Akorinti Wecipiri
2 Ngokuti inini ndasanangura kutama kumutsukwarisai pandicazouyazve koomuvhakacirai. 2 Ngokuti kana ndikamutsukwarisai, ndiani acazoita kuti ndipfare, asiripi imwimwi andinonga ndatsukwarisa? 3 Ndakatara zvandakatara, kuitira kuti pandinozouyeyo, nditame kutsukwariswa no aya anodikana kundipfadza; ngokuti ndino rugondo rekuti, zviro zvinoita kuti ndipfare zvinomupfadzaiwo. 4 Ngokuti ndakamutarirai ndecitambudzika maningi uye ndecirhwadziwa mu mwoyo, ndino misodzi yakawanda maningi, haiwa kuti ndimurhwadzisei, asi kuti muziye madire andinomuitai.
5 Kana pano munhu wakaita kuti pagare no kutsukwara, aazi kutsukwarisa inini basi, asi wakatsukwarisawo imwimwi mwese. Inini andidi hangu kuseenzesa masoko anorhwadza. 6 Kusumururhwa kaakaizwa no anhu akawanda kunokwana ku munhuwo; 7 asi pari zvino imwimwi munodikana kumuzwira usisi momurekerera no mwoyo wese uye momunyaradza, kuitira kuti asanyiswe ngo kutsukwara kakakura. 8 Hino ndinomukohomedzesai kuti mumupangidzirezve kuti munomuda. 9 Ndizvona zvakandiitisa kuti ndimutarirei: Kuti ndione kuti munopangidza kuti munozwira mu zviro zvese. 10 Kana imwimwi mukarekerera munhu pa zviro zvaanonga aita, inini ndinomurekererawo. Zvezvirokwazvo, zvese zvandarekerera (kana pano zviro zvandaidikana kurekerera) ndakazviitira kuti ndibetsere imwimwi pa maonero a Kristu, 11 kuitira kuti tisanyiswe* na Sathani, ngokuti mazano ake tinoaziya.
12 Pandakaguma mu Troadhe kuti ndiziise masoko akanaka ngezva Kristu uye pandakafunungurirhwa musuwo mu basa ra Tenzi, 13 mwoyo wangu wakanetseka maningi ngokuti andizi kuona Tito hama yangu. Hino ndakaeneka hama dzo kweneyo, ndoenda ku Masedhoniya.
14 Asi tinotenda Mwari, ngokuti iyena anotitungamirira hinga masurudado ari kubva kunyisa mu hondo pamwepo na Kristu uye eciseenzesa isusu, anoita kuti kunuhwirira ke kumuziya kuzwike kwese-kwese! 15 Ngokuti kuna Mwari isusu tiri mupiro unonuhwirira wa Kristu, pakati pe aya ari kuenda kooponeswa* no pakati pe aya ari kuenda kootsakatiswa;* 16 ku okupedzesera aya tiri kunuhwa* rufu kunoendesa ku rufu, ku okutanga tiri kunuhwirira upenyu kunoendesa ku upenyu. Hino ndiani akanyasa kukwaniriswa pa kuita basa iri? 17 Isusu tinokwanisa, ngokuti atiripi atengesi e soko ra Mwari, hinga zvinoizwa nge akawanda, asi tinoreketa no mwoyo wese hinga anhu akatumwa na Mwari, tecizviita pamberi pa Mwari uye tiri pamwepo na Kristu.