Akatarhwa na Ruka
13 Pa nguwa iyona, anhu anganani ainga aripo akamubvunza ngezve Agarireya ainga auraiwa na Pirato uye iyena wakavhenganidza ngazi yawo no zvibairo zvawo. 2 Djesu akaadaira eciti: “Munorangarira kuti Agarireya awona ainga ari ashaishi kupinda Agarireya amweni ese ngokuti akasongana no dambudziko iri here? 3 Inini ndinomubvunzai kuti haiwa, asi kana mukatama kucinyuka zvitema zvenyu, mwese imwimwi mucatsakatiswa ngo mushobo umwewo. 4 Uye panocokuita no anhu aya 18 akambwererhwa no nyumba yakareba yo ku Sirowe uye ofirepo, munorangarira kuti awona ainga ari ashaishi kudarika anhu ese anogara mu Djerusarema here? 5 Ndinomubvunzai kuti haiwa, asi kana mukatama kucinyuka zvitema zvenyu, mwese mucatsakatiswa hingana awona.”
6 Hino akaaitira muezaniso unoti: “Mwanarume umweni wainga uno muonde wakasimwa mu munda we uvha, uye mwanarumewo wakaenda koopsvaka maonde uye aazi kugumira kunyazi mucero umwe. 7 Iyena wakabvunza mwanarume waisenza mu munda we uvha kuti: ‘Ndaano makore matatu ndeciuya koopsvaka maonde, asi andiripi kuaona. Uteme! Ngokuti uwona uri kupamba mbuto nyore.’ 8 Mwanarumewo wakamudaira kuti: ‘Tenzi, usiyeizve ke gore rimwe, ndicacera mu matii awo uye ndoukanda ndimo. 9 Kana uwona ukazobara micero, zvatonaka; asi kana ukatama kubara, mungazoutema henyu.’”
10 Pa Sabudu rimweni, iyena ainga ecifundisa mu sinagoga. 11 Uye mainga muno mwanakadzi umweni wainga ano makore 18 ano mwiya waiita kuti akonerhwe simba; iyena waihamba akakotama uye wainga asikakwanisi kuima zvakanaka. 12 Djesu paakamuona, akamubvunza kuti: “Yaya, nhenda yenyu yapera.” 13 Djesu akakanda nyara dzake paari, uye ciriporipoco mwanakadziwo wakaima zvakanaka, wotanga kukudza Mwari. 14 Ngokudaro, mutungamiriri we sinagoga paakazviona, wakanyangadzwa ngokuti Djesu ainga aporesa munhu mu Sabudu, uye wakati ku anhu: “Pano mazuwa 6 anodikana kuizwa basa; mungauya mu mazuwa awona, kuti muporeswe, haiwa mu Sabudu.” 15 Asi Tenzi akamudaira eciti: “Acengedzi, kodi umwe na umwe wenyu aasudzunuri n’ombe yake kana dhongi rake mu Sabudu, woenda koozvimwisa mvura? 16 Hino mwanakadzi uu, mwana wa Abrahamu, wekuti wainga akasungwa na Sathani ke makore anokwana 18, aazi kusisira here kusudzunurhwa pa zuwa ro Sabudu?” 17 Iyena paakabhuya izvi, azondi ake ese akapsveruka, asi anhu akatanga kupfara no zviro zvese zvinoshamisa zvaiizwa na Djesu.
18 Ngokudaro, iyena akatunhudzira eciti: “Umambo wa Mwari wakaezana nei, uye ndingauezanisa nei? 19 Iwona wakaezana no tsangu yo mostardha yakatorhwa no munhu umweni woisima mu munda make, tsanguyo yakamera, yogara muti mukuru, uye shiri dze kudenga dzakaita masaki adzo pa nhai dzawo.”
20 Iyena akatizve: “Umambo wa Mwari ndingauezanisa nei? 21 Wakaezana no mbiriso yakatorhwa no mwanakadzi umweni, woivhenganidza no mipimo mitatu mikuru* yo ufu, dakara mukanyiwa wese wafufuma.”
22 Uye iyena akahamba mu thaundi no thaundi uye mutanha no mutanha, ecifundisa paainga ari mu gwanza ecienda ku Djerusarema. 23 Hino, mwanarume umweni wakamubvunzisa kuti: “Tenzi, acaponeswa ashoma kani?” Iyena akaabvunza kuti: 24 “Nyasai kupeta masimba kuti mupinde no pamusuwo mudoko, ngokuti ndinomubvunzai kuti, ajinji acapsvaka kupinda napo asi aazokwanisi. 25 Mumasure mekuti muridzi we nyumba wamuka wofunga musuwo, imwimwi mucagara ngo dii ro kunza mecigogodza musuwo uye meciti: ‘Tenzi, tifungurireiwo musuwo.’ Asi iyena acamudairai kuti: ‘Andikuzii kamuri kubva.’ 26 Hino imwimwi mucatanga kubhuya kuti: ‘Takarhya no kumwa pamberi penyu, uye imwimwi makafundisa mu makwanza edu makuru.’ 27 Asi iyena acamubvunzai kuti: ‘Andikuzii kamuri kubva. Budai pamberi pangu, mwese imwimwi munoita zviro zvakashata!’ 28 Ikona ndiko kamucacema, mecirumanisa mazino enyu, pamucaona Abrahamu, Izaki, Djakobo, no aphorofita ese mu Umambo wa Mwari, asi imwimwi mokhandirhwa kunza. 29 Uyezve, anhu e kumabvazuwa no kumadokera, e katemaidumba no kakutsi, acauya ogara pa meza mu Umambo wa Mwari. 30 Purutanai! Kuno okupedzesera anozogara okutanga, uye kuno okutanga anozogara okupedzesera.”
31 Pa nguwa iyona kamare Afarisi anganani akamukhwederera uye omubvunza kuti: “Buda muno uende, ngokuti Herodhi anoda kukuuraya.” 32 Uye iyena akati kaari: “Endai koobvunza imbwa iya yo mushango kuti, nyamasi no mangwana ndiri kudzingira madhimoni no kuporesa anhu, uye pa zuwa rocitatu ndinonga ndapedza.’ 33 Asi ndinodikana kurumbwa ndecizviita nyamasi, mangwana, uye hwedza, ngokuti azvitenderhwi kuti muphorofita auraiwe kunza ke Djerusarema. 34 Djerusarema, Djerusarema, rinouraya aphorofita no kufura no mapuwe aya anotumwa! Ndakaedza kangana kuunganidza ana ako hingana kuunganidza kunoita huku zvitiyo pasi pe mabaphiro ayo! Asi imwimwi makaramba. 35 Onai! Nyumba yenyu inozoramwiwa na Mwari. Inini ndinomubvunzai kuti imwimwi amucazondionizve, dakara mabhuya kuti: ‘Akakomborerhwa munhu anouya mu zina ra Djehovha!’”*