Akatarhwa na Mateu
20 “Umambo we kudenga wakaezana no muridzi we muzi wakafumira comacibesi, woenda koopsvaka anyamutarakita kuti aseenze mu munda wake we uvha. 2 Mumasure me kupangana no anyamutarakita kuti aizoapasa dhenariyo* rimwe pa zuwa, wakaabvunza kuti aende koosenza mu munda wake we uvha. 3 Padzaikhwedera 9 dze macibesi,* iyena wakabudazve, oona amweni ainga akaima pa bazari ainga asina caaiita; 4 uye wakaabvunza kuti: ‘Endaiwo kooseenza mu munda we uvha, uye ndicamupasai maererano no zvamasenza.’ 5 Hino, awona akaenda. Iyena wakabudazve padzaikhwedera 12 dze masikati* uye padzaikhwedera 15 dze masikati,* woitazve zvimwezvo. 6 Pakupedzesera, iyena wakabudazve padzaiita 17 dze masikati,* uye wakagumira anhu amweni akaima, woabvunzisa kuti: ‘Magarirei pano zuwa rese musikaiti ciro?’ 7 Awona akamudaira kuti: ‘Apana watitorawo.’ Iyena wakati kaari: ‘Endaiwo ku munda we uvha.’
8 “Zuwa parakadoka, muridzi we munda wakabvunza muonereri wake we munda kuti: ‘Dainza aseenzi uapase mare yawo, ucatanga no akapedzesera kuuya, wozopedzesera no atanga kuuya.’ 9 Anarume akatanga kuseenza panguwa 17 dze masikati paakaguma, umwe na umwe wawo wakatambira dhenariyo* rimwe. 10 Hino, anarume akatanga kuseenza paakaguma, akarangarira kuti aizotambira mare yakawanda, asi umwe na umwe wawo wakatambirawo dhenariyo* rimwe. 11 Mumasure mekutambira, awona akatanga kugurungutira muridzi we munda 12 uye akati: ‘Anarume aya apedzesera kuuya aseenza nguwa imwe basi; asi imwimwi maaezanisa na isusu tatakatira teciseenza uye tecipsva no zuwa!’ 13 Asi iyena wakati ku umwe wawo: ‘Shamwari, andiripi kukudzvinyirira. Auzi kutenderana na inini kuti ndaizokupasa dhenariyo* rimwe? 14 Tora mare yako uende. Inini ndiri kuda kupasa wekupedzesera uu mare imweyo no yandakupasa. 15 Anditenderhwi here kuita zvandinoda no zviro zvangu? Kana kuti wagara no bibvu ngokuti ndaaitira zvakanaka?’ 16 Ngokudaro, okupedzesera anozogara okutanga, uye okutanga anozogara okupedzesera.”
17 Paaikwidza kuenda ku Djerusarema, Djesu akadainza afundi ake 12 pawo oga mu gwanza, oabvunza kuti: 18 “Izwai! Tiri kukwidza kuenda ku Djerusarema, uye Mwana we munhu acakandwa mu nyara dzo atungamiriri e apristi no atari. Uye awona acamutongera rufu. 19 Anozomukanda mu nyara dze anhu e madzinza amweni kuti amushore, amuponde uye amuuraye pa mutanda; asi iyena acamutswa pa zuwa rocitatu.”
20 Pedzepo, mai e ana a Zebhedheu akauya paari no ana awo, omugodamira kuti amuite cikumbiro. 21 Djesu akaabvunzisa kuti: “Munodei?” Awona akadaira kuti: “Pamunozonga maa mu Umambo wenyu, itai kuti ana angu aya airi agare pamwepo na imwimwi. Umwe ku moko kwawo, umweni ku moko boshwe.” 22 Djesu akaadaira eciti: “Amuzvizii zvamuri kukumbira. Munokwanisa here kumwira mu kopo yandaakuda kumwira?” Awona akadaira kuti: “Tinokwanisa.” 23 Iyena akaabvunza kuti: “Izvirokwazvo kuti mucamwiradi mu kopo yangu, asi kusanangura kuti ndiani acagara ku moko wangu kwawo kana we boshwe, andinipi ndinosanangura, mbuto idzona nge dze aya akadzigadzirirhwa na Baba angu.”
24 Afundi amweni 10 paakazvizwa, akanyangadzirhwa Tiyago na Juau. 25 Djesu akaadainza, oabvunza kuti: “Imwimwi munozviziya kuti atongi e madzinza amweni anodzvinyirira anhu awo uye akuru awo anoatonga. 26 Izvi azvidikani kuitika kudaro pakati penyu; asi uya anoda kugara mukuru pakati penyu, anodikana kugara museenzi wenyu, 27 uye uya anoda kugara wekutanga pakati penyu, ngaagare muranda wenyu. 28 Zvimwezvoo, Mwana we munhu aazi kuuya kuzoseenzerhwa, asi kuzoseenzera no kupasa upenyu* wake kuti asudzunure ajinji.”
29 Paaibuda mu Djeriko, anhu akawanda akamuteera. 30 Hino, mapofu mairi aigara pamuceto pe gwanza, akazwa kuti Djesu aidarika ndipona, uye akakhuwa eciti: “Tenzi, Mwana wa Dhavhidhi, tizwireiwo usisi!” 31 Asi anhu akaasumurura, eciabvunza kuti anyarare; asi awona akatobambirira kukhuwa eciti: “Tenzi, Mwana wa Dhavhidhi, tizwireiwo usisi!” 32 Hino Djesu akaima, oadainza, oabvunzisa kuti: “Munoda kuti ndimuitirei?” 33 Mapofu aya akati: “Tenzi, itai kuti tione.” 34 Djesu akaazwira usisi uye akapsvasa madziso awo. Ciriporipoco, awona akatanga kuona uye akamuteera.