Akatarhwa na Ruka
12 Paiitika izvi, zviuru zve anhu ainga akaungana zvekuti ainga ecitsikirirana, uye Djesu akatanga kubvunza afundi ake eciti: “Ngwarirai mbiriso yo Afarisi, kana kuti ucengedzi wawo. 2 Asi apana cakaigika cisikazobudiswi pamhene, uye apana cakafisika cisikazozikaniki. 3 Hino zvese zvamunoreketa mu cidima zvicazika pakadjeka, uye zvamunoreketa muciwewee mumba menyu zvicaparidzwa pamusoro pe nyumba. 4 Uyezve shamwari dzangu, ndinomubvunzai kuti, musathye anouraya mwiri asi mumasure mazvo pasinazve zvaangakwanisa kuita. 5 Asi ndicamupangidzai wamunodikana kuthya: Ithyai Uya wekuti mumasure mekuuraya, ano simba re kukhandira mu Gehena.* Honde, ndinomubvunzai kuti, ithyai Iyena. 6 Zvishiri zvishanu zvinotengeswa no mare zviiri zvisikanyanyi kukosha,* andizvopi here? Asi apana kana imwe yadzo ingakanganiwa na Mwari. 7 Asi kunyazi tsitsi riri mu musoro menyu rakaerengwa rese. Hino musathye; imwimwi munokosha maningi kudarika zvishiri zvakawanda.
8 “Ndinomubvunzai kuti, munhu wese anotendera kuti anondiziya pamberi pe anhu, Mwana we munhu acatenderawo kuti anomuziya pamberi pe ngirozi dza Mwari. 9 Asi munhu wese anondiramba pamberi pe anhu acarambwawo pamberi pe ngirozi dza Mwari. 10 Wese anobhuya masoko akashata ngezve Mwana we munhu, anozorekererhwa, asi uya anotuka mwiya mucena aazorekererhwi. 11 Paanozomuendesai pamberi pe anhu akawanda,* pamberi pe akuru-akuru e govherno, uye pamberi pe anhu ano masimba, musanetseke nge mushobo wamucareketa no zviya zvamucareketa kuti mudzidziirire, 12 ngokuti mwiya mucena ucamufundisai pa nguwa iyona kamare zvamunodikana kureketa.”
13 Hino munhu umweni wainga uri pakati pe anhu wakamubvunza kuti: “Mufundisi, bvunzai hama yangu kuti igawane na inini nhaka.” 14 Djesu akamudaira kuti: “Iwe nai, ndiani wandigadza kuti ndigare mutongi kana kuti ndigare no citenderhwa ce kukowanisa zviro pakati penyu?” 15 Hino akati kaari: “Rumbwai makamuka uye ngwarirai mushobo wese we makaro, ngokuti kunyazi kana munhu ano zvijinji, upenyu wake aubvi pa zviro zvaanazvo.” 16 Ngokudaro, akaaitira muezaniso eciti: “Munda we mupfumi umweni wakabara zvakanaka. 17 Hino iyena wakatanga kubhuya mu mwoyo make kuti: ‘Zvino ndicaitei zvandisisina mbuto ye kukandira zvirimwa zvangu?’ 18 Iyena wakati: ‘Ndicaita kudai: Ndicaphwanya miturika yangu, uye ndicawaka imweni yakakura kupinda ii, imona ndimo mandicakanda zvirimwa zvangu no zviro zvangu zvese, 19 uye wodzibvunza kuti: “Uno zviro zvakawanda zvakanaka zvawakacengeta zvinokwana makore akawanda; zorora hako, urhye, umwe, upfare.”’ 20 Asi Mwari akati kaari: ‘Iwewe wakapusa, usiku uno ucauraiwa. Hino ndiani anozosara no zviro zvawaunganidza?’ 21 Izvi ndizvo zvinoitika ku munhu anodziunganidzira upfumi asi aazi kupfuma kuna Mwari.”
22 Hino iyena akati ku afundi ake: “Ndiyo ndaa ndinomubvunzai kuti, musadzirhye mwoyo panocokuita no upenyu* wenyu kuti mucarhyei uye panocokuita no mwiri wenyu kuti mucapfekei. 23 Ngokuti upenyu* unokosha kupinda zvokurhya uye mwiri kupinda zvokupfeka. 24 Onai magunguwe: Awona aasimi mbeu kana kukorora; aana muturika kana tsapi; asi Mwari anoapasa zvokurhya. Imwimwi amukoshi kupinda shiri here? 25 Ndiani wenyu anokwanisa kutunhudzira upenyu wake padoko basi nge ndaa ye kudzirhya mwoyo? 26 Hino kana musikakwanisi kuita ciro cidoko-doko cakadai, ngei mecidzirhya mwoyo nge ndaa ye zviro zvimweni? 27 Onai makurire anoita maruwa e mushango: Awona aabati basa uye aaruki; asi ndinomubvunzai kuti, kunyazi Soromoni no mbiri yake yese, aazi kusimira hingana rimwe rawo. 28 Hino, kana Mwari ecisimidza kudai shango rekuti nyamasi riripo uye mangwana rokhandirhwa pa muriro, angakonerhwa here kunyasa kusimidza imwimwi, anhu ano kutenda kudoko? 29 Hino imai kupsvaka zvokurhya no zvokumwa, uye imai kurumbwa mecidzirhya mwoyo; 30 ngokuti madzinza amweni anogara ecipsvakisisa zviro izvi, asi Baba enyu anoziya kuti munoda zvese izvi. 31 Pane kudaro, rumbwai mecipsvaka Umambo wake, uye zviro izvi zvicatunhudzirhwa kamuri.
