhu akacena, nge cekunza anooneka hingana kuti akanaka, asi nge cemukati akadzara no makodo e anhu akafa, no mushobo wese we zviro zvisikazi kucena. 28 Ngo mushobo umwewo, nge cekunza imwimwi makaita hingana anhu anatsi mu maonero e anhu, asi nge cemukati makadzara no ucengedzi uye no kusama kuteerera mutemo.
29 “Mune nyathwa imwimwi atari no Afarisi, acengedzi! Ngokuti munowaka makuwa e aphorofita uye munorungamisa makuwa e anatsi, 30 uye munoti: ‘Kudai takararama mu nguwa yo madzitsekuru edu, tainga tisikazodi kugara no ndaa ye kuuraya aphorofita.’ 31 Ngokudaro, imwimwi muri kudzipupurira mwega kuti muri ana e anhu akauraya aphorofita. 32 Hino, pedzesai mabasa akashata akatangwa no madzitsekuru enyu.
33 “Imwimwi muri nyoka, ana e nyoka, mungatiza kudini kutongwa mu Gehena?* 34 Nge ndaa yazvo, ndiri kumutumirai aphorofita, azii, no afundisi. Amweni awo munozoauraya pedzepo munozoakhomera pa mutanda, amweni munozoaponda mu masinagoga enyu, no kuateerera mu mathaundi ese meciatambudza, 35 kuti ndaa ye ngazi ye anhu anatsi yakadururhwa pa nyika iuye pamuri, kubvira pa ngazi ya Abheri dakara pa ngazi ya Zakariya mwana wa Bharakiya, wamakauraya pakati pe mbuto cena no artari. 36 Zvirokwazvo ndinoti kamuri, zviro zvese izvi zvicauya pa mubarirhwana uu.
37 “Djerusarema, Djerusarema, rinouraya aphorofita no kufura no mapuwe aya anotumwa! Ndakaedza kangana kuunganidza ana ako hingana kuunganidza kunoita huku zvitiyo pasi pe mabaphiro ayo! Asi imwimwi makaramba. 38 Onai! Nyumba yenyu inozoramwiwa na Mwari.* 39 Ndinomubvunzai kuti, kubvira zvino kuenda mberi amucandionizve, dakara mabhuya kuti: ‘Akakomborerhwa munhu anouya mu zina ra Djehovha.*