Zvakapangidzwa kuna Juau
5 Inini ndakaona mupumburu mu moko kwawo we Uya ainga akagara pa cigaro ce umambo wakatarhwa matii ese,* wakanyasa kunamwa no zvinamiro zvinomwe. 2 Ndakaonawo ngirozi ino simba yecidainzira no izwi guru yeciti: “Ndiani akasisira kufunungura mupumburu uye kubvisa zvinamiro zvawo?” 3 Asi painga pasina munhu kudenga, pa nyika, kana pasi pe nyika waikwanisa kufunungura mupumburu uye kuona zvainga zvakatarhwa imona. 4 Ndakatanga kucema maningi, ngokuti painga pasina munhu waizwi wakasisira kufunungura mupumburu uye kuona zvainga zvakatarhwa imona. 5 Asi umwe we akuru wakandibvunza kuti: “Usaceme. Ona! Mhondoro ye dzinza ra Djudha, mudzi wa Dhavhidhi, wawina, zvekuti iyena anokwanisa kufunungura mupumburu uye zvinamiro zvinomwe.”
6 Inini ndakaona bira raiita hingana rakafa, rakaima pakati pe cigaro ce umambo no pakati pe zvisikwa zvirongomuna zvipenyu uye pakati pe akuru, irona rainga rino nyanga nomwe no madziso manomwe, madziso aya anoimirira mwiya minomwe ya Mwari yakatumwa mu nyika yese. 7 Ciriporipoco, irona rakakhwedera uye rakatora mupumburu wainga uri mu moko kwawo wa Uya ainga akagara pa cigaro ce umambo. 8 Parakabata mupumburu, zvisikwa zvirongomuna zvipenyu uye akuru 24 akahwarara pamberi po Bira irona, umwe na umwe wainga ano rudimbwa* uye tijera ye oro yakadzara no rusenzi. (Rusenzi irona rinoimirira minamato ye acena.) 9 Uye aiemba ngoma ipsva, eciti: “Tenzi makasisira kutora mupumburu uye kufunungura zvinamiro zvawo, ngokuti makafa uye no ngazi yenyu makatengera Mwari anhu e madzinza ese, mireketero, uye e nyika dzese 10 uye makaaita madzimambo no apristi a Mwari wedu, uye awona acatonga nyika.”
11 Inini ndakaona, uye ndakazwa izwi re ngirozi dzakawanda dzakatenderedza cigaro ce umambo, pamwepo no zvisikwa zvipenyu no akuru, mutengo wawo wainga uri mazana no mazana e zviuru zvakawandisisa no zviuru zve zviuru, 12 uye idzona dzaidainzira no izwi guru dzeciti: “Bira rakauraiwa rakasisira kutambira simba guru, upfumi, uzii, simba, rureremedzo, rukudzo uye makomborero.”
13 Ndakazwa zvisikwa zvese zve kudenga, zve pa nyika, zve pasi pe nyika, uye no zve mu bahari. Honde, zvese zviri mazviri, zveciti: “Uya akagara pa cigaro ce umambo pamwepo no Bira ngaapaswe makomborero, rureremedzo, rukudzo uye simba nokusikaperi.” 14 Zvisikwa zvirongomuna zvipenyu zvaiti: “Ameni!” uye akuru akahwarara uye onamata Mwari.