Djoshuwa
23 Mumasure me nguwa yakareba mekuti Djehovha azorodza Aisraeri ku azondi awo ese ainga akaatenderedza, pa nguwa yekuti Djoshuwa wainga acembera, 2 Djoshuwa wakadainza Israeri yese, akuru, misoro ye mhuri, atongi, no atungamiriri, uye wakaabvunza kuti: “Inini ndacembera maningi. 3 Uye imwimwi kamare makaona zvese zvakaizwa na Djehovha Mwari wenyu, ku madzinza ese aya nge ndaa yenyu, ngokuti Djehovha Mwari wenyu, ndiye akamurhwirai. 4 Onai, ndeciseenzesa mudjenya, ndakamupasai* nyika ye madzinza ainga asara kuti igare nhaka yenyu, uye nyika ye madzinza amweni ese andakatsakatisa, kubvira ku Djorodhani dakara ku Bahari Guru,* ku dii re kumadokero.* 5 Uye ndi Djehovha Mwari wenyu akaadzingira pamberi penyu, iyena akaadzingira nge ndaa yenyu, uye imwimwi makatora nyika dzawo, hinga zvainga zvakapikirhwa na Djehovha Mwari wenyu.
6 “Zvino pangidzai ushingi wakakura kuti muzwire uye muteerere zvese zvakatarhwa mu bhuku re Mutemo wa Mozesi musikapauki pazviri, mecienda ku moko kwawo kana ku moko boshwe, 7 musikabatani no madzinza amweni asara pakati penyu. Amudikani kunyazi kubhuya zina re anamwari awo, kana kuita mhiko mu mazina awo uye amudikani kuaseenzera kana kuhwarara pamberi pawo. 8 Asi rumbwai makagondeka kuna Djehovha Mwari wenyu, hinga zvamurikuita dakara nyamasi. 9 Ngokuti Djehovha acadzingira pamberi penyu madzinza akakura uye akabamba, ngokuti dakara nyamasi apana kunyazi munhu umwe wakakwanisa kumukundai. 10 Mwanarume umwe wenyu ucadzingira anarume 1000, ngokuti Djehovha Mwari wenyu, anonga ecimurhwirai, hingana zvaakagondesa. 11 Ndiyo ndaa, rumbwai makangwarira* nguwa dzese musikasii kuda Djehovha Mwari wenyu.
12 “Asi kana imwimwi mukapauka uye mobatana no madzinza asara pakati penyu, moita citenderano ce kuwakana nawo uye mobatana nawo uye awona obatana na imwimwi, 13 garai makaziya kuti Djehovha Mwari wenyu, aazorumbwi ecimudzingirirai anhu aya. Awona acagara murau uye ciro cinocengedza kamuri, mushamu uno zviro zvinobaya ku misana yenyu uye minzwa mu madziso enyu dakara imwimwi matsakatiswa pa nyika ii yakanaka yamapaswa na Djehovha Mwari wenyu.
14 “Onai, inini ndaakuda kufa,* uye imwimwi munonyasa kuziya no mwoyo wenyu wese uye no mwiya* wenyu wese kuti apana kunyazi soko rimwe haro pa zvipikirhwa zvese zva Djehovha Mwari wenyu zvisikazi kuitika. Zvese zvakadzadzika kamuri. Apana kunyazi cimwe cisikazi kuitika. 15 Asi hinga kudzadzika ke zviro zvese zvakanaka zvakagondeswa na Djehovha Mwari wenyu, Djehovha acaunzisawo kamuri matambudziko ese aakamugondesai* uye acamutsakatisai pa nyika ino yakanaka yamapaswa na Djehovha Mwari wenyu. 16 Kana imwimwi mukatama kuzwira citenderano ca Djehovha Mwari wenyu, caakamupasai kuti mucizwire, moseenzera anamwari amweni uye mohwarara pamberi pawo, hino shungu dza Djehovha dzicauya kamuri uye imwimwi mucatsakatika nokukasika pa nyika ino yakanaka yaamupasai.”