Akatarhwa na Mateu
22 Djesu akareketazve nawo eciseenzesa miezaniso, eciti: 2 “Umambo we kudenga ungaezaniswa na mambo wakaitira mwana wake mabiko e mucato. 3 Uye iyena wakatuma aranda ake kuenda koodainza anhu ainga apikwa ku mabiko e mucato, asi awona ainga asikadi kuuya. 4 Iyena wakatumazve aranda amweni eciti: ‘Bvunzai anhu akapikwa kuti: “Ndauraya n’ombe dzangu no zvinyama zvangu zvakanuna, uye zvese zvapera kugadzirirhwa. Uyai ku mabiko e mucato.”’ 5 Asi aya ainga akapikwa akaramba, umwe wakaenda ku munda wake, umweni wakaenda ku bhizi rake; 6 uye amweni akhona akabata aranda ake, oaponda uye akaauraya.
7 “Mambo wakanyangadzwa maningi, wakatuma masurudado ake, ouraya aya akauraya aranda ake uye opisa mathaundi awo. 8 Pedzepo, iyena wakati ku aranda ake: ‘Zviro zvese zve mabiko e mucato zvapera kugadzirirhwa, asi anhu ainga apikwa ainga asikazi kusisira. 9 Hino, endai ku makwanza anobuda mu thaundi, mupike munhu wese wamunoona kuti auye ku mabiko e mucato.’ 10 Hino, aranda ake akaenda mu makwanza, opika anhu ese aakaona, akashata no akanaka; uye nyumba yo mabiko e mucato yakadzara no anhu ainga apikwa.
11 “Mambo paakapinda kuti anyase kuona anhu ainga apikwa, wakaona mwanarume umweni wainga asikazi kupfeka macira e mucato. 12 Hino, iyena wakamubvunzisa kuti: ‘Shamwari, wapinda kudini muno usina macira e mucato?’ Iyena wakakonerhwa zvekureketa. 13 Pedzepo, mambo wakabvunza aseenzi ake kuti: ‘Musungei moko no mirenje dzake momukhandira kunza ku cidima. Ikona ndiko kaacacema no kurumanisa mazino ake.’
14 “Ngokuti kuno akawanda akapikwa, asi akasanangurhwa ashoma.”
15 Afarisi akaenda uye akapangana kuti amubate pa masoko ake. 16 Hino, akatuma afundi awo kaari, pamwepo no ateeri a Herodhi, eciti: “Mufundisi, tinozviziya kuti munoreketa zvirokwazvo uye munofundisa zvirokwazvo ngezva Mwari, uye amupsvaki kupfadza anhu, ngokuti amuoni zvakaita munhu nge cekunza. 17 Hino tibvunzei, munoonawo kudini? Zvinotenderhwa* here kana kuti haiwa kuripa musoho kuna Sezari?” 18 Asi, eciziya ngezve kushata ke mwoyo yawo, Djesu akati: “Acengedzi, ngei munoda kundiedza? 19 Ndipangidzei mare yokuripa nayo musoho.” Akamuunzisira dhenariyo* rimwe. 20 Iyena akaabvunzisa kuti: “Mufanikiso no masoko akatarhwa apa nge zvaani?” 21 Awona akati: “Nge zva Sezari.” Iyena akaabvunza kuti: “Hino, pasai zva Sezari kuna Sezari, asi zviro zva Mwari kuna Mwari.” 22 Paakazwa izvi, akashamiswa, akamusiya oenda.
23 Pa zuwa irona Asadhusi, anhu anobhuya kuti akuna rumuko, akauya omubvunzisa kuti: 24 “Mufundisi, Mozesi wakati: ‘Kana mwanarume akafa asina ana, hama yake inodikana kuwaka mufirhwakadziwo, kuti abarire hama yake ana.’ 25 Cinoitika nge cekuti, pakati pedu painga pano hama dzinokwana 7. Wekutanga wakawaka, ofa asina ana, akasiira hama yake mukadzi wake. 26 Zvimwezvoo zvakaitika no wecipiri, no wecitatu, dakara ese 7 apera kufa. 27 Pakupedzesera, mwanakadziwo wakazofawo. 28 Hino pa rumuko, acagara mukadzi wani pa anomwe aya? Ngokuti ese akambogara amuna ake.”
29 Djesu akaadaira kuti: “Imwimwi makapsveteka, ngokuti amuzii Matarhwa kana simba ra Mwari; 30 ngokuti pa rumuko anarume aawaki uye anakadzi aawakwi, asi anonga akaita hinga ngirozi dze kudenga. 31 Panocokuita no kumutswa ke akafa, amuzi kuerenga here zvakabhuiwa na Mwari kamuri, eciti: 32 ‘Inini ndiri Mwari wa Abrahamu, Mwari wa Izaki, uye Mwari wa Djakobo’? Iyena ndi Mwari we apenyu, haiwa we akafa.” 33 Anhu paakazwa izvi, akashamisika no kufundisa kake.
34 Afarisi paakazwa kuti iyena akaita kuti Asadhusi atame cokureketa, akabatana oita cikwata cimwe. 35 Umwe wawo wainyasa kuziya Mutemo, wakamuedza ngo kumubvunzisa kuti: 36 “Mufundisi, ndiupi Mutemo mukuru pa Mitemo yese?” 37 Djesu akati kaari: “‘Ida Djehovha* Mwari wako no mwoyo wako wese no upenyu* wako wese no ndangariro dzako dzese.’ 38 Uu ndiwo mutemo mukuru pa yese uye wekutanga. 39 Wecipiri wakada kuezana na uu, unoti: ‘Ida mudoni wako hinga mushobo waunodziita.’ 40 Pa mitemo ii miiri, ndipo panobuda mutemo wese uye zvakatarhwa no aphorofita.”
41 Afarisi paainga akaungana, Djesu akaabvunzisa kuti 42 “Munorangarirei ngezva Kristu? Iyena ndi mwana waani?” Awona akadaira kuti: “Wa Dhavhidhi.” 43 Iyena akaabvunzisa kuti: “Hino, ngei Dhavhidhi ecifemerhwa na Mwari akamudainza kuti Tenzi, paakati, 44 ‘Djehovha* akati kuna Tenzi wangu: “Gara ku moko kwawo wangu dakara ndakanda azondi ako pasi pe tsoka dzako”’? 45 Hino, kana Dhavhidhi ecimudainza kuti Tenzi, zvingaitika kudini kuti iyena agare mwana wake?” 46 Apana akakwanisa kumudaira, uye kubvira pa zuwa irona kuenda mberi, apana wakazogarazve no ushingi we kumuita mibvunzo.