Djoshuwa
7 Asi Aisraeri aazi kutendeka panocokuita no zvainga zvakatongerhwa kutsakatiswa,* ngokuti Akani mwana wa Kami, mwana wa Zabhidhi, mwana wa Zera we dzinza ra Djudha, wakatora zviro zvinganani zvainga zvakatongerhwa kutsakatiswa. Nge ndaa yazvo, shungu dza Djehovha dzakauira Aisraeri.
2 Hino Djoshuwa wakatuma anarume e ku Djeriko kuti aende ku Ai, iri dhuze no Bheti-avheni nge kumabvazuwa ke Bheteri, uye akaabvunza kuti: “Endai uye vhevhai nyika.” Hino anarumewo akaenda uye akavhevha nyika yo Ai. 3 Paakahwirira kuna Djoshuwa, akamubvunza kuti: “Azvidikani hazvo kuti anhu ese aende. Anarume 2000 kana 3000 anokwana kuti akunde anhu e ku Ai. Musarembese anhu ese nge kuatuma kuti aende, ngokuti ikona akuna anhu akawanda.”
4 Ngokudaro, anarume anokwana 3000 akaenda ikona, asi awona akatiza anarume e ku nyika yo Ai. 5 Anarume e ku Ai akauraya anarume anokwana kuita 36; akateera Aisraeri kubvira ku dii re kunza re musuwo dakara ku Sebharimu* eciauraya pa muterero. Nge ndaa yazvo, mu ndani me anhu makavhunduka* nge kuthya.
6 Ngokudaro, Djoshuwa wakamwesa macira ake uye wakahwarara akaringira pasi pamberi pe Areka ya Djehovha dakara usiku, uye iyena no akuru e Israeri akakanda mavhu mu musoro mawo. 7 Djoshuwa wakati: “Cangamire Tenzi Djehovha, ngei maita kuti anhu aya abire Djorodhani? Maita izvona kuti mutikande mu nyara dze Aamori, kuitira kuti titsakatiswe here? Kudai takagutsikana hedu nge kugara ku dii rimweni* re Djorodhani! 8 Ndirekererei Djehovha, ndingabhuyeizve pa nguwa ino yekuti Aisraeri atiza* azondi awo? 9 Kana Akanani no agari ese e nyika ino akazwa ngezve zviro zvaitika, awona acatitenderedza uye acafudza zina redu pa nyika, uye imwimwi mucaitei kuitira zina renyu guru?”
10 Djehovha akadaira Djoshuwa, eciti: “Purumuka! Ngei iwewe wakahwarara weciringira pasi? 11 Aisraeri aita citema. Awona aazi kurumbwa akatendeka pa citenderano candakaabvuza kuti acengete. Akatora zviro zvinganani zvainga zvakatongerhwa kutsakatiswa,* akazviba uye akazvikanda mucifise-fise pakati pe zviro zvawo kamare. 12 Nge ndaa yazvo, Aisraeri aazokwanisi kurumbwa ecirhwisana no azondi awo. Awona acatendeuka kuti atize azondi awo, ngokuti agara ciro cakatongerhwa kutsakatiswa.* Andicazogarizve na imwimwi dakara mabvisa pakati penyu ciro cakatongerhwa kutsakatiswa. 13 Enda uye cenesa anhu! Abvunze kuti: ‘Dzicenesei kuitira mangwana, ngokuti izvi ndizvo zvinobhuiwa na Djehovha Mwari we Israeri: “Pano ciro cakatongerhwa kutsakatiswa* pakati penyu, imwi Aisraeri. Imwimwi amuzokwanisi kurumbwa mecirhwisana no azondi enyu dakara mabvisa pakati penyu ciro cakatongerhwa kutsakatiswa. 14 Imwimwi munodikana kudzipangidza comacibesi, dzinza rimwe na rimwe; dzinza ricasanangurhwa na Djehovha ricaenda mberi, mhuri imwe na imwe; mhuri icasanangurhwa na Djehovha icaenda mberi, nyumba imwe na imwe; nyumba icasanangurhwa na Djehovha icaenda mberi, mwanarume umwe na umwe. 15 Uye uya ucabathwa ano ciro cakatongerhwa kutsakatiswa* acapiswa pa muriro, iyena pamwepo no zviro zvake zvese, ngokuti aazi kuteerera citenderano ca Djehovha uye waita zviro zvinopsverusa pakati pe Israeri.”’”
16 Hino Djoshuwa wakamuka comacibesi uye wakaita kuti Aisraeri adzipangidze, dzinza rimwe na rimwe, uye dzinza ra Djudha rakasanangurhwa. 17 Iyena wakaita kuti mhuri ya Djudha iuye mberi uye mhuri ya Zera yakasanangurhwa; mumasure mazvo wakaita kuti e mu mhuri ya Zera auye mberi, mwanarume umwe na umwe, uye Zabhidhi wakasanangurhwa. 18 Pakupedzesera, wakaita kuti auye mberi ese e mu mhuri ya Zabhidhi, mwanarume umwe na umwe, uye Akani mwana wa Kami, mwana wa Zabhidhi, mwana wa Zera, we dzinza ra Djudha, wakasanangurhwa. 19 Hino Djoshuwa wakabvunza Akani kuti: “Mwana wangu, ndapota, kudza Djehovha Mwari we Israeri, uye pupura kaari. Ndapota, ndibvunze zvawaita. Usandifisire ciro.”
20 Akani wakabvunza Djoshuwa kuti: “Zvezvirokwazvo, ndini ndakashaishira Djehovha Mwari we Israeri, uye zvandakaita ndi izvi: 21 Pandakaona pakati pe zviro zvaidikana kutsakatiswa djira rakarungama rinokosha re Sineari, mashekeri* anokwana 200 e prata uye mashekeri 50 e oro, ndakazvisirira uye ndozvitora. Izvona zvakaigwa mu tenda rangu, zvakacererhwa pasi uye mare iri ngo pasi.”
22 Djoshuwa wakatuma nokukasika anarume anganani, uye awona akaenda ecigogoma dakara ku tenda; mu tendemo mainga makaigwa djira no mare ngo pasi. 23 Ngokudaro, awona akatora zviro zvese zvainga zviri mu tenda uye akaenda nazvo kuna Djoshuwa no Aisraeri ese uye akazvikanda pamberi pa Djehovha. 24 Hino Djoshuwa no Aisraeri ese akabata Akani mwana wa Zera, prata, djira rakanaka, oro, ana ake e anarume, ana ake e anakadzi, n’ombe dzake, madhongi ake, tenda rake, no zvese zvainga zviri zvake, uye akaenda nawo ku Bani re Akori. 25 Djoshuwa wakati: “Ngei iwewe watiunzira dambudziko?* Nyamasi Djehovha acakuunzira dambudziko.” Hino Aisraeri ese akamufura no mapuwe; pedzepo akaapisa no muriro. Ngokudaro, ese akafurhwa no mapuwe. 26 Uye akamutsa murhwi wakakura we mapuwe pamusoro pake wekuti uciriyo dakara nyamasi. Mumasure mazvo, shungu dza Djehovha dzakathurudzika. Ndiyo ndaa, mbuto iyona inodainzwa kuti Bani ro Akori* dakara nyamasi.