Akatarhwa na Ruka
15 Arongosi ese e musoho no ashaishi aimuunganira kuti amuzwe. 2 Afarisi pamwepo no atari aigurunguta eciti: “Munhu uu anotambira ashaishi uye anorhya nawo.” 3 Hino iyena akaaitira muezaniso unoti: 4 “Ndiani wenyu wekuti kana ano mabira 100, wopsvetekerhwa no rimwe, aangasii 99 mushango woenda koopsvaka riya rakapsveteka dakara ariona? 5 Uye kana akariona, iyena anorikanda pa phewa, wopfara. 6 Uye paanoguma kumba, anodainza shamwari dzake no anyacigarisano ake woabvunza kuti: ‘Pfarai pamwepo na inini, ngokuti ndaona bira rangu rainga rapsveteka.’ 7 Ndinomubvunzai kuti, kucagarawo no mupfaro mukuru kudenga nge ndaa ye mushaishi umwe basi anocinyuka zvitema zvake kupinda anatsi 99 asina zvitema zvaanodikana kucinyuka.
8 “Kana kuti ndi mwanakadzi upi ano madrakema* gumi, wopsvetekerhwa no rimwe rawo, asikabatidzi cibani wopsvaira, wonyasa kuripsvaka dakara ariona? 9 Uye kana akariona, anodainza shamwari dzake no anyacigarisano ake, woabvunza kuti: ‘Pfarai pamwepo na inini, ngokuti ndaona drakema* rangu rainga rapsveteka.’ 10 Ndinomubvunzaiwo kuti, ngirozi dza Mwari dzinopfara maningi kana mushaishi umwe akacinyuka zvitema zvake.”
11 Hino iyena akabhuya kuti: “Mwanarume umweni wainga ano ana airi. 12 Mudoko wakhona wakati kuna baba ake: ‘Baba, ndipasei dii rangu ro nhaka.’ Awona akakoanisa ana awo zviro zvaainga anazvo. 13 Mumasure me mazuwa manganani, mwanewo wakaunganidza zviro zvake zvese, woita rhwendo, woenda ku nyika iri kure uye wakapedza upfumi wake ecirarama upenyu wakashata. 14 Paainga asisina ciro, mu nyika yese iyona makaitika nzara yakakura, uye iyena wakatanga kutambudzika. 15 Iyena wakatoguma pa kuseenzera umwe we agari e nyika iyona, uwo wakamutuma kuti aende koousha nguruwe dzake. 16 Iyena waida kurhya zvokurhya zvairhyiwa no nguruwe, asi apana waimupasa ciro.
17 “Paakazonyasa kurangarira, iyena wakati: ‘Baba angu ano anhu angana anoaseenzera ano zvokurhya zvakawandisisa, nepoo inini ndiri kufa kuno no nzara? 18 Ndicahwirira kumba ka baba angu uye ndoabvunza kuti: ‘Baba, ndashaishira Mwari uye imwimwi. 19 Andizi kusisira kudainzwazve mwana wenyu. Ndibatei henyu hinga umwe we aseenzi enyu.”’ 20 Hino iyena wakabata gwanza woenda kuna baba ake. Paainga aciri kure, baba ake akamuona uye omuzwira usisi, akagogoma omukhumbatira* uye onyasa kumupsvoda. 21 Mwanewo wakaabvunza kuti: ‘Baba, ndakashaishira Mwari uye imwimwi. Andizi kusisira kudainzwazve mwana wenyu.’ 22 Asi babewo akabvunza aseenzi awo kuti: ‘Kasikai! unzisai djira rakareba rakanakisisa, mumupfekedze, uye mupfekedzei aneri mu cikunwe cake no masandarya mu tsoka dzake. 23 Unzisaiwo kamwana ke n’ombe kakanuna, kaurayei uye ngatirhye tecipemberera, 24 ngokuti mwana wangu uu wainga wafa asi wamuka; wainga wapsveteka uye waoneka.’ Hino awona akatanga kupemberera.
25 “Mwana wake mukuru wainga ari ku munda, paakahwirira uye paainga aapadhuze no pa nyumba, wakazwa ngoma no anhu ecitamba. 26 Hino wakadainza umwe we aseenzi uye wakamubvunzisa kuti cinyi caiitika. 27 Museenziwo wakamubvunza kuti: ‘Hama yenyu yauya, uye baba enyu auraya kamwana ke n’ombe kakanuna, ngokuti amutambira no uthongo wakanaka.’ 28 Hino iyena wakanyangadzwa uye wakaramba kupinda mumba. Asi baba ake akabuda otanga kumudeketerera kuti apinde. 29 Iyena wakadaira baba ake kuti: ‘Ndakamuseenzerai ke makore akawanda hinga muranda uye andizi kumbopandukira mitemo yenyu, kunyazi zvakadaro imwimwi amuzi kumbondipasa kunyazi mbudzi imwe kuti ndiite mabiko no shamwari dzangu. 30 Asi pandoguma mwana wenyu uu wakashaisha kuseenzesa* upfumi wenyu no mahure, imwimwi mamuuraira kamwana ke n’ombe kakanuna.’ 31 Babewo akamudaira kuti: ‘Mwanangu, iwewe wakarumbwa na inini nguwa dzese, uye zviro zvese zvandinazvo nge zvako. 32 Asi isusu taidikana kuita mabiko uye kupfara, ngokuti hama yako yainga yafa asi yamuka; yainga yapsveteka asi yaoneka.’”