Akorinti Wekutanga
16 Panocokuita no kuunganidza musengo-musengo we zvipo zve kupasa acena, mungakwanisa kuteedzera nhungamiriro dzandakapasa ungano dze ku Garatiya. 2 Pa zuwa rokutanga re sumana imwe na imwe, umwe na umwe wenyu unodikana kukanda ciro pa dii maererano no zvaanazvo, kuitira kuti musengo-musengo usazotange kuizwa kana ndikagumeyo. 3 Asi pandicazoguma ikona, ndicatuma anarume amucatendera mu tsamba yenyu kuti akagondeka kuitira kuti aendese zvipo zvenyu zve unaki ku Djerusarema. 4 Asi kana zveciita kuti inini ndiendewo nawo ikona, ndicaenda nawo.
5 Asi ndicamuvhakacirai pandinonga ndoobva ku Masedhoniya, ngokuti ndicapinda no ku Masedhoniya; 6 pamweni ndicatogareyo nguwa yakareba kana kutopedza nguwa ye kutonhora ndinemwi, kuitira kuti mumasure mazvo mozondiperekedza kandicaenda. 7 Ngokuti zvino andidi kugara na imwimwi ke nguwa doko basi, asi ndiri kuetsera kugara na imwimwi ke nguwa yakareba, kana Djehovha* akatendera. 8 Asi ndicarumbwa ndiri mu Efeso dakara pa Mutambo we Pentekosti, 9 ngokuti ndakafunungurirhwa musuwo wakakura we basa, asi azondi akawanda maningi.
10 Kana Timoti akaguma ikona, musaite kuti athye ciro cipi haco paanonga anemwi, ngokuti uri kuita basa ra Djehovha,* hinga zvandiri kuitawo. 11 Hino, musatendere kuti munhu upi hake amudheerere. Asi itai kuti aenderere mberi no rhwendo rake mu runyararo kuti auye kandiri, ngokuti inini pamwepo no hama dzimweni takamuetsera.
12 Ngezve Aporo hama yedu inodiwa, ndakamukohomedzesa maningi kuti auye kamuri pamwepo no hama dzimweni. Iyena aana urongwa we kuuya ikona zvino, asi ucauyeyo kana akaona mukana.
13 Rumbwai makamuka, garai makabamba mu kutenda, rumbwai makashinga,* garai no simba. 14 Zvese zvamunoita zviitei no rudo.
15 Hama, ndinomukohomedzesai ndeciti: Munozviziya kuti e panyumba pa Estefana ndiwona akatanga kugara atendi mu Akaya uye kuti akadzipira kuseenzera acena. 16 Hino rumbwai mecidzikanda pasi pe anhu akadai uye po ese anoita basa iri eciseenza no simba. 17 Ndinopfara maningi ngokuti Estefana, Fortunato na Akaiko ari kuno, ngokuti awona akandibetsera maningi pamainga musiripopi. 18 Ngokuti awona akapfadza mwoyo wangu no wenyu. Hino, reremedzai anarume akadaro.
19 Ungano dze ku Aziya dziri kumutambisai. Akira na Priska pamwepo no ungano iri panyumba pawo iri kumutambisai no mwoyo wese muna Tenzi. 20 Hama dzese dziri kumutambisai. Cungamidzanai no mwoyo wese.*
21 Mucungamidzo wangu wandiri kutara ngo nyara dzangu inini Pauro, ndi uu:
22 Kana munhu asikadi Tenzi, ngaatukwe. Uyai Tenzi wedu! 23 Nyasha dza Tenzi wedu Djesu ngadzigare na imwimwi. 24 Rudo rangu ngarigare na imwimwi mwese mu rubatano na Kristu Djesu.