32 “Imwi cikwata cidoko, musathye, ngokuti Baba enyu anopfarira kumupasai Umambo. 33 Tengesai zviro zvenyu mupase mareyo arombo.* Dzigadzirirei zvibudu zvokukandira mare zvisikatsakari, uu ndiwo upfumi usikamboperi kudenga, kusina mbavha dzinokhwedera padhuze uye kusina citema-macira cinorhya. 34 Ngokuti pano upfumi wako, ndiponawo pano mwoyo wako.
35 “Garai makapfeka* uye makagadzirira uye garai no zvibani zvenyu zvakabaka, 36 garai hinga anhu anonga ecietsera tenzi wawo ecibva ku mucato, kuti paanoguma wogogodza musuwo, awona otomufungurira. 37 Anopfara aranda anogumirhwa na tenzi wawo ecirinda! Ndinomubvunzai zvirokwazvo kuti, tenziwo anozopfeka macira o kuita nawo basa kuti aaseenzere, woabvunza kuti agare pa meza uye woaseenzera. 38 Uye kana akaguma pa kurinda kecipiri,* kana kecitatu,* uye woagumira akagadzirira, arandewo anopfara! 39 Asi ziyai kuti, kudai muridzi we nyumba waiziya nguwa inoguma mbavha, wainga asikazotenderi kuti nyumba yake iphwanywe. 40 Imwimwiwo rumbwai makagadzirira, ngokuti Mwana we munhu ari kuuya pa nguwa yamusikakariri.”
41 Hino Pedru wakabvunzisa kuti: “Tenzi, muezaniso uu muri kuitira isusu basi kana kuti muri kuitira anhu ese?” 42 Uye Tenzi akati: “Zvezvirokwazvo ndiani kamare muonereri wakatendeka* uye wakangwara, acasanangurhwa na tenzi wake kuti aonerere aseenzi amweni* kuti arumbwe eciapasa zvokurhya pa nguwa kwayo? 43 Anopfara muranda iyena kana tenzi wake akamugumira eciita izvona! 44 Ndinomubvunzai zvirokwazvo kuti, iyena anozomugadza kuti aonerere zviro zvake zvese. 45 Asi kana muranda uya akareketa nge ce mu mwoyo make kuti: ‘Tenzi wangu uri kunonoka,’ uye wotanga kuponda aseenzi o anarume no aseenzi o anakadzi, ecirhya, ecimwa uye eciraradza, 46 tenzi we muranda iyena acauya pa zuwa raasikakariri uye pa nguwa yaasikazii, iyena acamuphanica maningi womukhandira mu mbuto yo anhu asikazwiri. 47 Hino muranda uya wazwisisa zvaidiwa na tenzi wake asi aazi kugadzirira no kuita zvaakumbirhwa, acapondwa maningi. 48 Asi uya asikazi kuzwisisa uye woita zvakasisira muphanico, acapondwa padoko. Zvezvirokwazvo, wese uya anopaswa zvakawanda, acakumbirhwa zvakawanda, uye uya wakapaswa ubaba kuti aonerere zvakawanda acakumbirhwa zvakawanda kudarika zviya zvaapaswa.
49 “Inini ndauya koobakidza muriro pa nyika, uye cinyi cimweni candingada kana iwona watobaka? 50 Zvezvirokwazvo, ndino rubhabhatidzo randinodikana kubhabhatidzwa naro, uye ndiri kunetseka maningi dakara rapera! 51 Muri kurangarira kuti ndaunzisa runyararo pa nyika? Ndinomubvunzai kuti haiwa, pane kudaro, ndaunzisa kuparadzana. 52 Kubvira zvino, mu nyumba imwe basi mucagara no anhu ashanu asikazwirani, atatu ecipesana no airi uye airi ecipesana no atatu. 53 Awona anonga akaparadzana, baba ecipesana no mwana, mwana no baba, mai no mwana wawo we mwanakadzi uye mwana we mwanakadzi na mai ake, nyazani na nyamwana uye nyamwana na nyazani.”
54 Iyena akatiwo ku anhu ainga aripo: “Pamunoona gore recibva kumadokera, imwimwi munoti: ‘Kuri kuuya dutu rakakura,’ uye izvona zvinoitika. 55 Pamunoona keciitika mhepo yecibva kakutsi, imwimwi munobhuya kuti: ‘Kucapisa maningi,’ uye izvona zvinoitika. 56 Acengedzi, munokwanisa kuongorora zvinonga zvakaita nyika uye kudenga, asi ngei musikakwanisi kuongorora zviri kuitika nguwa ino? 57 Ngei musikakwanisi kuziya pacenyu zviro zve unatsi? 58 Hinga muezaniso, pamunonga mecihamba mu gwanza no munhu anoda kumukesharii, petai masimba kuti mugadzirise nyaya yenyu pamunonga muri mu gwanza mecienda ku mutongi, kuitira kuti iyena atame kumukandai mu nyara dzo mutongi, mutongi womuendesai ku murindi, uye murindi womukandai mu kadheya. 59 Ndinokubvunza kuti, auzobudimo usati wapedza kuripa gaa rese.”*