Akatarhwa na Marko
1 Kutanga ke masoko akanaka* akaringana na Djesu Kristu, Mwana wa Mwari: 2 Hinga zvakatarhwa no muphorofita Isaya kuti: “(Ona! Ndiri kutuma mutumwa wangu, unozogadzirira gwanza rako.) 3 Kuno izwi riri kuzwika ku renje* reciti: ‘Gadzirirai gwanza ra Djehovha!* Rungamisai makwanza ake.’” 4 Juau Mubhabhatidzi wainga ari ku renje, eciparidza ngezve rubhabhatidzo hinga cipangidzo ce kucinyuka kuti zvitema zvirekererhwe. 5 Anhu ese e mu nharaunda ye Djudhiya uye anhu aigara mu Djerusarema aienda kaari, uye awona aibhabhatidzwa* naye mu murambo we Djorodhani, ecipupura pamhene zvishaishi zvawo. 6 Juau waipfeka dehwe ro kamero rino ukuse, cihunu cake caisungwa no bhande ro dehwe, iyena wairhya makwiza no uci. 7 Iyena waiparidza eciti: “Munhu ari kuuya mumasure mangu ano simba kundidarika, uye inini andizi kusisira kuti ndikhumure masandarya ake. 8 Inini ndamubhabhatidzai no mvura, asi iyena acamubhabhatidzai no mwiya mucena.”
9 Mu mazuwa awona, Djesu akabva ku Nazareta re Garireya uye akabhabhatidzwa na Juau mu Djorodhani. 10 Paakandobuda mu mvura, iyena wakaona kudenga kecifunguka uye mwiya wa Mwari wecicita wakaita hinga njiwa, weciuya pana Djesu. 11 Uye izwi rakabuda kudenga reciti: “Iwewe uri Mwana wangu, mudisiswa; ndakupfarira.”
12 Uye ciriporipoco mwiya wa Mwari wakaendesa Djesu ku renje. 13 Ngokudaro, iyena akagara ku renje ke mazuwa 40, uye akaedzwa na Sathani. Kainga kuno zvinyama zve mushango, asi ngirozi dzaimubetsera.
14 Hino mumasure me kusungwa ka Juau, Djesu akaenda ku Garireya, eciparidza masoko akanaka a Mwari 15 eciti: “Nguwa yakwana, uye Umambo wa Mwari wakhwedera padhuze. Cinyukai zvitema zvenyu, uye tendai mumasoko akanaka.”
16 Ecihamba mu muceto me Bahari ro Garireya, Djesu akaona Simoni no munukuna wake unozwi Andreya ecikhandira maricera mu bahari, ngokuti awona ainga ari aedzi e howe. 17 Djesu akati kaari: “Nditeerei, uye ndicamuitai kuti mugare aedzi e anhu.” 18 Awona akasiya maricera ciriporipoco uye akamuteera. 19 Paakaenda mberi padoko, akaona Tiyago na Juau ana a Zebhedheu, awona ainga ari mu bharko ecigadzirisa maricera awo, 20 uye ciriporipoco iyena akaadainza. Hino awona akasiya baba awo Zebhedheu mu bharko no aseenzi awo uye akamuteera. 21 Awona akaenda ku Kafarnau.
Parakaguma zuwa re Sabudu, iyena akapinda mu sinagoga uye akatanga kufundisa. 22 Uye anhu akashamiswa no mafundisiro ake, ngokuti iyena aiafundisa zvaibva kuna Mwari, haiwa hinga zvaiizwa no atari awo. 23 Pa nguwa iyona mu sinagoga mawo mainga muno munhu wainga uno mwiya wakashata, uye iyena waikhuwa eciti: 24 “Munodei na isusu, Djesu we ku Nazareta? Mauya kuzotitsakatisa here? Ndinonyasa kuziya kuti ndimwi ani, muri Mucena wa Mwari!” 25 Asi Djesu akausumurura, eciti: “Nyarara, uye buda mu munhu uu!” 26 Mumasure me kuitisa kuti mwanarumewo ambwere pasi uye akhuwe no izwi guru, mwiya wakashata wakabuda maari. 27 Ngokudaro, ese akashamisika maningi otanga kubvunzana pacawo, eciti: “Zvinyi izvi? I fundiso ipsva! Iyena atori no simba rekudzingira mwiya yakashata, uye iyona inomuzwira.” 28 Uye masoko akaringana naye akabararika nokukasika mu nharaunda yese yo Garireya.
29 Pedzepo akabuda mu sinagoga uye oenda kumba ka Simoni na Andreya, akaendawo na Tiyago uye Juau. 30 Ambiya a Simoni ainga akawata ngokuti ainga akaferuka, uye afundi akazvibvunza Djesu ciriporipoco. 31 Iyena akaenda kaari, obata nyara yawo oamutsa. Awona akatamba, uye ambiyewo akatanga kuabikira.
32 Cemadekoni zuwa parainga radoka, anhu akamuunzisira anhu ese airhwara no ainga ano madhimoni; 33 uye anhu ese e mu thaundi ainga akaungana pa musuwo. 34 Ngokudaro akaporesa anhu akawanda airhwara nhenda dzakasiyana-siyana, uye akadzingira madhimoni akawanda, asi aazi kusiya kuti madhimoniwo arekete, ngokuti awona aimuziya kuti ndi Kristu.*
35 Cemacibesi kucakasvipa, Djesu akafumira oenda ku mbuto isina anhu, uye paakaguma akatanga kunamata. 36 Asi, Simoni no ese aainga anawo akatanga kumupsvaka. 37 Paakamuona, akamubvunza kuti: “Anhu ese ari kumupsvakai.” 38 Asi iyena akati kaari: “Ngatiende ku mbuto imweni, mu mathaundi ari padhuze kuti ndiparidzirewo ikona, ngokuti ndizvo zvandakauira.” 39 Uye iyena akaenda, eciparidzira mu masinagoga awo ku Garireya uye ecidzingira madhimoni.
40 Hino kakauya mwanarume umweni wainga uno mapere, womugodamira womudeketerera, eciti: “Tenzi, kana mecida, mungandiporesa.” 41 Paakaona izvi akamuzwira usisi, otambanudza nyara yake, omubata uye oti: “Ndinoda! Mapere ako ngaapere.” 42 Ciriporipoco mapere ake akapera, uye iyena wakatamba. 43 Hino Djesu akamubvunza kuti aende mumasure me kunyasa kumubvunza kuti: 44 “Ngwarira kuti usabvunze munhu zvandakuitira, asi enda koodzipangidza ku mupristi, wopasa cipo cakarekethwa no mutemo wa Mozesi, kuti aone kuti waporeswadi.” 45 Asi mumasure me kuenda, mwanarumewo wakatanga kuziisa anhu uye kubararisa nge zvazvo kwese-kwese, zvekuti Djesu ainga asikacakwanisi kupinda mu thaundi asikaoneki no anhu, zvekuti akarumbwa ari kunza ku mbuto dzisina anhu akawanda. Asi anhu akarumbwa eciuya kaari ecibva kwese-kwese.